Nkieto wumueka bantedilanga Sara * wutuba: “Minu yiyolukanga ko beni ayi ndisi ko lufiatu mu minu veka. Diawu yibanga ko nsika bo yidi va khati batu badi nzunzu ayi lunangu. Vayi yimbanga nsika bo yidi va khati batu balembama ayi ba kikululanga. Minu yiba zabikisanga mambanza mami ayi mambu yimviokila. Bawu bakundi yinluta zolanga.”

Mambu matuba Sara mammonisa ti, befu kuba batu balembama, bankaka bankuiza tomba kuba bakundi bitu. Mvandi, kuba mutu wulembama kunkuangidikanga Yave. Diawu Kibibila kintuba: ‘Bika luvuata . . . nlembama.’ (Kolosai 3:12) Mbi binsundula kulembama? Buidi Yesu kamonisina ti wuba nlembami? Ayi buidi khadulu ayoyi yilenda tuadisila mayangi mu luzingu luitu?

Kulembama yidi khadulu yinkuizilanga kuidi mutu wuntuadisanga ndembama. Mutu wulembama wummonisanga lukinzu, wumvangilanga bankaka mamboti, ayi wunnunganga kukiyala mu thangu ba kumfuemisa.

Kuba mutu wulembama masinsundula ko kukhambu ku mangolo. Kikuma ki kingeleku basadila muingi kutubila mutu “wulembama,” kidi kikuma baba sadilanga muingi kutubila mimvalu minsitu baba tuilanga ku nzo. Mimvalu beni miba mangolo mawombo, vayi, mia kukolama miaba lembamanga mu kutumukina mfumu’awu. Kheti buawu, masinsundula ko ti miawu misiedi ko mangolo, vayi miaba nunganga kukiyala. Bobuawu mvandi, kulembama ku tusadisanga ‘kuyala’ kifu ki fika fuemanga ayi kuzingila mu ndembama na bankaka.

Ḿba ngie wulenda yindula: ‘Minu yisi ko mutu wulembama.’ Mu nza tuidi mu kuzingila, muidi batu bawombo badi makhema ayi bakhambulu mvibudulu, diawu, dilenda ba diambu diphasi kuba mutu wulembama. (Loma 7:19) Bukiedika, disi ko diambu diluelu kuba mutu wulembama, vayi Phevi Yinlongo yi Yave yinkuiza tusadisa muingi tununga kukuna khadulu ayoyi. (Ngalatia 5:22, 23) Vayi, kibila mbi didi diambu dinkinza kuvanga mangolo muingi tuba batu balembama?

Kulembama yidi khadulu yimvanganga bankaka ba tufikama. Dedi Sara tube tubila va thononu, befu tumbanga nsika voti tunzolanga kuba na batu balembama. Yesu widi kifuani kimboti mu matedi kuba mutu wulembama ayi kumonisa mamboti. (2 Kolinto 10:1) Diawu, kheti bana balezi bakhambu kunzaba buboti baba zolanga kumfikama.—Malako 10:13-16.

Kulembama didi diambu dimboti kuidi befu ayi kuidi bankaka. Befu kuba batu balembama, tualasa fika  fuemanga ko. (Zingana 16:32) Befu kuvanga mawu tualasa nyongisa ko batu tunzolanga. Befu kuba batu balembama, tuala kengidila mayindu mitu, mavanga mitu ayi tualasa vanga ko bankaka batovuka.

Yesu wuba biyeku biwombo, kheti bobo, nandi wuba mutu wulembama kuidi baboso. Batu bawombo mu bilumbu bi Yesu baba salanga beni ayi baba banga bavonga. Bawu baba tombanga khindusulu. Ḿba babaka mbombolo bo Yesu kabakamba: “Yizanu kuidi minu, . . . kibila minu yidi mutu wulembama ayi wukikululanga”!—Matai 11:28, 29.

Mbi tufueti vanga muingi tuba batu balembama buka Yesu? Ditheti, tufueti longuka diambu di Nzambi muingi tuzaba buidi Yesu kaba zingilanga na bankaka ayi mbi nandi kavanga bo kaviokila mu mambu maphasi. Bosi, tufueti vanga mangolo ma kulandakana kifuani ki Yesu mu thangu tumviokila mu mambu ma tutota. (1 Petelo 2:21) Tala mambu matatu masadisa Yesu kuba mutu wulembama.

Yesu waba kukikululanga. Yesu kasa tuba ko to ti wuba mutu “wulembama,” vayi mvandi wuba mutu waba “kukikululanga”. (Matai 11:29) Kibibila kintubila zikhadulu beni va kimueka, kibila ziawu zidi nguizani. (Efeso 4:1-3) Mu phila mbi?

Kukikulula kutu sadisanga tubika fika fuemanga mu dioso kua diambu. Dedi mu thangu batu batuba ti Yesu wuba ‘phulu yi kudia ayi yi kunua,’ buidi nandi katadila mambu amomo bamvunina? Nandi kasa fuema ko, vayi wubika batu bamona mavanga mandi mamboti, ayi wuba kamba mu ndembama “nduenga yimmonikanga buboti mu mavanga mandi.”—Matai 11:19.

Mbi wulenda vanga enati mutu wu kukembi diambu dimbi mu kibila ki mvil’aku, tsi wubutukila voti nkand’aku nyitu? Peter, nkulutu wumueka wu kimvuka ku Africa do Sul wutuba: “Minu kumona fiti mu kibila ki mambu mutu wunkaka kabe kukhamba, minu yiku yikuvusanga, ‘Boti Yesu nandi wumviokila mu mambu amama, khanu mbi kankuiza vanga?’” Nandi wubue tuba: “Minu yilonguka ti buisa fuana ko fika fuemanga mu dioso kua diambu.”

Yesu zebi ti befu tuidi batu ba masumu. Minlandikini mi Yesu baba makani mamboti, vayi, mu kuba batu ba masumu, babasa nunganga ko kuvanga to mambu masulama. Dedi, va builu butsuka ava bamvonda, Yesu wudinda lusadusu kuidi Petelo, Yakobi ayi Yoane, vayi bawu basa kunsadisa ko. Kheti bobo, nandi kasa bafuemina ko, kibila wuzaba ti bapostolo bandi baba batu ba masumu. Diawu kaba kambila: “phevi yidi ayi luzolo lumboti, vayi nyitu yidi yilebakana.” (Matai 26:40, 41)

Khomba yimueka bantedilanga Mandy, va thonono nandi waba tombanga batu bavangila mambu moso mu phila yisulama. Vayi bubu nandi wumana vanga mangolo ma kuba mutu wulembama buka Yesu Klisto. Khomba beni wutuba: “Mu kulandakana kifuani ki Yave, minu yimana vanga mangolo ma kutsikika thalu’ami mu zikhadulu zimboti zi bankaka ayi kukikinina ti befu boso tuidi batu ba masumu.” Ngie kuvisa ti bankaka badi batu ba masumu dedi bo Yesu kavangila, wala nunga kubika tsikika mayindu mu zinzimbala ziawu.

Yesu wuba lufiatu ti Yave kalenda ludika mamoso. Bo kaba va ntoto, Yesu wuvibidila mu mambu mawombo maphasi. Batu bamvueza, banlenza ayi bambula. Kheti buawu, nandi wutatamana kuba wulembama kibila “waba fiatilanga mutu wumfundisanga mu busonga.” (1 Petelo 2:23) Yesu wuzaba ti Yave wala kunkieba ayi mu thangu yifuana, wala dedikisa mambu moso makhambulu masonga kaba viokila.

Befu fika dasuka mu thangu ba tuvangila mambu makhambulu masonga, tulenda tomba kuvutudila mambi mu mambi. Buawu Kibibila kintubila: “Nganzi yi mutu yilendi vanga ko mambu masonga ma Nzambi.” (Yakobi 1:20) Kheti tuidi kibila muingi kuba mu nganzi, mu kuba batu ba masumu, tulenda vangila mambu mu phila yikhambulu fuana.

Khomba yimueka ku Alemanha bantedilanga Cathy wuba yindulanga ti ‘na khambu kukinuanina naveka, ni mutu wunkaka kalendi vanga ko mawu.’ Vayi bo katona kufiatila mu Yave, phil’andi yi kuyindudila yibaluka. Nandi wutuba: “Bubu, minu yitombanga ko thangu zioso kukinuanina minu veka, kibila yizebi ti Yave widi mu kumona mambu moso ayi mawu ma kutsadisanga kuba mutu wulembama.” Enati wumana viokila mu mambu makhambulu masonga, buna landakana kifuani ki Yesu ayi fiatila mu Yave. Mawu mala kusadisa wutatamana kuba mutu wulembama.

Yesu wutuba ti kuba batu balembama kuala tusadisa kuba mayangi. Diawu katubila: “Mayangi kuidi batu balembama.”  (Matai 5:5) Mona buidi khadulu ayoyi yilenda tusadisila mu mambu manlanda.

Kuba mutu wulembama kunsadisanga kudekula mambu va dikuela. Yaya Robert, khomba yimueka wunkalanga ku Austrália wunkikinina mawu. Nandi wutuba: “Zikhumbu ziwombo mu khambu yindula, yima kambilanga nkazi’ami mambu manlueka ntima. Ngie kutuba mambu bo widi mu nganzi, wisi ko bu kuvutukila mbusa. Ayi bo yimmana kutuba mawu, minu yaba banga beni mu kiunda, mu kumona phila mambu beni maba kunluekilanga ntima.”

“Befu boso tueti vanga zinzimbala” mu mambu tunkoluka, ayi mambu tunkoluka mu khambu yindula, malenda botula ndembama va dikuela. (Yakobi 3:2) Diawu, boti diambu mube bakasana va dikuela, kuba balembama kulenda musadisa kutatamana kuba bavumbama ayi kusola mambu munkoluka.—Zingana 17:27.

Yaya Robert tube tubila, wuvanga mangolo mawombo muingi kuba mutu wulembama ayi zebi kukiyala. Mambu mbi mayiza monika kuntuala? Naveka wutuba: “Bubu, kheti tube bakasana mambu, yimana vanga mangolo muingi kukuwa buboti bo nkazi’ami kankoluka, ayi yinkolukilanga mu phila yilembama mu khambu fika fuema. Yimmona ti kithuadi kitu va dikuela kima buelama.”

Kuba mutu wulembama kutusadisa kuzinga buboti na bankaka. Mutu wufika fuemanga kabanga ko bakundi bawombo. Vayi, kuba batu balembama kulenda tusadisa tutatamana ‘kukieba kithuadi kitu mu nzila yi ndembama.’ (Efeso 4:2, 3) Cathy, tube tubila kumbusa, wutuba: “Kuba mutu wulembama, ku kutsadisanga kuviokisa thangu yimboti na batu bankaka, kheti bankaka mu bawu basi ko zikhadulu zimboti.”

Kuba mutu wulembama kutusadisanga kuba ndembama. Kibibila kindedikisa “nduenga yi Nzambi” na kulembama ayi ndembama. (Yakobi 3:13, 17) Mutu wulembama widi “ntima wuvumbama.” (Zingana 14:30) Khomba yimueka bantedilanga Martin wuvanga beni mangolo muingi kuba mutu wulembama, nandi wutuba: “Bubu, yima luta ba mutu wumboti ayi yifika dasukanga ko, mawu ma kutsadisanga kuluta ba ndembama ayi mayangi.”

Bukiedika ti disi ko diambu diluelu kuba mutu wulembama. Khomba mueka wutuba: “Muingi kutuba kiedika, nate bubu khumbu zinkaka yimbanga beni nganzi.” Boti buawu mvaku wummuenanga, bika kuvonga, Yave wunkuiza kusadisa muingi wununga, kibila nandi wuntomba tuba batu balembama. (Yesaya 41:10; 1 Timoteo 6:11) Nandi kalenda ‘dukisa khubumunu’itu’ ayi ‘kutukindisa.’ (1 Petelo 5:10) Dedi mvuala Polo, bumviokila thangu, tuala nunga kulandakana “kulembama ayi mamboti ma Klisto.”—2 Kolinto 10:1.