DILONGI 22
Monisa ti Wumvutulanga Matondo mu Minkhayilu mi Yave Wukhambu Monanga
‘Thalu’itu yisi ko mu biuma tummonanga . . . Vayi yidi mu biuma tukhambu monanga. Kibila biuma tummonanga bidi to mu thangu yiluelo; vayi bio bikhambu monikanga biawu buela kadidila.’—2 KOLINTO 4:18.
NKUNGA 45 Mayindu ma Tsi Ntim’ami
MAMBU TUANLONGUKA *
1. Mbi Yesu katuba mu matedi kiuka ki diyilu?
BAKANA ko minkhayilu mioso Nzambi ka tuvananga tulenda mona. Minkhayilu milutidi luvalu tumimonanga ko. Mu dilongi kavanga va Mbata Mongo, Yesu wutuba ti kiuka ki diyilu kilutidi na kiuka ki nza. Diawu kabuedila mambu amama: ‘Koso kuidi kiuka kiaku, kuawu mvandi kuidi ntim’aku.’ (Matai 6:19-21) Ntim’itu wawu wulenda tuvanga kutomba biuma tunluta vuanga nkinza. Tunkutikisanga kiuka voti kimvuama ku diyilu, bo tumvanga dizina dimboti va mesu ma Nzambi voti mu kuba kikundi kifikama na Nzambi. Yesu wutuba ti vasi ko mutu, wulenda tulula kiawu.
2. (a) Dedi bummonisina 2 Kolinto 4:17, 18, mu mambu mbi mvuala Polo katuba tufueti tsikikila thalu’itu? (b) Mambu mbi tunkuiza longuka mu dilongi adidi?
2 Mvuala Polo wutuba ti tufueti ‘tsikika thal’itu . . . mu biuma tukhambu monanga.’ (Tanga 2 Kolinto 4:17, 18.) Biuma abiobi tukhambu monanga bidi lusakumunu tuala tambula mu Nza yimona. Mu dilongi adidi, tuala tubila matedi minkhayilu minna tukhambu monanga tulenda bakila ndandu—kikundi na Nzambi, nkhayilu wu nsambu, lusalusu lu phevi yinlongo, ayi lusalusu lu Yesu ayi zimbasi mu kisalu ki kusamuna. Mvandi tunkuiza tubila buidi tulenda monisina ti tumvuanga nkinza minkhayilu amiomi.
KIKUNDI NA YAVE
3. Nkhayilu mbi yilutidi tuidi tukhambu monanga, ayi mbi bi tusadisa kubaka yawu?
3 Kikundi kitu na Yave Nzambi, yawu nkhayilu yilutidi tukhambu monanga. (Minkunga 25:14) Buidi Nzambi kalenda vangila kikundi na batu ba masumu, vayi kheti bobo nandi wuntatamananga kuba wunlongo? Nandi kalenda mavanga kibila nkhayilu yi khudulu yi Yesu ‘yibotula masumu va nza.’ (Yoane 1:29) Yave wuzaba ti lukanu luandi lu kutuadisa khudulu luala salama. Diawu kavangila kikundi na batu bazinga mu thangu yikhulu ava Yesu kiza va ntoto.—Loma 3:25.
4. Banani Kibibila kintubila bazinga mu thangu yikhulu ayi baba bakundi ba Nzambi?
4 Kibibila kintubila matedi babakala bazinga mu thangu yikhulu ayi bayiza ba bakundi ba Nzambi. Wumueka mu bawu wuba Abalahami. Nandi wumonisa kiminu kingolo mu Yave. Diawu bo kafua, kuvioka 1.000 di mimvu kuntuala Yave wuyiza ntedila ‘nkundi’ami.’ (Yesaya 41:8) Mawu mammonisa ti lufua, lulendi nunga ko kuvasa Yave na bakundi bandi bafikama. Kuidi Yave, Abalahami buka ti kasa fua ko, wukhidi mu mayindu mandi. (Luka 20:37, 38) Dibakala dinkaka Kibibila kintubila widi Yobi. Ava kakutakana na zimbasi ku diyilu, Yave wutubila mu lufiatu matedi lukuikumunu lu Yobi. Yave wuntedila ‘mutu wulunga, wusonga, wuntumukinanga Nzambi ayi wuntinanga mambi.’ (Yobi 1:6-8) Vayi buidi Yave kaba tadilanga Danieli, mutu wunsadila mu lukuikumunu mu 80 di mimvu ku ntoto wu bapakanu? Zikhumbu zitatu zimbasi bakambila Danieli ti nandi wuba ‘mutu wu luvalu’ va meso ma Nzambi. (Danieli 9:23; 10:11, 19) Tulenda ba lufiatu ti Yave widi phuila yiwombo muingi kuvulubusa bakundi bandi bafua.—Yobi 14:15.
Mu ziphila mbi tulenda monisina ti tumvutulanga matondo mu minkhayilu mi Nzambi tukhambu monanga? (Tala lutangu 5) *
5. Mbi tufueti vanga muingi tuba kikundi kifikama na Yave?
5 Batu bakua bubu badi kikundi kifikama na Yave kheti mu kuba batu ba masumu? Badi bivevi na bivevi. Tuzabidi mawu kibila mu nza yimvimba babakala, bakieto ayi bana balezi badi mu kumonisa mu zikhadulu ziawu ti batidi kuba bakundi ba Nzambi. Kibibila kintuba ti ‘Yave widi kikundi kifikama na batu basonga.’ (Zingana 3:32) Diawu muingi tuba kikundi kifikama na Yave, tufueti ba kiminu mu khudulu yi Yesu. Kibila muawu Yave katuvaninanga luaku lu kukivana kuidi nandi ayi kubotama. Bo tumbaka makani amomo ma nkinza, buawu tunkuiza banga va kimueka na bivevi na bivevi bi baklisto bankaka ba kivana ayi babotama badi ‘kikundi kifikama’ na Mutu wulutidi zangama mu nza yoso.
6. Buidi tulenda monisina ti tumvuanga nkinza kikundi kitu na Yave?
6 Buidi tulenda monisina ti tumvuanga nkinza kikundi kitu na Yave? Dedi bo Abalahami ayi Yobi batatamana bakuikama mu Nzambi kuvioka 100 di mimvu, befu mvitu tufueti tatamana bakuikama, kheti tueka mimvu miwombo mu kusadila Yave. Banga Danieli, tufueti luta vua nkinza kikundi kitu na Nzambi kena moyo’itu. (Danieli 6:7, 10, 16, 22) Mu lusadusu lu Yave, tulenda nunga ziphasi zioso tumviokila ayi kutatamana kuba kikundi kifikama ayi nandi.—Filipi 4:13.
NKHAYILU YI NSAMBU
7. (a) Dedi bummonisina Zingana 15:8, buidi Yave kammuenanga minsambu mitu? (b) Buidi Yave kantambudilanga minsambu mitu?
7 Nsambu wawu nkhayilu wunkaka tuidi tukhambu monanga. Batu badi kikundi kifikama bankolukanga beni matedi mayindu ayi mabanza mawu. Bukiedika ti mawu mammonikanga mvandi mu kikundi tuidi na Yave? Ngete! Mu nzila Kibibila, Yave wutuzabikisanga mayindu ayi mabanza mandi. Ayi befu tukunzabikisanga mayindu ayi mabanza mitu ma tsi ntima bo tunsambila. Yave wunkuangalalanga beni kukuwa minsambu mitu. (Tanga Zingana 15:8.) Mu kuba nkundi wu luzolo, Yave kayuwanga ko to minsambu mitu vayi wuntambudilanga mvandi miawu. Khumbu zinkaka tulenda fika baka mvutu, vayi zikhumbu zinkaka tufueti tatamana kusambila mu matedi diambu beni. Kheti bobo, tulenda ba lufiatu ti Yave wunkuiza tutambudila mu thangu ayi mu phila yifuana. Mvutu wu Nzambi khumbu zinkaka wunkuizilanga mu phila tukhambu vingila. Dedi, tulenda yindula ti nandi wunkuiza botula ziphasi tumviokila, vayi nandi kalenda tuvana nduenga ayi mangolo muingi ‘kununga ziawu.’—1 Kolinto 10:13.
(Tala lutangu 8) *
8. Buidi tulenda monisina ti tumvuanga nkinza nkhayilu wu nsambu?
8 Buidi tulenda monisina ti tumvuanga nkinza nkhayilu wu nsambu? Phila yimueka tulenda vangila mawu, yidi mu kulandakana dilongi di Kibibila dintuba: “Lusambilanga mu khambu vonga.” (1 Tesalonika 5:17) Yave katu kuikanga ko kusambila. Vayi wunkinzikanga luaku tuidi lu kusola ayi wutukindisa muingi ‘tutatamana kusambila.’ (Loma 12:12) Muingi tumonisa ti tumvutulanga matondo mu nkhayilu beni, tufueti sambilanga khumbu ziwombo mu kilumbu. Bo tumvanga minsambu beni, tubika to kudinda vayi mvandi tufueti vutudilanga Yave matondo ayi kunzitisa.—Minkunga 145:2, 3.
9. Mambu mbi khomba yimueka katuba mu luaku lu kusambila, ayi buidi ngie wummuenanga luaku beni?
9 Bo tuntatamana kusadila Yave ayi tummona phila nandi kantambudila minsambu mitu, buawu tuala luta muena nkinza wu kusambila. Tala kifuani ki yaya Chris weka 47 di mimvu mu kisalu ki thangu ka thangu. Nandi wutuba: “Yinzolanga beni kukotuka meni meni muingi kusambila kuidi Yave. Mayangi beni kumona mbasukulu yi muinya ayi kitoko ki bivangu biandi! Mawu ma kuphanganga kuvutudila Yave matondo mu minkhayilu amiomio, kubunda mvandi nkhayilu yi kusambila. Bo yimmana kusambila kutsuka kilumbu, minu yinlalanga mu mayangi kibila kilunzi kiama kimbanga kisama.”
NKHAYILU YI PHEVI YINLONGO
10. Kibila mbi tufueti vuila nkinza phevi yinlongo yi Nzambi?
10 Phevi yinlongo voti mangolo ma Yave, yidi nkhayilu yinkaka tukhambu monanga vayi tufueti vua nkinza. Diawu Yesu ka tukindisila tutatamana kudinda yawu mu nsambu. (Luka 11:9, 13) Mu nzila phevi’andi yinlongo, Yave wutukindisanga mu kutuvana ‘lulendu lulutidi ngolo.’ (2 Kolinto 4:7; Mavanga 1:8) Mu lusalusu lu phevi yinlongo yi Nzambi, tulenda kuikama mu mosokua mambu ma phasi tumviokila.
(Tala lutangu 11) *
11. Buidi phevi yinlongo yilenda tusadisila?
11 Phevi yinlongo yitusadisanga tununga kuvanga biyeku bitu mu kisalu ki Nzambi. Yawu mvandi yilenda tusadisa tubuela pisuka mu bisalu tuzebi kuvanga. Diawu, busafuana ko kukizitisanga mu mambu tunnunga kuvanga mu kisalu ki Nzambi, kibila mu lusadusu lu phevi’andi tunnunginanga kuvanga mamoso.
12. Dedi buntubila Minkunga 139:23, 24, mambu mbi tulenda dindila lusadusu lu phevi yinlongo?
12 Phila yinkaka tulenda monisina ti tumvuanga nkinza phevi yinlongo yi Nzambi, yidi mu kusambila muingi yawu yi tusadisa kubakula mosokua mayindu voti zinzinunu zimbi tuidi mu ntima. (Tanga Minkunga 139:23, 24.) Befu kuvanga mawu, Yave mu nzila phevi’andi yinlongo wala tusadisa tukikulula ayi kukikinina mayindu voti zinzinunu zimbi tuidi. Ayi befu kubakula ti mayindu voti zinzinunu zimbi zimatona kukonzuka mu ntim’itu, tufueti sambila muingi phevi yi Nzambi yituvana mangolo ma kununga mayindu voti zinzinunu beni zimbi. Mu phila ayoyi, tunkuiza monisa ti tuidi bakubama muingi tubika vanga diosokua diambu dilenda vanga Yave kabika ku tusadisa mu nzila phevi’andi yinlongo.—Efeso 4:30.
13. Buidi tulenda buedila kuvua nkinza phevi yinlongo yi Nzambi?
13 Tulenda buela kuvua nkinza phevi yinlongo, mu kuyindula mambu Yave kamvanganga mu bilumbu bitu mu nzila phevi beni. Ava Yesu kuvutuka ku diyilu, nandi wukamba minlandikini miandi: ‘Bo muala tambula phevi yinlongo, buna luela tambula mvandi mangolo ayi luela ba zimbangi ziami . . . nate muna mu sukila nza.’ (Mavanga 1:8) Mambu amomo madi mu kusalama mu phila yi kukuitukila. Mu lusadusu lu phevi yinlongo, Yave makutikisa nduka nana di bivevi na bivevi ayi ndambu bi batu mu nza yoso. Mvandi, dikabu di Yave dinzingilanga mu kithuadi kibila phevi yinlongo yi Nzambi yibasadisanga kukuna zikhadulu buka luzolo, mayangi, ndembama, mvibudulu, mamboti, kuvanga mamboti, kiminu, kulembama, ayi kukiyala. Zikhadulu aziozi zidi mu khati ‘ḿbutu wu phevi.’ (Ngalatia 5:22, 23) Bukiedika, phevi yinlongo yidi nkhayilu yimboti!
LUSALUSU LU KIPHEVI TUMBAKANGA MU KISALU KI KUSAMUNA
14. Banani tukhambu monanga ba tusadisanga mu kisalu ki kusamuna?
14 Nkhayilu yinkaka tuidi, yidi kusala va kimueka na Yave, Yesu ayi zimbasi. (2 Kolinto 6:1) Befu tunsalanga yawu va kimueka bo tuidi mu kisalu ki kusamuna. Diawu Polo katubila mu matedi naveka ayi bankaka bamvanganga kisalu beni: ‘Befu tuidi minsadisi minsalanga va kimueka ayi Nzambi.’ (1 Kolinto 3:9) Bo tunsamuna, mvandi tuidi mu kusala va kimueka na Yesu. Tufueti tebukanga moyo ti mu thangu Yesu kakamba minlandikini miandi ‘lukitula batu ba zitsi zioso minlonguki miami,’ nandi mvandi wuba kamba: ‘Minu yidi yinu.’ (Matai 28:19, 20) Mbi tulenda tuba mu matedi zimbasi? Lusakumunu lunneni tuidi mu kutuadusu kuidi zimbasi bo tunsamuna ‘zitsangu zimboti. . .kuidi batu boso badi va ntoto.’—Nzaikusu 14:6.
15. Kiyeku mbi ki nkinza Yave kadi mu kisalu ki kusamuna? Vana kifuani.
15 Mu lusalusu lu Yave ayi bivangu biandi bi kiphevi, mambu mbi madi mu kuvangama? Tuidi mu kuvanga kisalu ki kusamuna zitsangu zi Kintinu ayi batu badi mintima mikubama badi mu kutambula zitsangu beni ayi kukonzuka mu kiphevi. (Matai 13:18, 23) Yave, naveka wumvanganga kiedika akiokio kukonzuka mu mintima mi batu. Buawu Yesu katubila ti, vasi ko mutu kalenda ba nlandikini’andi boti ‘Tat’andi kasa kuntumisa ko.’ (Yoane 6:44) Kibibila kimvana kifuani kimueka mu matedi mambu amomo. Kilumbu kimueka, mvuala Polo wulonga dingumba di bakieto baba ku nganda divula di Filipi. Tala mambu Kibibila kintuba mu matedi wumueka mu bawu bantedilanga Lidi: ‘Yave wuzibula ntim’andi muingi kayuwa buboti mambu ma Nzambi Polo kaba longa.’ (Mavanga 16:13-15) Dedi Lidi, bivevi na bivevi bi batu balonguka kiedika, kibila Yave nandi wuba tumisa.
16. Nani fueni mu tambula nzitusu mu mamoso tunnunga kuvanga mu kisalu ki kusamuna?
16 Nani fueni mu tambula nzitusu mu mamoso tunnunga kuvanga mu kisalu ki kusamuna? Mvuala Polo wutambudila kiuvu akiokio mu mambu katuba mu nkanda kasonikina basi Kolinto: ‘Minu yikuna, Apolo wulembila nlangu; vayi Nzambi nandi wumenisa. Diawu, mutu wunkuna ayi wunlemba nlangu basi ko mfunu, vayi Nzambi nandi lutidi mfunu, bila nandi wummenisanga.’ (1 Kolinto 3:6, 7) Buka Polo, tufueti vananga nzitusu yoso kuidi Yave mu mambu moso tunnunga kuvanga mu kisalu ki kusamuna.
17. Buidi tulenda monisina ti tumvutulanga matondo mu luaku tuidi lu ‘kusala va kimueka’ na Yave, Yesu ayi zimbasi?
17 Buidi tulenda monisina ti tumvutulanga matondo mu luaku tuidi lu ‘kusala va kimueka’ na Yave, Yesu ayi zimbasi? Mu kuba kifuza mu kisalu ki kusamuna ayi kusadilanga luaku loso tuidi muingi kusamuna zitsangu zimboti kuidi bankaka. Vadi ziphila ziwombo tulenda vangila mawu, dedi kuvana kimbangi mu bibuangu bimviokilanga beni batu ayi “mu nzo ka nzo.” (Mavanga 20:20) Zikhomba ziwombo bantianga mvandi kuvana kimbangi yosokua thangu babe bakila luaku. Bo bandengana mutu, bawu ba kumvananga mboti mu mayangi ayi bantonanga disolo. Boti mutu beni widi mu kutia disolo, bawu bantombanga phila yi kuba longila zitsangu zimboti.
(Tala lutangu 18) *
18-19. (a) Mbi binsundula Kusala va kimueka na Nzambi? (b) Tubila kifuani kimmonisa buidi Yave kasadisila nlonguki wumueka wu Kibibila.
18 ‘Kusala va kimueka na Nzambi,’ kuisinsundula ko to kulonga batu, vayi mvandi tufueti kuba vutukilanga. Bo mutu kamvua nkinza zitsangu zi Kintinu, tufueti vanga mangolo muingi kumvutukila. Boti tuisi ko thangu yi kumvutukila, tulenda dinda muingi khomba yinkaka kavanga mawu. Vayi makani mitu mafueti ba ma kutona ndongukulu yi Kibibila na mutu beni. Ayi bo tukue longukanga yandi, befu tunkuangalalanga kumona phila Yave kanyikunina mayindu ayi ntima wu mutu beni.
19 Tala kifuani ki Raphalalani, nganga yimueka yi minkisi wunkalanga ku África do Sul. Nandi wutona kulonguka Kibibila ayi wuzola beni mambu kaba longuka. Nandi wuyiza longuka mambu Kibibila kintuba mu matedi kukoluka na bakulu bafua. (Deutelonomi 18:10-12) Va thonono disa ba ko diambu diluelo kukikinina kiedika akiokio, vayi buviokila thangu, Raphalalani wubika Nzambi kabalula phila kaba yindudilanga. Bosi, nandi wununga kubika kisalu beni ki kutesanga mambu, kheti kiawu to kisalu kaba muingi kuyizingisa. Bubu Raphalalani weka 60 di mimvu. Nandi wutuba: “Yimvutulanga beni matondo kuidi Zimbangi zi Yave, bawu batsadisa mu ziphila ziwombo ayi bathombila kisalu kinkaka. Vayi yinluta vutulanga matondo kuidi Yave wutsadisa kubalula nzingulu’ami. Bubu yilenda basika mu kisalu ki kusamuna banga Mbangi yi Yave wubotama.”
20. Makani mbi tufueti baka?
20 Mu dilongi adidi, tuma tubila minkhayilu minna tukhambu monanga. Vayi kuba kikundi kifikama na Yave, yawu nkhayilu yilutidi mu minkhayilu mioso tuma tubila. Kikundi akioki, kitusadisanga kutambula luaku lunkaka tukhambu monanga—kukoluka na Yave mu nsambu, kutambula lusalusu lu phevi yinlongo, ayi kutambula lusalusu lumfumina ku diyilu muingi kuvanga kisalu ki kusamuna. Diawu baka makani ma kubuela monisa luvalu mu minkhayilu amiomio tukhambu monanga. Ayi tatamana kuvutudila Yave matondo mu kuba Nkundi wumboti kuidi ngiewu.
NKUNGA 145 Nzambi Wukanikisa Paladizu
^ Lut. 5 Mu dilongi diviokizi, tulongukidi matedi minkhayilu miwombo mi Nzambi tulenda mona. Vayi mu dilongi adidi, tunkuiza longuka matedi minkhayilu mi Nzambi tukhambu monanga ayi buidi tulenda monisina ti tumivuanga nkinza. Dilongi adidi mvandi dinkuiza tusadisa kuvutudilanga Yave matondo mu kuba tho yi minkhayilu beni.
^ Lut. 58 MAMBU MADI MU ZIFIKULA: (1) Khomba yimueka yinkieto widi mu kuyindula matedi kikundi kiandi na Yave mu thangu kantala bivangu bi Nzambi.
^ Lut. 60 MAMBU MADI MU ZIFIKULA: (2) Khomba beni widi mu kudinda mu nsambu muingi Yave kamvana mangolo ma kuvana kimbangi.
^ Lut. 62 MAMBU MADI MU ZIFIKULA: (3) Phevi yinlongo yimvana khomba beni mangolo muingi kuvana kimbangi.
^ Lut. 64 MAMBU MADI MU ZIFIKULA: (4) Khomba beni widi mu kulonguka Kibibila na nkieto beni kavana kimbangi. Khomba ayoyi yinkieto wunnunga kuvanga kisalu ki kusamuna ayi kuvanga minlonguki mu lusalusu lu zimbasi.
