1-2. Dedi bummonisina Minkunga 40:5, minkhayilu mbi Yave katuvana, ayi mbi tufueti tubila matedi mawu?

YAVE Nzambi widi koko kuyalubuka. Nandi wutu vana minkhayilu miwombo, dedi: Ntoto, kibuangu kimboti muingi tuzingila, tonzo voti kilunzi ki tusadisanga kuyindula ayi kukoluka na bankaka ayi Kibibila, Diambu Diandi muingi tubaka mimvutu mi biuvu binkinza bitedi luzingu luitu.—Tanga Minkunga 40:5.

² Mu dilongi adidi, tunkuiza tubila matedi minkhayilu amiomi mitatu. Kibila bo tunyindula mu matedi minkhayilu beni, buawu tuala buela vutudila matondo kuidi Yave Mvang’itu ayi tuala luta bela phuila yi kuvanga mambu ma kunkuangidika. (Nzaikusu 4:11) Mvandi, dinkuiza tukubika buboti muingi kusadisa batu bankikininanga ti biuma bioso bidi va nza, biyizila mu kinzimbukila.

3. Kibila mbi ntoto yawu to “ planeta.” yifuana muingi tuzingila?

³ Nduenga yi Nzambi yimonikanga mu phila nandi kavangila ntoto. (Loma 1:20; Ebeleo 3:4) Kheti vadi ziplaneta ziwombo zinzungidilanga thangu, vayi ntoto yawu to planeta yidi biabioso befu tuntomba muingi kuzingila mu mayangi.

4. Kibila mbi tulenda tubila ti ntoto wuviokizi makumbi batu bamvanganga?

⁴ Ntoto phila wididi va kingela ku diyilu, tulenda wudedikisa buka dikumbi voti buatu bunlalama va mbata nlangu. Vayi disuasana didi buatu buidi batu bawombo mu khati ayi ntoto tunzingilanga. Muingi tuvisa mawu buboti, ndoko tufuanikisa: Yindulabu batu badi mu dikumbi, angi baveka bafueti vanga phemu, bidia ayi nlangu’awu. Vayi balendi loza ko tsodu’awu,  ni kheti kunenina ku nganda dikumbi. Buabu, mu mbuenu’aku mimvu minkua balenda zingila muawu? Bukiedika ti mu thangu yikhufi. Vayi disuasana didi na ntoto, kibila kheti vanzingilanga batu bawombo, wawu wunsadisanga bivangu bioso bitatamana kuzinga, wumvanganga phemu yitatamana, bidia, nlangu ayi biabioso tuntomba mu kiteso kifuana. Mvandi tsodo yidi va ntoto, yiyendanga ko ku diyilu vayi kheti abobo ntoto wuntatamananga wudiodila ayi kikhidi kibuangu kimboti muingi kuzingila. Mu kibila mbi? Kibila buawu Yave kavangila muingi wu kidiodisanga waveka. Tutala ziphila ziwadi ntoto wumvangilanga mawu: mu phemu ayi mu nlangu.

5. Buidi Yave kavangila phemu yitatamana va ntoto, ayi mbi mawu matulonga mu matedi nandi?

⁵ Phemu nkinza yidi muingi batu, bibulu ayi biuma bioso bidi moyo bitatamana kuzinga. Batu bamfionguninanga matedi phemu, batuba ti balendi tangikisa ko thalu yi phemu yimboti batu ayi bibulu bantitikanga mu mvu wumueka. Muingi phemu yitatamana va ntoto, Yave wuvanga batu ayi bibulu muingi batitikanga phemu yimboti (oxigênio O₂), ayi kubasisanga phemu yimbi (gás carbônico co₂). Bosi wuvanga bitidi ayi minti minneni—muingi kutitika phemu ayoyi yimbi ayi kubasisa phemu yimboti befu tuntitikanga. Diawu befu tukhambuanga ko phemu yimboti muingi tutatamanga kuzinga ayi ntoto wuwalanga ko phemu yimbi. Mambu moso amomo mamvangamanga, ma tuvanga kukikinina kiedika kidi mu Mavanga 17:24, 25 mantuba ti: ‘Nzambi wumvananga baboso luzingu ayi mvumuku.’

6. Buidi Yave kavangila nlangu muingi wutatamana va ntoto, ayi mbi mawu matulonga mu matedi nandi? (Tala mvandi tsielu yintuba “ Nlangu widi nkhayilu wu Yave.”)

⁶ Ntoto widi va kibuangu kifuana diawu vadidi nlangu. Boti ntoto wubue fikama mua nkadu Thangu, khanu vasi ko nlangu ni biuma bidi moyo mu kibila ki mbazu; vayi boti wawu wubue tatuka to mua nkadu Thangu, khanu ntoto widi dimanya dinneni di kiozi. Vayi buidi wawu wuntatamananga va ntoto? Bo Yave katula ntoto va kibuangu kifuana, buawu nlangu wukhambu maninanga va ntoto. Ayi mu kibila ki mbazu yi muinya, mufu wu nlangu wumfuminanga va ntoto, wummakanga ku diyilu ayi wunkitukanga matuti. Va kuvioka kumi di bilumbu, matuti beni mawu mabue dodukanga mu phila yi mvula yi nlangu voti mvula yi mamanya ma kiozi. Diawu batu ba luzabu bantubilanga ti mu kadika mvu, thalu yi nlangu wuntombukanga ku diyilu, wuviokizi na nlangu widi mu mayanga moso madi va mbata ntoto. Mambu moso amomo mammonikanga, matulonga ti Yave widi Nzambi yi Nkua Ngolo Zioso ayi yi Nduenga.—Yobi 36:27, 28; Mpovi 1:7.

7. Mu ziphila mbi tulenda monisina ti tuntondanga Yave mu nkhayilu bantubila mu Minkunga 115:16?

⁷ Buidi tulenda vutudila matondo mu kibuangu kimboti Yave katuvana muingi tuzingila? (Tanga Minkunga 115:16.) Phila yimueka tulenda vangila mawu yidi mu kubotula thangu muingi kuyindulanga mu bivangu bi Yave. Mawu mala tusadisa kutondanga Yave kadika kilumbu mu biuma bimboti katuvana. Phila yinkaka tulenda vangila mawu, yidi mu kudiodisanga buboti kibuangu tunkalanga.

8. Kibila mbi tulenda tubila ti tonzo tuvangulu mu phila yi kukuitukila?

⁸ Tonzo tu mutu yidi nkhayilu yi kukuitukila. Bo ngie wuba mu kivumu ki mam’aku, tonzo tuaku tutona kukonzuka mu kulandakana ntungulu nandi veka Yave kavana ayi bumviokila thangu bivevi na biveni bi ziselula zimona zi tonzo zimvangamanga. Batu bamfionguninanga tonzo batuba ti, tonzo tu nkulutu tulenda ba nduka 100 di bivevi na bivevi bi ziselula bantedilanga  zineuronio. Ziselula zioso ba zikhupika mu phila yifuana va kibuangu kimueka ayi zidi kizitu ki kilu yimueka ayi ndambu. Tala mua bifuani mu mangitukulu tonzo kamvanganga.

9. Bivisa mbi ngie widi ti mangolo ma kukoluka yidi nkhayilu wu Yave?

⁹ Mangolo mitu ma kukoluka madi mangitukulu. Yindulabu mambu mammonikanga bo tunkoluka. Mu kadika kikuma wunkoluka, tonzo tuaku tufueti tuadisa ludimi, mbembu, bididi bi munu ayi ziphati. Binama bioso abiobi bifueti nyikuka mu thangu yimueka muingi mambu tunkoluka mayuwakana kuidi bankaka. Mu mvu 2019, dingumba dimueka dimfionguninanga matedi diela tuidi di kukoluka zimbembu ziwombo, dituba ti bana batsombi balenda kuwa ayi kuvisa kikuma kimueka kimueka. Mambu amomo, mambuela kindisa mambu mimfiongunini miwombo bankikininanga ti befu tumbutukanga na diela di kuzaba ayi kulonguka zimbembu zinkaka. Bukiedika, mangolo ma kukoluka yidi nkhayilu wu Yave.—Esodu 4:11.

10. Buidi tulenda vutudila matondo mu nkhayilu yi kukoluka Yave katuvana?

¹⁰ Vadi ziphila ziwombo tulenda vutudila Yave matondo mu nkhayilu yi kukoluka katuvana. Phila yimueka tulenda vangila mawu, yidi mu kulonga kiedika kitedi Nzambi kuidi batu bankikininanga ti biuma bioso biyizila mu kinzimbukulu. (Minkunga 9:1; 1 Petelo 3:15) Batu abobo, bantomba kutu vanga kukikinina ti ntoto ayi biuma bioso bidi moyo, biyizila mu kinzimbukulu. Boti badi bakubama muingi kutu kuwa, buna tulenda sadila Kibibila ayi mambu tuma tubila mu dilongi adidi, muingi kuba longa kiedika kitedi Tat’itu yi diyilu. Mvandi tulenda kuba zabikisa kibila mbi tunkikininanga ti Yave nandi Mvangi wu diyilu ayi ntoto.—Minkunga 102:25; Yesaya 40:25, 26.

11. Diela mbi dinkaka befu tuidi?

¹¹ Diela tuidi di kutebukila mambu moyo madi mangitukulu. Mu thangu yikhulu, nsoniki wumueka wutuba ti tonzo voti kilunzi ki mutu, kilenda lunda mambu malenda fuana mu nduka 20 di bivevi na bivevi di zibuku. Vayi bubu, bivisa bimmonisa ti kilunzi kitu, kinluta lundanga mambu kuvioka na thalu ayoyi nsoniki beni katubila. Tonzo kutu sadisanga kuvanga diambu dinkaka di kukuitukila. Diambu mbi?

12. Mbi bituvanga kuba disuasana na bivangu bioso bidi va ntoto?

¹² Mu bivangu bioso bidi va ntoto, batu bawu to badi diela di kulonguka ayi kuzaba kusuasisa mamboti ayi mambi. Befu tunnunganga kutebuka moyo mambu mavioka ayi kufiongunina mawu. Diela adiodio, di tusadisanga kusola mambu mafueti tutuadisa ayi kubalula phil’itu yi kuyindudila ayi yi kuzingila. (1 Kolinto 6:9-11; Kolosai 3:9, 10) Befu tulenda kubika kilunzi kitu muingi kuzaba kusuasisa mamboti ayi mambi. (Ebeleo 5:14) Tulenda longuka kumonisa luzolo, kiadi ayi nlemvu. Mvandi tulenda  landakana kifuani ki Yave mu kuvanga mambu masonga.

13. Dedi bummonisina Minkunga 77:11, 12, buidi tulenda sadila kilunzi?

¹³ Befu tulenda monisa kuidi Yave ti tukuntondanga bo katuvanga ayi kilunzi. Phila yimueka tulenda vangila mawu, yidi mu kutebukanga moyo zikhumbu zioso nandi katusadisila ayi katubombila. Mawu mala luta tuvana lufiatu ti Yave wala tusadisa mvandi mu bilumbu binkuiza kuntuala. (Tanga Minkunga 77:11, 12; 78:4, 7) Phila yinkaka, yidi mu kutebukilanga moyo mambu mamboti bankaka ba tuvangila ayi kuba tondanga mu mawu. Batu ba luzabu babakula ti batu badi kifu ki kuvutulanga matondo, bawu banluta banga mayangi. Vayi vadi mambu mankaka Yave kansolanga kuzimbakana kheti widi kilunzi kivedila. Dedi, bo tunyongini disumu tube vanga, Yave wunsolanga kutu lemvukila ayi kuzimbakana diawu. (Minkunga 25:7; 130:3, 4) Ayi Yave wuntomba befu tulandakana kifuani kiandi, mu kulemvukila mutu benyongina diambu dimbi kabe tuvangila.—Matai 6:14; Luka 17:3, 4.

14. Buidi tulenda vutudila Yave matondo bo katuvanga na tonzo?

¹⁴ Kusadila tonzo voti kilunzi muingi kuzitisa Yave, yidi phila tulenda vutudila matondo kuidi mutu wutuvana yawu. Vayi bankaka bansadilanga tonzo mu phila yimbi—mu kusola kuvanga baveka mambu banyindula ti madi mamboti voti mambi. Bo buidi ti Yave nandi wutu vanga, tulenda tuba ti zithumu ziandi ziawu zilutidi, kubika kuandi zitu. (Loma 12:1, 2) Ayi bo tunlandakana zithumu zi Yave, befu tunzingilanga mu ndembama. (Yesaya 48:17, 18) Mvandi tumbakulanga tsundu yi luzingu: yitedi kuzitisa ayi kukuangidika Mvangi ayi Tat’itu wu diyilu.—Zingana 27:11.

15. Kibila mbi tulenda tubila ti Kibibila yidi nkhayilu yimmonisa kivisa ti Nzambi wutuzolanga?

¹⁵ Kibibila yidi nkhayilu yimmonisa kivisa ti Nzambi wutuzolanga. Mu kibila ki luzolo kadi  mu befu, diawu katuadisila batu muingi basonika Kibibila. Mu buku beni, muawu Yave kamvanina mimvutu mi biuvi biwombo binkinza bi luzingu, dedi: Kuidi tufumina? Kibila mbi tuvangulu? Mambu mbi mala monika mu bilumbu binkuiza kuntuala? Yave tidi ti bana bandi boso bazaba mimvutu mi biuvu abiobi. Tona muna tona, nandi wuntuadisanga batu muingi kusekula Kibibila mu zimbembo ziwombo. Bubu, Kibibila kidi kisekulu kuvioka 3.000 di zimbembo! Kibibila yawu buku banluta sekulanga ayi banluta kabanga mu nza yimvimba. Koso kua kuma batu balenda kala ayi yoso kua mbembo balenda koluka, bawombo mu bawu badi luaku lu kulonguka zitsangu zi Kibibila mu mbembo’awu.—Tala mvandi tsielu yintuba “ Tsekudulu yi Kibibila mu Zimbembo Zidi ku Africa.”

16. Dedi bummonisina Matai 28:19, 20, buidi tulenda monisina ti tuntonda Yave mu kutuvana Kibibila?

¹⁶ Befu tulenda monisa ti tuntonda Yave mu kutuvana Kibibila mu kutanganga kiawu kadika kilumbu, mu kuyindulanga mu mambu kanlonga ayi mu kusadila mambu tunlonguka mu luzingu luitu. Mvandi tulenda kumvutudila matondo mu kuvanga mamoso tulenda nunga muingi kunata zitsangu zi Kibibila kuidi batu boso.—Minkunga 1:1-3; Matai 24:14; tanga Matai 28:19, 20.

17. Minkhayilu mbi tuba tubila mu dilongi adidi, ayi mambu mbi tuala longuka mu dilongi dinkuiza?

¹⁷ Mu dilongi adidi, tuma tubila matedi minkhayilu mitatu Yave katuvana: Ntoto, kibuangu kitu; tonzo, kinama ki kukuitukila; ayi Diambu di Nzambi, Kibibila. Vayi vadi minkhayilu minkaka mi Yave tukhambu monanga tulenda kuitukila. Miawu tuala longuka mu dilongidinkuiza.