DILONGI 20
NKUNGA 67 ‘Longa Diambu di Nzambi’
Bika Luzolo lu Kukindisa Wutatamana Kusamuna!
“Mu zitsi zioso, zitsangu zimboti zifueti samunu theti.” —MALAKU 13:10.
MAMBU TUANLONGUKA
Buini luzolo lu tusadisilanga kuba kifuza ayi kusamuna zisangu zimboti mu ntima woso?
1. Zisangu mbi tuyuwizi mu lukutukunu lumfunu lu mvu 2023?
MU LUKUTUKUNU lumfunu lu mvu 2023, a befu tutambudi tsangu yimboti beni. Baludikizi mua mambu befu tunkikininanga ayi baveni ndubu yimboti matedi kisalu kitu ki kusamuna. Tulongukizi ti ḿba batu bankaka bala tambula luaku lu kuba ku khonzu Yave, kheti bo lutululu lu Babiloni Yinneni luala vioka. Mvandi tulongukizi ti tona mu Ngonda Kumi Mueka mvu 2023, minsamuni mi Kintinu, balasa bue vananga ko kipholo kioso kitedi kisalu kiawu ki kusamuna. Bukiedika ti mambu amomo mammonisa ti kisalu ki kusamuna kisieli ko beni nkinza ayi kilendi bue vangimina ko mu nsualu dedi bo tuaba yindudilanga? Ndamba!
2. Kibila mbi kisalu kitu ki kusamuna kinluta bueliminanga nkinza kadika kilumbu? (Malaku 13:10)
2 Kadika kilumbu kimvioka, tummona ti kisalu kitu ki kusamuna kifueti luta vangimina mu nsualu. Kibila mbi? Kibila tsukulu yikemu kufikama. Tala mambu Yesu kabikula matedi kisalu ki kusamuna mu bilumbu bisuka. (Tanga Malaku 13:10.) Mu matangu ma Matai mandedakana na mambu amomo madi mu malaku, mantuba ti zisangu zimboti zifueti samunu mu nza yimvimba ava “tsukulu” yiza. (Matai 24:14) Tsukulu beni yinsundula lutululu lu nza ayiyi yi Satana yiwedi mambi. Yave mana sikika “kilumbu ayi kilokula” muingi kutulula nza yi Satana. (Matai 24:36; 25:13; Mava. 1:7) Kadika kilumbu kimvioka, tuke mu kuluta fikama kilumbu beni. (Loma 13:11) Vayi ava mawu mamonika, tufueti tatamana kusamuna nati tsukulu yala kuiza.
3. Mbi bi tunatanga kusamuna?
3 Bo tunyindula kisalu kitu ki kusamuna, buboti beni ku yikuvusanga kiuvu akiki: Kibila mbi tunsamuninanga zisangu zimboti? Mu bukhufi, luzolo luawu lu tunatanga kusamuna. Mambu tumvanganga mu kisalu ki kusamuna, mammonisanga luzolo luitu—mu zisangu zimboti, mu batu ayi bulutidi luzolo mu Yave ayi mu dizina diandi. Ndoku tutubila mambu amomo.
BEFU TUNSAMUNANGA KIBILA TUNZOLANGA ZISANGU ZIMBOTI
4. Buini befu tumbelanga bo tunkuwa zisangu zimboti?
4 Buidi wumbelanga bo wuntambula zisangu zimboti? Dedi—batu bawombo bambanga beni mu nyenzi bo muana kambutuka voti bo bambaka kisalu kio bawu bantombanga beni. Ayi mu mayangi, bantombanga kuzabikisa mawu ka basi likanda ayi bakundi. Buawu ngie wubela bo wuyuwa zisangu zimboti zilutudi—zi Kintinu ki Nzambi?
5. Buidi ngie wubela mu khumbu yitheti wulonguka kiedika ki Kibibila? (Tala mvandi foto.)
5 Yindula buini ngie wubela bo wuyuwa kiedika ki Kibibila mu khumbu yitheti. Ngie wubakula ti Tat’aku yi diyilu wu kuzolanga, ayi wuntomba ngie wuba mu khati dikanda di batu ba kumbuongiminanga. Nandi wukanikisa ti ziphasi zioso ziala mana. Ngie wulenda bue mona basi dikanda diaku ayi bakundi baku bafua kuvulubuka—ayi mambu mankaka mamboti. (Malaku 10:29, 30; Yoa. 5:28, 29; Loma 8:38, 39; Nzai. 21:3, 4) Kiedika akiokio kinyikuna ntim’aku. (Luka 24:32) Bo wuyuwa mambu amomo, ngie wuzola mawu ayi wabasa tomba ko kusueka mawu ka ngie veka!—Dedikisa mawu na Yelemia 20:9.
Bo tulonguka zisangu zimboti mu khumbu yitheti, befu tusa nunga kusueka mambu amomo mamboti kuidi befu veka! (Tala lutangu 5)
6. Mbi ngie belonguka mu kifuani ki Ernest ayi Rose?
6 Tala kifuani akiki. Yaya Ernest b wuba kumi li mimvu bo tat’andi kafua. Nandi wutuba: “Minu yaba kuyikuvusanga: ‘Tat’ami bakuenda ku diyilu? Voti bo kabe fua befuililila?’ Minu yaba monanga nsoki bana bankaka baba matata.” Ernest waba kuendanga khumbu ziwombu ku biziami, waba fukamanga vantuala libumbi li tat’andi ayi waba sambilanga: “Lemvuka, a Nzambi, minu yintomba kuzaba kuini tat’ami kakeli.” Bo vuvioka 17 di mimvu tona tat’andi kufua, Ernest wutambula luaku lu kulonguka Kibibila. Nandi wuba beni mayangi mu kulonguka ti bafua bayindulanga ko ayi bake buka bawu banlala. Mvandi wuyangalala kuzaba lukanu lu Kibibila matedi luvulubukusu. (Mpovi 9:5, 10; Mava. 24:15) Nandi wubakula mimvutu mi biuvu biaba kuntatisanga beni! Ernest wuba beni mayangi mu kiedika ki Kibibila kaba longuka. Nkanzi’andi Rose, mvandi wutona kulonguka Kibibila va kimueka ayi nnuni’andi. Bawu babotama mu mvu 1978. Mu mayangi bawu batona kulonga mambu baba longuka ka basi likanda, bakundi ayi batu bankaka. Mu kibila akiokio, Ernest ayi Rose busalisa kuvioka 70 di batu kukonzuka mu kiphevi ayi kubotama.
7. Kiedika ki Kibibila kia kukonzuka mu nitma, mambu mbi mammonikanga? (Luka 6:45)
7 Bukiedika, kiedika ki Kibibila kia kukonzuka mu ntima mutu, nandi wunkuiza mona beni phasi kusueka mambu kanlonguka. (Tanga Luka 6:45.) Befu tumbanga dedi mueka na minlandikina mi Yesu mu sekulu yitheti batuba: “Befu tulendi bika ko kutuba matedi mambu tumona ayi tuyuwa.” (Mava. 4:20) Befu tunzolanga beni kiedika tunlongukanga ayi tuntombanga kuzabikisa kiawu kuke batu boso tulenda nunga.
BEFU TUNSAMUNAGA KIBILA TUNZOLANGA BATU
8. Mbi bi tunatanga kulonga bankaka zisangu zimboti? (Tala quadro “ Zola Batu—Ayi Vanga Minlonguki.”) (Tala mvandi foto.)
8 Dedi Yave ayi Mun’andi, befu tunzolanga batu. (Zinga. 8:31; Yoa. 3:16) Befu tummonanga batu kiadi, kibila bawu basi ko “kivuvu” ayi basa “zaba ko Nzambi.” (Efe. 2:12) Bawu bantovukanga beni mu kibila ki mambu ma luzingu, vayi befu tuke biuma bi luvalu bio bawu bantomba—zisangu zimboti zi Kintinu ki Nzambi. Zisangu aziozio, zilenda basadisa kubaka kivuvu ayi luzingu lumboti tona bubu ayi kubaka kivuvu ki “luzingu lu kiedika”—lu kuzinga mvu ka mvu—mu nza yimona.—1 Timo. 6:19.
Luzolo kuidi Yave ayi kiadi tummonanga batu, lu tusadisanga kuvanga mangolo muingi kuba longa zisangu zimboti (Tala lutangu 8)
9. Ndubu mbi tunzabikisanga matedi bilumbu binkuiza ayi kibila mbi? (Yehezekeli 33:7, 8)
9 Luzolo luitu kuidi batu, lu tunatanga kuba lubula ti tsukulu nza ayiyi yimbi, yima fikama. (Tanga Yehezekeli 33:7, 8.) Befu tummonanga kiadi batu bankalanga va nseng’itu ayi basi likanda litu bammanga kubuongiminanga Yave. Batu buwombu bunnatanga luzingu luawu mu khambu zaba ti kunkuiza ba—“ziphasi zingolo zio ka zimonikini’abu ko tona vana thonono nza nati bubu, ayi zialasa bue monika ko.” (Matai 24:21) Befu tuntomba kuba zabikisa mambu mankuiza monika mu thangu lufundusu—lu binganga bi luvunu biala tuluka, bosi Yave wala tulula nza yi Satana mu Alimangedoni. (Nzai. 16:14, 16; 17:16, 17; 19:11, 19, 20) Befu tunsambilanga muingi batu bawombu bayuwa zindubu zio tukuba zabikisanga ayi babundana yitu mu mbuoungimini yi kiedika. Vayi mbi tuleneda tuba matedi batu bammanga kukuwa zindubu beni kubunda mvandi basi dikandi ditu?
10. Kibibila mbi tufueti tatiminina kulubula batu mu nsualu?
10 Dedi bo tulongukidi mu dilongi dibedi, ḿba Yave wala vukisa batu bankaka bala balula mavanga, bo bala mona ti Babiloni Yinneni yima tuluka. Boti buawu, buna tufueti luta zabikisa zindubu beni mu nsualu. Yindula mu diambu adidi: Mambu befu tunkamba batu mu bilumbu abibi, mawu bawu balenda tebukila monyo mu bilumbu binkuiza. (Dedikisa mawu na Yehezekeli 33:33.) Mu bilumbu binkuiza, ḿba bawu bala yindula zindubu befu tuba longa ayi bala bundana yitu mu mbuongimini yikiedika muingi babika kufua. Yindula mu nsungi wu buloko ku Filipi ko Polo ayi Sila baba. Nandi wubalula to zikhadulu ziandi bo “vamonika ndikununu yinneni yi ntoto.” Bobuawu mvandi, ḿba batu bankaka bammanganga zisangu zimboti bubu, balenda balula zikhadulu ziawu ba kumona ti Babiloni Yinneni yima tuluka.—Mava. 16:25-34.
BEFU TUNSAMUNINANGA KIBILA TUNZOLANGA YAVE AYI DIZINA DIANDI
11. Buini tumvaninanga nzitusu, nkembu ayi mangolo mitu ka Yave? (Nzaikusu 4:11) (Tala mvandi foto.)
11 Kibila kilutidi nkinza muingi kusamuna zisangu zimboti, kidi luzolo luitu ka Yave ayi dizina diandi dinlongo. Befu tuntadilanga kisalu kitu ki kusamuna banga phila yi kuzitisila Nzambi yo befu tunzolanga. (Tanga Nzaikusu 4:11.) Mu ntima woso befu tunkikinina ti Yave Nzambi wufuana mu kutambula nkembu, nzitusu ayi mangolo kuidi baboso ba kumbuongiminanga. Befu tumvananga Yave nzitusu ayi nkembu bo tunlonganga bankaka ti Yave, nandi “wuvanga biuma biosu.” Ayi befu tuke bamonyo kibila nandi wu tuvana luzingu. Befu tu kumvananga mangolo mitu—bo tunsadila thangu’itu, mangolo mitu ayi biuma bioso tuidi muingi—kubasikanga mu kisalu ki kusamuna mu phila tulenda nungina. (Matai 6:33; Luka 13:24; Kolo. 3:23) Mu bukhufi, befu tunzolanga kutubila matedi Nzambi yo befu tunzolanga. Mvandi tunzolanga kukamba bankaka matedi dizina diandi ayi mambu nandi kanzolanga. Kibila mbi?
Befu tumvananga Yave mangolo mitu, bo tunsadilanga thangu’itu, mangolo mitu ayi biuma bioso tuidi muingi kubuela kukivana mu kisalu ki kusamuna mu phila tulenda nungina (Tala lutangu 11)
12. Buini befu tumvedisilanga dizina di Nzambi mu kisalu ki kusamuna?
12 Luzolo luitu kuidi Yave, lutunatanga kuvedisa dizina diandi. (Matai 6:9) Befu tuntombanga kuvanga mamoso tunnunga muingi kuvedisa dizina di Yave, mu luvunu Satana kamvunina. (Ngene. 3:1-5; Yobi 2:4; Yoa. 8:44) Mu kisalu kitu ki kusamuna, befu tunkakidilanga dizina di Nzambi ayi tunlonganga kiedika matedi nandi kuidi baboso ba tukuwa. Befu tuntomba muingi baboso bazaba ti khadulu yilutidi yi Yave yidi, luzolo. Ayi phil’andi yi kuyadila yidi yisonga ayi mvandi Kintinu kiandi, kiambelama kumanisa ziphasi, kutuala ndembama ayi mayangi kuidi batu boso va ntoto. (Minku. 37:10, 11, 29; 1 Yoa. 4:8) Bo tunkakidila dizina di Yave mu kisalu ki kusamuna, befu tumvedisanga dizina diandi. Mvandi tumbanga beni mayangi mu kuzaba ti tuke mu kuzingila mu dizina ditu. Mbi mawu mandundula?
13. Kibila mbi tummuenanga nyenzi mu kutedulu Zimbangi zi Yave? (Yesaya 43:10-12)
13 Yave wu tutedila ‘zimbangi’ ziandi. (Tanga Yesaya 43:10-12.) Mua mimvu kumbusa, tutambula nkanda mueka wu Dingumba Dintuadisi wutubila abubu: “Kutedulu wumueka mu Zimbangi zi Yave, luawu luaku lulutidi woso kuandi mutu kalenda baka.” c Kibila mbi? Tala kifuani akiki. Ngie kutomba mutu kaba mbangi’aku ayi ka kukakidila ku nzo lufundusu, ngie wunkuiza sola mutu no ngie zebi, wumfiatilanga ayi ke zikhadulu zio balenda kikinina ku nzo lufundusu. Bobuawu mvandi, mu kutu sola muingi tuba Zimbangi ziandi, Yave wummonisanga ti wu tuzebi buboti, wu tufiatilanga muingi befu tumonisa ti nandi to Nzambi yikiedika. Befu tunkuangalalanga beni mu kuba Zimbangi ziandi. Diawu tunsadilanga loso kua luaku, muingi kuzabikisa dizina diandi kuidi bankaka ayi kumonisa ti mambu moso Satana kutuba matedi Yave, make ma luvunu. Bo kuvanga mawu, befu tunzingilanga mu dizina ditu—Zimbangi zi Yave!—Minku. 83:18; Loma 10:13-15.
BEFU TUALA TATAMANA KUSAMUNA NATI KUTSUKA
14. Mambu mbi mamboti mankuiza kuntuala?
14 Bukiedika, mambu mawombo mamboti mankuiza kuntuala! Mu lusakumunu lu Yave, befu tuntomba kumona batu bawombo kukikinina kiedika ava ziphasi zingolo zitona. Mvandi, tuma kuangalala kuzaba ti kheti mu thangu ziphasi zingolo, ḿba vala ba batu bawombu bake mintima mikubama bala kuiza ku khonzu Yave!—Mava. 13:48.
15-16. Mambu mbi tufueti tatamana kuvanga ayi nati thangu mbi?
15 Bo tuntemina muingi mawu mamonika, befu tuke kisalu muingi kuvanga. Befu tuke luaku lu kuvanga kisalu kio kialasa bue vangama ko—kisalu ki kusamuna zisangu zimboti zi Kintinu ki Nzambi mu nza yimvimba. Vayi mu yoyawu thangu, tufueti tatamana kulubula batu. Batu bafueti zaba ti tsukulu yi nza ayiyi yi Satana, yike mu kufikama mu nsualu. Ayi bo thangu beni yala tuka, bawu bala zaba ti zisangu Zimbangi zi Yave baba longanga, kuidi Yave Nzambi zifumina.—Yehe. 38:23.
16 Mbi tuidi bakubama muingi kuvanga? Mu kibila ki luzolo luitu mu zisangu zimboti, mu batu ayi dilutidi nkinza luzolo tuidi kuidi Yave ayi dizina diandi, befu boso tuke makani ma kutatamana kusamuna mu mayangi, mu nsualu ayi mu kifuza, nati mu thangu naveka Yave kala tuba “bikanu kubue samuna!”
NKUNGA 54 ‘Ya yiyi Nzila’
a Lukutukunu lu mfunu lu mvu 2023, luvangama ku Nova Iorque U.S.A mu kilumbu 7 Ngonda Yikumi, ku kibuangu ki Zimbangi zi Yave bamvangilanga zikhutukunu zinneni. Woso kua mutu kalenda tala luawu mu JW Broadcasting®—kitini 1 Ngonda Kumi Yimueka mvu 2023 ayi kitini 2 mu JW Broadcasting Ngonda Yitheti mvu 2024.
b Tala dilongi “A Bíblia Muda A Vida Das Pessoas—Fiquei impressionado com as respostas da Bíblia,” didi mu Kibanga ki Nsungi kilumbu 1 Ngonda Yimmuadi mvu, 2015.
