DILONGI 19
NKUNGA 22 Kintinu Kima Kubama—Bika Kiawu Kiyiza!
Mbi Tuzebi Matedi Phila Yave Kala Fundisila Batu mu Bilumbu Binkuiza?
“Yave . . . kasintomba ko ni mutu kabungu.”—2 PETE. 3:9.
MAMBU TUANLONGUKA
Tulenda ba lufiatu ti Yave wala fundisa batu mu bilumbu binkuiza mu phila yisonga.
1. Kibila mbi tulenda tubila ti tuke mu kuzingila mu thangu yi mayangi?
BEFU tuidi mu kuzingila mu thangu yi mayangi! Kadika kilumbu, tummonanga zimbikudulu zi Kibibila kusalama. Dedi befu tuke mu kumona ntinu Norte ayi ntinu wu sude kunuana ayi kuvanga mangolo muingi kutuma nza yimvimba. (Dani. 11:40, nota.) Befu tummonanga zitsangu zi Kintinu kusamunu mu phila yi kukuitukila ayi bivevi na bivevi bi batu bake mu kukikinina ziawu ayi kubalula mavanga mawu. (Yesa. 60:22; Matai 24:14) Ayi befu tuntambulanga bidia biwombo bi kiphevi “mu thangu yifuana.”—Matai 24:45-47.
2. Lufiatu mbi tulenda ba ayi mbi tufueti kikinina?
2 Yave wuntatamananga kusadisa bisadi biandi, kuvisa buboti mambu mala monika mu bilumbu binkuiza. (Zinga. 4:18; Dani. 2:28) Tulenda ba lufiatu ti nate mu thangu ziphasi zingolo ziala tona, befu tuala zaba mamoso mantombulu muingi tutatamana bakuikama ayi kutatamana kuba kithuadi mu thangu beni. Vayi tufueti kikinina ti vadi mambu mankaka mo ka tusazaba ko, matedi bilumbu binkuiza kuntuala. Mu dilongi adidi, tunkuiza longuka phisulu yimona mu mambu tuaba kikininanga matedi bilumbu binkuiza. Mvandi tunkuiza bue fiongunina mua mambu tufueti zaba matedi bilumbu binkuiza kuntuala ayi phila Tat’itu yi diyilu kala vangila mawu kusalama.
MAMBU TUKHAMBU ZABA
3. Mambu mbi tuaba kikininanga ayi kibila mbi?
3 Mu mimvu mima vioka, befu tuaba tubanga ti bo ziphasi zingolo ziala tona, ni mutu kalasa bue ba ko luaku lu kulonguka matedi Yave ayi kuvuka mu Alimangedoni. Befu tuaba tubilanga mawu, kibila tuaba yindulanga ti kadika mutu voti diambu dimonika mu Khuka Minlangu, dinsundula mambu mala monika mu bilumbu binkuiza. Dedi, befu tuaba yindulanga ti dedi bo Yave kazibikila muelu wu nzaza ava Khuka Minlangu yitona, buawu mvandi buala bela bo ziphasi zi ngololo ziala tona. Yave wala zibika muelu muingi ni mutu mu Nza ayiyi yi Satana kabue baka luaku lu kuvuka.—Matai 24:37-39.
4. Kibila mbi tulendi yindula ko ti phila mambu mamonikina mu bilumbu bi Nowa, yike mbonosono yi mambu mala monika mu bilumbu binkuiza? Sudikisa.
4 Vayi dike diambu dimboti kuyindula ti kadika diambu dimonika mu Khuka Minlangu didi tsundukulu mu bilumbu binkuiza? Ndamba. Kibila mbi? Kibila vasi ko ni lutangu lu Kibibila luntubila mawu. a Yesu wudedikisa “bilumbu bi Nowa” na thangu kala kuizila. Vayi nandi kasa tuba ko ti mamoso mamonika mu bilumbu bi Nowa, madi tsundukulu mu bilumbu binkuiza. Dedi, bo Yave kazibika muelu wu nzaza. Vayi mawu masinsundula ko ti vasi ko ni diambu befu tulenda longuka mu bilumbu bi Nowa.
5. (a) Mbi Nowa kavanga ava Khuka Minlangu yitona? (Ebeleo 11:7; 1 Petelo 3:20) (b) Nguizani mbi yidi matedi kisalu ki kusamuna Nowa kavanga ayi kio befu tunvanganga bubu?
5 Bo Yave kalubula Nowa matedi kutuala Khuka Minlangu, Nowa wumonisa lufiatu mu kutunga nzaza. (Tanga Ebeleo 11:7; 1 Petelo 3:20.) Bobuawu mvandi batu bankuwanga zitsangu zimboti zi Kintinu ki Nzambi, bafueti sadila mambu bankuwa. (Mava. 3:17-20) Petelo wutedila Nowa “nsamuni wu mambu masonga.” (2 Pete. 2:5) Vayi dedi bo tutubidi mu dilongi dibedi, befu tusa zaba ko boti Nowa wuvanga kisalu kineni ki kusamuna muingi kulubula batu boso baba zinganga va ntoto mu thangu’andi matedi Khuka Minlangu. Bubu mvandi, befu tumvanganga kisalu ki kusamuna mu nza yimvimba. Ayi tumvangilanga mawu mu kifuza. Vayi kheti mu mangolo moso tulenda vanga, tulendi nunga ko kusamuna batu boso mu nza yimvimba ava tsukulu yiza. Kibila mbi?
6-7. Kibila mbi tulenda tubila ti tualasa nunga ko kusamuna zitsangu zimboti kuidi kadika mutu va ntoto ava tsukulu yiza? Sudikisa.
6 Tala mambu Yesu katuba matedi kisalu ki kusamuna. Nandi wubikula ti zitsangu zimboti, ziala samunu “mu ntoto wumvimba, muingi kuvana kimbangi.” (Matai 24:14) Mbikudulu ayoyo, yike mu kuluta salama mu bilumbu bitu. Zitsangu zi Kintinu zikemu kulongu kuvioka 1.000 di zimbembu ayi mu nzila khond’itu mayo jw.org, batu bawombo bubu va ntoto balenda longuka matedi zitsangu zi Kintinu ki Nzambi.
7 Vayi Yesu mvandi wukamba minlandikini miandi ti bawu balasa nunga ko kusamuna zitsangu zimboti mu “mavula moso” voti kuidi baboso ava nandi kiza. (Matai 10:23; 25:31-33) Mambu amomo Yesu katuba make mu kusalama mu bilumbu bitu. Bivevi na bivevi bi batu banzingilanga mu bibuangu bio befu tukhambulu kiphuanza ki kusamuna zitsangu zimboti. Mvandi mu kadika minutu, mu nza yimvimba mumbutukanga bana bawombo. Befu tumvanganga mamoso tulenda nunga muingi kusamuna mu “mimvila mioso, minkuna mioso, zimbembu zioso ayi makanda moso.” (Nzai. 14:6) Vayi tufueti visa ti, tualasa nunga ko kusamuna zitsangu zimboti kuidi kadika mutu va ntoto ava tsukulu yiza.
8. Kiuvu mbi tulenda kuyikuvusa matedi phila Yave kala fundisila batu? (Tala mvandi foto)
8 Mambu amomo, ma tuvanga kuyindula mu kiuvu kinkaka: Mbi tulenda tuba matedi batu bo balasa baka ko luaku lu kukuwa zitsangu zi mboti ava ziphasi zingolo zitona? Mbi Yave ayi Muan’andi kavana kiyeku ki kufundisa, bala kuba vangila? (Yoa. 5:19, 22, 27; Mava. 17:31) Matangu mabongulu ntu diambu mantuba ti Yave “kasintomba ko ni mutu kabungu.” Vayi nandi kantomba, “baboso babalula mavanga mawu.” (2 Pete. 3:9; 1 Timo. 2:4) Diawu tufueti kikinina ti Yave, ka tukembi’abu ko mbi kala vanga muingi kuvana mvutu wu kiuvu akiokio. Bukiedika, nandi kasi ko mu lukuiku lu kutu kamba mamoso matedi mambu kamana vanga voti mo kala vanga.
Mambu mbi Yave kala vangila batu bakhambu tambula luaku, lu kukuwa zitsangu zimboti bo ziphasi zingolo ziala tona? (Tala lutangu 8) c
9. Mambu mbi Yave katusudikisa mu Kibibila?
9 Mu Kibibila, Yave mana tumonisa mambu nandi kala vanga. Dedi Kibibila kitukamba ti Yave wala vulubusa batu “bakhambulu basonga”, voti batu bafua mu khambu tambula luaku lu kulonguka zitsangu zimboti ayi kubalula zikhadulu ziawu. (Mava. 24:15; Luka 23:42, 43) Mambu amomo matuvanga kuyindula matedi biuvu binkaka binkinza.
10. Biuvu mbi binkaka tulenda kuyikuvusa?
10 Bukiedika ti batu boso bala fua mu thangu ziphasi zingolo balasa vulubuka ko? Kibibila kinsudikisa ti batu bala balukila Yave ayi baboso kala tulula mu Alimangedoni, balasa vulubuka ko. (2 Tesa. 1:6-10) Abu batu bala fua mu thangu ziphasi zingolo, mu kibila ki kimbevu, bununu, bala vonda kuidi batu bankaka voti mu bibila binkaka? (Mpovi 9:11; Zaka. 14:13) Bukiedika ti bankaka mu bawu bala ba mu nkangu wu batu “bakhambulu basonga” bala vulubuka mu nza yimona? Befu tusa zaba ko.
MAMBU BEFU TUZEBI
11. Diambu mbi Yave kala tadila muingi kufundisa batu mu Alimangedoni?
11 Befu tuzebi mambu mawombo matedi bilumbu binkuiza. Dedi tuzebi ti mu Alimangedoni, Yave wala fundisa batu mu kutadila mambu bavangila zikhomba zi Klistu. (Matai 25:40) Tona bubu, batu Yave kala tadila mamemi, bammonisanga ti bambuelanga mioko Baklistu basolu. Mvandi tuzebi ti bankaka mu zikhomba zi Yesu bala ba va ntoto va thonono ziphasi zingolo ayi bala kuenda ku diyilu bo vala kambu mua thangu muingi Alimangedoni yitona. Boti zikhomba zi Yesu bala ba va ntoto, buna luala ba luaku muingi batu bake mintima mimboti, baba buela mioko ayi kisalu bawu bamvanganga. (Matai 25:31, 32; Nzai. 12:17) Mbi mambu amomo mansundula?
12-13. Mbi ḿba batu bankaka bala vanga bo bala mona ti “Babiloni Yinneni” yima tuluka? (Tala mvandi foto)
12 Kheti bo ziphasi zingolo ziala tona, ḿba bankaka bo bala mona ti “Babiloni Yinneni” yima tuluka, bala tebuka moyo ti Zimbangi zi Yave batona kutubila mawu tona thama. Bukiedika ti bankaka bo bala mona mambu amomo bala balula mavanga mawu?—Nzai. 17:5; Yehe. 33:33.
13 Mambu amomo ma kumonika, mala ba dedi mueka buka mo mamonika ku Ngipiti mu bilumbu bi Mose. Tebuka moyo ti ‘batu bawombo ba mimvila minkaka’ bayenda va kimueka na basi Isaeli. Ḿba bankaka mu bawu batona kuba kiminu mu Yave, bo bamona zindubu Mose kaba kuba zabikisanga matedi Kumi di Zitsingulu kumonika. (Esodu 12:38) Bo Babiloni Yinneni yala tuluka, va kumonika batu bala buela mioko mbuongimini yikiedika, bukiedika ti befu tufueti ba mu kiunda? Ndamba! Befu tuntomba kumonisa zikhadulu zio Tat’itu yi diyilu kadi. Dedi, nandi widi ‘nkua nlemvo, nkua kiadi, nkua mvibudulu, widi luzolo lu kuikama ayi nkua kiedika.’ b—Esodu 34:6.
Batu bankaka bo bala mona lutululu lu “Babiloni Yinneni” bala tebuka moyo ti Zimbangi zi Yave batona kutubila mawu tona thama (Tala lutangu 12-13) d
14-15. Bukiedika ti muingi Yave kuvulubusa mutu, vala tombulu theti kuzaba thangu mbi kafuila ayi kuidi kaba zingilanga? Sudikisa. (Minkunga 33:4, 5)
14 Khumbu zinkaka befu tunkuwanga batu kutuba, “khanu buboti kuandi boti basi dikanda diama bafua ava ziphasi zingolo kutona muingi babaka kivuvu ki kuvulubuka.” Buboti kuzaba ti ngie wunyindulanga matedi basi dikanda diaku. Vayi, boti mutu wala zinga mvu ka mvu, vasintombulu ko theti kuzaba thangu mbi nandi kafuila. Kibila Yave widi Mfundisi wuvedila voti makani nandi kambakanga make masonga. (Tanga Minkunga 33:4, 5.) Befu tulenda ba lufiatu ti ‘Mfundisi wu nza yimvimba’ wala baka makani mamboti.—Ngene. 18:25.
15 Mvandi tulenda tuba ti boti mutu wala zinga mvu ka mvu, vasintombulu ko theti kuzaba kuidi nandi kabe zingilanga. Tuidi lufiatu ti Yave kalendi tadila ko ‘zikhombo’ bivevi na bivevi bi batu banzingilanga mu zitsi mo zitsangu zimboti ka zitukidiabu ko. (Matai 25:46) Kheti befu tulenda zimbakana batu abobo, tuidi lufiatu ti Mfundisi wu nza yimvimba wumvuanga beni nkinza batu abobo. Befu tusa zaba ko buidi Yave kala vangila mambu mu thangu ziphasi zingolo. Ḿba bankaka mu thangu ayoyo, bala tambula luaku lu kulonguka matedi Yave, kumfiatila ayi kubaka makani ma kuba ku khonzu’andi bo nandi kala vedisa dizina diandi vantuala batu.—Yehe. 38:16.
Bo ziphasi zingolo ziala tona . . . ḿba bankaka bo bala mona mambu amomo bala balula mavanga mawu.
16. Mambu mbi tumana visa matedi Yave? (Tala mvandi fikula)
16 Mu nzila ndongukulu’itu yi Kibibila, tumana visa ti Yave mvuanga beni nkinza luzingu lu batu. Nandi wuvana luzingu lu Muan’andi, muingi kutusadisa kubaka luaku lu kuzinga mvu ka mvu. (Yoa. 3:16) Befu boso tumana mona ti Yave widi nkua kiadi. (Yesa. 49:15) Nandi zabizi dizina di kadika mutu mu befu. Bukiedika, nandi wutuzabizi buboti ayi kheti tufuidi nandi kalenda kubue tuvanga na yoyawu nyitu ayi kututula momawu mayindu tuba! (Matai 10:29-31) Bukiedika, tuidi bibila bimboti muingi kuba lufiatu ti Tat’itu yi luzolo, wala fundisa kadika mutu mu phila yisonga ayi wala lemvukila batu.—Tia. 2:13.
Tulenda ba lufiatu ti Yave wala fundisa kadika mutu mu phila yisonga, yivedila ayi mu nlemvu (Tala lutangu 16)
17. Mbi tunkuiza tubila mu dilongi dinlanda?
17 Tsudukusu tuma mona mu dilongi adidi, yima tusadisa kumona ti tufueti luta samuna zitsangu zimboti bubu. Kibila mbi tuntubila mawu? Ayi mbi bituvanga kutatamana kusamuna zitsangu zimboti mu khambu vonga? Tunkuiza baka mimvutu mi biuvu abiobio mu dilongi dinlanda.
NKUNGA 76 Yangalala mu Ntim’aku
a Muingi kuvisa buboti kibila mbi tubaludila diambu adiodio, tala dilongi dintuba “Esse é o modo aprovado por ti,” mu Kibanga ki Nsungi kilumbu 15 Ngonda Yintatu, mvu 2015 tsielu. 7-11.
b Bo Babiloni Yinneni yala tuluka, bisadi bioso bi Yave bala viokila mu zithotolo bo Ngongi yi Mangongi kala banuanisa. Ayi woso mutu wala ba ku khonzu dikabu di Nzambi, mvandi wala thotu.
c MAMBU MADI MU FOTO: Zifoto zimmonisa kibila mbi tulenda tubila ti tualasa nunga ko kusamuna kuidi batu boso mu nza yimvimba, ava tsukulu yiza: (1) Nkietu wumueka wukala ku kibuangu ko kinganga kintuma kuna, ki kikininanga ko binganga binkaka, (2) bakuela bankalanga ku tsi ko zimfumu zi luyalu bankandiminanga ayi bamvondanga batu ba binganga binkaka ayi (3) dibakala wunkalanga ku kibuangu kidi beni phasi muingi kutuka ayi kukhambu kuendanga batu.
d MAMBU MADI MU FOTO: Kikhupa wubika kiedika wuntebuka moyo mambu kalonguka matedi lutululu lu “Babiloni Yinneni” nandi wunyongina masumu mandi ayi wumvutuka ku nzo matata bake bisadi bi Yave. Mambu amomo ma kumonika befu tuntomba kuyindula mu nlemvu ayi kiadi ki Tat’itu yi diyilu ayi kukuangalala boti mutu benyongina masumu.
