1. Khadulu mbi Yesu kadi tunluta zolanga? Sudikisa.

KHADULU mweka yinkinza Yesu kadi yidi phila kamvisilanga ziphasi tumvyokila bo twidi batu basumuka. Bo kaba va ntoto, Yesu wuba wukubama mwingi ‘kukwangalala va kimweka na batu bankwagalala’ ayi ‘kudila va kimweka na batu bandila.’ (Loma 12:15) Dedi, bo 70 di minlonguki mi Yesu bavutuka mu mayangi bo baba fumina mu kisalu ki kusamuna, Yesu “wumona [mayangi] mu pheve.” (Luka 10:17-21) Bo nandi kamona phila batu baba zolanga Lazalo babela mu kibila ki lufwa lwandi, ‘kyadi kingolo kimbwila mu ntima.’—Yoane 11:33.

2. Mbi bisadisa Yesu kuvwa nkinza mabanza ma batu?

² Kheti Yesu wuba mutu wuvedila, nandi wumonisa beni kyadi ayi nlemvo. Mbi binsadisa kumonisa zikhadulu azyozi? Kyuma kilutidi nkinza kisadisa Yesu lwidi luzolo mu batu. Dedi butubidi dilongi divyokidi, nandi ‘waba luta zolanga beni bana ba batu.’ (Zingana 8:31) Luzolo kadi mu batu, lunnata kuzaba buboti phila batu banyindudilanga. Mvwala Yoane wusudikisa: “Bila nandi veka wuzaba mambu madi mu mutu.” (Yoane 2:25) Yesu waba banga mu kyunda bo bankaka baba tovukanga. Batu baba monanga luzolo nandi kaba kwidi bawu, diawu baba kikininanga kukuwa zitsangu zi Kintinu. Befu mvitu bo tummona batu kyadi, buawu mvandi twala luta bela bakubama mwingi kusadisa batu mu kisalu ki kusamuna.—2 Timoteo 4:5.

3-4. (a) Boti tumvwanga nkinza mabanza ma bankaka, bwidi twala tadila kisalu ki kusamuna? (b) Mbi twenlonguka mu dilongi adidi?

³ Mvwala Polo wuzaba ti nandi kafweti samuna, ayi befu mvitu tuzebi ti tufweti samuna. (1 Kolinto 9:16) Diawu, befu kuvwa nkinza mabanza ma bankaka, twalasa tadila ko kisalu ki kusamuna  buka kisalu ba kukwika kuvanga, vayi phila yi kumonisina ti tumvwanga bankaka nkinza ayi tutidi kubasadisa. Befu tuzebi ti ‘mayangi ma kuvana, malutidi mayangi madi mu kutambula.’ (Mavanga 20:35) Kibila kitu ki kusamunina kya kuba ki kutomba sadisa bankaka, befu twala luta baka mayangi mu kusamuna.

⁴ Mu dilongi adidi, twenlonguka bwidi tulenda monisina ti tumvwanga nkinza mabanza ma bankaka mu kisalu ki kusamuna. Tunkwiza mona theti mbi tulenda longuka mu phila Yesu kaba vwilanga batu nkinza. Bosi twala tubila ziphila zinna tulenda landikinina kifwani kyandi.—1 Petelo 2:21.

5-6. (a) Phila batu mbi Yesu kavwa nkinza? (b) Dedi buntubila mbikudulu yidi mu Yesaya 61:1, 2, kibila mbi Yesu kamwena kyadi batu beni?

⁵ Tala kifwani kimweka kimmonisa bwidi Yesu kamonisina ti waba vwanga nkinza mabanza ma bankaka. Khumbu yimweka, Yesu ayi minlonguki myandi baba bavonga bila basamuna zitsangu zimboti mu khambu vunda. Bawu basa baka ko “thangu yi [kudila] bidia.” Diawu Yesu kanatina minlonguki myandi “va buangu kikambulu batu” ayi ‘bavunda nkadu.’ Vayi, batu bawombo batwama kuma Yesu ayi minlonguki myandi baba kwenda. Bo Yesu katuka ayi kamona batu beni, bwidi nandi kamwena mawu ayi mbi kavanga? Nandi “wuba mona kiadi *, bila baba banga mamemi bakambulu nsungi. [Ayi] wutona kuba longa mambu mawombo.”—Malako 6:30-34.

⁶ Kibila mbi Yesu kamwena kyadi mabanza ma batu beni? Nandi wumona ti batu beni “baba banga mamemi bakambulu nsungi.” Ḿba Yesu wumona ti bawombo mu bawu baba biphumbulu ayi baba salanga bilokolu biwombo mwingi kukeba makanda mawu. Bankaka baba beni mu kyunda kibila mutu baba zolanga wufwa. Boti buawu, buna Yesu wuvisikisa  mambu baba vyokila. Dedi bo tumweni mu dilongi divyokizi, Yesu ḿba wuvyokila mvandi mu mambu ma phila ayoyi. Yesu waba vwanga nkinza bankaka, ayi waba tomba kuba zabikisa zitsangu zilenda ku babomba.—Tanga Yesaya 61:1, 2.

7. Bwidi tulenda landikinina kifwani ki Yesu?

⁷ Mbi tunlonguka mu kifwani ki Yesu? Dedi Yesu, batu ba tuzungidila badi buka “mamemi bakambulu nsungi.” Bawu bamvyokilanga mu mambu mawombo maphasi. Befu twidi byuma bawu bantomba—zitsangu zi Kintinu. (Nzaikusu 14:6) Diawu tunlandikininanga kifwani ki Yesu ayi tunsamunanga zitsangu zimboti bila befu ‘tummonanga kiadi mutu wulebakana ayi nsukami.’ (Minkunga 72:13) Befu tummonanga batu kyadi, ayi tutidi kuvanga dyoso dyambu mwingi kubasadisa.

8. Bwidi tulenda monisina ti tumvwanga nkinza mabanza ma bankaka mu kisalu ki kusamuna? Vana kifwani.

⁸ Mbi bilenda kutusadisa kumonisanga ti tumvwanga nkinza mabanza ma batu tunsamunanga? Tufweti kukitula va kibwangu ki batu tunsamunanga ayi kubavangila mambu dedi bo tuntomba ba tuvangila. * (Matai 7:12) Ndoko tutubila ziphila zinna tulenda vangila mawu. Yitheti, kuyindula zitsatu zi kadika mutu. Befu tulenda fwanikisa mambu tumvanganga bo tunsamuna dedi mambu mfelimi kamvanganga. Mfelimi wumboti wunyindulanga theti zitsatu zi kadika mutu widi mu kubela. Nandi wumvanganga byuvu ayi wunkuwanga buboti mambu mutu wumbela kantuba matedi mambu ma kuntatisa. Mfelimi kalendi kumvana ko mu thinu bilongo nandi kammwena ti kafweti tona kunwa, vayi kalenda vyokisa theti mwa thangu mwingi kamona buboti mambu mantatisa mutu wumbela bosi kalenda kunsonikina bilongo kafweti nwa. Bobuawu mvandi, tulendi sadila ko mbonosonu yimweka kwidi batu boso tundengana mu kisalu ki kusamuna. Vayi tufweti tomba kuvisikisa mayindu ma kadika mutu.

9. Mambu mbi tufweti bika fika yindula bo tumvana mutu kimbangi khumbu yitheti? Sudikisa.

⁹ Bo tumvana mutu kimbangi khumbu yitheti, bika fika yindula ti zebi mambu kadi mu kuvyokila, mambu kankikininanga ayi kibila mbi kankikininanga mawu. (Zingana 18:13) Vayi mu lukinzu tumvanganga byuvu mwingi tuzaba matedi nandi ayi mambu kankikininanga. (Zingana 20:5) Boti mu kikhulu kyaku disi ko dyambu dimbi di kuvanga, buna wulenda kunkuvula matedi kisalu, dikanda dyandi, mambu matedi nzingulu’andi kumbusa ayi mambu kankikininanga. Mu thangu tumvana bankaka byuvu, befu tubavananga lwaku mwingi batukamba kibila mbi bantombila zitsangu zimboti. Bo tuzabizi mawu, tulenda monisa ti  tumvwanga nkinza mabanza mawu mu kubasadisa mu mambu batomba kuzaba buka bo Yesu kavangila.—Dedikisa na 1 Kolinto 9:19-23.

10-11. Dedi buntubila 2 Kolinto 4:7, 8, phila mbi yimwadi tulenda monisina ti tumvwanga nkinza mabanza ma bankaka? Vana kifwani.

¹⁰ Yimwadi, yindula mambu batu bamvyokila mu luzingu. Buawu tulenda visila mambu bamvyokila. Kibila, befu mvitu twidi batu bamasumu ayi tumvyokilanga mu mambu maphasi batu boso bamvyokilanga. (1 Kolinto 10:13) Tuzabizi ti luzingu mu nza ayiyi lwidi beni phasi. Vayi befu tunnunganga mu lusalusu lu Yave. (Tanga 2 Kolinto 4:7, 8.) Yindul’abu batu bakhambu ba kikundi kifikama na Yave. Dilenda ba dyambu diphasi beni kwidi bawu kuzinga mu nza ayiyi mu khambu baka lusalusu lwandi. Buka Yesu, tummonanga kyadi batu, ayi befu tutidi kubazabikisa ‘zitsangu zi mambu malutidi mboti.’—Yesaya 52:7.

¹¹ Landakana kifwani ki khomba mweka bantedilanga Sergey. Ava kulonguka kyedika, Sergey kabasa kolukanga ko beni ayi wuba beni zitsoni. Diba dyambu diphasi kwidi nandi kukoluka na bankaka. Buvyokila thangu, nandi wuvitika kulonguka Kibibila. Sergey wutuba: “Bo yilonguka Kibibila, minu yilonguka ti Baklisto badi nswa wu kuzabizisa bankaka mambu matedi kiminu kiawu.” Nandi wubwela tuba: “Minu yisa ba ko lufyatu ti yilenda nunga kumavanga.” Vayi nandi waba yindulanga beni batu bakhambu zaba kyedika, ayi wuzaba ti luzingu luawu ḿba phasi beni lwidi bila bawu basa zaba ko Yave. Nandi wutuba: “Mambu mamona yaba longuka maba kunthwadisa mayangi mawombo ayi ndembama mu ntima. Minu yizebi ti bankaka bafweti longuka mvandi kyedika.” Bo mabanza ma Sergey ma kuvwa bankaka nkinza mabwela konzuka, nandi wuyiza visa ti wuba beni kibakala mwingi kusamuna. Sergey wutuba “Minu yiyituka beni, kibila kukamba bankaka matedi mambu ma Kibibila mabwela lufyatu lwama. Ayi kukamba bankaka matedi mambu yinkikininanga kumbwela kindisanga kiminu kyama.” *

12-13. Kibila mbi tufweti bela mvibudulu kwidi batu tunlonga mu kisalu ki kusamuna? Vana kifwani.

 ¹² Yintatu, ba mvibudulu kwidi batu wunlongisa. Tebuka moyo ti bawu basa longuka ko kyedika ki Kibibila ngye zebi buboti. Bawombo badi beni bakwikama mu mambu bankikininanga. Bawu balenda mona ti mambu bankikininanga mantwalanga kithwadi na dikanda diawu, kikhulu kiawu voti va nsengi’awu. Bwidi tulenda kubasadisila?

¹³ Yindula mambu amama: Mbi bimmonikanga boti kikada kyeka mimvu miwombo, kisyedi ko kimboti ayi bafweti vingisa kiawu? Khumbu zinkaka, kikada kimona ba kitunganga, bo bakhidi sadila kikada kikhulu. Kikada kimona kya kumana, bosi balenda tulula kikhulu. Bobuawu mvandi, ava tukamba batu babika mambu “makhulu” bankikininanga, tufweti kubasadisa theti kukuna luzolo mu kyedika “kimona” twidi kubalonga mu matedi minsiku mi Kibibila bakhambu zaba. Bosi bawu bala ba bakubama mwingi kubika nzingul’awu yikhulu. Valenda vyoka mimvu miwombo mwingi kusadisa batu kubalula mavanga.—Loma 12:2.

14-15. Bwidi tulenda sadisila batu kuvikisa matedi kivuvu ki kuzinga ku paladizu va ntoto? Vana kifwani.

¹⁴ Befu kuba mvibukulu kwidi batu tulonga mu kisalu ki kusamuna, twisinvingila ko bawu bafika visa voti kuvitika kyedika ki Kibibila tubalonga mu khumbu yitheti. Vayi, kuvwa nkinza mabanza ma bankaka kwala tunata kubasadisa kuyindula buboti mambu Kibibila kintuba. Vayi thangu yintombulu mwingi kubasadisa. Mwingi kufwanikisa, tala bwidi tulenda sadisila mutu kuvisa dilongi diteti kuzinga mvu ka mvu ku paladizu va ntoto. Bawombo bakhambulu luzabu voti badi nkadu luzabu mu matedi kivuvu ki kuzinga va ntoto ku Paladizu. Bankaka bankikininanga ti mutu na kufwa, kalendi bwe zinga ko. Voti banyindulanga ti batu boso bamboti ku diyilu bankwenda. Bwidi tulenda kubasadisila?

¹⁵ Tala kifwani kimmonisa bwidi khomba mweka kansadisilanga batu kuvisikisa kivuvu ki kuzinga mvu ka mvu va ntoto. Theti, nandi wuntanganga Ngenesi 1:28. Bosi wunkuvulanga beki nzo: “Mu mbwenu’aku, kwidi Nzambi kaba tomba batu bazingila ayi phila luzingu mbi kaba tomba bawu baba?” Bawombo bamvutudilanga: “Nandi waba tomba bawu babaka luzingu lu mayangi va ntoto.” Bosi khomba beni wubwe tanganga Yesaya 55:11 ayi wunkuvulanga boti lukanu lu Nzambi lubaluka. Khumbu ziwombo beki nzo wuntubanga ti ndamba. Bosi kutsuka khomba wuntanganga Minkunga 37:10, 11 ayi wunkuvulanga bwidi batu bala zingila kuntwala. Mu kusadila Kibibila mu phila ayoyi, nandi masadisa batu bawombo kuvisa ti lukanu lu Nzambi lu batu kuzinga mvu ka mvu ku Paladizu va ntoto lusa baluka ko.

16-17. Dedi buntubila Zingana 3:27, bwidi tulenda monisina mabanza ma kuvwa nkinza bankaka? Vana kifwani.

¹⁶ Yinna, yindula mbi wulenda vanga mwingi kumonisa batu ti wuba vwanga nkinza.  Dedi, mbi tulenda vanga boti tumvutukila mutu mu thangu yikhambu fwana? Tulenda dinda mlemvo ayi kuvutuka mu khumbu yinkaka. Vayi boti mutu beki nzo mwa lusalusu kantomba? Voti mutu widi ku nzo vayi wuntomba lusalusu mwingi bansumbila byuma kuzandu, voti kunsonikina nkanda? Mu mambu amomo, tulenda kukivana mwingi kusadisa mutu beni.—Tanga Zingana 3:27.

¹⁷ Khomba mweka yinkyeto wubaka ndandu bo kavanga dyambu dimweka dyaba monika buka ti disa ba ko nkinza. Nandi waba vwanga nkinza dikanda dimweka, diawu kaba sonikina nkanda bo mwan’awu kafwa. Muna nkanda beni, nandi wusonika mvandi matangu ma Kibibila mwingi kuba bomba. Bwidi dikanda beni dibakila khindusulu mu nkanda baba fila? Nkyeto beni wufwilu mwana wusonika: “Kibedi yono kilumbu kyama kisa ba ko kimboti. Ḿba wulendi yindula ko phila nkand’aku wutusadisidi. Yimvutula beni matondo mu nkand’aku wufila, bila wutubomba beni. Ḿba yitengi nkanda beni 20 di zikhumbu kibedi yono. Minu yiyangalala beni mu phila nkad’aku wu tukindisila ayi wu tubombila. Tumvutula beni matondo mu ntim’itu woso.” Bukyedika, befu tulenda baka ndandu befu kukitula va kibwangu ki batu badi mu kutovuka ayi kuvanga dyoso dyambu mwingi kubasadisa.

18. Dedi buntubila 1 Kolinto 3:6, 7, mambu mbi tufweti tebukilanga moyo mu matedi kisalu kitu ki kusamuna, ayi mu kibila mbi?

¹⁸ Bukyedika, tutidi kutadila mu phila yifwana kiyeku twidi mu kisalu ki kusamuna. Befu tulenda sadisa bakanka kulonguka matedi Nzambi, vayi kiyeku kilutidi nkinza kisi ko kitu. (Tanga 1 Kolinto 3:6, 7.) Yave nandi wunsolanga batu. (Yoane 6:44) Ayi kutsuka, kadika mutu wala tambula zitsangu zimboti boso bwididi ntim’andi. (Matai 13:4-8) Tebuka moyo ti batu bawombo basa kikinina ko malongi ma Yesu—kheti nandi wuba nlongisi wulutidi wuma zinga va ntoto! Diawu, tulenda ba ko mu kyunda boti batu tuntomba kusadisa bammanga kukuwa zitsangu tunsamuna.

19. Ndandu mbi twala baka befu kuvwa batu nkinza mu kisalu ki kusamuna?

¹⁹ Befu twala baka ndandu befu kuvwa nkinza mabanza ma bankaka mu kisalu ki kusamuna. Twala luta zola mvandi kisalu ki kusamuna. Twala mona mayangi mankwizanga mu kuvana. Ayi mu khambulu phasi tunsadisanga batu boso badi ‘bakubama mu kubaka luzingu lukalumani’ mwingi kutambula zitsangu zimboti. (Mavanga 13:48) Diawu ‘bo tukhidi lwaku, tuvanga mamboti kuidi batu boso.’ (Ngalatia 6:10) Bosi befu twala baka mayangi mu kutwadisa nzitusu kwidi Tat’itu widi ku diyilu.—Matai 5:16.