DILONGI 11
Yuwa Mbembo yi Yave
‘Awuwu widi Mwan’ami. . . Bika lunyuwila.’—MATAI 17:5.
NKUNGA 89 Yuwa, Tumamana, ayi Baka Lusakumunu
MAMBU TWANLONGUKA *
1-2. (a) Bwidi Yave kaba kolukilanga na batu? (b) Mambu mbi twantubila mu dilongi adidi?
YAVE wunzolanga kukoluka yitu. Mu thangu yikhulu, nandi wusadila miḿbikudi, zimbasi, ayi Mwan’andi Yesu Klisto, mwingi kutuzabikisa mayingu mandi. (Amosi 3:7; Ngalatia 3:19; Nzaikusu 1:1) Bubu, nandi wunkolukanga yitu mu nzila Kibibila. Nandi wutuvana kiawu mwingi tulonguka mayindu mandi ayi tuvisa zinzila zyandi.
2 Bo Yesu kaba va ntoto, Yave wu yoluka yandi khumbu zitatu. Twantubila mambu Yave katuba ayi mbi tulenda longuka mu mambu beni, ayi bwidi tulenda mabakila ndandu.
‘NGYE WIDI MWAN’AMA WU LUZOLO’
3. Dedi buntubila buku yi Malako 1:9-11, mbi Yave katuba bo Yesu kabotama, ayi bivisa mbi binkinza bidi mu mambu katuba?
3 Buku yi Malako 1:9-11 yintubila khumbu yitheti Yave kayoluka na mwan’andi (Tanga.) Nandi wutuba: ‘Ngye widi Mwan’ama wu luzolo; Nyenzi beni wukumbonisanga.’ Bukyedika, mawu manyikuna mabanza ma Yesu ku kuwa mbembo yi Tat’andi. Bila yiba mbonosonu yi luzolo ayi yi lufyatu kwidi nandi! Mambu Yave katuba mamonisa bivisa bitatu binkinza mu matedi Yesu. Kitheti, Yesu widi Mwan’andi. Kimwadi, Yave wunzolanga Mwan’andi. Ayi kintatu, Mwan’andi wu kunkwangidikanga. Ndoko tufyongunina bivisa abyobi.
4. Bo Yesu kabotama, kikundi mbi kimona kayiza tona na Yave?
4 ‘Ngye widi Mwan’ama.’ Mambu amama mammonisa ti Yave wubwe tona kikundi kimona na Mwan’andi wu luzolo. Bo Yesu kaba ku diyilu, nandi wuba mwana Nzambi wu kiphevi. Vayi bo kabotama, nandi wubwe kituka mwana wumona, wusolo mu phevi yilongo. Ayi wubwe baka lwaku lu kuvutuka kudiyilu mwingi kaba Ntinu ayi nkulutu mu ziganga zi Nzambi. (Luka 1:31-33; Ebeleo 1:8, 9; 2:17) Diawu bo Yesu kabotama Tat’andi katubila mu mayangi: ‘Ngye widi Mwan’ama.’—Luka 3:22.
Befu tumbakanga khindusulu bo ba kututonda (Tala lutangu 5) *
5. Bwidi tulenda landikinina kifwani ki Yave ki kukindisa bankaka ayi kumonisa luzolo?
5 ‘Ngye widi Mwan’ama wu luzolo.’ Akiki kidi kifwani kimboti beni. Kibila mambu amama mammonisa ti Yave widi beni luzolo mu mwan’andi Yesu. Befu mvitu, tufweti tombanga lwaku lu kunyunga ayi kukindisa bankaka. (Yoane 5:20) Bwidi wummwenanga kutsi’aku ntima bo mutu ka kumonisa luzolo mu kuvwa nkinza voti ka kukindisa? Bukyedika ti wunkwangalalanga beni. Mawu mvandi, zikhomba zitu mu kimvuka ayi basi dikanda ditu bantomba tuba vangila. Befu kumonisa luzolo mu kutonda khomba mu kimvuka, bukyedika kiminu kiadi kinkwiza bwela ba kikinda ayi kutatamana kusadila Yave. Matata bafweti kindisa bana bawu. Mu thangu matata batondanga bana bawu mu bukyedika ayi baba monisanga luzolo, bawu bansadisanga bana bawu kunkonzuka.
6. Kibila mbi tulenda fyatila Yesu Klisto?
6 ‘Nyenzi beni wukumbonisanga.’ Mambu Yave katuba mammonisa ti nandi wuba lufyatu ti Yesu wala nunga kuvanga luzolo lwandi. Boti Yave widi lufyatu mu Mwan’andi, befu mvitu tulenda ba lufyatu ti Yesu wala dukisa zikhanu zyoso zi Yave. (2 Kolinto 1:20) Kunyindula kifwani ki Yesu, kutusadisanga kubwela baka makani ma kulandakana ntungulu’andi. Dedi bo Yave kadidi lufyatu mu Yesu, Nandi mvandi widi lufyatu ti bisadi byandi, bela tatamana kulandakana ntungulu’andi.—1 Petelo 2:21.
‘BIKA LUNYUWILA.’
7. Dedi buntubila Matai 17:1-5, thangu mbi Yave kayolukila tona ku diyilu, ayi mambu mbi katuba?
7 Tanga Matai 17:1-5. Khumbu yimwadi Yave kayolukila ku diyilu yiba thangu Yesu ‘kakituka.’ Yesu wutumisa Petelo, Yakobi, ayi Yoane mwingi benda yandi ku mongo mweka wunangama. Bo batuka kuna, bawu bamona kimona mesu ki mangitukulu. Busu bu Yesu ayi minledi myandi myaba lezama. Ayi batu bwadi bamonika, wumweka wuba buka Mose ayi wunkaka Elia, bawu batona kukoluka na Yesu mu matedi mambu mala kummonikina kuntwala, lufwa ayi luvulubukusu lwandi. Kheti bapostolo bandi baba ‘beni tolo,’ bawu batatamana bakotuka mu thangu bamona kimona mesu beni. (Luka 9:29-32) Bosi dituti dimweka diba zungidila, ayi bayuwa mbembu yi Nzambi yaba fumina ku diyilu! Buka mu thangu Yesu kabotama, Yave wumonisa ti waba zolanga ayi waba kikinina Mwan’andi, bo katuba: ‘Awuwu widi Mwan’ami wu luzolo, nyenze yiwombo kakumbonisanga.’ Vayi khumbu ayiyi Yave wubwela tuba: ‘Bika lunyuwila.’
8. Bwidi Yesu ayi minlonguki babakila ndandu mu kimona mesu ki Yesu kakituka?
8 Kimona mesu akiki, kiba kifwani kyaba monisa lulendu ayi nkembu wu Yesu bo kala yala buka Ntinu mu Kintinu ki Nzambi. Bukyedika, Yesu wubaka khindusulu yiwombo mwingi kununga kuvyokila mu ziphasi ayi lufwa lwaba kunkwizila. Kimona mesu beni mvandi, kikindisa kiminu ki minlonguki mi Yesu. Kibila kiba sadisa kukubama mu zithotolo zyaba kuba kwizila ayi mu kisalu kingolo batambula mwingi kuvanga kuntwala. Mu 30 di mimvu kuntwala, mvwala Petelo wubwe tubila kimona mesu beni, mwingi kumonisa ti waba tebuka moyo kimona mesu beni.—2 Petelo 1:16-18.
9. Dilongi mbi dinkinza Yesu kavana minlonguki myandi?
9 ‘Lunyuwila.’ Yave wuvisikisa ti nandi wuntomba befu tuyuwanga Mwan’andi ayi tuntumukina. Mbi Yesu katuba bo kaba va ntoto? Nandi wutuba mambu mawombo mankinza tufweti vanga! Buka, mu luzolo nandi wulongisa minlandikini myandi bwidi bu kusamunina zitsangu zimboti. Ayi khumbu ziwombo nandi wuba kindisa batatamana bakotuka. (Matai 24:42; 28:19, 20) Nandi wu bakindisa mvandi batatamana bakwikama ayi babika vongila mu nzila. (Luka 13:24) Yesu wuba monisa nkinza wu kuyizolasana bawu yi bawu, mwingi batatamana kuba kithwadi, ayi balandakana zithumu zyandi. (Yoane 15:10, 12, 13) Bukyedika, dilongi dimboti beni Yesu kavana minlandikini myandi! Dilongi adyodi, nkinza mvandi didi bubu dedi bo dibela mu thangu Yesu kavana diawu.
10-11. Bwidi tulenda monisina ti tunkuwanga mbembo yi Yesu?
10 Yesu wutuba: ‘Woso mutu widi ku khonzo yi kyedika, wunkuwa mbembo’ami.’ (Yoane 18:37) Befu tummonisanga ti tunkuwanga mbembo’andi bo ‘tumvibidila befu na befu, ayi tunzaba lemvukila badi yitu.’ (Kolosai 3:13; Luka 17:3, 4) Tummonisanga mvandi ti tunkuwanga mbembo’andi, bo tunsamuna zitsangu zimboti mu kifuza mu zithangu zyoso “yiba yifuana, voti yikambu fuana.”—2 Timoteo 4:2.
11 Yesu wutuba: “Mamemi mami [bankuwanga] mbembo’ami.” (Yoane 10:27) Minlandikini mi Klisto bayuwanga ko to Yesu mu kuzibula matu mu mambu mandi, vayi mu kusadila mvandi mawu. Bawu bavukumukanga ko mu “mayindu ma luzingu.” (Luka 21:34) Diawu nkinza beni kwidi bawu kutumukina zithumu zi Yesu, kheti bo bamvyokila mu mambu maphasi. Zikhomba zitu ziwombo badi mu kuvyokila zithotolo ziwombo, dedi mu myoko mi zimbeni, kukhambu ku zimbongo, ayi bivuka binneni. Kheti mu mambu moso bamvyokila, bawu bantatamana bakwikama kwidi Yave mu moso kwa mambu ma kubamonikina. Kwidi bawu, Yesu wuba kanikisa mambu amama: ‘Woso mutu wunkikininanga zithumu zyama ayi wu zitumukinanga buna nandi widi luzolo mu minu. Ayi woso mutu widi luzolo mu minu, Tat’ami mvandi wela kunzola.’—Yoane 14:21.
Kisalu kitu ki kusamuna ki tusadisanga tuba bakwikama (Tala lutangu 12) *
12. Phila mbi yinkaka tulenda monisina ti tunkuwanga mbembo yi Yesu?
12 Phila yinkaka tulenda monisina ti tunkuwanga mbembo yi Yesu, yitedi mu sala va kimweka na batu Yave kasola mwingi kutwama ntwala mu kimvuka. (Ebeleo 13:7, 17) Mawombu mama baluka mu kimvuka ki Yave mu mimvu mi mavyoka, dedi bisadulu bimona, ziphila zinkaka zi kusamunina; nkanda wu thwadusulu yi lukutukunu va khati sabala, ayi phila yikutungila ayi yikuludikila Zinzo zi Kintinu. Tumvutulanga beni matondo mu zithwadusulu zi luzolo tuntambulanga! Tulenda ba lufyatu ti Yave wala sakumuna mangolo tumvanganga ma kulandakana zithwadusulu kamvananga mu nzila yi kimvuka.
13. Ndandu mbi twala baka befu kukuwa mbembo yi Yesu?
13 Befu tumbakanga ndandu mu kukuwa mambu moso Yesu kalongisa. Yesu wukamba minlonguki myandi ti malongi mandi mala kubavana phosi mu ntima. Nandi wutuba: ‘Luela baka luvundulu mu miela minu. Bukiedika vangu kiama kisi phasi mu nata ko ayi mfun’ama wisi zitu ko.’ (Matai 11:28-30) Dyambu di Nzambi, kubunda mvandi Zibuku Zinna zintubila luzingu ayi kisalu ki kusamuna ki Yesu, zitukindisanga, zimbwelanga mangolo mitu ma kiphevi ayi zituvananga ndwenga. (Minkunga 19:7; 23:3) Yesu wutuba: ‘mayangi madi kwidi bobo bankuwanga ayi bantumamananga dyambu di Nzambi!’—Luka 11:28.
‘MINU YALA KEMBISA DIZINA DYAMI’
14-15. (a) Dedi buntubila matangu ma Yoane 12:27, 28, khumbu mbi yintatu Yave kayolukila kudiyilu? (b) Kibila mbi mambu ma Yave mabombila ayi makindisila Yesu?
14 Tanga Yoane 12:27, 28. Buku yi Yoane yintubila khumbu yintatu Yave kayoluka kudiyilu. Mwa bilumbu bivyoka ava kafwa, Yesu wuba ku Yelusalemi mwingi kukemba kungi wu tsuka wu Pasika. Nandi wutuba: ‘Minu yidi mu kyunda kingolo.’ Diawu kasambidila: “Tata, kembisa dizina diaku.” Mu thangu beni nandi wuyuwa mbembu yi Tat’andi ku diyilu: ‘Minu yi dikembisanga ayi yala bwela kudikembisanga.’
15 Yesu wuba mu kyunda kingolo mu kibila ki kiyeko kinneni kaba ki kutatamana wukwikama mu Yave. Yesu wuzaba ti wunkwiza tovuka beni ayi wunkwiza fwa. (Matai 26:38) Kukembisa dizina di Tat’andi, kiawu kyuma kiluta ba nkinza kwidi Yesu. Yesu bamvunina mambu, ayi nandi waba kwazuka beni mwingi lufwa lwandi lubika twadisa zitsonya. Bukyedika, mambu Yave katuba masadisa Yesu kuba lufyatu lungolo! Nandi wuvisa ti dizina di Nzambi dyala kembusu. Mambu Tat’andi katuba mabomba ntim’andi ayi mankindisa mu mambu maba kunkwizila kuntwala. Kheti naveka to Yesu wuvisikisa mambu Tat’andi katuba mu thangu beni, Yave wuvanga mangolo mwingi mambu Nandi katuba maba masonama mwingi tubakila mawu ndandu.—Yoane 12:29, 30.
Yve wala kembisa dizina dyandi ayi wal kula dikabu dyandi (Tala lutangu 16) *
16. Kibila mbi thangu zinkaka tulenda tatubukila mu matedi dizina di Nzambi?
16 Buka Yesu, befu mvitu tulenda tatubuka beni mu phila batu bamfwisila tsoni dizina di Yave. Dedi mamonikina Yesu, batu ḿba balenda tuvangila mambu makhambulu masonga. Voti tulenda ba divuda mu kibila ki mambu ma luvunu zimbeni zitu bantubanga. wulenda yindula zitsoni mambu amomo mantwadisanga mu dizina di Yave ayi kimvuka kyandi? Mu thangu ayoyi, mambu ma Yave ma tukindisanga beni. Tubika mona boma mu mambu batu bamvunina Yave ayi dikabu dyandi. Vayi tuba ba lufyatu ti ‘ndembama yi Nzambi, yoyi yivyokidi dyela dyoso, yela kyeba mintima mitu ayi mayindu mitu mu Klisto Yesu.’ (Filipi 4:6, 7) Yave wala tatamana kuzitisa dizina dyandi. Mu nzila Kintinu ki Nzambi, nandi wala manisa ziphasi zyoso Satana ayi nza ayiyi bantwadisanga kwidi bisadi byandi bikwikama.—Minkunga 94:22, 23; Yesaya 65:17.
NDANDU YIDI MU KUKUWA MBEMBU YI YAVE BUBU
17. Dedi buntubila Yesaya 30:21, bwidi Yave kankolukilanga yitu bubu?
17 Yave wukhidi kolukanga yitu bubu. (Tanga Yesaya 30:21.) Bukyedika ti tuyuwanga ko mbembu yi Nzambi ku diyilu. Vayi nandi wutuvana Kibibila Dyambu dyandi, mwingi kutuvana zithwadusulu. Phevi yinlongo yi Yave yinsadilanga mvandi ‘Nnanga Wukwikama’ mwingi katatamana kuvana bidya bi kiphevi kwidi bisadi byandi. (Luka 12:42) Vadi bilongulu biwombo tuntambulanga mu minkanda ayi binkaka mu khondi mayo. Ayi mvandi zivideo ziwombo ayi bilongulu biswekulu mu fono bitusadisa kukindisa kiminu kitu!
18. Bwidi mambu ma Yave mankindisilanga kiminu kyaku ayi kibakala?
18 Tufweti tembukanga moyo mambu Yave kakamba Mwan’andi bo kaba va ntoto! Mambu ma Nzambi masonama mu Kibibila, ma tuvana lufyatu ti Yave zebi mambu moso mamvyoka ayi nandi wala manisa mambu moso Satana ayi nza yimbi bantwadisanga. Kuzaba mawu, kulenda tusadisa kutatamana kukuwa mbembo yi Yave. Befu kuvanga mawu, twala nunga ziphasi tumvyokila bubu, ayi ziphasi twala dengana kuntwala. Kibibila ki tutebula moyo: ‘Lufweti ba bakwikuma, mwingi lutambula mambu Nzambi kalukanikisa, bo lumvanga luzolo lwandi.’—Ebeleo 10:36.
NKUNGA 4 “Yave Nsungi’ami”
^ Lut. 5 Bo Yesu kaba va ntoto, Yave wu yoluka yandi khumbu zitatu. Khumbu mweka Yave ka kambila minlonguki mi Klisto ti ‘Bika lunyuwila.’ Bubu Yave wukhidi kolukanga na bisadi byandi mu nzila Kibibila, kubunda mvandi malongi ma Yesu ayi mo tuntambulanga mu nzila kimvuka kyandi. Mu dilongi adidi, tunkwiza mona kibila mbi didi dyambu dimboti kukuwila Yave ayi Yesu.
^ Lut. 52 MAMBU MADI MU ZIFIKULA: Nkulutu mweka wu kimvuka wummona nsadisi wu bakulutu bu kudyodisila Nzo yi Kintinu ayi bu kusadila va kibwangu bambongilanga binlongulu mu Nzo yi Kintinu. Nkulutu beni wu kuntonda mu mawu.
^ Lut. 54 MAMBU MADI MU ZIFIKULA: Bakwela bamweka ku Serra Leoa bamvana nkanda wu kutumisina mutu mu lukutukunu kwidi nlobi zimfu.
^ Lut. 56 MAMBU MADI MU ZIFIKULA: Zimbangi zi Yave bakutakana ku nzo yimweka, ku tsi yi bazibika kisalu kitu ki kusamuna. Bawu babe vwata mu phila yifwana mwingi babika kubazaba banga Zimbangi zi Yave.
