DILONGI 10
Luzolo mu Yave Lutukindisa Muingi Kubotama
“Mbi bi kukhakidila mu kubotama?” — MAVANGA 8:36.
NKUNGA 37 Sadila Yave mu Ntim’aku Woso
MAMBU TUANLONGUKA *
1-2. Dedi bummonisina Mavanga 8:27-31, 35-38, mbi bisadisa dibakala muisi Etiopi kubaka makani ma kubotama?
NGIE tidi kubotama ayi kuba nlandikini wu Klisto? Bawombo babaka makani amomo. Vayi mbi biba sadisa? Luzolo badi mu Yave ayi phuila yi kuntonda mu mamoso kaba vangilanga. Tala kifuani ki dibakala dimueka di muisi Etiopi Kibibila kantubila.
2 Bo dibakala beni kazaba kiedika kitedi Nzambi, luzolo luandi mu Yave lubuelama ayi lunkindisa kubaka makani ma kubika kinganga kiandi ayi kukuendanga ku Yelusalemi muingi kubuongimina Yave va kimueka na dikabu diandi. (Tanga Mavanga 8:27-31, 35-38.) Kilumbu kinkaka bo kaba vutuka ku Etiopi, mu nzila nandi wuba kuiza tanganga mbikudulu yi Yesaya, vayi kabasa visa ko mawu buboti. Buawu Filipi mu thuadusulu yi phevi yinlongo, kamakina mu dikalu dibakala beni kaba ayi wunsudikisa ti mbikudulu beni, yaba tubila matedi Yesu. Mbi nandi kayiza vanga? Muna ntangu beni, nandi wudinda muingi kabotama ayi kaba nlandikini wu Yesu. Ayi nandi wuzaba ti kubotama yiba phila yi kutondila Yesu mu khudulu’andi.—Matai 28:19.
3. Mbi bilenda kutula nkaku mu kubotama? (Tala dibaya dintuba “ Phila Ntoto Mbi Yesu Katubila Wundedakana na Ntim’aku?”)
3 Luzolo mu Yave lulenda kusadisa kubaka makani ma kubotama. Vayi luzolo mvandi lulenda kutula nkaku mu mawu. Buidi malenda bela? Tala mambu amama matatu tulenda fuanikisa. Ditheti, luzolo widi kuidi dikanda diaku ayi bakundi bakhambulu Zimbangi zi Yave, lulenda kuvanga kuyindula ti ngie kubotama, bawu bankuiza kulenda ayi kutatuka. (Matai 10:37) Dimuadi, mba vadi kifu kimbi ngie wunzolanga beni ayi widi mu kumona phasi mu kubika, kheti mu kuzaba ti Nzambi kazolanga ko kiawu. (Minkunga 97:10) Dintatu, dilenda ba kutebukanga moyo minkungi mi binganga bi luvuni wuba kembanga. Luzolo mu minkungi beni, lulenda kutula nkaku kubika miawu kheti mu kuzaba ti Yave kakikininanga ko miawu. (1 Kolinto 10:20, 21) Diawu buboti ku yikuvusa, “mbi ove nani yinluta zolanga?”
MUTU TUFUETI LUTA ZOLA
4. Mbi bilenda kusadisa kubaka makani ma kubotama?
4 Vadi mambu mawombo tunzolanga ayi tumvutudilanga beni matondo. Dedi, kuzaba Kibibila, Yesu ayi Zimbangi zi Yave. Vayi masi ko to mawu mantombulu muingi kubotama. Kibila ava ngie kulonguka Kibibila, matedi Yesu ayi kuzaba Zimbangi zi Yave, mba ngie wuba kuba zolanga. Angi Luzolo mu Yave, kiawu kibila kilutidi nkinza muingi kukivana ayi kubotama. Ngie kuluta zola Yave, vasi ko kiuma kilenda kutula nkaku mu kukivana kuidi Nandi. Ayi luzolo beni, luawu luala kusadisa kutatamana wukuikama mu nzila yikiedika.
5. Mambu mbi tuanlonguka?
5 Yesu wutuba ti tufueti Zola Yave mu ntim’itu woso mu muel’itu woso, mu mayindu mitu moso ayi mu zingolo zitu zioso. (Malako 12:30) Mbi wulenda vanga muingi kuzola Yave ayi kunkinzika mu phila Yesu katubila? Mu kuyindula phila Yave kakumonisilanga luzolo. Kuvanga mawu, mala kusadisa kuvutulanga matondo kuidi Yave. (1 Yoane 4:19) Mabanza mbi ayi mavanga mbi wala monisa bo luzolo luaku mu Yave lumbuelama? Mawu tuenlonguka mu dilongi adidi *
6. Dedi bummonisina Loma 1:20, mu phila mbi yinkaka tulenda longukila matedi Yave?
6 Longuka matedi Yave mu kutala bivangu biandi. (Tanga Loma 1:20 Nzaikusu 4:11) Botula mua thangu muingi kutala ayi kuyindula luzabu luwombu kadi mu phila kavangila mintindu na mintindu mi minti ayi bibulu. Voti fiongunina mu phila yi kukuitukila nandi kavangila nyitu’aku. (Minkunga 139:14) Ayi yindula ntindu mangolo katula mu Thangu ayi mafunda na mafunda ma zimbuetila zinkaka muingi kuvana kiezila ntoto wumvimba. * (Yesaya 40:26) Ngie kuvanga mawu, luzolo luaku mu Yave lunkuiza buelama. Vayi kuzaba ti Yave nkua luzabu ayi nkua ngolo zioso, bakana mawu to mantombulu muingi kukuna kikundi kimboti ayi nandi. Angi muingi tuba luzolo luwombo mu nandi, tufueti buela kunzaba buboti.
7. Mbi wufueti vanga muingi luzolo luaku mu Yave lubuelama?
7 Buboti beni kuzaba ti Yave kavuanga ko to nkinza batu boso, vayi mvandi wukuvuanga nkinza. Boti ngie phasi wummonanga kukikinina ti mvangi diyilu ayi ntoto wukuvuanga nkinza, muna tebuka moyo ti Yave ‘kasi ko thama kuidi kadika mutu mu befu’. (Mavanga 17:26-28) Nandi “wumfionguninanga mintima mioso” ayi wunkanikisa ti “ngie kuntomba, wela mbakula.” (1 Lusansu 28:9) Ayi zaba ti ngie widi luaku lu kulonguka Kibibila, kibila nandi ‘wu kutumisa’ (Yelemia 31:3) Bo wumvisa mamoso Yave kakuvangilanga, buawu luzolo luaku mu Yave lumbuelimina.
8. Mu phila mbi wulenda vutudila Yave matondo mu luzolo luandi?
8 Kusambila kuidi Yave, yidi phila wulenda vutudila matondo mu luzolo luandi kuidi ngiewu. Mu thangu wunkamba Nzambi mambu ma kutatisa ayi wu kuntonda mu mamoso ka kuvangilanga, buawu luzolo luaku mu Nandi lumbuela kukindila. Ayi mu thangu wummona phila Nandi kantambudila minsambu miaku, kikundi kinu kiala buela kinda. (Minkunga 116:1) Mawu mvandi, mala buela lufiatu luaku ti Nandi wukuvuanga nkinza. Vayi muingi wuba kikundi kimboti na Yave, ngie fueti visa phil’andi yi kuyindudila. Ayi ngie fueti zaba mbi Nandi kantomba mu ngiewu. Bukiedika, kulonguka Kibibila, yawu to phila wulenda zabila mawu.
Kulonguka Kibibila yidi phila yimbote tulenda fikimina Yave ayi kuzaba mambu nandi kantomba tuvanga (Tala lutangu 9) *
9. Buidi wulenda monisina ti wumvuanga nkinza Kibibila?
9 Longuka kukinzika Kibibila, Diambu di Nzambi. Kibibila kiawu to kintuba kiedika kitedi Yave ayi mambu Nandi kantomba mu ngiewu. Diawu, tanganga Kibibila kadika kilumbu ayi kubikanga ndongukulu’aku. Mu phila ayoyi, ngie wala monisa ti wumvuanga nkinza Kibibila. (Minkunga 119:97, 99; Yoane 17:17) Ngie widi thuadusulu yi kutanganga Kibibila kadika kilumbu? Boti widi, tatamana kuvanga mawu.
10. Mambu mbi tulenda longukila to mu Kibibila?
10 Kibibila kiawu to kinsudikisa mambu Yesu kavanga muingi kutukula. Ayi mvandi kiawu to kintubila matedi batu bamona Yesu. Diawu, ngie kulonguka mambu Yesu katuba ayi kavanga, malenda buela kukindisa luzolo luaku mu nandi.
11. Mbi bilenda kusadisila kubuela luzolo luaku mu Yave?
11 Longuka kuzola Yesu; ayi luzolo luaku mu Yave lunkuiza buelama. Mu kibila mbi? Kibila Yesu nandi wulandakana kifuani ayi zikhadulu zi Tat’andi mu phila yisulama. (Yoane 14:9) Diawu, bo wunluta longuka matedi Yesu, wunkuiza zaba buboti Yave ayi kikundi kiaku mu nandi kinkuiza buelama. Bo wuntanga matedi Yesu, wunkuiza bakula phila nandi kaba muenanga kiadi biphumbulu, batu babela, mimfuizi ayi zitsiana. Mvandi wunkuiza zaba malongi mawombo Yesu kavana ayi ndandu tulenda baka befu kusadila mawu mu luzingu luitu.— Matai 5:1-11; 7:24-27.
12. Ngie kubuela longuka matedi Yesu, mbi mawu mala kukindisa kuvanga?
12 Mvandi yindula mu khudulu yi Yesu: nandi wufuila mu kibila kitu, muingi tubaka nlemvu wu masumu. (Matai 20:28) Kuyindula mu mawu, kulenda buela luzolo luaku mu Yesu ayi malenda kukindisa kunyongina masumu maku ayi kudinda nlemvu kuidi Yave. (Mavanga 3:19, 20; 1 Yoane 1:9) Ayi bo luzolo luaku mu Yave ayi Yesu lumbuelama, buawu wunkuiza bela phuila yi kuba va kimueka na batu banzolanga Yave.
13. Mbi Yave kala kuvana?
13 Longuka kuzola dikabu di Yave. Ḿba basi dikanda diaku ayi bakundi basinkuiza visa ko kibila mbi ngie tidi kukivanina kuidi Yave ayi kubotama. Va thonono bawu balenda kubalukila ayi kutatuka. Vayi zaba ti Yave kalendi kukuekula ko kibila nandi wala kuvana dikanda dimona, zikhomba mu kimvuka. Ayi ngie kufikama zikhomba mu kimvuka, wala mona luzolo lu dikabu di Nzambi ayi wala baka lusalusu wuntomba. (Malako 10:29, 30; Ebeleo 10:24, 25) Bumviokila thangu, ḿba dikanda diaku balenda baka makani ma kusadila Yave ayi kuzingila mu zithumu ziandi.— 1 Petelo 2:12.
14. dedi buntubila 1 Yoane 5:3, ndandu mbi wumbakanga mu kulandakana malongi ma Yave?
14 Longuka kukinzika ayi kusadila zithumu zi Yave. Ava kulonguka matedi Yave, ḿba ngieveka waba bakanga makani mu matedi mambu mamboti ayi mambi wufueti vanga. Vayi bo wutona kulonguka Kibibila, wubakula ti kuzingila mu minsiku mi Yave mawu malutidi. (Minkunga 1:1-3; tanga 1 Yoane 5:3.) Yindulabu malongi Kibibila kamvana kuidi banuni, bakazi, matata ayi bana. (Efeso 5:22–6:4) Mu mbuenu’aku, malongi beni madi mu kusadisa dikanda diaku dibuela ba mayangi? Yindula mvandi mu malongi Yave katuvananga matedi kusola mboti bakundi. Bukiedika ti, kulandakana mawu ma kusadisanga ko kuba zikhadulu zimbote? (Zingana 13:20; 1 Kolinto 15:33) Ḿba ngie betambudila ngete mu biuvu abiobi.
15. Mbi bilenda kusadisa kuzaba bu kusadila minsua mi Kibibila?
15 Khumbu zinkaka, ngie ḿba wuzabanga ko buidi bu kusadila minsua mi Kibibila widi mu kulonguka mu luzingu luaku. Mbi bilenda kusadisa? Tanganga bilongulu bi Kibibila Yave katuvananga mu nzila kimvuka kiandi muingi wuzaba kusuasisa mamboti ayi mambi. (Ebeleo 5:13, 14) Ba kifu ki kutanga ayi kulonguka buboti bilongulu beni ayi ngie wala mona phila biawu bididi tsalulu mu luzingu luaku. Ayi biawu mvandi, biala kubuela phuila yi kuba mu khati dikabu di Yave.
16. Buidi Yave kantuadisilanga dikabu diandi?
16 Longuka kuzola ayi kubuela mioko kimvuka ki Yave. Yave wunkutikisanga dikabu diandi mu bimvuka biviakana; ayi Muan’andi, Yesu, nandi kabieka ntu voti mfumu kimvuka ki baklisto. (Efeso 1:22; 5:23) Bosi Yesu wubieka ‘Nnanga wukuikama’ muingi kutuama ntuala kisalu kioso kimvangamanga mu bimvuka bioso. Dingumba beni mvandi ditambula kiyeku ki kukieba ayi kukubika bidia bi kiphevi. (Matai 24:45-47) Phila nnanga wukuikama ka kukiebilanga ayi ka kutuadisilanga, yidi mu kubieka mu kadika kimvuka zikhomba bayonzuka mu kiphevi muingi batuadisa kimvuka. (Yesaya 32:1, 2; Ebeleo 13:17; 1 Petelo 5:2, 3) Bakulutu beni ba kimvuka, bansalanga mu kibila kiaku, mvandi badi bakubama muingi ku kuvana mbombolo ayi ku kusadisa kuba kikundi kifikama na Yave. Phila yilutidi bakulutu ba kimvuka balenda ku kusadisila, yidi mu kukubika bumboti muingi ngie mvaku wulonga bankaka matedi Yave.— Efeso 4:11-13.
17. Dedi bummonisina Loma 10:10, 13, 14, kibila mbi tufueti kambila bankaka matedi Yave?
17 Longa bankaka muingi bazola Yave. Yesu ava kafua, wukamba minlandikini miandi muingi balonga bankaka matedi Yave. (Matai 28:19, 20) Ayi ḿba va thonono wulenda vanga mawu kibila Yesu mawu ka tukamba tuvanga. Vayi bo luzolo luaku mu Yave lumbuelama, ngie wunkuiza ba momawu mayindu mvuala Petelo ayi Yoani baba, bawu batuba: ‘Befu tulendi vonga ko kuyolukila mambu befu veka tumona ayi tuyuwa.’ (Mavanga 4:20) Kusadisa mutu kaba luzolo mu Yave, diawu diambu dinluta tuvananga mayangi. Dedi, yindula mayangi Filipi kamona bo kasadisa dibakala muisi Etiopi kuzaba kiedika ayi kubaka makani ma kubotama! Ngie kulandakana kifuani ki Filipi ayi kutumamana nsua Yesu kavana wu kusamuna, wala monisa ti tidi kuba Mbangi Yave. (Tanga Loma 10:10, 13, 14.) Bo wala tula mu kiteso akiokio, ḿba ngie mvaku wala kuyikuvusa dedi bo muisi Etiopo kakiyuvusila: “ Mbi bi kuthula nkaku mu kubotama?”— Mavanga 8:36.
18. Mbi tuala longuka mu dilongi dinkuiza?
18 Makani malutidi nkinza wulenda baka mu luzingu luaku, madi ma kubotama. Diawu, wufueti yindula boboti ava kuvanga mawu. Mbi fueti zaba matedi kubotama? Mbi wufueti vanga ava kubotama ayi mbi wufueti tatamana kuvanga bo wumbotama? Tunkuiza baka mimvutu mi biuvu abiobi mu dilongi dinkuiza.
NKUNGA 2 Dizina Diaku Yave
^ Lut. 5 Bawombo banzolanga Yave, bankuiza banga divuda boti bama fuana kubotama voti ndamba. Enati ngie mvaku wummuenanga buawu, buna dilongi adidi dinkuiza kutebula moyo mambu mankinza wulenda vanga muingi kubotula divuda beni ayi kubotama.
^ Lut. 5 Befu batu disuana tuidi, diawu kadika mutu kalenda sadila mu phila yiviakana malongi tuentubila va wanda, mu khambu landakana phila manlandisinina mu dilongi adidi.
^ Lut. 6 Tala bifuani binkaka mu mua zibuku (lc) ayi (lf).
^ Lut. 61 MAMBU MADI MU FIKULA: Nkomb’itu wumvana kimbangi kuidi mutu wunsumbisa.
