1. Mambu mbi maphasi bisadi bi Yave bamviokilanga?

NGIE widi mu kuviokila mu mambu maphasi? Dedi, ḿba khomba mu kimvuka wu kuluekizi ntima. (Yako. 3:2) Voti mutu wunkotanga yaku kikola ove wunsalanga yaku, wukuvuezanga kibila ngie widi Mbandi yi Yave. (1 Pete. 4:3, 4) Ḿba bankaka va dikanda diaku, badi mu kutula nkaku muingi kusamuna voti kulandakananga zikhutukunu. (Matai 10:35, 36) Mambu moso amomo, malenda ku kuvongisa ayi kuvanga wubika kubue sadila Yave. Vayi ba lufiatu ti mu mosokua mambu wulenda viokila, Yave wala kuvana mangolo ayi nduenga muingi wununga mambu wumviokila.

2. Dedi bummonisina Loma 15:4, buidi matangu ma Kibibila malenda ku tusadisila?

² Yave wutuma basonika mu Kibibila binongu bi bisadi biandi banunga zithotolo kheti mu kuba batu ba masumu. Kibila mbi kavangila mawu? Muingi tulonguka mambu mamfunu mu bifuani biawu. Kiawu kibila Yave katuadisila mvuala Polo kasonika mambu madi mu Loma 15:4. Tanga. Kutanga binongu abiobio bi Kibibila, bilenda kutu bomba ayi kutuvana kivuvu. Vayi muingi tuluta bakila biawu ndandu, vasintombulu ko to kutanga Kibibila. Angi tufueti bika Diambu di Nzambi dinyikuna ntim’itu ayi dibalula phil’itu yi kuyindudila. Boti thuadusulu tuntomba muingi kununga mambu tumviokila, mbi tulenda vanga? (1) kusambila, (2) kuvisa kinongu kioso, (3)  kuyindula mu mambu tuntanga, ayi (4) kusadila mambu tuidi mu kulonguka. Mu dilongi adidi, tunkuiza mona buidi tulenda vangila mawu. *  Mvandi tunkuiza mona buidi tulenda sadila mambu amomo manna, bo tumfiongunina kifuani ki ntinu Davidi ayi mvuala Polo.

3. Ava wutona kutanga Kibibila, mbi ngie fueti vanga?

³ (1) Sambila. Ava wutona kutanga Kibibila, dinda kuidi Yave muingi ka kusadisa wubaka ndandu mu mambu wunkuiza tanga. Dedi, boti malongi widi mu kutomba mu mambu widi mu kuviokila, sambila kuidi Yave muingi ka kuvana nduenga yi kubakudila mu Kibibila minsua milenda kusadisa kuzaba ma kuvanga.—Fili. 4:6, 7; Yako. 1:5.

4. Mbi bilenda ku kusadisa kuvisa buboti binongu bi Kibibila?

⁴ (2) Visa kinongu kioso. Yave wutuvanga na diela di kuyindula mambu. Muingi kuvisa buboti binongu bi Kibibila, meka kuyindula mambu bantubila mu kinongu ayi wukitula va kibuangu ki mutu bantubila muawu. Meka kumona mambu nandi kamonikina ayi tomba kuzaba mabanza kaba mu thangu beni.

5. Mbi binsudula kuyindula mu mambu wuntanga ayi buidi wulenda vangila mawu?

⁵ (3) Yindula mu mambu wuntanga. Mawu mansundula, kubotula thangu muingi kuyindula buboti mu mambu tuntanga mu Kibibila. Ayi kumona buidi tulenda sadila mawu mu kadika diambu tundengana mu luzingu. Kuyindula, kutusadisanga kumona nguizani yidi mu mambu tuntanga ayi kuma visa buboti. Kutanga Kibibila mu khambu yindula, kuidi buka ngie wuntala mabaya va tsi, mu khambu zaba kibila babe kubikila mawu. Vayi kutanga Kibibila ayi kuyindula mambu wuntanga, kuidi buka ngie wunkuika mabaya beni ayi wumvisa ti yidi mesa yi kudila. Muingi wununga kuyindula, ngie fueti kuyikuvusa: Mbi mutu bantubila mu lutangu beni kavanga muingi kanunga mu mambu nandi kaviokila? Buidi Yave kansadisila? Buidi mambu yima longuka malenda kutsadisila kuvibidila mu mambu yimviokila?

6. Kibila mbi tufueti sadila mambu tunlonguka mu Kibibila?

⁶ (4) Sadila mambu wunlonguka. Yesu wutuba ti mutu wukhambu sadilanga mambu kadi mu kulonguka, widi dedi mueka na mutu wuntungila nzo va mbata nsengisini. Kisalu kiandi kioso ayi mangolo mandi moso mala ba maphamba. Mu kibila mbi? Kibila bo kivuka kinneni kiala monika, nzo beni yala tuluka. (Matai 7:24-27) Bobuawu mvandi, mangolo moso tuala vanga muingi kusambila, kuvisa kinongu kioso, ayi kuyindula mu mambu tube tanga, mala ba kuandi maphamba befu manga kusadila mambu tube longuka. Ayi mvandi, bo tuala viokila mu ziphasi zi luzingu voti zithotolo zinkaka, kiminu kitu kiala lebakana. Vayi bo tunsadila mambu tunlonguka, befu tunnunganga kubaka makani mamboti, tumbakanga ndembama ayi kiminu kitu kinluta banga kikinda. (Yesa. 48:17, 18) Buabu tuemmona, buidi tulenda sadila mambu amomo manna, bo tunlonguka mambu ntinu Davidi kamonikina.

7. Boti nkundi voti wumueka va dikanda be kunyongisa ntima, kifuani kinani kilenda kusadisa?

⁷ Vadi nkundi voti wumueka va dikanda diaku wumana kulueka ntima? Boti ngete, buna ngie wulenda baka lusalusu, mu kuyindula mambu ntinu Davidi kavanga bo muan’andi Abisaloni kambalukila ayi kaba tomba kumvinginina va luyalu.—2 Samu. 15:5-14, 31; 18:6-14.

8. Mbi ngie wulenda vanga muingi wubaka lusadusu lu Yave?

⁸ (1) Sambila. Bo wunyindula mu kinongu ki Davidi, kamba Yave buidi widi mu kumuena bo babe kulueka ntima. (Minku. 6:6-9) Bosi, dinda thuadusulu yi Yave muingi wubakula minsua mi Kibibila milenda kusadisa kuzaba ma kuvanga.

9. Mambu mbi Abisaloni kavangila Davidi?

 ⁹ (2) Visa kinongu kioso. Yindula mambu moso mamonika ayi yindula buidi Davidi kabela. Theti, Abisaloni muana wu Davidi wuvunina tat’andi mambu muingi dikabu dioso dinzola. (2 Samu. 15:7) Bosi, bo kamona ti yiba thangu yifuana, nandi wufila minlenga mambu ku Isaeli muingi kukubika batu boso mo bankikinina kaba ntinu. Nandi mvandi wununga kuvukumuna Aitofeli nkundi wu Davidi, muingi kaba ku khonzo’andi. Abisaloni wu yizabikisa ti nandi widi ntinu ayi waba tomba kuvonda ntinu Davidi. Ayi ḿba mu thangu beni, ntinu Davidi kubela kaba bela. (Minku. 41:1-9) Davidi wuyiza bakula makani Abisaloni kaba ayi wutina ku Yelusalemi. Masodi ma Abisaloni, manuanisa masodi ma Davidi. Ayi mu mvita beni, Abisaloni wufua.

10. Khanu mambu mbi ntinu Davidi kavanga bo Abisaloni ayi Aitofeli bambalukila?

¹⁰ Buabu, yindulabu buidi Davidi kabela bo mambu moso amomo mamonika! Nandi waba zolanga beni muan’andi Abisaloni ayi wabe fiatilanga Aitofeli. Vayi baba buadi banyongisa beni ntim’andi, bo bambalukila ayi batomba kumvonda. Davidi ḿba khanu kasa bue fiatila ko ni wumueka mu bakundi bandi bankaka, mu kuyindula ti bawu mvawu baba ku khonzo yi Abisaloni. Nandi ḿba khanu wutona to kuyindula mu matedi naveka ayi kuba mu kiunda kingolo. Vayi bakana ko mawu mamonika. Nandi wununga mambu moso amomo. Buidi Davidi kanungina kuvanga mawu?

11. Mbi Davidi kavanga mu mambu kaba viokila?

¹¹ (3) Yindula mu mambu wuntanga. Mbi ngie wulenda longuka mu mambu mamonikina ntinu Davidi? Mvandi, yindula mu kiuvu akiki: “Mbi Davidi kavanga mu mambu kabe viokila?” Davidi wuvangila mamoso mu nduenga. Nandi kasa bika ko boma buntula nkaku mu kubaka makani. Vayi nandi wudinda lusalusu lu Yave mu nzila nsambu. Mvandi, wudinda lusadusu kuidi bakundi bandi. Ayi mu thinu wutona kusadila makani kabaka. Kheti mu kiunda kingolo kaba, Davidi kasa bika ko kufiatila mu batu ayi kasa kituka ko mutu wumbi. Nandi wutatamana kufiatila mu Yave ayi mu bakundi bandi

12. Mbi Yave kavanga muingi kusadisa Davidi?

¹² Buidi Yave kasadisila Davidi? Ngie kubue fiongunina mua nkadu, wunkuiza bakula ti Yave wuvana Davidi mangolo kabe tomba muingi kavibidila mu mambu kabe viokila. (Minku. 3:1-8; tala matangu madi va thonono kapu) Yave wusakumuna makani Davidi kabaka. Ayi mvandi wubuela mioko bakundi ba Davidi bakuikama, bo banuana muingi kukieba ntinu’awu.

13. Boti mutu be kunyongisa ntima, buidi wulenda landikinina kifuani ki Davidi? (Matai 18:15-17)

¹³ (4) Sadila mambu wunlonguka. Wukiyuvusa: ‘Buidi yilenda landikinina kifuani ki ntinu Davidi?’ Mu kufika vanganga dioso kua diambu muingi kudedikisa mambu wumviokila. Mu kutadila mambu widi mu kuviokila, sadila dilongi Yesu kavana didi mu Matai 18. (Tanga Matai 18:15-17.) Vayi bika kubaka makani mu khambu yindula buboti voti mu lukuiku. Sambila kuidi Yave muingi kavumbika mabanza maku ayi ka kuvana nduenga muingi wuvibidila mu mambu wumviokila. Tatamana kufiatila mu bakundi baku ayi kikinina lusadusu luawu. (Zinga. 17:17) Ayi bulutidi, tatamana kulandakana malongi ma Yave madi mu Kibibila.—Zinga. 3:5, 6.

14. Mu mambu mbi matangu ma 2 Timoteo 1:12-16; 4:6-11, 17-22 malenda kukindisila?

¹⁴ Widi mu kuviokila mu zithotolo kuidi basi dikanda diaku? Ngie wunkalanga ku tsi  bakandimina mbuongimin’itu kuidi Yave? Boti mawu widi mu kumonikina, buna matangu ma 2 Timoteo 1:12-16 ayi 4:6-11, 17-22, malenda kukindisa. * Mvuala Polo wusonika matangu amomo bo kaba mu buloku.

15. Mbi ngie wulenda dinda kuidi Yave?

¹⁵ (1) Sambila. Ava kutanga kinongu ki mvuala Polo, kamba Yave mambu wumviokila ayi buidi widi mu kumuena. Bosi, dinda thuadusulu’andi muingi wubakula minsua mi Kibibila milenda kusadisa kuzaba ma kuvanga.

16. Mambu mbi mvuala Polo kamonikina?

¹⁶ (2) Visa kinongo kioso. Wuyitula va kibuangu ki mvuala Polo. Nandi wuba wukangama mu ziphanga mu buloku ku Loma. Mua thangu kumbusa, nandi wukheti ba mu buloku. Vayi mu khumbu ayiyi, nandi wuzaba ti bankuiza mvonda. Bakundi bandi bankaka banyekula ayi nandi wuba beni wuvonga.—2 Timo. 1:15.

17. Khanu mambu mbi mvuala Polo kavanga?

¹⁷ Mvuala Polo, kasa tsikika ko mayindu mandi mu mambu kaba viokila, mu kuyindula ti boti kasa kukivana ko mu kisalu ki Yave, khanu basa ntula ko mu buloku. Nandi khanu wufuemina batu baba kalanga ku Asia bo banyekula. Mvandi, khanu kasa bue fiatila ko bakundi bandi bankaka. Vayi mvuala Polo kasa vanga ko mawu. Mbi binsadisa kutatamana kufiatila mu bakundi bandi ayi mu lusalusu lu Yave?

18. Mambu mbi mvuala Polo kavanga muingi kununga ziphasi zioso kaviokila?

¹⁸ (3) Yindula mu mambu wuntanga. Tomba kubaka mvutu wu kiuvu akiki: “Mambu mbi mvuala Polo kavanga muingi kanunga ziphasi zioso kaviokila?” Kheti bo luzingu luandi luba va kingela, mvuala Polo kasa zimbakana ko diambu dilutidi nkinza—kuvana nzitusu kuidi Yave. Nandi wutatamana kuyindula mu phila kalenda kindisila bankaka. Ayi wumonisa lufiatu luandi kuidi Yave, mu kutatamana kusambila. (2 Timo. 1:3) Mvuala Polo kabasa viokisanga ko thangu mu kuyindulanga mu zikhomba banyekula. Vayi nandi wutuba ti, waba vutulanga beni matondo mu phila bakundi bandi bansadisila. Ayi nandi waba botulanga thangu muingi kulonguka Diambu di Nzambi. (2 Timo. 3:16, 17; 4:13) Ayi bulutidi, nandi wuba lufiatu ti Yave ayi Yesu ba kunzolanga, kibila bawu basa kunkuekula ko. Mvandi bankanikisa ti bala kumvana mfutu mu kisalu kiandi kikuikama.

19. Buidi Yave kasadisila mvuala Polo?

¹⁹ Yave wulubula mvuala Polo ti mu kuba wumueka mu baklisto, nandi wala viokila mu zithotolo ziwombo. (Mava. 21:11-13) Vayi buidi Yave kasadisila mvuala Polo? Nandi wutambudila minsambu mi Polo ayi wumvana mangolo kabe tomba. (2 Timo. 4:17) Yave wukamba mvuala Polo ti, nandi wala tambula mfutu’andi mu kisalu kiandi kikuikama. Mvandi, Yave wasadila bakundi ba Polo bakuikama, muingi bansadisa mu zitsatu ziandi.

20. Dedi bummonisina Loma 8:38, 39, buidi tulenda landikinina kifuani ki mvuala Polo?

²⁰ (4) Sadila mambu wunlonguka. Wukiyuvusa: ‘Buidi yilenda landikinina kifuani ki mvuala Polo?’ Dedi mvuala Polo, befu mvitu tuala viokila mu zithotolo mu kibila ki kiminu kitu. (Malako 10:29, 30) Muingi tutatamana bakuikama kuidi Yave kheti bo tumviokila mu ziphasi, tufueti tatamana kusambila ayi kulongukanga Diambu di Nzambi, Kibibila. Ayi tubika zimbakananga ti, kiuma kilutidi nkinza kidi, kuvana nzitusu kuidi Yave. Tulenda ba lufiatu ti Yave kalendi tukuekula ko. Ayi mosokua mambu batu balenda vanga, bawu balendi tula ko nkaku muingi Yave katuzola.—Tanga Loma 8:38, 39; Ebe. 13:5, 6.

21. Mbi bisadisa Aya ayi Hector kununga bikaka baviokila?

²¹ Mu mosokua mambu tulenda viokila, kulonguka bifuani bi Kibibila bilenda kutu kindisa. Dedi, Aya ntuami ntuala wumueka wunkalanga ku Japão wutuba ti, kinongo ki Yona, kinsadisa kununga boma bu kuvananga kimbangi ki baboso. Kifuani kinkaka kidi di Hector, khomba wumueka widi ditoko wunkalanga ku Indonesia, widi matata bakhambu sadilanga Yave. Nandi wutuba ti kifuani ki Luti ki kunkindisanga kulonguka matedi Yave ayi kunsadila mu ntima woso.

22. Buidi wulenda bakila zivideo zibongulu mu binongu bi Kibibila ayi mu kikhuku ki malongi “Landakana Kiminu Kiawu”?

²² Kuidi wulenda bakudila bifuani bi Kibibila bilenda kukindisa? Mu matangu ma Kibibila masueku mu fono, zivideo ayi kikhuku ki malongi, “Landakana Kiminu Kiawu” kitusadisanga kuvisa binongu bi Kibibila. * Ava wutona kutala, kukuwa, voti kutanga binongu abiobio bafiongunina buboti, dinda Yave muingi ka kusadisa kubakula mambu mankinza wulenda sadila. Meka kukitula va kibuangu ki mutu bantubila mu kinongu beni. Yindula mu mambu bisadi abiobio bi Yave bavanga ayi buidi Yave kaba sadisila kununga mambu maphasi baviokila. Bosi, sadila mambu belonguka. Mvandi, tonda Yave mu lusalusu kakuvana. Ayi monisa ti wumvuanga nkinza lusalusu beni, mu kusadila luaku widi muingi kukindisa ayi kubuela mioko bankaka.

23. Dedi bummonisina Yesaya 41:10, 13, mbi Yave katukanikisa?

²³ Kuzinga mu nza ayiyi yinthuadusu kuidi Satana, kuidi beni phasi. Ayi khumbu zinkaka, tuzabanga ko ma kuvanga. (2 Timo. 3:1) Vayi tulendi kuazuka ko beni ayi kuba mu boma, kibila Yave zebi mambu tuidi mu kuviokila. Bo tumviokila mu ziphasi, nandi wunkanikisa kutu simba mu koku kuandi ku lubakala ku lunungu. (Tanga Yesaya 41:10, 13.) Tuidi lufiatu ti Yave wunkuiza tusadisa. Ayi Kibibila kituvananga mangolo tuntomba muingi tununga mambu tumviokila.