1. Kibila mbi Yesu kadindila kuidi Yave muingi kakieba minlonguki miandi?

VA BUILU butsuka ava bamvonda, Yesu waba yindula beni ziphasi minlonguki miandi bala viokila. Mu kibila ki luzolo kaba mu bakundi bandi, nandi wudinda kuidi Tat’andi muingi kaba ‘kieba kuidi nkua wambi.’ (Yoa. 17:14, 15) Yesu wuzaba ti bo kala vutuka ku diyilu, Satana wala tatamana kutuadisa ziphasi kuidi woso kua mutu wumbaka makani ma kusadila Yave. Diawu dikabu di Yave diaba tombulu lukiebu luandi.

2. Kibila mbi tuididi lufiatu ti Yave wala tambudila minsambu mitu?

² Yave wutambudila nsambu wu Yesu, kibila wunzolanga Muan’andi. Befu kuvanga mangolo ma kukuangidika Yave, nandi mvandi wala kutu zola ayi wala kuwanga minsambu mitu, mu kutuvananga lukiebu ayi lusadusu tuntomba. Bo kadi Mfumu dikanda diandi, Yave wala tatamana kukieba bana bandi. Kibila na kukhambu vanga mawu, dizina diandi diala vuezu!

3. Kibila mbi tuntombilanga lukiebu lu Yave bubu?

³ Bubu, tunluta tomba beni lukiebu lu Yave, kibila Satana wukulumuka va ntoto ayi ‘widi beni nganzi.’ (Nzai. 12:12) Nandi wumvukumunanga batu bankaka muingi ba tutuadisa ziphasi ayi banyindula ti badi mu ‘kuvanga luzolo lu Nzambi.’ (Yoa. 16:2) Bankaka bakhambu sadilanga Nzambi, batu tuadisanga ziphasi kibila tukotanga ko mu mambu ma nza. Mu zioso kua ziphasi tumviokila, tuidi lufiatu ti Yave widi yitu. Kibila mbi? Kibila Diambu di Nzambi dintuba: ‘Vayi Mfumu widi wukuikama, nandi wala kulukindisa ayi  kulukieba kuidi nkua wambi.’ (2 Tesa. 3:3) Buabu tuemmona ziphila ziwadi Yave katu kiebilanga.

4. Dedi bummonisina Efeso 6:13-17, mbi Yave katuvana muingi kutu kieba?

⁴ Yave wutuvana binuanunu bi tukiebanga mu mintambu mi Satana. (Tanga Efeso 6:13-17.) Kinuanunu akiokio ki kiphevi, kidi beni kingolo ayi kifuana! Vayi muingi tubaka lukiebu lu binuanunu abiobio, tufueti tatamana kubisadila. Vayi mbi kadika kinuanunu kinsundula? Ndoko tumonanu mu matangu manlanda.

5. Mbi phonda yi kiedika yinsundula ayi kibila mbi tufueti vuatila yawu?

⁵ Phonda yi kiedika, yinsundula kiedika tunlongukanga mu Diambu di Nzambi. Kibila mbi tufueti vuatila phonda yi kiedika? Kibila Satana widi ‘tata yi luvunu.’ (Yoa. 8:44) Vama vioka bivevi na bivevi di mimvu tona Satana katona kusadila luvunu muingi kuvukumuna ‘ntoto wumvimba widi batu’! (Nzai. 12:9) Vayi kiedika kidi mu Diambu di Nzambi Kibibila, kitu kiebanga mu luvunu alolo. Buidi tumvuatilanga phonda yi kiedika? Tumvuatilanga yawu bo tunlonguka kiedika kitedi Yave, mu kunsadila mu ‘phevi ayi mu kiedika’. Mvandi, mu kutubanga kiedika mu mambu moso.—Yoa. 4:24; Efe. 4:25; Ebe. 13:18.

6. Mbi binsundula kikhutu ki kisengu ki busonga ayi kibila mbi tufueti vuatila kiawu?

⁶ Kikhutu ki kisengu ki busonga, kinsundula zithumu zisonga zi Yave. Kibila mbi tufueti vuatila kikhutu ki kisengu ki busonga? Kibila dedi bo kikhutu kiaba kiebilanga disodi mu mvita, muingi kabika nongana zitsoto voti madionga, bobuawu mvandi kikhutu ki kisengu ki busonga, kinkiebanga ntim’itu ayi kimutu kitu mu mambu mambi ma nza ayiyi. (Zinga. 4:23) Yave wuntomba tunzola ayi tunsadila mu ntima woso. (Matai 22:36, 37) Vayi Satana wuntomba kukabula ntim’itu—mu kutu vanga kuzola biuma bi nza ayiyi. (Yako. 4:4; 1 Yoa. 2:15, 16) Ayi na kukhambu nunga kuvanga mawu, nandi wutu kuikanga muingi tubayisa zithumu zi Yave.

7. Buidi tunsadilanga kikhutu ki kisengu ki busonga?

⁷ Tumvuatilanga kikhutu ki busonga, bo tunkikinina zithumu zi Yave matedi mamboti na mambi ayi bo tunzingila mu zithumu beni. (Minku. 97:10) Bankaka banyindulanga ti zithumu zi Yave zitu botulanga kiphuanza tuidi. Vayi, befu kubika kusadila minsua mi Kibibila mu luzingu luitu, tuala ba dedi mueka na disodi dimbontula kikhutu mu thangu kannuana mvita, mu kuyindula ti kidi beni kizitu. Ayoyo, yidi mbonosono yi buvungisi! Kibila kuidi banzolanga Yave zithumu ziandi zisiko kizitu vayi zimvukisanga moyo.—1 Yoa. 5:3.

8. Mbi binsundula kuba bitambi bi kubama muingi kusamuna zitsangu zimboti zi ndembama?

⁸ Mvuala Polo wutu kindisa muingi tuvuata bitambi bikubama muingi kusamuna zitsangu zimboti zi ndembama. Mawu mansundula ti, tufueti ba bakubama muingi kusamuna zitsangu zi Kintinu. Bo tunlonga bankaka matedi zitsangu zi Kibibila, buawu kiminu kitu kiala buela kindimina. Tunkuitukanga kumona phila dikabu di Yave mu nza yimvimba bansadilanga luaku badi muingi kusamuna zitsangu zimboti. Dedi, bawu bansamunanga bo badi mu kikola, ku kisalu, mu nzo ka nzo, bo bankuenda kue vanga  lungosu, bo bankuenda kuesumba biuma ayi kuidi batu bazebi bakhambu sadilanga Yave. Befu kubika kusamuna mu kibila ki boma, tuala ba dedi mueka na disodi dinnuana mvita vayi wumvula zisapatu. Na kuvanga mawu, kalenda vangana phasi ayi balenda kumvonda. Mvandi, kalasa nunga ko kulandakana zithuadusulu zi mfumu’andi.

9. Kibila mbi tufueti vuatila nkaku wunneni wu kiminu?

⁹ Nkaku wunneni wu kiminu, wunsundula kiminu tuidi mu Yave. Ayi tuidi lufiatu ti nandi wala dukisa zikhanu ziandi. Kiminu akiokio, kilenda tusadisa ‘kuzimisa madionga moso ma mbazu mankuizilanga kuidi nkua wambi.’ Kibila mbi tufueti vuatila nkaku wunneni? Muingi kutu kieba mu malongi ma batu ba balukila Yave ayi muingi tubika mona boma mambu zimbeni zitu ba tuvuninanga. Befu kukhambu ba kiminu, tualasa ba ko mangolo ma kukindama bo batu bala tukuika kubayisa zithumu zi Yave. Kadika khumbu tummanga kuvanga mambu Yave kanlendanga, kuba kuandi mu kikola voti mu kisalu, kiminu kitu kiawu kitu kiebanga. (1 Pete. 3:15) Mvandi, kadika khumbu tummanga kisalu kilenda tuvana zimbongo ziwombo vayi kitu tula nkaku mu  kisalu ki Yave, kiminu kitu kiawu kitu kiebanga. (Ebe. 13:5, 6) Ayi bo tuntatamana kusadila Yave kheti bo tumviokila mu zithotolo, kiminu kitu mvandi kiawu kitu kiebanga.—1 Tesa. 2:2.

10. Mbi biobio phu yi kisengu yi phulusu ayi kibila mbi tufueti kuyivuatila?

¹⁰ Phu yi kisengu yi phulusu, kidi kivuvu Yave katuvana—kivuvu ti, nandi wala tukula mu lufua ayi kuvana mfutu kuidi baboso bamvanganga luzolo luandi. (1 Tesa. 5:8; 1 Timo. 4:10; Tito 1:1, 2) Dedi bo phu yi kisengu yinkiebilanga ntu wu disodi, kivuvu kitu kinkiebanga mayindu mitu. Mu phila mbi? Kivuvu akiokio, kitu sadisanga kutsikika mayindu mu zikhanu zi Nzambi ayi kitu sadisanga kutadila mambu tumviokila mu phila yifuana. Buidi tumvuatilanga yawu? Bo tundedikisa mayindu mitu na phila Yave kanyindudilanga. Dedi, tutulanga ko kivuvu kitu mu kimvuama ki nza ayiyi vayi mu Nzambi.—Minku. 26:2; 104:34; 1 Timo. 6:17.

11. Mbi biobio mbedi yi kiphevi ayi kibila mbi tufueti kuyisadila?

¹¹ Mbedi yi kiphevi, didi Diambu di Nzambi, Kibibila. Mbedi beni yidi lulendu luntululanga luvunu loso, kukula batu mu kivika ki malongi ma luvunu ayi mu mavanga mambi. (2 Koli. 10:4, 5; 2 Timo. 3:16, 17; Ebe. 4:12) Tunlongukanga kusadila mbedi beni mu phila yimboti, mu nzila ndongukulu yi Kibibila yi befu veka ayi mu khubumunu tumbakanga mu kimvuka ki Nzambi. (2 Timo. 2:15) Kubotula kuandi binuanunu tuma tubila, Yave wutu kiebanga mu phila yinkaka. Mu phila mbi?

12. Lusadusu mbi lunkaka tuntomba ayi kibila mbi?

¹² Disodi widi luzabu lu mvita, zebi ti kalendi nuanisa ko nkangu wu masodi naveka vayi nandi wala tomba lusadusu lu masodi mankaka. Bobuawu mvandi, tulendi nunga ko Satana ayi badi kukhonzo’andi mu zingolo zitu veka vayi tufueti tomba lusadusu lu zikhomba zitu zi kiphevi. Diawu Yave katuvanina ‘nkangu wu zikhomba’ mu nza yimvimba widi kukhonzo’itu muingi kutu buela mioko.—1 Pete. 2:17.

13. Dedi bummonisina Ebeleo 10:24, 25, ndandu mbi tumbakanga bo tunlandakananga zikhutukunu?

¹³ Phila yimueka tulenda tambudila lusadusu lu zikhomba yidi, mu kukuendanga mu zikhutukunu. (Tanga Ebeleo 10:24, 25.) Befu boso tumbanga mu kiunda vayi zikhutukunu zitu bombanga. Kibila masolo tumbanga na zikhomba va thonono ayi kutsuka lukutukunu ayi mimvutu mi zikhomba mitu kindisanga beni. Mvandi, malongi ayi zimbonosono zibongulu mu Kibibila zikhomba bamvanganga, zitu vananga mangolo muingi tutatamana kusadila Yave. (1 Tesa. 5:14) Mvandi, zikhutukunu zi tuvananga luaku lu kubaka mayangi mankuizilanga mu kusadisa bankaka. (Mava. 20:35; Loma 1:11, 12) Zikhutukunu zitu kubikanga mu kisalu ki kusamuna. Dedi, zitu sadisanga kupisuka muingi tuzaba bukusadila bilongulu tunsadilanga muingi kulonga. Diawu, kubamanga buboti ava kukuenda mu lukutukunu. Ayi bo widi mu lukutukunu teka buboti matu. Bosi sadila khubumunu bebaka. Ngie kuvanga mawu, wala ba ‘disodi dimboti di Yesu Klisto.’—2 Timo. 2:3.

14. Lusalusu mbi lunkaka befu tuidi?

¹⁴ Mvandi, tuidi lusalusu lu bivevi na bivevi bi zimbasi. Yindula mambu mbasi yimueka kalenda vanga! (Yesa. 37:36) Buabu, yindula mambu nkangu woso wu zimbasi balenda vanga. Vasi ko mutu, ni ziphevi zimbi,  balenda dedakana na nkangu wu masodi ma Yave. (Minko. 6:16) Yave widi Nkua Ngolo Zioso! Diawu bo wuntona kumona boma mu kibila ki mambu wumueka va dikanda diaku, mutu wunsalanga yaku voti mutu wunkotanga yaku kikola kantuba voti kamvanga, yindula mu mambu amomo. Ngie wisi ko ngie veka mu mvita awowo. Kibila widi mu kulandakana zithuadusu zi Yave.

15. Dedi bummonisina Yesaya 54:15, 17, kibila mbi vasi ko ni mutu kalenda kandimina bisadi bi Yave kutatamana kusamuna?

¹⁵ Satana ayi batu mu nza batulendilanga, kibila befu tukotanga ko mu mambu ma Politika ayi tusimbanga ko mata muingi kunuana mvita. Mvandi, tunsamunanga matedi dizina di Nzambi, tumvananga kivuvu kuidi batu ti, Kintinu ki Nzambi kiawu to kiala tuala ndembama ayi nsika. Ayi tunsadisanga batu kuzaba ti, Satana wuntuadisanga nza ayiyi widi nkua luvunu ayi nkua wambi. (Yoa. 8:44) Mvandi, tunsamunanga ti mbungulu yi Satana yima fikama. Diawu Satana ayi bakua mambi, balendi tutula ko nkaku muingi kuvanga kisalu akiokio. Vayi tuala tatamana kuzitisa Yave, mu kusadila luaku yoso tuidi muingi kusamuna. Kheti Satana widi lulendu, nandi kanunganga ko kutula nkaku muingi batu batambula zitsangu zi Kintinu mu nza yimvimba. Kibila tuidi lukiebu lu Yave.—Tanga Yesaya 54:15, 17.

16. Buidi Yave kala vukisila dikabu diandi mu ziphasi zingolo?

¹⁶ Mambu mbi mala monika mu bilumbu binkuiza kuntuala? Ziphasi zingolo. Yave, wala tuvukisa mu phila yikukuitukila. Theti, nandi wala vukisa bisadi biandi bikuikama, bo kala vanga mintinu mi nza kubalukila Babiloni Yineni, binganga bioso bi luvunu. (Nzai. 17:16-18; 18:2, 4) Bosi, nandi wala vukisa dikabu diandi mu kutulula biuma bioso bi nza yi Satana mu Alimangedoni.—Nzai. 7:9, 10; 16:14, 16.

17. Buidi tulenda bakila ndandu mu kutatamana bakuikama kuidi Yave?

¹⁷ Bo tuntamana bafikama kuidi Yave, Satana kalasa tutuadisa ko ziphasi ziala kadidila. Kibila nandi wala bungua. (Loma 16:20) Diawu vuata kinuanunu kiaku—ayi bika kuvula kiawu! Bika kunuana mvita awowo ngie veka. Buela mioko zikhomba ziaku ayi landakana zithuadusulu zi Yave. Ngie kuvanga mawu, Tat’aku wu luzolo wala kukindisa ayi wala kukieba.—Yesa. 41:10.