1. Dedi bummonisina Matai 24:9, kibila mbi tukhambu kuitukilanga bo batu mu nza batulenda?

YAVE wutu vanga na luaku lu kuzola ayi kutambula luzolo. Diawu, bo mutu ka tulenda, befu tunyonganga beni ayi ḿba khumbu zinkaka tumbanga mu boma. Dedi, tala kifuani ki khomba yimueka yinkieto bantedilanga Georgina wunkalanga ku Europa. Nandi wutuba: “Bo minu yiba 14 di mimvu, mam’ami wutona kundenda bo yibaka makani ma kusadila Yave. Minu yinyonga beni mu mawu ayi yitona kuyindula ti yisi ko mutu wumboti.” * Khomba yinkaka bantedilanga Danylo, wusonika: “Bo masodi bambula ayi baphangila mambu mambi kibila yidi Mbangi yi Yave, minu yinyonga beni mu mawu.” Befu tunyonganga beni bo batu batulenda. Vayi tuyitukanga ko mu mawu, kibila Yesu wutuba ti mambu amomo mala tumonikina. —Tanga Matai 24:9.

2-3. Kibila mbi batu banlendilanga minlandikini mi Yesu?

² Kibila mbi batu mu nza banlendilanga minlandikini mi Yesu? Kibila Yesu wutuba ti bawu basi ko kithuadi na ‘mambu ma nza ayiyi.’ (Yoa. 15:17-19) Befu tunkinzikanga zimfumu zi luyalu vayi tuba buongiminanga ko ayi mvandi tubuongiminanga ko bidimbu bi tsi tunkalanga. Kibila kuidi Yave to tumvananga mbuongimini yoso. Diawu tumbuedilanga mioko nsua Yave kadi wu kuyala nza yoso, kheti Satana ayi batu badi ku khonzu’andi, bammanganga ti nandi widi nsua beni. (Ngene. 3:1-5, 15) Mvandi, befu tunsamunanga ti Kintinu ki Nzambi kiawu to kiala tuala kivuvu kuidi batu mu nza woso ayi kutulula zimbeni zioso zi Yave. (Dani. 2:44; Nzai. 19:19-21) Zitsangu aziozio  zimvananga mbombolo kuidi batu bamboti vayi zintuadisanga ngazi kuidi bakua mambi.—Minku. 37:10, 11.

³ Mvandi, ba tulendilanga kibila befu tunzingilanga mu zithumu zisonga zi Nzambi. Ziawu zidi beni disuasana na mambu batu mu nza bankikininanga. Dedi, batu bawombo bubu, bamvanganga mambu ma kitsuza mu phila batu ku Sodoma ayi Ngomola baba vangilanga, divula dio Yave kabaka makani ma kutulula! (Yuda 7) Ayi bo tunlandakana zithumu zisonga zi Yave mu matedi mambu amomo, batu bawombo ba tusevanga ayi ba tutadilanga banga batu bakhambulu diela!—1 Pete. 4:3, 4.

4. Zikhadulu mbi zitu kindisanga bo batu batulenda?

⁴ Mbi bilenda kutu sadisa kukindama bo batu batulenda ayi batuvangila mambu mambi? Tufueti ba lufiatu ti Yave wunkuiza tusadisa. Banga nkaku, kiminu kitu kilenda kutu sadisa ‘kuzimisa madionga moso ma mbazu mamfidisanga nkua wambi.’ (Efe. 6:16) Vayi bakana ko to kiminu kintombulu muingi tukindama. Vatombuluanga mvandi luzolo. Kibila mbi? Kibila luzolo ‘lunkindamanga mu mambu moso mambi.’ (1 Koli. 13:4-7, 13) Buabu tuemmona buidi luzolo mu Yave, luzolo mu zikhomba zitu zi kiphevi ayi mvandi luzolo mu zimbeni zitu, lulenda kutu sadisila kukindama bo batulenda.

5. Buidi luzolo Yesu kadi mu Tat’andi lunsadisila?

⁵ Va builu ava zimbeni ziandi bamvonda, Yesu wukamba minlandikini miandi mikuikama: ‘Minu yinzolanga Tata, [diawu] yimvangilanga mamoso mu phila Tata kathumina.’ (Yoa. 14:31) Luzolo Yesu kadi mu Yave, lunsadisa muingi kakindama mu ziphasi zioso kaviokila. Bobuawu mvandi, luzolo luitu mu Yave lulenda kutu sadisa kuvanga mambu Yesu kavanga.

6. Dedi bummonisina Loma 5:3-5, buidi bisadi bi Yave bambelanga bo batu mu nza baba lenda?

⁶ Tona muna tona, luzolo mu Nzambi lunsadisanga bisadi bi Yave kukindama mu zithotolo. Dedi, bo nzo yi lufundusu yilutidi ku Yuda bakamba bapostolo muingi babika kubue samunanga, luzolo mu Nzambi luba kindisa ‘kutumamana theti Nzambi bika batu.’ (Mava. 5:29; 1 Yoa. 5:3) Luzolo alolo mu Nzambi, lunsadisanga zikhomba bubu, batatamana bakuikama bo bamviokila mu zithotolo kuidi zimfumu zi luyalu. Bo batu mu nza batulenda, befu tubanga ko mu kiunda vayi tunkuangalalanga.— Mava. 5:41; tanga Loma 5:3-5.

7. Kibila mbi tulendi kuitukila ko bo basi dikanda ditu batulenda?

⁷ Ḿba zithotolo zinluta kutu tuadisanga ziphasi zidi, zio zinkuizilanga kuidi basi dikanda ditu. Bo tunzaba kiedika, bankaka va dikanda ditu balenda yindula ti mambu tuidi mu kulonguka madi ma luvunu. Ayi bankaka balenda yindula ti tuma vunzuka ntu. (Dedikisa na Malako 3:21.) Diawu bawu balenda tona kutu bulanga voti kutu kambanga mambu malenda kutu lueka ntima. Befu tuyitukanga ko mu mambu amomo. Kibila Yesu wutuba: ‘Zimbeni zitheti zi mutu bala ba basi dikanda diandi veka.’ (Matai 10:36) Bukiedika, moso kuandi mambu basi dikanda ditu balenda kutu vangila, befu tuba tadilanga ko banga zimbeni zitu. Kibila bo luzolo luitu mu Yave lumbuelama, buawu mvandi luzolo tuidi mu batu lumbuelimina. (Matai 22:37-39) Vayi tubikanga ko kulandakana minsua ayi minsiku mi Yave midi mu Kibibila, muingi kukuangidika mutu yitu.

8-9. Mbi bisadisa Georgina kukindima kheti bo kabe viokila mu zithotolo?

⁸ Georgina tuba tubila mu matangu mabe vioka, wununga kutatamana wukuikama kheti mu zithotolo zi mam’andi. Georgina wutuba: “Minu ayi mam’ama tutona kulonguka Kibibila na Zimbangi zi Yave. Vayi bo vavioka  sambanu di zingonda, bo yitona kukuendanga mu zithutukunu, mam’ama wuyiza balula mayindu. Minu yiyiza bakula ti nandi wuvanga kinkundi na batu babalukila kimvuka ki Yave. Diawu kaba sadilanga mambu baba kunkambanga muingi kuphanga kuvutuka mbusa. Mvandi, nandi waba kumbulanga, waba titikanga minlengi miama ayi waba lozanga bilongulu biama. Bo yidukisa 15 di mimvu, minu yibotama. Mam’ama wumeka kuvanga mamoso muingi kukhandimina kusadila Yave. Nandi wuthula ku nzo bantulanga batu banuanga zitsunga zingolo ayi bamvanganga mambu ma buphunya, muingi kubaka lusalusu. Phasi beni kukindama mu zithotolo, boti ziawu zinkuizila kuidi mutu ngie zebi ti fueti kuzola ayi fueti kukieba.”

⁹ Mbi bisadisa Georgina kukindama mu mambu kabe viokila? Nandi wutuba: “Kilumbu mam’ama katona kumbalukila, buna yimana tanga Kibibila kioso. Mu thangu beni, minu yiba lufiatu ti mambu yaba longuka mu Kibibila maba makiedika. Ayi kinkundi kiama na Yave kiba beni kingolo. Khumbu ziwombo minu yisambila ayi nandi wutambudila minsambu miami. Mu thangu mambu amomo mabe monika, khomba yimueka yinkieto wuthumisa ku nzo’andi muingi tulonguka Kibibila va kimueka. Ayi zikhomba ziwombo mu kimvuka bakhindisa beni. Bawu baba kunthadilanga banga wumueka va dikanda diawu. Yimona bivisa ti koko ku Yave, kuawu kulutidi lulendu kena zimbeni zitu.”

10. Lufiatu mbi tulenda ba mu Yave Nzamb’itu?

¹⁰ Mvuala Polo wusonika ti vasi ko kiuma kilenda ‘kutu vambisa mu luzolo lu Nzambi, luidi mu Yesu Klisto Mfumu’itu.’ (Loma 8:38, 39) Kheti bo tumviokila mu ziphasi mu mua thangu, Yave wala tatamana kuba va khonzu’itu ayi kutu kindisa. Kifuani ki Georgina ki tumonisa ti, Yave mvandi wutu sadisanga, mu nzila zikhomba zitu zi kiphevi.

11. Buidi luzolo Yesu katubila luidi mu Yoane 15:12, 13, lusadisila minlonguki miandi? Vana kifuani.

¹¹ Va builu butsuka ava bamvonda, Yesu wutebula moyo minlonguki miandi matedi kukizolasana bawu na bawu. (Tanga Yoane 15:12, 13.) Nandi wuzaba ti luzolo alolo, lunkuiza basadisa kutatamana kuba kithuadi ayi kukindama mu thangu batu va nza bala balenda. Tala mambu mamonika mu kimvuka kimueka kiba ku Tesalonika. Bo kiawu kiyiza vangama,  zikhomba baba mu kimvuka beni batona kuviokila mu zithotolo. Vayi kheti bobo, zikhomba aziozio baba kifuani kimboti mu matedi kumonisa lukuikumunu ayi luzolo. (1 Tesa. 1:3, 6, 7) Mvuala Polo wuba kindisa muingi ‘batatamana kubuela monisa luzolo.’ (1 Tesa. 4:9, 10) Luzolo beni, luawu lunkuiza basadisa kubomba batu baba mu kiunda ayi kubuela mioko batu balebakana. (1 Tesa. 5:14) Bawu balandakana zithuadusulu mvuala Polo kaba vana. Diawu mu nkanda wumuadi kaba sonikina mu mvu wulanda, mvuala Polo wuba kamba: ‘Luzolo beno boso muidi kuidi bankaka luidi mu kubuelama.’ (2 Tesa. 1:3-5) Luzolo luawu luba sadisa kukindama mu ziphasi ayi mu zithotolo.

12. Mu thangu mvita, buidi zikhomba kutsi yimueka bamonisina luzolo badi bawu na bawu?

¹² Tala kifuani ki Danylo, tuma tubila va thonono ayi nkazi’andi. Bo mvita wutona ku divula bankalanga, bawu batatamana kulandakananga zithutukunu, kusamuna mu luaku baba bakanga ayi kukabilanga bidia baba na zikhomba zinkaka. Kilumbu kimueka, masodi bayenda ku nzo yi Danylo ayi bankamba muingi kabika kubue ba Mbangi yi Yave. Danylo wutuba: “Bo minu yimanga, bawu bambula ayi bavuna kubasula mu ntu’ama. Ava kukuenda, bawu bankhamba ti bankuiza vutuka muingi kubundana nyitu na nkazi’ama. Bo zikhomba bazaba mawu, mu thinu bawu ba tumakisa mu Comboio yaba kuenda ku divula dinkaka. Minu yilendi zimbakana ko luzolo zikhomba aziozio bambonisa. Bo tutuka ku divula beni dimona, zikhomba bankalanga kuna ba tuvana bidia, batsadisa kubaka kisalu ayi kubaka nzo. Mu phila ayoyi, befu mvitu tuaba yambanga Zimbangi zi Yave zinkaka, baba tinanga mu mavula maba mvita.” Binongo abiobio bimmonisa ti luzolo tuidi befu na befu, lutu sadisanga kukindama bo batu batulenda.

13. Buidi phevi yinlongo yitu sadisilanga kukindama mu kisalu ki Yave, kheti bo batu batulenda?

¹³ Yesu wukamba minlandikini miandi, muingi bazola zimbeni ziawu. (Matai 5:44, 45) Vayi bukiedika ti didi diambu diluelu kuvanga mawu? Ndamba! Vayi mu lusalusu lu phevi yinlongo yi Nzambi, tulenda nunga. Mbutu wu phevi yinlongo widi luzolo, mvibudulu, mamboti, kulembama ayi kukiyala. (Ngala. 5:22, 23) Zikhadulu aziozio zitu sadisanga kukindama bo batulenda. Zimbeni ziwombo  bayiza balula mavanga mawu, kibila nnuni, nkazi, muana voti mutu wunkaka va nsengi widi Mbangi yi Yave wummonisa zikhadulu aziozio zimboti. Ayi bawombo mu bawu bamana ba zikhomba zitu zi kiphevi. Diawu ngie kumona phasi kuzola batu batulendanga kibila befu tunsadilanga Yave, dinda mu nsambu phevi yinlongo yi Yave muingi wubotula mayindu amomo. (Luka 11:13) Ayi ba lufiatu ti nzila yi Yave yawu yilutidi.—Zinga. 3:5-7.

14-15. Buidi Loma 12:17-21, yisadisila Yasmeen kumonisa luzolo kuidi nnuni’andi kheti mu mambu mambi kaba kumvangilanga?

¹⁴ Tala kifuani ki Yasmeen, wunkalanga ku Oriente Medio. Bo nandi kayiza ba wumueka mu Zimbangi zi Yave, nnuni’andi wuyindula ti bamvuna. Diawu katomba kuvangila mamoso muingi kunkandimina kusadila Nzambi. Nandi wabe kunkambanga mambu ma kunlueka ntima. Ayi wuvukumuna dikanda di Yasmeen, mfumu yimueka yi kinganga ayi nganga yimueka yi minkisi muingi kutula Yasmeen boma ayi kumvunina mambu ti nandi widi mu kuvasa dikanda diandi. Mvandi, nnuni wu Yasmeen wutendukila zikhomba bo baba mu lukutukunu. Khumbu ziwombo Yasmeen kaba dilanga mu kibila ki mambu mambi nnuni’andi kaba kumvangilanga.

¹⁵ Bo Yasmeen kabe kuendanga mu zikhutukunu ku Nzo yi Kintinu, zikhomba baba kumbombanga ayi baba kunkindisanga. Ayi bakulutu ba kimvuka bankindisa kusadila mambu madi mu Loma 12:17-21. (Tanga.) Yasmeen wutuba: “Diba diambu diphasi vayi yidinda kuidi Yave muingi kansadisa kusadila mambu yinlongukanga mu Kibibila. Diawu bo nnuni’ama kabifisa kikuku mu kibila ki ngazi kaba, minu yikifiona. Bo kanthendukila, minu yintambudila mu mbembo yivumbama. Ayi bo kabakana kubela, minu yinkieba buboti.”

16-17. Mbi ngie belonguka mu kifuani ki Yasmeen?

¹⁶ Yasmeen wubaka ndandu mu kutatamana kumonisa luzolo kuidi nnuni’andi. Nandi wutuba: “Nnuni’ama wutona kumfiatila kibila wuzaba ti minu yintubanga to kiedika. Nandi wutona kukhuwanga mu lukinzu, bo tuaba kolukanga matedi kinganga. Ayi wukikinina tudedikisa mambu, muingi kuvutula ndembama va nzo. Buabu, nandi wukukhindisanga kulandakana zikhutukunu. Minu yidi kivuvu ti, nnuni’ama wala kikinina kiedika. Ayi tuala sadila Yave va kimueka.”

¹⁷ Kifuani ki Yasmeen kimmonisa ti luzolo, lukindamanga mu mambu moso,. . . lumvibidilanga mu mambu moso ayi luntatamananga  mu mambu moso.’ (1 Koli. 13:4, 7) Kuzaba ti batu batulendanga, kulenda tutuadisa kiunda. Vayi luzolo lulutidi mangolo. Luawu lumbombanga mintima mitu ayi lunkuangidikanga ntima wu Yave. Kheti zimbeni zitu bala tatamana kutulenda, befu tuala tatamana mu mayangi. Buidi malenda bela?

18. Kibila mbi tufueti kuangalala bo batu batulenda?

¹⁸ Yesu wutuba: ‘Mayangi kuidi benu mu thangu batu bala kululenda.’ (Luka 6:22) Befu tuzolanga ko bo batu batuthota mu kibila ki kiminu kitu. Vayi kibila mbi tufueti kuangalala bo batu batulenda? Tala bibila abibi bitatu. Kitheti, Bo tunkindama, befu tumbakanga lunungu va meso ma Nzambi. (1 Pete. 4:13, 14) Kimuadi, kiminu kitu kinluta kindamanga. (1 Pete. 1:7) Ayi kintatu, tuala tambula mfutu wulutidi—luzingu lu mvu ka mvu.—Loma 2:6, 7.

19. Kibila mbi bapostolo babela mu mayangi kheti bo baba bula?

¹⁹ Bo Yesu kavulubuka, bapostolo bamona bivisa mu mambu katuba matedi mayangi. Bo bamana kuba bula ayi kuba kandimina muingi babika kubue samunanga, bawu bayangalala. Kibila mbi? ‘Kibila bazaba ti bafueni mona ziphasi mu kibila ki dizina di [Yesu].’ (Mava. 5:40-42) Luzolo baba kuidi mfumu’awu, luluta kena boma baba mu zimbeni ziawu. Ayi bawu bamonisa luzolo beni, mu kusamuna zitsangu zimboti mu “khambu vonga.” Zikhomba zitu ziwombo bubu, bantatamananga bakuikama kheti bo bamviokila mu ziphasi. Bawu bazebi ti, Yave kalendi zimbakana ko kisalu bavanga ayi luzolo bamonisa mu dizina diandi.—Ebe. 6:10.

20. Mbi tuala longuka mu dilongi dinkuiza?

²⁰ Batu bala tatamana kutulenda bo tukhidi zingila mu nza ayiyi. (Yoa. 15:19) Vayi tulendi mona ko boma. Kibila dedi bo tunkuiza muena mu dilongi dinkuiza, Yave ‘wala kindisa . . . Ayi wala kieba’ bisadi biandi bikuikama. (2 Tesa. 3:3) Diawu, tatamana kuzola Yave, zikhomba zitu zi kiphevi ayi mvandi zimbeni zitu. Befu kulandakana dilongi adiodio, tuala tatamana mu kithuadi, kiminu kitu kiala luta kindama, tuala zitisa Yave ayi tuala monisa ti luzolo luawu lulutidi lulendu kena kimbeni.