DILONGI 27
Kubama Bubu mu Zithotolo Zinkuiza
‘Bukiedika, baboso batidi kunata luzingu lukuikama mu Nzambi, mu kithuadi na Yesu Klisto, mvawu bela thoto.’—2 TIMOTEO 3:12.
NKUNGA 129 Tukuikamanu
MAMBU TUANLONGUKA *
1. Kibila mbi tufueti bela bakubama mu zithotolo tuala viokila?
VA BUILU ava kufua, Yesu Klisto wutuba ti baboso batidi kuba minlonguki miandi bala balenda. (Yoane 17:14) Mawu mamonika mu bukiedika. Nati bubu, Baklisto bakiedika bamviokilanga mu zithotolo kuidi batu bakhambu zolanga mbuongimini yi kiedika. (2 Timoteo 3:12) Ayi bo tuidi mu kuefikamanga kutsuku nza ayiyi, tufueti ba bakubama kibila zimbeni zitu bala buela kutu thota.—Matai 24:9.
2-3. (a) Mbi tufueti tebukanga moyo mu matedi boma? (b) Mbi tuemmona mu dilongi adidi?
2 Mbi tufueti vanga muingi kununga zithotolo zinkuiza kuntuala? Tubika bala ti kuyindulanga mu mambu mala tumonikina kulenda kutu sadisa. Kuyindulanga mu mambu kamamonikiniabu ko kulenda kutu vanga kukuazuka beni ayi kuba boma. Ayi tulenda tomba kubika kiedika ava kuviokila mu zioso kua zithotolo. (Zingana 12:25; 17:22) Nkinza beni kutebukilanga mawu moyo, kibila boma bulenda ba ntambu wungolo mu mioko mi ‘mben’itu, Nkadi’ampemba.’ (1 Petelo 5:8, 9) Diawu, mbi bilenda kutu sadisa kuba bakubama mu zithotolo zinkuiza kuntuala?
3 Mu dilongi adidi, tuemmona buidi tulenda kindisila kikundi kitu na Yave ayi kibila mbi didi diambu dinkinza kuvanga mawu bubu. Mvandi tunkuiza zaba mbi tufueti vanga muingi tuluta ba kibakala. Ayi kutsuka tunkuiza longuka mbi tufueti vanga bo batu ba tulenda.
BUIDI BU KUKINDISILA KIKUNDI KIAKU NA YAVE
4. Dedi buntubila Ebeleo 13:5, 6, lufiatu mbi tufueti ba? Kibila mbi lufiatu beni luididi nkinza?
4 Ba lufiatu ti Yave wuku zolanga ayi kalendi kukuekula ko. (Tanga Ebeleo 13:5, 6.) Mimvu miwombo kumbusa, Kibanga ki Nsungi kituba: “Mutu wuzebi buboti Nzambi wunluta kunfiatilanga mu thangu kamviokila mu zithotolo.” Mambu amomo madi ma kiedika! Tufueti zola Yave ayi kufiatila to mu nandi. Tulendi zimbakana ko luzolo lungolo nandi kadi mu kadika mutu mu befu. Kuba lufiatu alolo, kuala tusadisa kununga ziosokua zithotolo tumviokila.—Matai 22:36-38; Yakobi 5:11.
5. Mbi ngie wufueti vanga muingi wubaka bivisa ti Yave wuku zolanga?
5 Tanganga Kibibila kadika kilumbu muingi wukindisa kikundi kiaku na Yave. (Yakobi 4:8) Bo wuntanga kiawu, tsikika mayindu maku mu zikhadulu zi Yave. Tomba kuzaba luzolo kadi mu ngiewu mu mambu kantubanga ayi kamvanganga. (Esodu 34:6) Batu bankaka baba monisanga ko luzolo, diawu bammuenanga phasi kukikinina ti Nzambi wuba zolanga. Boti mawu mayindu widi, sonika mu nkanda mambu mamboti Yave ka kuvangilanga. (Minkunga 78:38, 39; Loma 8:32) Bo wunyindula mu mambu maku monikinanga ayi ma wuntanga mu Diambu di Nzambi, ḿba ngie wulenda nunga kusonika mambu mawombo Yave kavanga ayi kakhidi vanga mu ngiewu. Ngie kuvutulanga matondo mu mambu moso Yave ka kuvangilanga, kikundi kiaku ayi nandi kiala luta kindama.—Minkunga 116:1, 2.
6. Dedi bummonisina Minkunga 94:17-19, mambu mbi mala kumonikina ngie kusambila mu ntima woso?
6 Sambilanga kadika kilumbu. Yindula mu muana bambumba mu luzolo kuidi tat’andi. Muana beni kalenda mona nsika ayi kuzabikisa tat’andi mambu moso kabe monikina mu kilumbu, kuba kuandi mamboti voti mambi. Mawu mvandi malenda monikina kuidi ngiewu ayi Yave ngie kusambilanga mu ntima woso kadika kilumbu. (Tanga Minkunga 94:17-19.) Mu nsambu, ‘dukula ntim’aku dedi nlangu’ ayi zabikisa tat’aku wu luzolo mambu moso ma kukuamisa ayi ma kutula boma. (Maniongo 2:19) Zebi ndandu mbi wala baka? Ngie wala baka ‘ndembama yi Nzambi’ bantubila mu Kibibila ‘yoyi yiviokidi diela dioso.’ (Filipi 4:6, 7) Bo wunluta kusambila mu ntima woso, buawu ngiewu wala luta fikimina Yave.—Loma 8:38, 39.
Kibakala kinkuizilanga mu lufiatu luitu mu Yave ayi Kintinu kiandi
Lufiatu mu zikhanu zi Kintinu zivana mangolo khomba Stanley Jones (Tala bitini bi matangu 7)
7. Kibila mbi ngie wufueti bela lufiatu ti zikhanu zi Nzambi zitedi Kintinu ziala salama?
7 Ba lufiatu ti zikhanu zi Yave zitedi Kintinu ziala salama. (Zintalu 23:19) Boti kiminu kiaku kisi ko kingolo mu zikhanu zi Nzambi, mawu mala sadisa Satana ayi badi ku khonzu’andi bakutula boma. (Zingana 24:10; Ebeleo 2:15) Mbi ngie wufueti vanga muingi kubuela lufiatu luaku mu zikhanu zi Kintinu ki Nzambi? Tona ndongukulu yi Kibibila matedi zikhanu zi Kintinu ayi fiongunina bibila wulenda bela lufiatu ti ziawu ziala salama. Vayi kibila mbi kuvanga mawu didi diambu dimboti? Tala kifuani ki Stanley Jones, wuviokisa sambuadi di mimvu mu buloku mu kibila ki kiminu kiandi. * Mbi binsadisa kununga mu thangu ayoyi yi ziphasi? Nandi wutuba: “Kiminu kiama kiba kingolo kibila minu yizaba mambu matedi Kintinu ki Nzambi na mambu kala vanga ayi yisa findanga ko ziphaka mu mawu. Diawu ni mutu wununga kuthatula mu Yave.” Ngie kuba kiminu kingolo mu zikhanu zi Yave, kikundi kiaku ayi nandi kiala luta ba kifikama ayi walasa bika ko boma bukununga.—Zingana 3:25, 26.
8. Kulandakana zikhutukunu zioso yidi phila yimboti yi kuzabila mbi? Sudikisa.
8 Landakana zikhutukunu zioso. Zikhutukunu zi tusadisanga kukindisa kinkundi kitu na Yave. Ayi nkinza tumvananga ziawu, kutu sadisa kuzaba boti tuala nunga voti ndamba zithotolo zinkuiza kuntuala. (Ebeleo 10:24, 25) Kibila mbi tuntubila abobo? Boti bubu befu tumbikanga kiosokua kiuma kitu vanga kubika kuenda mu lukutukunu, mbi biala monika kuntuala bo tuala tombulu kutula luzingu luitu va kingela muingi kukuenda mu lukutukunu? Vayi boti tuidi makani ma kukuendanga mu zikhutukunu zioso, tualasa mona ko boma mu thangu zimbeni zitu bala tomba kutu kandimina kuvanga mawu. Ayiyi yawu thangu tufueti zodila zikhutukunu. Befu kuzola ziawu, ni zithotolo, ni mintinu mi luyalu, bala tuvanga kubika tumamana theti Yave ava batu.—Mavanga 5:29.
Kulunda mu ntu matangu ma Kibibila ayi minkunga kuala tusadisa mu thangu tuala viokila mu zithotolo (Tala bitini bi matangu 9) *
9. Kibila mbi kulunda matangu ma Kibibila mu ntu yidi phila yimboti yi kukubimina mu zithotolo zinkuiza?
9 Lunda mu ntu matangu ma Kibibila wunzolanga. (Matai 13:52) Ḿba wununganga ko kulunda va ntu matangu, vayi Yave kalenda sadila pheve’andi yinlongo muingi ku kusadisa kutebuka moyo matangu beni. (Yoane 14:26) Khomba wumueka wuba naveka mu buloku ku Alemanha Oriental wutuba: “Mayangi mawombo yiba, kibila yinunga kusueka matangu mawombo ma Kibibila mu ntu. Kheti yiba miveka, yisadila buboti thangu yiba mu kuyindulanga matangu mawombo ma Kibibila.” Matangu khomba kalunda mu ntu mansadisa kubuela fikama Yave—ayi kutatamana wukuikama.
(Tala bitini bi matangu 10) *
10. Kibila mbi buboti beni kulunda mu ntu minkunga minkembisa Yave?
10 Lunda mu ntu ayi yimbila minkunga minkembisa Yave. Bo Polo ayi Sila baba mu buloku ku Filipi, bawu bayimbila minkunga minkembisa Nzambi balunda mu ntu. (Mavanga 16:25) Mawu mvandi zikhomba zitu baba ku União Soviética bavanga bo baba nata ku buloku bungolo ku Sibéria. Bawu bayimbila minkunga muingi kuyikindasana. Khomba mueka yinkieto bantedilanga Mariya Fedun wuntebuka moyo: “Tuaba kuimbilanga minkunga mioso tuzaba miba mu buku yi minkunga.” Nandi wutuba ti minkunga amiomi, misadisa baboso kuba bakindama ayi kubuela fikama Yave. Abu ngiewu? Mvaku wumbuela bakanga khindusulu bo wunkuimbila minkunga midi mu buku yi minkunga voti midi mu TV JW? Sadila thangu ayiyi muingi kulunda miawu mu ntu!—Tala quadro yintuba “Phana Kibakala.”
BUIDI WULENDA BUELA MONISINA KIBAKALA
11-12. (a) Dedi bummonisina 1 Samueli 17:37, 45-47, kibila mbi Davidi kamonisina kibakala? (b) Mambu mbi mamboti tulenda longuka mu kifuani ki Davidi?
11 Muingi wununga zithotolo, ngie wufueti ba kibakala. Boti ngie wunyindula ti wisi ko kibakala, mbi wufueti vanga muingi kukuna khadulu ayoyi? Tebuka moyo ti kuba kibakala kuisintombulu ko kuba ntela wuwombo, mangolo mawombo voti nzayilu yiwombo. Yindula mu kifuani ki Davidi. Nandi wuba ditoko bo kanuana na Ngoliati. Vantuala Ngoliati, Davidi wuba wukhufi, kasa ba ko mangolo ayi kasa ba ko wukubama muingi kunuana. Kasa ba ko mbedi voti sabala. Vayi Davidi wuba beni kibakala ayi kasa ba ko boma bu kunuanisa Ngoliati wuba beni lungundayi.
12 Kibila mbi Davidi kamonisina kibakala? Kibila nandi waba kikininanga ti Yave wuba yandi. (Tanga 1 Samueli 17:37, 45-47.) Davidi kasa viokisanga ko thangu’andi mu kuyindulanga ti Ngoliati nandi wulutidi zangama ke nandi. Vayi nandi wuyindula: ‘Ngoliati kiphumbulu kadi va meso ma Yave.’ Mbi tube longuka mu kinongo akioki? Befu mvitu tulenda ba kibakala. Diawu, tufueti ba lufiatu ti Yave widi va khonzu’itu ayi zimbeni zitu badi biphumbulu va meso ma Nzambi Nkua Ngolo Zioso. (2 Lusansu 20:15; Minkunga 16:8) Ava zithotolo zitona, mbi tulenda vanga muingi tuluta ba kibakala?
13. Kiuma mbi kitu sadisanga kuluta ba kibakala? Sudikisa.
13 Kiuma kitu sadisanga bubu kuba kibakala, kuidi kusamuna zitsangu zimboti zi Kintinu. Vayi buidi kisalu ki kusamuna kitu buedilanga kibakala? Kisalu ki kusamuna kitu longisanga kufiatila Yave ayi kubika ba boma bu batu. (Zingana 29:25) Kuvanganga bisavu binyikunanga nyitu, kunkindisanga nyitu, buawu mvandi kibakala kitu kinkuiza luta kindama bo tunsamuna vosokua vama, mu nzo ka nzo, mu bibuangu bidi beni batu, voti mu kuvana kimbangi mu khambu kubama. Befu kubuela kibakala kitu mu kisalu ki kusamuna, tuala luta ba bakubama muingi kutatamana kusamuna mu thangu zimfumu zi luyalu bala kandimina kisalu kitu.—1 Tesalonika 2:1, 2.
Nancy Yuen kasa kikinina ko kubika kisalu ki kulonga zitsangu zimboti (Tala bitini bi matangu 14)
14-15. Mbi tulenda longuka mu bifuani bi Nancy ayi Valentina?
14 Tulenda longuka beni mu kifuani ki zikhomba ziwadi zi bakieto bakuikama bamonisa kibakala. Wumueka mu bawu widi khomba Nancy Yuen. * Kheti wuba ntela wumueka ayi ndambu (1.5 m), nandi kasa bikanga ko boma bunnunga. Bo batomba kukuika Nancy kubika kubue longanga, nandi kasa kikininana ko, diawu kavangila 20 di mimvu mu buloku ku China. Masodi mamfundisa batuba ti nandi ‘mutu wuluta ba kithemu mu divula dioso di China.’
Valentina Garnovskaya wuba lufiatu ti Yave wuba yandi (Tala bitini bi matangu 15)
15 Kifuani kinkaka kidi ki khomba Valentina Garnovskaya. * Nandi wuvanga 21 di mimvu mu buloku ku divula baba tedilanga União Soviética. Kibila mbi bantudila mu buloku? Kibila nandi wuba wukubama muingi kutatamana kusamuna, diawu masodi baba kuntadilanga buka ‘mbeni wu boma.’ Mbi bisadisa zikhomba ziwadi zi bakieto kumonisa kibakala? Lufiatu Nancy ayi Valentina baba ti Yave wuba yawu, luawu luba sadisa.
16. Buidi tulenda bakila kibakala ki kiedika?
16 Dedi bo tuma muena, befu tumonisanga ko kibakala mu mangolo mitu veka voti nzayilu tuidi. Muingi tumonisa kibakala, tufueti kikina ki Yave widi ku khonzu’itu ayi widi kutu nuanina. (Deutelonomi 1:29, 30; Zakalia 4:6) Ayiyi yawu tho yi kibakala kikiedika.
BUIDI BU KUNUNGINA KITHATU ZIMBENI ZITU BADI MU BEFU
17-18. Ndubu mbi Yesu katu vana mu Yoane 15:18-21? Sudikisa.
17 Befu boso tunzolanga bankaka ba tukinzika. Vayi tulendi yindula ko ti tuisi ko luvalu boti bankaka ba tulenda. Yesu wutuba: ‘Mayangi kuidi benu mu thangu batu bala ku lulenda, ayi bo bela tatamana ku luvengumuna, bo bela ku lufinga, ayi bo bela singa dizina dinu, mu kibila ki Muana Mutu.’ (Luka 6:22) Mbi Yesu kaba tomba kutuba?
18 Yesu kasa tomba ko kutuba ti Baklisto banzolanga bo batu baba lenda. Vayi nandi waba tulubula mu mambu mala tumonikina. Befu tukotanga ko mu mambu ma nza. Befu tunlandakananga malongi ma Yesu ayi tunsamunanga zioziawu zitsangu nandi kasamuna. (Tanga Yoane 15:18-21.) Vayi bilutidi nkinza kuidi befu kuidi kusadila Yave. Boti batu batulendanga kibila tunzolanga Tat’itu, amomo mambu mawu.
19. Buidi tulenda landikinina kifuani ki bapostolo?
19 Kawubika mambu voti mavanga ma batu bankaka maku vanga kumona zitsonya zi kuba Mbangi yi Yave. (Mika 4:5) Boti khumbu zinkaka wummonanga boma bu batu, tebuka moyo kifuani ki bapostolo. Bo Yesu kafua, bawu bamona phila zimfumu zi binganga bi basi Yuda baba kuba lendilanga. (Mavanga 5:17, 18, 27, 28) Kheti bobo, bawu batatamana kukuendanga ku tempelo ku Yelusalemi ayi bamonisa bivisa kuidi baboso ti bawu baba minlonguki mi Yesu. (Mavanga 5:42) Bawu basa bika ko boma bu batula nkaku mu kisalu ki kusamuna. Ngie mvaku wulenda nunga boma. Buidi? Zabikisa baboso ti ngie widi Mbangi yi Yave—ku kisalu, mu kikola ayi va nsengi wunkalanga.—Mavanga 4:29; Loma 1:16.
20. Kibila mbi bapostolo babela mu mayangi kheti bo baba lenda?
20 Kibila mbi bapostolo babela mu mayangi? Bila bawu bazaba kibila baba kuba lendilanga ayi baba monanga nzitusu kutovuka mu kibila ki kuvanga luzolo lu Nzambi. (Luka 6:23; Mavanga 5:41) Mvuala Petelo wusonika kuntuala: ‘Mayangi kuidi benu mu thangu batu bala kululenda, ayi bo bela tatamana kuluvengumuna, bo bela kulufinga, ayi bo bela singa dizina dinu, mu kibila ki Muana Mutu.’ (1 Petelo 2:19-21; 3:14) Befu kuvisa ti batu batulendanga kibila tumvanganga mambu masonga, befu tualasa bika ko kusadila Yave.
NDANDU YIDI MU KUBA WUKUBAMA
21-22. (a) Mbi wutidi kuvanga muingi kuba wukubama mu zithotolo zinkuiza? (b) Mbi tuala longuka mu dilongi dinkuiza?
21 Befu tusa zaba ko thangu mbi batu bala tona kutu thota voti thangu mbi mintinu mi luyalu bala kandimina kisalu kitu. Vayi diambu dimueka befu tuzebi: tulenda tona kukubama bubu. Diawu tufueti kindisila kikundi kitu na Yave, kubuela monisa kibakala ayi kununga zimbeni zitu bo ba tulenda. Befu kukubama bubu, tuala nunga kuba bakuikama mu bilumbu binkuiza.
22 Vayi ba kukandimina kisalu kitu ki kusamuna? Mu dilongi dinkuiza, tuala longuka mua minsua mi Kibibila miala tusadisa kutatamana kusadila Yave mu thangu bala kandimina kisalu kitu.
NKUNGA 118 “Yave Wutubuela Kiminu”
^ Lut. 5 Tuisintomba ko bankaka ba tulenda. Vayi tuzebi ti befu boso tuala viokila mu zithotolo. Dilongi adidi dinkuiza tusadisa kumonisa kibakala bo tumviokila mu zithotolo
^ Lut. 7 Tala Kibanga ki Nsungi, kilumbu 1 Ngonda Yintanu, mvu 1966, tsielu 275-286.
^ Lut. 14 Tala Kibanga ki Nsungi, kilumbu 1 Ngonda Yintatu, mvu 1980, zitsielu 4-7. Tala mvandi video Todos Saberão Quem É Jeová mu JW Broadcasting®. Kota vantuba ENTREVISTAS E CASOS REAIS.
