1-2. (a) Kibila mbi tulendi kuitukila ko bo bankandimina mbuongimin’itu? (b) Mbi tunkuiza longuka mu dilongi adidi?

MU mvu 2018, kuvioka 223.000 di minsamuni mi zitsangu zimboti, bazingila mu zitsi bakandimina kisalu kitu kuidi Yave. Masi ko mambu ma kukuitukila. Dedi bo tulongikidi mu dilongi dibedi, Baklisto bazebi ti bala viokila mu zithotolo. (2 Timoteo 3:12) Kosokua tunzingila, mu kinzimbukila zimfumu zi luyalu balenda tukandimina kubuongimina Tat’itu yi luzolo, Yave.

² Boti ku tsi wunkalanga ntinu wumbaka makani ma kukandimina mbuongimin’itu kuidi Yave, ḿba ngie wulenda kuyikuvusa: ‘Zithotolo zinsundula ti tusiedi ko luvalu va meso ma Yave? Kukandimina kisalu kitu kunsundula ti tuisi bue buongimina ko Yave? Yifueti kukuenda ku divula dinkaka bakhambu kandimina kisalu kitu?’ Mu dilongi adidi, tunkuiza baka mimvutu mi biuvu abiobi. Mvandi tunkuiza longuka buidi tulenda tatamana kubuongimina Yave mu thangu bankandimina kisalu kitu ayi mambu mbi tufueti bela keba keba.

3. Dedi bummonisina 2 Kolinto 11:23-27, zithotolo mbi mvuala Polo kaviokila ayi mbi tube longuka mu kifuani ki Polo?

³ Boti ntinu bekandimina mbuongimin’itu, ḿba tulenda yindula ti tusiedi ko luvalu va meso ma Yave. Tala kifuani ki mvuala Polo. Nandi wuba luvalu va meso ma Yave. Nandi wuba luaku lu kusonika 14 di minkanda midi mu Masonoko ma Kiebeleo, ayi wuba mvuala wu bapakanu. Vayi nandi wuviokila  mu zithotolo ziwombo. (Tanga 2 Kolinto 11:23-27.) Kifuani ki mvuala Polo, kitulonga ti khumbu zinkaka Yave wumbikilanga bisadi biandi bikuikama kuviokila mu zithotolo.

4. Kibila mbi basi nza batulendilanga?

⁴ Yesu wusudikisa kibila mbi tufueti bela bakubama mu kuviokila mu zithotolo. Nandi wutuba ti bala tulenda kibila tukotanga ko mu mambu ma nza. (Yoane 15:18, 19) Kuviokila mu zithotolo kuisinsundula ko ti tusiedi ko luvalu va meso ma Yave. Vayi kummonisa ti befu tuidi mu kuvanga mambu masulama!

5. Bukiedika ti batu badi mangolo ma kumanisa mbuongimina yi Yave? Sudikisa.

⁵ Batu ba kinsuni balendi nunga ko kumanisa mbuongimini yi Nzambi Nkua Ngolo Zioso, Yave. Bawombo bayedika, vayi basa nunga ko. Tala mambu mamonika mu Mvita Wumuadi wulutidi ngolo mu nza yimvimba. Mu thangu beni mintinu mu zitsi ziwombo batuadisa zithotolo kuidi dikabu di Nzambi. Bakandimina kisalu ki Zimbangi zi Yave kubika to ku Alemanha, vayi mvandi ku Austrália, ku Canadá ayi mu bibuangu binkaka. Vayi mona mambu mbi mamonika. Mu mvu 1939, bo mvita wutona, kuba 72.475 di minsamuni mu nza yoso. Vayi bo mvita wumana mu mvu 1945, mu lusalusu lu Yave kuyiza ba 156.299 di minsamuni. Thalu yi minsamuni yiyiza buelama!

6. Mambu mbi mamboti malenda monika bo tumviokila mu zithotolo? Vana kifuani.

⁶ Zithotolo zilenda kutu sadisa kubuela ba bakuikama mu kusadila Yave ayi kubika ba boma. Dedi, bakuela bamueka baba muana wu dibakala baba zingila ku tsi zimfumu zi luyalu babaka makani ma kukandimina mbuongimin’itu. Bawu basa ba ko boma, vayi bakota mu kisalu ki ntuami ntuala. Nkazi’andi wubika kisalu kaba tambulanga zimbongo ziwombo muingi kuvanga mawu. Nnuni wutuba ti kukandimina kisalu kitu kuvanga batu kutomba buela zaba matedi Zimbangi zi Yave. Mu kibila akioki, disa ba ko diambu diphasi kutona ndongukulu yi Kibibila. Kukandimina kisalu kitu kutuadisa ndandu yinkaka. Nkulutu mueka wu kimvuka wunkalanga mvandi ku tsi beni wutuba ti bawombo babika kubue sadila Yave, batona kukuendanga mu zikhutukunu ayi kuvutuka kubue samuna.

7. (a) Mbi tunlonguka mu mambu madi mu Levitiku 26:36, 37? (b) Mbi wunkuiza vanga mu thangu bankandimina kisalu kitu?

 ⁷ Bo zimbeni zitu bankandimina kisalu kitu, bawu bantomba befu tuba boma bu kusadila Yave. Kubika kuandi to kukandimina kisalu kitu, bawu balenda tiamuna zitsangu zi luvunu, kufila masodi muingi kukengidila zinzo zitu, kutunata mu zinzo zi lufundusu, voti kukotisa bankaka mu buloku. Bawu bantomba befu tuba boma, kibila bannunga kukotisa mua ndambu yi zikhomba zitu ku buloku. Befu kuba mona boma ayi kumona boma mambu balenda kutu vangila, befu tulenda tona kubika bue sadila Yave. Befu tumengi kuba dedi batu bantubila mu Levitiku 26:36, 37. (Tanga.) Befu tualasa bika ko boma bu tuvanga kubika sadila Yave. Befu tunfiatilanga mu Yave ayi tubanga ko boma. (Yesaya 28:16) Mu lusambulu, befu tuntombanga zithuadusulu zi Yave. Befu tuzebi ti mu lusalusu luandi, nate mintinu mi nza milutidi mangolo balendi nunga ko kutukandimina kubuongimina Nzambi mu lukuikumunu.—Ebeleo 13:6.

8-9. (a) Makani mbi mfumu dikanda voti kadika mutu kafueti baka? (b) Mbi biela sadisa mutu kubaka makani mamboti?

⁸ Boti ku tsi wunkalanga ntinu bekandimina mbuongimin’itu, ngie wulenda kuyikuvusa boti wufueti kuenda ku tsi bakhambu kandimina kisalu kitu kuidi Yave. Amomo madi makani kadika mutu kafueti baka. Bankaka balenda zola kulonguka matedi mambu Baklisto mu sekulu yitheti bavanga mu thangu baviokila mu zithotolo. Bo zimbeni bavonda Stefano mu mamanya, minlonguki ku Yelusalemi batina mu mavula mankaka, bankaka bayenda ku Fenisi, Sipeli, Antiokia. (Matai 10:23; Mavanga 8:1; 11:19) Vayi, bankaka balenda zola kuzaba ti bo zithotolo zinkaka zimonikina Baklisto mu sekulu yitheti, mvuala Polo wubaka makani ma kubika tatuka bibuangu bakandimina kisalu ki kusamuna. Vayi nandi wutula luzingu luandi va kingela muingi kutiamuna zitsangu zimboti ayi kukindisa zikhomba mu bibuangu biaba viokila mu zithotolo zingolo.—Mavanga 14:19-23.

⁹ Mambu mbi tubelonguka mu binongo abiobi? Kadika mfumu dikanda kafueti baka makani mu matedi kukuenda kuma kunkaka. Ava kukuenda nandi kafueti sambila ayi kufiongunina buboti mambu mamboti ayi mambi malenda monikina dikanda diandi mu kibila ki kukuenda kuma kunkaka. Mu mambu amomo, kadika nlandikini wu Klisto “wela nata wandi mfuna.” (Ngalatia 6:5) Befu tulendi ko kufundisa bankaka mu makani bambaka.

10. Zithuadusulu mbi Dingumba di filiali ayi bakulutu ba kimvuka bala vana?

¹⁰ Ba kukandimina kisalu kitu, buidi ngie wela tatamana kubuongimina Yave? Digumba di filiali yi tsi wunkalanga bela vana zithuadusulu kuidi bakulutu ba kimvuka, matedi buidi bu kutambudila bidia bi kipheve, buidi bu kuvangila zikhutukunu ayi buidi bu kusamunina. Digumba di filiali ba kukhambu vana zithuadusulu kuidi bakulutu ba kimvuka, bakulutu bala kusadisa ayi kusadisa zikhomba zinkaka mu kimvuka kutatamana kubuongimina Yave. Bawu bela vana zithuadusulu zibongulu mu Kibibila ayi bilongulu.—Matai 28:19, 20; Mavanga 5:29; Ebeleo 10:24, 25.

11. Kibila mbi ngie wulenda bela lufiatu ti walasa khambu ko bidia bi kipheve ayi mbi wulenda vanga muingi kukieba Kibibila ayi bilongulu binkaka?

¹¹ Yave wukanikisa ti bisadi biandi balasa khambu ko bidia bi kipheve. (Yesaya 65:13, 14; Luka 12:42-44) Diawu, ba lufiatu ti kimvuka ki Yave kiela vanga mamoso muingi ku kusadisa  kutatamana wukuikama. Vayi mbi ngie wulenda vanga? Bo bankandimina kisalu kitu, tomba vama vamboti muingi wulunda Kibibila ayi kioso kilongulu widi. Ba keba keba mu khambu bika biuma bi luvalu vosokua vama—kheti bidi mu minkanda, mu telefoni voti mu computador mu bibuangu balenda fika bakula biawu. Kadika mutu mu befu kafueti vanga mangolo muingi kutatamana kuba wukindama.

12. Muingi batu babika kuzaba mambu tuidi mu kuvanga, buidi bakulutu balenda vangila zikhutukunu?

¹² Mambu mbi mala monika matedi zikhutukunu zitu? Bakulutu bala kubika mamoso muingi ngie wulandakana lukutukunu mu phila batu ba tulendanga bakhambu zaba. Bawu balenda kukutuadisa muingi kulandakana zikhutukunu mu mangumba maluelu ayi balenda vingisa khumvu ziwombo kibuangu ki zikhutukunu ayi thangu. Muingi kusadisa zikhomba ziaku, buboti beni kukoluka mu mbembo yi vumbama bo wuntuka ayi bo wumbasika mu lukutukunu. Mvandi, buboti beni kuvuata mu phila batu bakhambu zaba ti mu lukutukunu wunkuenda.

13. Mbi tulenda longuka mu kifuani ki zikhomba zitu ku União Soviética?

¹³ Vayi mbi tulenda tuba mu matedi kisalu ki kusamuna? Kadika tsi balenda natina mambu mu phila yiviakana. Befu tunzolanga Yave ayi tutidi kukoluka na batu mambu matedi Kintinu, diawu tuala baka phila yi kulongila. (Luka 8:1; Mavanga 4:29) Mawu zikhomba zitu ku divula dikhulu yi União Soviética bavanga. Tala matuba Emily Baran, ntangi wu binongo: “Bo ntinu katuba ti Zimbangi zi Yave balendi ko kubue samuna mambu ma kiminu kiawu kuidi bankaka, bawu batona kukoluka na batu baba kalanga yawu va nsengi, batu baba salanga yawu ayi bakundi bawu. Ayi bo baba fila mu buloku mu kibila beni, bawu balonga batu baba yawu mu buloku.” Kheti bo bakandimina kisalu kitu, zikhomba zitu ku União Soviética basa vonga ko kusamuna. Boti ntinu ku tsi wunkalanga bekandimina kisalu ki kusamuna, vanga mambu zikhomba aziozi bavanga: kawubika kusamuna!

14. Mu mambu mbi Minkunga 39:1 katusadisa kuba keba keba?

¹⁴ Ba keba keba mu mambu wunkamba bankaka. Mu thangu bankandimina kisalu kitu, tufueti zaba ti vadi thangu yi ‘kuvuena sui.’ (Mpovi 3:7) Tufueti sueka zithuadusulu bala tuvana, ayi kubika zabikisa ziawu kuidi batu bakhambu nsua. Buka dizina di zikhomba, bibuangu bi zikhutukunu, buidi tunsamuninanga ayi buidi tuntambudilanga bilongulu. Tulendi zabikisa ko mambu amomo kuidi zimfumu zi luyalu, ni kuidi bakundi bitu voti kuidi basi dikanda ditu bankalanga ku tsi tuidi voti ku tsi yinkaka. Befu kuvanga mambu  amomo, tuala tula luzingu lu zikhomba zitu va kingela.—Tanga Minkunga 39:1.

15. Mbi Satana kala tomba kutu vanga, ayi mbi biala tusadisa kubika bua mu ntambu awowo?

¹⁵ Kawubika mambu maluelu matu vasa. Satana zebi ti nzo yivasuka yilendi tatamana ko kuba kithuadi. (Malako 3:24, 25) Nandi wala vanga mamoso muingi kutuadisa luvasanu mu zikhomba. Nandi wuntomba tuyibalukila befu na befu kubika kuandi kumbalukila nandi.

16. Kifuani mbi kimboti khomba Gertrud katu bikila?

¹⁶ Kheti zikhomba zi bakieto beka bayonzuka mu kipheve bafueti ba keba keba muingi babika bua mu ntambu awowo. Mona kifuani ki zikhomba ziwadi zi bakieto badi basolo, Gertrud Poetzinger ayi Elfriede Löhr. Bawu ayi zikhomba zinkaka zi bakieto baba ku buloku bu phasi ku Alemanha Nazista. Khomba Elfriede waba vanganga malongi muingi kukindisa zikhomba zinkaka zi bakieto baba ku buloku. Vayi Gertrud waba monanga beni nsoki. Kuntuala, Gertrud wumona zitsonya mu mawu ayi wulomba kuidi Yave muingi kansadisa kabika monanga nsoki. Nandi wusonika: “Befu tufueti longuka kukikinina boti bankaka balutidi mua luzabu voti biyeku kena befu.” Buidi Gertrud kanungina nsoki kaba? Nandi wutsikika mayindu mandi mu zikhadulu zimboti zi khomba Elfriede ayi mu mamboti mandi. Mu phila ayoyi, bawu bavutuka kubue ba bakundi bamboti. Bawu babuadi bavuka ku buloku bu phasi baba ayi basadila Yave mu lukuikumunu nati mu kilumbu kiawu kitsuka va ntoto. Mbi tube longuka mu kifuani kiawu? Muingi tubika bua mu ntambu wu kithatu, tufueti vanga mangolo muingi kudedikisa mambu tuidi na zikhomba zinkaka.—Kolosai 3:13, 14.

17. Kibila mbi tufueti bela keba keba muingi tubika baka makani mitu veka?

¹⁷ Bika kubayisa zithuadusulu. Zikhomba zi lufiatu badi biyeku mu kimbuka bala tuvana zithuadusulu, ayi buboti beni kulandakana ziawu. Kuvanga mawu kuala tusadisa kubika tuadisa mambu mankaka. (1 Petelo 5:5) Buka, ku tsi yimueka bakandimina kisalu kitu, zikhomba baba tuama ntuala bakamba minsamuni muingi babika kutambika bilongulu kuba kuandi mu minkanda voti mu telefoni mu kisalu ki kusamuna. Vayi nsamuni wumueka widi ntuami ntuala, wuyindula ti nandi wulutidi zaba kena bankaka, wutatamana kutambika bilongulu. Mambu mbi mayiza monika? Kilumbu kimueka, bo ntuami ntuala beni ayi zikhomba zinkaka baba vana kimbangi, baba tedimisa kuidi masodi ayi baba vana biuvu. Ḿba masodi beni baba landakana zikhomba ayi banunga kubonga bilongulu bioso batambika. Mbi tube longuka mu kifuani akioki? Tufueti landakananga zithuadusulu kheti tuisinkikinina  ko mu ziawu. Yave wala tatamana kutu sakumuna befu kutumamana zithuadusulu zi batu kasola muingi kutu tuama ntuala.—Ebeleo 13:7, 17.

18. Kibila mbi tulendi tsikikila ko zithuadusulu zikhambu fuana?

¹⁸ Bika tsikika zithuadusulu zikhambu fuana. Bakulutu ba kimvuka ba kutsikika zithuadusulu zikhambu fuana, bawu balenda vongisa zikhomba. Khomba Juraj Kaminský wuntebuka moyo bo bakandimina kisalu kitu ku divula dikhulu di Tchecoslováquia: “Bo zikhomba baba biyeku ayi bakulutu bawombo ba kimvuka baba tula mu buloku, bankaka baba tuamanga ntuala mu bimvuka batona kutsikika minsiku minsamuni bafueti landakana, bawu basonika mambu bafueti vanga ayi ma balendi vanga ko.” Yave kasa tuvana ko nsua wu kubakila bankaka makani. Mutu wuntuadisanga zithuadusulu zikhambu fuana kasinkiebanga ko zikhomba—vayi nandi widi mu kutomba ba mfumu yi kiminu kiawu.—2 Kolinto 1:24.

19. Dedi bummonisina 2 Lusansu 32:7, 8, kibila mbi tulendi bela ko boma bu mintambu mi Satana?

¹⁹ Satana, Nkadi’ampemba, widi mben’itu yilutidi, kasimvonga ko kuthota bisadi bikuikama bi Yave. (1 Petelo 5:8; Nzaikusu 2:10) Satana ayi batu ba kunsadisanga bala tomba kutu kandimina kubuongimina Yave. Vayi tulenda bika ko boma bu tuyala! (Deutelonomi 7:21) Yave widi ku khonzo’itu, ayi nandi wala tatamana kutusadisa kheti bo bankandimina kisalu kitu.—Tanga 2 Lusansu 32:7, 8.

20. Mbi ngie widi wukubama muingi kuvanga?

²⁰ Ba lufiatu zikhomba zitu mu sekulu yitheti baba. Bawu bakamba zimfumu zi luyalu mu thangu’awu: ‘Lufundisi beno veka ti: Didi difuana va ntuala Nzambi kutumukina theti batu, kubika kuandi Nzambi. Vayi befu, tulendi vonga ko kutubila mambu befu tumona ayi tuyuwa.’—Mavanga 4:19, 20.