Biuvu bi Mintangi
Nani ‘nkietu’ bantubila mu Yesaya 60:1, ayi buidi nandi ‘katelimina’ ayi ‘kakienzudila muind’andi’?
Yesaya 60:1 yintuba: ‘Ah nkietu, telama, kienzula muind’aku, kibila muind’aku wuma tuka. Nkembu wu Yave wunlezama mu ngiewu.’ Matangu mankaka mammonisa ti ‘nkietu’ awowo wuba sioni, voti Yeluzalemi kapitali yi basi Yuda mu thangu beni. a (Yesa. 60:14; 62:1, 2) Yelusalemi, diawu divula diluta ba dimfunu mu Isaeli yimvimba. Mambu Yesaya katuba, mantuadisa biuvu biodi: Kitheti, thangu mbi ayi buidi Yelusalemi “yitelimina” ayi yikienzudila muinda wu kiphevi? Kimmuadi, bukiedika ti mambu Yesaya katuba make tsundukulu mu bilumbu bitu?
Thangu mbi ayi buidi Yelusalemi “yitelimina” ayi yikienzudila muinda wu kiphevi? Yelusalemi ayi tempelu yiba yituluka bo basi Yuda baba dukisa 70 di mimvu mu buvika ku Babiloni. Vayi bo basi Medo-Pelesia banunga basi Babiloni, basi Isaeli boso baba mu buvika ku Babiloni, babaka kiphuanza ki kuvutuka ku ntotu’awu muingi kuvutula mbuongimini yikiedika. (Esala 1:1-4) Tona mu mvu 537 A.T.K., basi Isaeli bakuikama baba mu 12 di minkunu bavanga mawu. (Yesa. 60:4) Bawu batona kuvana minkhailu ka Yave, kukemba mingungi ayi kubue tunga tempelu. (Esala 3:1-4, 7-11; 6:16-22) Mu phila ayoyo, nkembu wu Yave wuvutuka kubue kienzuka ku Yelusalemi—voti dikabu di Nzambi. Ayi bawu bayiza ba tho yikiezila kuidi mimvila mioso miba kukitombi ki kiphevi.
Vayi mbikudulu yi Yesaya, yisa salimina ko to ku Yelusalemi yikhulu. Nduka basi Isaeli boso basa tatamana ko kutumukina Nzambi. (Nehe. 13:27; Mal. 1:6-8; 2:13, 14; Mat. 15:7-9) Kuntuala bawu bamanga Mesia, Yesu Klistu. (Mat. 27:1, 2) Mu mvu 70 T.K., babue tulula Yelusalemi ayi tempelu mu khumbu yimmuadi.
Yave wubikula tsukulu ayoyo yiphasi. (Dani. 9:24-27) Bukiedika, lusa ba ko lukanu lu Yave mu mambu moso kabikula mu nzila Yesaya masalimina ku divula di Yelusalemi. Yesaya kapu 60.
Bukiedika ti mambu Yesaya katuba make tsundukulu mu bilumbu bitu? Ngete, vayi mala salimina mu nkietu wunkaka bamfuanikisa—“Yelusalemi yi diyilu.” Mvuala Polo wusonika matedi nandi bo katuba: “Nandi widi ngud’itu.” (Nga. 4:26) Yelusalemi yi diyilu yinsundula, kimvuka ki Nzambi kidi ku diyilu muidi bivangu bi kiphevi bikuikama. “Bana” bandi badi, Yesu ayi 144.000 di Baklistu basolu, dedi Polo bake kivuvu ki kuzingila ku diyilu. Baklistu basolu badi “dikabu dinlongo”—“ayi Isaeli yi Nzambi.”—1 Pet. 2:9; Nga. 6:16.
Buidi Yelusalemi yi diyilu “yitelimina” ayi “yikienzudila muinda”? Nandi wuvangila mawu, mu nzila bana bandi basolu va ntoto. Dedikisa mambu amomo na mbikudulu yi Yesaya kapu 60.
Vaba tombulu Baklistu basolu “kutelama” mu kibila ki kitombi ki kiphevi baba. Kibila dedi bo babikudila, malongi ma luvunu matembakana mu sekulu yimmuadi T.K bo bapostolo bamana kufua. (Mat. 13:37-43) Mu phila ayoyo, bawu bayiza ba mu buvika bu Babiloni Yinneni voti mu malongi ma binganga bi luvunu. Baklistu basolu batatamana mu buvika nati thonono bilumbu bitsuka mu mvu 1914. (Mat. 13:39, 40) Vasa vioka ko beni thangu mu mvu 1919, bawu bayiza basika mu buvika bu kitombi ki kiphevi ayi batona kukienzula muinda wu kiphevi, mu kukivana mu kisalu ki kusamuna. b Buviokala thangu, batu ba zitsi zioso bayiza mu kiezila kubunda mvandi bo bake mu Isaeli yi Nzambi—“mintinu” bantubila mu Yesaya 60:3.—Nzai. 5:9, 10.
Kuntuala, Baklistu basolu bala kienzula muinda wu Nzambi mu phila yilutidi. Buidi? Bo bawu bala fua va ntoto, bala ba ku “Yelusalemi yimona” voti nkietu wu dikuela wu Yesu muidi 144.000 di mintinu ayi zinganga Nzambi.—Nzai. 14:1; 21:1, 2, 24; 22:3-5.
Yelusalemi yimona ke kiyeku kinkinza ki kudukisa mbikudulu yike mu Yesaya 60:1. (Dedikisa mawu na Yesaya 60:1, 3, 5, 11, 19, 20 ayi Nzaikusu 21:2, 9-11, 22-26.) Dedi bo divula di Yelusalemi dibela divula mintinu mi Isaeli baba kalanga, bobuawu mvandi, Yelusalemi Yimona ayi Yesu, bala yala mu nza yimona. Buidi Yelusalemi yimona “[yimfumina] ku diyilu, kuidi Nzambi” yala kulukila? Mu kusikika thalu’andi va ntoto. Batu bankinzikanga Nzambi mu zitsi zioso, bala “diatila mu kiezila kiandi.” Bawu bala vuka mu masumu ayi lufua. (Nzai. 21:3, 4, 24) Mu phila ayoyo, Nzambi wala “bue vutula mambu moso dedi bo mabela va thonono,” dedi bo Yesaya ayi mimbikudi minkaka babikudila. (Mav. 3:21) Yave wutona kuvutula mambu moso mu phila mabela bo Yesu katona kuyala ayi wala manisa kuvanga mawu kutsuka luyalu lu kivevi di mimvu.
a Tsekudulu yi Nza Yimona yi Kibibila Kinlongo, mu Yesaya 60:1 yinsadila kikuma “nkietu” kubika kuandi “Sioni,” voti “Yelusalemi,” kibila phila basonikina bikuma abiobio mu Kiebeleo “telama” ayi “kienzula muind’aku” bimmonisa ti nkietu bintubila, dedi bummonisina kutsuka lutangu kikuma “ngieyu.”
b Kubotuka mu buvika bu kiphevi, kutonina mu 1919 dedi bummonisina Yehezekeli 37:1-14 ayi Nzaikusu 11:7-12. Yehezekeli wubikula ti kheti Baklistu boso basolu baviokisa thangu yiwombu mu buvika bu Babiloni yinneni, vayi bawu bala vuka. Mbikudulu yi Nzaikusu yintuba ti bisadi bi Nzambi mu mua thangu, babasa nunganga ko kumbuongimina buboti. Vayi bo thangu beni yivioka, vabutuka mua dingumba di Baklistu basolu muingi kutuama ntuala. Ayi mu mvu 1919, bawu batambula kiyeku ki kuba “kisadi kikuikama ayi ki nduenga.”—Mat. 24:45; mona buku A Adoração Pura de Jeová É Restaurada! tsielu 118.
