DILONGI 5
Tutidi Kukuenda Yinu
‘Tutidi kukuenda yinu, kibila tuyuwizi ti Nzambi widi yinu.’—ZAKALIA 8:23.
NKUNGA 26 Ma Wuba Vangila, Minu Wuvangila
MAMBU TUANLONGUKA *
Mamemi mankaka (‘kumi di babakala’) bankuangalalanga beni kusadila Yave va kimueka na baklisto basolo (‘muisi Yuda’) (Tala bitini bi matangu 1-2)
1. Mbi Yave kabikula matedi bilumbu bitu?
YAVE wubikula mambu amama matedi bilumbu bitu: ‘Kumi di babakala di zimbembo zioso ayi mimvila mioso bala simbidila kikhutu ki muisi Yuda, ayi bala tuba: ‘Tutidi kukuenda yinu, kibila tuyuwizi ti Nzambi widi yinu.’’ (Zakalia 8:23) ‘Muisi Yuda’ bantubila mu lutangu alulu wunsundula baklisto basolo mu phevi yinlongo, bantedilanga mvandi “[Isaeli] yi Nzambi.” (Ngalatia 6:16) Vayi ‘kumi di babakala’ bansundula batu boso badi kivuvu ki kuzinga mvu ka mvu va ntoto. Bawu bazebi ti Yave widi mu kusakumuna dingumba di baklisto basolo ayi banzolanga beni kubuongimina Yave va kimueka ayi bawu.
2. Buidi ‘kumi di babakala’ bankuedila na baklisto ‘basolo’?
2 Kibibila kintuba ti ‘kumi di babakala bala simbidila kikhutu ki muisi Yuda, ayi bala tuba: ‘Tutidi kukuenda yinu, kibila tuyuwizi ti Nzambi widi yinu.’’ Kheti lutangu alulu luntubila to muisi Yuda wumueka, kikuma ‘yinu’ kamvutukila khumbu wadi mu lutangu alolo, kimmonisa ti badi mu kutubila kuvioka mutu wumueka. Mawu mansundula ti muisi Yuda kasi ko mutu wumueka, vayi dingumba dioso di baklisto basolo. Bubu, tuisi ko bu kuzabika dizina di kadika mutu wusolo widi va ntoto. * Kheti bobo, batu badi kivuvu ki kuzinga va ntoto ‘balenda kuenda’ na baklisto basolo. Buidi? Mu kusadila Yave va kimueka na bawu. Vayi batu badi kivuvu ki kuzinga va ntoto, batadilanga ko baklisto basolo buka zimfumu, kibila bazebi ti mfumu wumueka to badi, Yesu.—Matai 23:10.
3. Biuvu mbi tunkuiza baka mimvutu mu dilongi adidi?
3 Bo baklisto basolo bakhidi mu khati dikabu di Nzambi bubu, bankaka balenda kuyikuvusa: (1) Buidi baklisto basolo bafueti kuyitadila? (2) Buidi tufueti tadila mutu wundianga dipha ayi wunnuanga vinu mu Mbambukulu Moyo? (3) Tufueti kuazuka mu thalu yi batu bandia dipha ayi bannua vinu? Dilongi adidi dinkuiza vana mimvutu mi biuvu abiobi.
BUIDI BAKLISTO BASOLO BAFUETI KUYITADILA?
4. Ndubu mbi yidi mu 1 Kolinto 11:27-29, baklisto basolo bafueti yindula, ayi kibila mbi?
4 Baklisto basolo bafueti yindula beni mu ndubu yidi mu 1 Kolinto 11:27-29. (Tanga.) Buidi khomba widi wusolo kalenda dila dipha ayi kunua vinu mu phila yi “khambu fuana”? Nandi kalenda vanga mawu mu kutatamana kudia dipha ayi kunua vinu, kheti kasinzingila ko mu zithumu zisonga zi Yave. (Ebeleo 6:4-6; 10:26-29) Baklisto basolo bazebi ti muingi batambula “mfutu wu lutelo luba ku diyilu; lutelo lu Nzambi mu Klisto Yesu” bafueti tatamana bakuikama.—Filipi 3:13-16.
5. Buidi baklisto basolo bafueti kuyitadila?
5 Phevi yinlongo yi Yave yinsadisanga batu kubika ba lungundayi, vayi kukikulula. (Efeso 4:1-3; Kolosai 3:10, 12) Diawu baklisto basolo bayindulanga ko ti bawu balutidi na bankaka. Bawu bazebi ti Yave wumvananga phevi’andi yinlongo kuidi bisadi biandi bioso kubika kuandi to bawu. Bawu bayindulanga ko ti bawu banluta visanga kiedika kidi mu Kibibila kena bankaka. Ayi bakambanga ko bankaka ti bawu badi basolo ayi bafueti tona kudia dipha ayi kunua vinu. Kibila bawu bazebi ti Yave, nandi to wuntumisanga mutu muingi kukuenda ku diyilu.
6. Dedi bummonisina 1 Kolinto 4:7, 8, kibila mbi baklisto basolo bayitukanga ko bo mutu kakhambu kikinina kivuvu kiawu?
6 Baklisto basolo bamvuanga beni nkinza kivuvu kiawu ki kukuenda ku diyilu vayi bawu basintomba ko bankaka baba vana nzitusu yikhambu fuana. (Filipi 2:2, 3) Bawu bazebi ti bo Yave kaba sola, nandi kasa zabikisa ko mawu batu bankaka. Diawu baklisto basolo bakhambu kuitukilanga, boti mutu va thononu kasinkikinina ko ti bawu badi basolo. Bawu bazebi ti Kibibila kitulonga tubika fika kikininanga mu mutu wuntuba ti wutambula kiyeku ki nkinza kuidi Nzambi. (Nzaikusu 2:2) Muingi kubika kuyinangika, baklisto basolo bakambanga ko kuidi mutu bama zaba ti bawu badi basolo. Ayi bayinyemisanga ko ti bawu badi basolo.—Tanga 1 Kolinto 4:7, 8.
7. Mambu mbi baklisto basolo bavanganga ko ayi kibila mbi?
7 Baklisto basolo bayindulanga ko ti bafueti diata to na mutu wunkaka wusolo. Bawu mvawu babanga ko mayindu ma kutomba baklisto bankaka basolo muingi kuzaba buidi Yave kaba sodila voti muingi kuvanga mangumba mawu baveka ma ndongukulu yi Kibibila. (Ngalatia 1:15-17) Baklisto basolo ba kuvanga mawu, kimvuka kisinkuiza ba ko kithuadi. Ayi bala monisa ti basi ko kithuadi na phevi yinlongo, yimvananga dikabu di Nzambi ndembama ayi kithuadi.—Loma 16:17, 18.
BUIDI TUFUETI TADILA BAKLISTO BASOLO?
Tulendi tadila ko baklisto basolo ayi zikhomba zinkaka badi biyeku buka batu bazabakana beni (Tala lutangu 8) *
8. Kibila mbi ngie wufueti bela keba keba mu phila wuntadila mutu wusolo? (Tala matangu madi va wanda.)
8 Buidi tufueti tadila zikhomba zi babakala ayi zi bakieto badi basolo? Disi ko diambu dimboti kunangika beni zikhomba, kheti nandi widi wusolo. (Matai 23:8-12) Yindula mu kifuani ki bakulutu ba kimvuka. Kibibila kitu kindisa ‘tulandaka kiminu kiawu’, vayi kitu kamba mvandi ti tulendi tadila ko wosokua mutu buka mfumu’itu. (Ebeleo 13:7) Bukiedika ti Kibibila kintuba ti zikhomba zinkaka badi bafuana muingi kutambula “[nzitusu] mu zikhumbu zizole.” Befu tufueti vanga mawu kibila bawu “bandiatisanga bumboti” ayi “bakiyekula mu samuna mambu ma Nzambi ayi mu longa”, kubika kuandi mu kivuvu badi ki kukuenda ku diyilu. (1 Timoteo 5:17) Befu kunangika ngolo khomba widi wusolo, nandi kalenda mona zitsoni. * Voti tulenda kumvanga kuba lungundayi. (Loma 12:3) Bukiedika, tuisintomba ko kuvanga zikhomba zi Klisto kubua mu disumu adiodi dingolo!—Luka 17:2.
9. Buidi tulenda monisina lukinzu kuidi baklisto basolo?
9 Buidi tulenda monisina lukinzu kuidi baklisto basolo? Phila yimueka yidi mu khambu kuvulanga buidi baba sodila. Kibila befu tuisi ko nsua wuku zaba mambu amomo. (1 Tesalonika 4:11; 2 Tesalonika 3:11) Ayi tulendi yindula ko ti nnuni, nkazi, matata voti basi dikanda diandi mvawu badi basolo. Vasi ko mutu wuntambulanga kivuvu ki kukuenda ku diyilu kuidi muisi dikanda, kibila kivuvu akioki Nzambi to wumvananga kiawu. (1 Tesalonika 2:12) Phila yinkaka tulenda monisina lukinzu, yidi mu kukhambu vanganga biuvu bilenda lueka ntima. Dedi, tulendi kuvula ko nkanzi khomba widi wusolo: “Buidi ngie wummuenanga diyindu di kuzinga ku paladizu va ntoto mu khambu nnuni’aku? Kibila tuidi lufiatu ti mu nza yimona, Yave wala “[dukisa] zitsatu zi kadika kima kidi moyo.”—Minkunga 145:16.
10. Kibila mbi kutumamana dilongi di kukhambu nangika beni batu dididi nkinza?
10 Nkinza beni befu kubika nangika beni baklisto basolo. Kibila mbi? Kibila Kibibila kintuba ti ḿba bankaka balasa tatamana ko bakuikama. (Matai 25:10-12; 2 Petelo 2:20, 21) Bo tuntumamana dilongi di kukhambu nangika beni batu, befu tulandakananga ko bankaka kheti beka mimvu miwombo mu kusadila Yave, badi batu bazabakana beni voti badi baklisto basolo. (Yuda 16) Mu phila ayoyi, bo lukuikumunu luawu lundekuka voti bo bambika kimvuka ki Yave, befu tualasa bika ko kusadila Yave ayi kiminu kitu mu nandi, kialasa dekuka ko.
TUFUETI KUAZUKA MU THALU YI BATU BANDIA DIPHA AYI BANUA VINU?
11. Mambu mbi madi mu kumonika mu thalu yi batu bandianga dipha ayi bannuanga vinu?
11 Mu mimvu miwombo kumbusa, thalu yi batu bandianga dipha ayi bannuanga vinu yidekuka. Vayi mu bilumbu bitu, thalu beni yibuelimizi. Bukiedika ti tufueti kuazuka mu mambu amomo? Ndamba. Tuemmona kibila mbi.
12. Kibila mbi tulendi kuazukila ko mu thalu yi batu bandianga dipha ayi bannuanga vinu?
12 “[Yave] zebi batu bandi.” (2 Timoteo 2:19) Yave zebi nani mu bukiedika widi wusolo. Vayi zikhomba bantanganga thalu yi batu bandianga dipha ayi bannuanga vinu basa zaba ko. Diawu, bawu balenda tanga batu banyindulanga ti badi basolo, vayi mu bukiedika basi ko. Dedi, vadi batu bankaka baba dianga dipha ayi baba nuanga vinu, vayi kuntuala bayiza bika. Bankaka ḿba mbela ntu badi ayi bankikininanga ti bala yala na Klisto ku diyilu. Diawu, tuisi ko bu kuzabila mu bukiedika baklisto bakua basolo bakhidi va ntoto.
13. Kibibila kintuba thalu yi baklisto basolo bala ba va ntoto bo ziphasi zingolo ziala tona?
13 Kuala ba baklisto basolo mu bibuangu biwombo va ntoto bo Klisto kala kuiza muingi kuba nata ku diyilu. (Matai 24:31) Kibibila kintuba ti mu bilumbu bitsuka, thalu yi baklisto basolo bala ba va ntoto yala ba yiluelu. (Nzaikusu 12:17) Vayi kiawu kisintuba ko thalu yi baklisto basolo bala ba va ntoto bo ziphasi zingolo ziala tona.
Mbi tufueti vanga bo mutu kandia dipha ayi kannua vinu mu Mbambukulu Moyo? (Tala lutangu 14)
14. Dedi bummonisina Loma 9:11, 16, mambu mbi tufueti visa mu phila Yave kansodilanga batu?
14 Yave nandi zabisi thangu mbi kafueti sola mutu muingi kukuenda ku diyilu. (Loma 8:28-30) Yave wutona kusola batu muingi kukuenda ku diyilu bo Yesu kavulubuka. Ḿba mu thangu yi baklisto batheti, baboso baba kivuvu ki kukuenda ku diyilu. Vayi divevi di mimvu kuntuala, batu baba tubanga ti badi baklisto basolo, basa landakananga ko Klisto mu bukiedika. Vayi kheti mu thangu ayoyi, Yave wusola mua batu mu bawu muingi kukuenda ku diyilu. Bawu baba buka kititi kimbi Yesu katuba kiala mena va mbata mbongo yimboti. (Matai 13:24-30) Mu bilumbu abibi, Yave wukhidi sola batu muingi baba mu dingumba di 144.000. * Diawu Yave na kubaka makani ma kusola mutu mu bilumbu abibi bitsuka, befu tufueti kinzika makani mandi. (Tanga Loma 9:11, 16.) * Tufueti ba keba keba muingi tubika ba dedi mueka na bisadi bi kinongo Yesu kata. Bawu basa zola ko phila mfumu yi kisalu kafutila batu batsuka bakota mu kisalu.—Matai 20:8-15.
15. Bukiedika ti baklisto boso basolo, badi mu dingumba di ‘nnanga wukuikama’ bantubila mu Matai 24:45-47? Sudikisa.
15 Bakana ko baklisto boso basolo badi mu dingumba di ‘nnanga wukuikama.’ (Tanga Matai 24:45-47.) Dedi mu sekulu yitheti, bubu Yave ayi Yesu bansadilanga zikhomba ziluelu muingi kudikila voti kulonga batu bawombo. Mu thangu beni, bakana ko baklisto boso basolo bawu basonika Masonoko ma Kiebeleo. Bubu mvandi, bakana ko baklisto boso basolo badi kiyeku ki ‘kuvana bidia mu thangu yi fuana’ kuidi dikabu di Nzambi.
16. Mbi ngie belonguka mu dilongi adidi?
16 Mbi tube longuka mu dilongi adidi? Tube longuka ti Yave wubaka makani ma kuvana luzingu lu mvu ka mvu va ntoto kuidi nkangu wunneni wu batu ba kunsadilanga, ayi luzingu ku diyilu kuidi mua dingumba di batu bala yala na Yesu. Yave wunsakumunanga bisadi biandi bioso—kuba ‘muisi Yuda’ voti ‘kumi di babakala’—ayi wutidi ti bawu batumamana minsiku miandi ayi batatamana bakuikama. Baboso bafueti tatamana kukikulula, kusadila Yave ayi kuba kithuadi. Ayi baboso bafueti vanga mangolo muingi kimvuka kitatamana mu ndembama. Diawu, bo tsukulu yi nza yidi mu kuefikamanga, tutatamananu kusadila Yave ayi kulandakana Klisto buka “nkangu wumueka” wu mamemi.—Yoane 10:16.
^ Lut. 5 Mu mvu awuwu, Mbambukulu Moyo lufua lu Klisto luala vangama mu kimuadi, kilumbu 7 Ngonda Yinna. Buidi tufueti tadila batu bandia dipha ayi bannua vinu mu lukutukunu alolo? Tufueti kuazuka mu thalu yi batu bandia dipha ayi bannua vinu? Dilongi adidi, dibongulu mu dilongi dimueka didi mu Kibanga ki Nsungi yi Ngonda Yitheti, mvu 2016. Diawu dinkuiza vana mimvutu mi biuvu abiobi.
^ Lut. 2 Dedi bummonisina Minkunga 87:5, 6, ḿba kuntuala Yave wala zabikisa mazina ma batu boso bala yala na Yesu ku diyilu.—Loma 8:19.
^ Lut. 8 Tala dibaya dintuba ‘Luzolo luvanganga ko makhambulu fuana’ mu Kibanga ki Nsungi yi Ngonda Yitheti, mvu 2016.
^ Lut. 14 Mavanga 2:33 yimmonisa ti bo mutu kansolu, Yesu wumbuelanga mioko, vayi Yave nandi wunsolanga mutu.
^ Lut. 14 Muingi wubuela zaba, tala “Biuvu bi Mintangi” mu Kibanga ki Nsungi ki kilumbu 1 Ngonda Yintanu, mvu 2007.
NKUNGA 34 Ndiatulu yi Busonga
^ Lut. 56 MAMBU MADI MU ZIFIKULA: Yindul’abu boti mu lukutukunu lu mavula, batu bawombo banzungidila mvuala wu Filiali ayi nkazi’andi muingi kuba botula zifoto. Ayoyi, yisi ko mbonosonu yi lukinzu!
