1-2. Mambu mbi bisadi biwombo bi Yave bamviokilanga ayi buidi baki muenanga?

YINDULA bifuani bitatu binlanda: Ku nzo mbuku, khomba mueka widi ditoko wuntambula tsangu ti kimbevo kingolo kieka yandi. Khomba wunkaka weka kuvioka 50 di mimvu bama mbotula mu kisalu, ayi kheti wumvanga mangolo kasinnunga ko kubaka kisalu kinkaka. Khomba mueka weka kiboba, kasi bue nunga ko kuvanga mambu kaba vanganga mu kisalu ki Yave.

² Boti ngie widi mu kuviokila mu mambu ma phila ayoyi, ḿba wulenda yindula ti wusiedi ko luvalu. Mambu ma phila ayoyi malenda kubotula mayangi, kuku vanga kuyitadila mu phila yimbi ayi kutulula kikundi kiaku na bankaka.

3. Mayindu mbi Satana ayi batu kankengidilanga badi matedi moyo?

³ Mambu mammonikanga mu nza mammonisa phila Satana kantadilanga luzingu lu batu. Tona va thononu, Satana wuntadilanga batu buka ti basi ko luvalu. Dedi, kheti wuzaba ti Eva wunkuiza fua, Satana wunkamba ti wala baka kiphuanza kilutidi na kubayisa Nzambi. Satana wunkengidilanga longusu, zimfumu zi luyalu ayi binganga bi luvunu. Diawu, tulendi kuituka ko kumona zimfumu zi lungosu, zimfumu zi luyalu ayi zimfumu zi binganga kuvanga mambu dedi nandi mu khambu kinzika moyo wu batu.

4. Mbi tunkuiza mona mu dilongi adidi?

⁴ Vayi Yave disuasana kadi. Nandi wuntomba bisadi biandi  bayitadila mu phila yimboti. Ayi bo tumviokila mu mambu matu vanga kuyindula ti tuisi ko luvalu, nandi wutu sadisanga. (Minkunga 136:23; Loma 12:3) Mu dilongi adidi, tunkuiza tubila ziphila zitatu Yave katu sadisilanga: (1) mu thangu tumbua kubela, (2) boti tuisi ko zimbongo zifuana muingi kuyizingisa, ayi (3) boti ziphasi zi bununu zituvanga kuyindula ti tuisi ko luvalu kuidi Yave. Vayi theti tunkuiza mona, kibila mbi tulenda bela lufiatu ti kadika mutu mu befu widi luvalu va meso ma Yave.

5. Mbi bi kuvanga kukikinina ti batu luvalu badi kuidi Yave?

⁵ Kheti tuvangulu mu ntoto, befu tulutidi luvalu va meso ma Yave kena ntoto. (Ngenesi 2:7) Buidi tuzabidi mawu? Kibiba Yave wuvanga batu na mangolo ma kulandakana zikhadulu ziandi. (Ngenesi 1:27) Mu phila ayoyo, nandi wutunangika vantuala bivangu bioso ayi wutuvana kiyeku ki kukieba ntoto ayi bibulu.—Minkunga 8:4-8.

6. Kivisa mbi kinkaka kimmonisa ti befu luvalu tuidi kuidi Yave?

⁶ Kheti bo Adami kasumuka, Yave wutatamana kuvua nkinza batu. Mu kibila ki luvalu tuidi kuidi Yave, mu luzolo nandi wuvana muan’andi Yesu muingi katukula mu masumu. (1 Yoane 4:9, 10) Mu kibila ki khudulu, Yave wala vulubusa batu bafua mu kibila ki disumu di Adami, kuba ‘basonga ayi bakhambulu basonga.’ (Mavanga 24:15) Kibibila kimmonisa ti befu tuidi luvalu kuidi Yave, kheti bo tumbua kubela, tusiedi ko zimbongo zifuana muingi kuyizingisa voti bo tuidi mu kutovuka mu kibila ki ziphasi zi bununu.—Mavanga 10:34, 35.

7. Bivisa mbi binkaka tuidi bi tusadisa kumona ti luvalu tuidi kuidi Yave?

⁷ Vadi bibila binkaka bi tuvana lufiatu ti tuidi luvalu va meso ma Yave. Nandi wutu tumisa ayi wumona phila tuvuila nkinza zitsangu zimboti. (Yoane 6:44) Bo tutona kufikama Yave, nandi mvandi wutona kutu fikama. (Yakobi 4:8) Muingi kumonisa luvalu tuidi kuidi nandi, Yave wumbotulanga thangu ayi wunsadilanga mangolo mandi muingi kutu longa. Nandi zebi banani befu tuidi bubu, ayi buidi tulenda bela kuntuala. Ayi wutu sembanga kibila wutu zolanga. (Zingana 3:11, 12) Bukiedika befu luvalu luwombo tuidi va meso ma Yave!

8. Buidi Minkunga 18:27-29 yilenda tusadisila bo tumviokila mu ziphasi?

⁸ Batu bankaka basa vananga ko ntinu Davidi luvalu, vayi Yave waba kunzolanga ayi waba kunsadisanga. Kuzaba mawu kusadisa Davidi kununga mambu kaba viokila. (2 Samueli 16:5-7) Bobuawu mvandi, bo tuidi mu kiunda voti tumviokila mu ziphasi, Yave kalenda tusadisa kumona mambu mu phila yinkaka ayi kutu sadisa kununga mambu tumviokila. (Tanga Minkunga 18:27-29.) Boti tuidi lusalusu lu Yave, vasi ko kiuma kilenda tutula nkaku kunsadila mu mayangi. (Loma 8:31) Buabu tuantubila mambu matatu tufueti tebukilanga moyo ti Yave wutu zolanga ayi wutu vuanga nkinza.

9. Mu kibila ki kimbevo, buidi tulenda kuyitadila?

⁹ Kimbevo kilenda tutuadisa beni kiunda. Kiawu kilenda tuvanga tuyindula ti tusiedi ko luvalu kuidi batu bankaka. Tulenda mona zitsonya bo batu bankaka banzaba ti kubela tuidi voti lusalusu luawu tuntomba. Kheti bankaka basa zaba ko ti kubela tuidi, ḿba tulenda ba kiunda mu kuyindula ti tulendi bue  nunga ko kuvanga mambu tuaba vanganga. Kheti mu mambu amomo maphasi, Yave wutu kindisanga. Buidi?

10. Dedi buntubila Zingana 12:25, mbi bilenda tusadisa bo tumbua kubela?

¹⁰ Boti kubela tuidi, ‘diambu dimboti’ dilenda kutu kindisa. (Tanga Zingana 12:25.) Diawu, mu luzolo Yave wutula mu Kibibila mambu mamboti ma tutebula moyo ti tuidi luvalu va meso mandi, kheti bo tumbua kubela. (Minkunga 31:19; 41:3) Befu kutanga khumbu ziwombo mambu beni madi mu Kibibila, Yave kalenda tusadisa kununga kiunda tulenda ba bo tumbua kubela.

11. Buidi Yave kasadisila Jorge?

¹¹ Tala mambu mamonikina Jorge. Bo kaba ditoko, nandi wubua kimbevo kingolo. Mawu mavanga Jorge kayindula ti kasiedi ko luvalu. Nandi wutuba: “Minu yisa ba ko yikubama muingi kununga mabanza mami ayi phila batu bankuiza kuthadila mu kibila ki kimbevo yiba. Bo kimbevo kiama kiaba buelama, minu yaba yindula beni buidi luzingu luama lunkuiza balukila. Minu yiba beni mu kiunda ayi yilomba kuidi Yave muingi katsadisa.” Buidi Yave kasadisila Jorge? Nandi wutuba: “Yaba monanga phasi kutsikika mayindu mami. Diawu bakhindisila muingi yitanga mua matangu madi mu Minkunga, mammonisa buidi Yave kamvuilanga nkinza bisadi biandi. Yaba tanganga matangu beni kadika kilumbu, ayi mawu mambomba ayi matsadisa kuba buboti. Buviokila thangu, mayangi yiba mavutuka ayi batu batuba ti babaka khindusulu mu kifuani kiama. Vawu yiyiza visila ti Yave wutambudila minsambu miama! Nandi wutsadisa kubalula phila yaba kukitadilanga. Yitona kutsikika mayindu mami mu mambu Kibibila kintuba matedi phila Nzambi ka kuthadilanga kheti mu kimbevo yidi.”

12. Boti kubela widi, mbi ngie wulenda vanga muingi kubaka lusalusu lu Yave?

 ¹² Boti ziphasi wummona mu kimbevo widi, ba lufiatu ti Yave zebi mambu widi mu kuviokila. Lomba lusalusu luandi muingi wutadila mambu wumviokila mu phila yifuana. Bosi tanga mu Kibibila mambu Yave katuma kusonika muingi ka kukindisa. Tsikika mayindu maku mu matangu mammonisa buidi Yave kamvuilanga nkinza kadika kisadi kiandi.—Minkunga 84:11.

13. Mbi mfumu dikanda kalenda yindula ba kumbotula mu kisalu?

¹³ Kadika mfumu wu dikanda wuntomba kukieba zitsatu zi dikanda diandi. Vayi yindula mfumu wu dikanda bambotula mu kisalu kheti kasa vanga ko ni diambu dimbi. Nandi wumvanga mangolo muingi kubaka kisalu kinkaka, vayi kheti bobo kasinnuga ko. Diambu adiodi, dilenda kumvanga kuyindula ti kasi ko luvalu. Vayi, buidi kutsikika mayindu mu zikhanu zi Yave kulenda kunsadisila?

14. Kibila mbi Yave kandukisilanga zikhanu ziandi?

¹⁴ Yave wundukisanga zikhanu ziandi zioso. (Yosua 21:45; 23:14) Nandi wumvanganga mawu mu bibila biwombo. Kitheti, mu kibila ki dizina diandi. Yave wukanikisa kukieba bisadi biandi bikuikama, ayi nandi wumvanganga mamoso muingi kudukisa zikhanu ziandi. (Minkunga 31:1-3) Bo tuidi mu khati dikanda diandi, Yave zebi ti tunkuiza ba mu kiunda na kukhambu kutukieba. Nandi wukanikisa kutuvana biuma tuntomba muingi kuzinga ayi tutatamana kunsadila mu lukuikumunu. Vasi ko kiuma kilenda kuntula nkaku muingi kuvanga mawu!—Matai 6:30-33; 24:45.

15. (a) Mambu mbi maphasi baklisto mu sekulu yitheti baviokila? (b) Lufiatu mbi Minkunga 37:18, 19 lutu vana?

 ¹⁵ Kutebukanga moyo ti Yave wundukisanga zikhanu ziandi, kutuvana lufiatu ti nandi wunkuiza tusadisa kheti bo tuala khambu zimbongo zifuana muingi kuyizingisa. Yindula mu kifuani ki baklisto mu sekulu yitheti. Bo batona kukuamikisa baklisto ku Yelusalemi, ‘baboso kubotula kuandi bapostolo, bamana tiamuka.’ (Mavanga 8:1) Mambu mbi mayiza monika? Bawu babika zinzo ayi bisalu biawu, diawu bakhambu bue bakila zimbongo zifuana muingi kuyizingisa. Kheti bobo, Yave kasa bakuekula ko. Ayi bawu batatamana mu mayangi. (Mavanga 8:4; Ebeleo 13:5, 6; Yakobi 1:2, 3) Yave wusadisa baklisto mu sekulu yitheti, ayi wala tatamana mvandi kutu sadisa.—Tanga Minkunga 37:18, 19.

16. Boti tueka biboba mambu mbi tulenda yindula?

¹⁶ Boti tueka biboba, ḿba tulenda yindula ti tusiedi ko mawombo ma kuvanga mu kisalu ki Yave. Ntinu Davidi ḿba mvandi wuba mowawu mayindu mu thangu kaba nuna. (Minkunga 71:9) Buidi Yave kalenda kutu sadisila?

17. Mbi tulenda longuka mu kifuani ki khomba Jheri?

¹⁷ Tala kifuani kimueka ki khomba yinkieto bantedilanga Jheri. Bantumisa muingi kalandakana lukutukunu batubila matedi phila yi kubuongisila Nzo yi Kintinu, vayi nandi kasa tomba ko kukuenda. Jheri wutuba: “Yidi kiboba, yidi mfuizi ayi yisi ko kiuma muingi Yave kasadila. Minu yisi ko luvalu.” Va builu ava lukutukunu beni, Jheri wuzibula ntim’andi kuidi Yave mu nsambu. Mu kilumbu kilanda, bo katuka ku Nzo yi Kintinu nandi waba kuyikuvusa boti diba diyindu dimboti kulandakana lukutukunu beni. Mu lukutukunu beni, wumueka mu minlongisi wutuba ti kubika Yave katulongisa, kiawu kiuma kilutidi nkinza tulenda kumvana. Jheri wutuba: “Minu  yiyindula, ‘Minu yidi kiuma akioki!’ Minu yitona kudila ayi yivisa ti Yave wutambudila nsambu’ami. Nandi waba kumbonisa ti minu yiba kiuma ki luvalu muingi kumvana ayi nandi wuba wukubama muingi kundongisa!” Mu kutebukila moyo kilumbu akioki, Jheri wutuba: “Bo yituka mu lukutukunu minu yiba mu kiunda ayi yaba kuyimuena buka ti yisi ko luvalu. Vayi bo yibasika, yiba wukinda ayi yimona ti yikhidi luvalu!”

18. Kheti tueka biboba, buidi Kibibila kimmonisina ti kisalu kitu luvalu kidi kuidi Yave?

¹⁸ Yave kalenda tatamana kutu sadila kheti tueka biboba. (Minkunga 92:12-15) Ḿba ngie wulenda yindula ti wuvanganga ko mawombo mu kisalu ki Yave. Vayi Yesu wutulonga ti, kuidi Yave, mamoso tumvanganga mu kisalu kiandi luvalu madi. (Luka 21:2-4) Diawu tsikika mayindu maku mu mambu wulenda nunga kuvanga. Buka, ngie wulenda longa bankaka matedi Yave, kuba nata mu nsambu, ayi kukindisa zikhomba muingi batatamana bakuikama. Yave wu kutadila buka kisadi kiandi bika ti mu mambu makua wumvanga, vayi mu phila wididi wukubama muingi kuntumukina.—1 Kolinto 3:5-9.

19. Lufiatu mbi Loma 8:38, 39 lutu vana?

¹⁹ Mayangi beni kubuongimina Yave, Nzambi wumvuanga nkinza bisadi biandi! Yave wutu vanga muingi tuvanga luzolo luandi, ayi kumbuongimina kuawu kumvananga tsundu luzingu luitu. (Nzaikusu 4:11) Kheti nza yi Satana ba tumuena buka ti tuisi ko luvalu, Yave katu tadilanga ko mu phila ayoyi. (Ebeleo 11:16, 38) Kheti bo tumbua kubela, tusiedi ko zimbongo zifuana muingi kuyizingisa voti tuidi mu kutovuka mu kibila ki ziphasi zi bununu, tulenda ba lufiatu ti vasi ko ni kiuma kilenda tutatula mu luzolo Tat’itu yi diyilu kadi mu befu.—Tanga Loma 8:38, 39.