1-2. Mbi mbasi kakamba bakieto baba va dibumbi di Yesu? Ayi thuadusulu mbi Yesu kaba vana?

MU KILUMBU 16 ki Nisa, wu mvu 33 T.K., bakieto bamueka baba zolanga Nzambi baba beni mu kiunda ayi bayenda ku dibumbi bazikila Yesu. Bo batuka kuna, bawu baba tomba kuvinda mafuta ma malasi ayi biuma binkaka mu nyitu Yesu, vayi bayituka mu kuzaba ti dibumbi bazikila Yesu diba yambi. Mbasi yimueka wuba kamba ti Yesu wuvulubuka. Nandi wubuela tuba: “[Nandi] wulutuamini ku Ngalili, kuna ma lummona”.— Matai 28:1-7; Luka 23:56; 24:10.

² Bo babe vutuka, Yesu wuba fikama ayi wuba kamba: “[Yendanu, kambanu] zikhomba ziama zienda ku Ngalili, kuawu [bala] ku mbonina.” (Matai 28:10) Kiuma kitheti Yesu kavanga bo kavulubuka luidi lukutukunu na minlonguki miandi. Mu lukutukunu beni nandi wuba vana zithuadusulu zinkinza!

3-4. Kibila mbi tulenda tubila ti thuadusulu yidi mu Matai 28:19, 20 yisa vanu ko to kuidi bapostolo? (Tala fotu yidi va thononu.)

³ Tanga Matai 28:16-20. Mu lukutukunu beni, Yesu wusudikisa buboti kisalu minlonguki miandi bala kuiza vanga mu sekulu yitheti ayi kiawu kisalu tukhidi vanga nati bubu. Yesu wutuba: “Yendanu, lukitula batu ba zitsi zioso minlonguki miami. Ayi luba longa bakeba mambu moso momo ndilutumina.”

⁴ Yesu wuntomba minlandikini miandi mioso bavanga kisalu ki samuna. Nandi kasa vana ko to kiyeku akioki kuidi 11 di bapostolo bandi bakuikama. Buidi tuzabidi mawu? Bukiedika ti bapostolo ba Yesu bawu to baba mu lukutukunu nandi  katuadisa mu mongo wu Ngalili? Tebuka moyo mambu mbasi kakamba bakieto: “[ku Ngalili] kuna ma lummona”. Bakieto abobo bakuikama mvawu baba mu lukutukunu beni ku Ngalili. Vayi bakana to bawu. Mvuala Polo wutuba ti Yesu “wumonikina kuidi zikhama zi tanu zi zikhomba mu khumbu yimosi.” (1 Kolinto 15:6) Kuidi?

5. Mbi tube longuka mu 1 Kolinto 15:6?

⁵ Tuidi bibila biwombo muingi kukikinina ti mu 1 Kolinto 15:6, Polo waba tubila loluawu lukutukunu luidi mu Matai kapu 28. Bibila mbi? Ditheti, bawombo mu minlandikini mi Yesu baba basi Ngalili. Diawu kulutidi beni tsuakulu kuba lukutukunu na batu bawombo ku mongo Ngalili kena ku nzo mutu ku Yelusalemi. Dimuadi, bo Yesu kavulubuka wumonana theti na bapostulo bandi ku nzo mueka ku Yelusalemi. Boti Yesu waba tomba kuvana kiyeku ki kusamuna ayi kuvanga minlonguki kuidi bapostolo bandi to, khanu nandi wuba kamba mawu ku Yelusalemi. Ayi khanu kasa kamba ko bakieto baneni bakuikama ayi batu bankaka muingi bandengana ku Ngalili.—Luka 24:33, 36.

6. Buidi Matai 28:20 yimmonisina ti kiyeku ki kuvanga minlonguki kivanu mvandi kuidi Baklisto bubu? Ayi nate kitesu mbi batu badi mu kutumukina thuadusulu ayoyi?

⁶ Kibila kintatu kimmonisa ti, lutumu lu kuvanga minlonguki lusa vanu ko to kuidi baklisto baba zinganga mu sekulu yitheti. Buidi tuzabidi mawu? Yesu wumanisa disolo diandi mu kutuba: “Ayi luzaba mbote ti Minu yidi yinu bilumbu bioso nate va tsukulu nza.” (Matai 28:20) Dedi bo Yesu katubila, batu bawombo bubu badi mu kuvanga kisalu ki kuvanga minlonguki. Yindulabu! Nduka 300.000 di batu mu kadika mvu bambontamanga muingi kuba zimbangi zi Yave ayi minlandikini mi Yesu!

7. Mbi tunkuiza tubila ayi kibila mbi?

⁷ Batu bawombo banlongukanga Kibibila bankuiza botamanga. Vayi bankaka bammonanga boma bu kuba minlandikini mi Yesu. Bawu banzolanga kulonguka vayi bavanganga ko mangolo muingi kubotama. Boti ngie widi mutu wunlongukanga yaku Kibibila, buna tuidi lufiatu ti wutidi kunsadisa kusadila mambu kanlonguka ayi kuba nlonguki wu Yesu. Mu dilongi adidi, tunkuiza mona buidi tulenda sadisila minlonguki mitu kuzola Yave ayi kukonzuka mu kiphevi. Kibila mbi tuntubila mawu? Kibila vala ba thangu vala tombulu befu kubaka makani boti tunkuiza tatamana kulonguka na nlonguki voti ndamba.

8. Kibila mbi khumbu zinkaka dilenda bela diambu diphasi kusadisa minlongkuki mitu kuzola Yave?

⁸ Yave kantomba batu bansadila mu kibila ki luzolo luawu mu nandi. Diawu, makani mitu madi kuba sadisa kuvisa ti Yave wuba vuanga nkinza ayi wunzolanga kadika mutu mu mawu. Tuntomba kuba sadisa kutadila Yave banga ‘Tata yi bana basiana ayi nkebi mimfuizi.’(Minkunga 68:5) Bo minlonguki miaku bankuiza mona luzolo Yave kadi mu bawu, mvawu bankuiza tona kunzola. Minlonguki minkaka ḿba balenda mona phasi kutadila Yave banga tata yi luzolo, kibila matata mawu basa bamonisa ko luzolo. (2 Timoteo 3:1, 3) Bo wumvana ndongukulu yi Kibibila, luta tubila beni zikhadulu zimboti Yave kadi. Sadisa minlonguki miaku kuvisa ti Nzamb’itu yi luzolo tidi bawu babaka luzingu lu mvu ka mvu ayi widi wukubama muingi kuba sadisa kubaka luawu. Mbi binkaka tulenda vanga?

9-10. Bilongulu mbi tufueti sadila muingi kuvana ndongukulu yi Kibibila ayi kibila mbi tufueti sadila biawu?

⁹ Sadila zibuku: “Mbi Kibibila Kilenda  Kutulonga” ayi “Buidi Bu Kutatamana Mu Luzolo Lu Nzambi.” Bilongulu abiobi bivangulu muingi kusadisa minlonguki mitu kuzola Yave. Buka, kapu 1 yi buku Mbi Kibibila Kilenda Kutulonga, yimvana mimvutu mi biuvu abibi: Nzambi wutuvuanga nkinza voti wututovulanga? Buidi Nzambi kammuenanga ziphasi zitu? Ngiewu, wulenda fikama Yave? Vayi buku, Buidi Bu Kutatamana Mu Luzolo Lu Nzambi? Yala sadisa nlonguki’aku kuvisa buidi kusadila minsua mi Kibibila milenda ludikila luzingu luandi ayi kumvanga kufikama Yave. Kheti wumana longuka na batu bankaka buku ayoyi, kubama buboti mu kadika ndongukulu ayi zaba zitsatu zi kadika nlonguki.

¹⁰ Mbi ngie wufueti vanga boti nlonguki’aku bevua nkinza diambu dimueka didi mu kilongulu kikhambulu mu khati bilongulu tumvaninanga ndongukulu yi Kibibila? Ḿba ngie wulenda kunkindisa muingi katanga naveka kilongulu beni. Mu phila ayoyi, benu mulenda tatamana ndongukulu’inu mu buku yidi mu bilongulu tunsadilanga muingi kulonga.

11. Thangu mbi tulenda tonina kusambila na minlonguki mitu? Ayi buidi tulenda kuba sadisila kuvisa nkinza wu kusambila?

 ¹¹ Sambila ava kutona ndongukulu yi Kibibila. Buboti beni kutoninanga ayi kumanisanga ndongukulu mu nsambu. Tufueti vanga mawu mu sabala yitheti voti yimuadi bo tuntona ndongukulu yi Kibibila. Befu tufueti sadisa minlonguki mitu mi Kibibila kuvisa ti tulenda visa to Diambu di Nzambi mu lusadusu lu phevi’andi yinlongo. Minsamuni miwombo ava kutona kusambila na nlonguki, bawu bansudikisanga nkinza wu nsambu mu kutanga Yakobi 1:5, luntuba: “Enati vadi mutu mu benu khambulu nduenga buna bika kalomba kuidi Nzambi.” Bosi wulenda yuvula nlonguki: “Buidi tulenda lombila nduenga kuidi Nzambi?” Nlonguki wunkuiza kikinina ti mu kusambilanga kuidi Nzambi.

12. Dedi bummonisina Minkunga 139:2-4, buidi wulenda sadisila nlonguki’aku kuvanga minsambu mimboti?

¹² Longisa nlonguki’aku kusambila. Nsadisa kuvisa ti Yave tidi kukuwa minsambu miandi mimvangu mu bukiedika. Kamba nlonguki’aku ti bo tumvanga minsambu mitu veka, tulenda zibula ntim’itu kuidi Yave mu kunkamba mabanza tulenda mona zitsoni kukamba mutu wunkaka. Kibila Yave zebi mabanza ma tsi ntim’itu. (Tanga Minkunga 139:2-4.) Mvandi tulenda kunkindisa kudinda lusadusu lu Yave muingi kubalula phila yi kuyindudila ayi kununga bifu bimbi. Yindula boti mutu wutona kulonguka thama, wunzolanga nkungi wumueka wukhambu kithuadi na malongi ma Kibibila. Nandi zebi ti mambu kamvanganga masi ko mamboti vayi nandi wunzolanga mambu madi mu nkungi beni. Nkindisa kudinda lusadusu muingi kazola to mambu Yave kanzolanga.— Minkunga 97:10

13. (a) Kibila mbi tufueti fika tumisa minlonguki mitu mu zikhutukunu? (b) Buidi tulenda sadisila nlonguk’itu kukimona buka ti nandi widi ku nzo’andi bo kadi mu zikhutukunu?

¹³ Fika tumisa nlonguki’aku mu zikhutukunu. Mambu nlonguki’aku kankuwa ayi kammona mu zikhutukunu malenda nyikuna mabanza mandi ayi kunsadisa kukonzuka mu kiphevi. Tala yandi video Mambu Mbi ma Monikanga ku Ǹzo yi Kintinu? Ayi ntumisa muingi kalandakana lukutukunu. Mvandi wunlenda mvana kitiki muingi kabaka bu kukuendila mu zikhutukunu. Didi diyindu dimboti kutumisa minsamuni miviakana muingi kulandakana ndongukul’inu yi Kibibila. Mu phila ayoyi, nandi kalenda vanga kikundi na zikhomba mu kimvuka. Ayi bo kala banga mu zikhutukunu, nandi wala kukimona buka ti widi ku nzo’andi.

14. Mbi bilenda kindisa nlonguki wu Kibibila kukonzuka mu kiphevi?

¹⁴ Makani mitu madi ma kusadisa nlonguk’itu wu Kibibila kukonzuka mu kiphevi. (Efeso 4:13) Bo mutu kankikinina ndongukulu yi Kibibila, ḿba nandi wunluta vuanga nkinza buidi ndongukulu beni yinkuiza kuntuadisila ndandu. Bo luzolo luandi mu Yave luka buediminanga buawu nandi kala tona kuyindula buidi kalenda sadisila bankaka, kubunda baneni badi mu kimvuka ki Yave. (Matai 22:37-39) Bo wala mona ti thangu yifueni, nzabikisa luaku tuidi lu kubuela mioko bisalu bi Kintinu mu nzila minkhayilu mitu.

15. Buidi tulenda sadisila nlonguk’itu wu Kibibila kuvanga mambu masulama bo kammonikina mambu?

¹⁵ Longisa nlonguki’aku wu Kibibila mbi kafueti vanga bo mambu mammonika mu kimvuka. Yindula boti nlonguki’aku widi nsamuni wukhambu botama beku kamba ti mutu  mu kimvuka benlueka ntima. Bika kunkamba nani wununga voti nani widi fotu. Vayi nsudikisa mbi Kibibila kintuba tufueti vanga. Nandi kalenda sola kulemvukila khomb’andi. Vayi boti kasinnunga ko kuma zimbakana, kafueti yoluka yandi mu luzolo muingi kuvutula “[khomb’andi] mu nzila yimboti.” (Dedikisa na Matai 18:15.) Sadisa nlonguki’aku kukubika mambu kala tuba. Wummonisa buidi kalenda sadila JW Library^® app, jw.org^® ayi bilongulu binkaka muingi kulonguka mambu mankinza. Na kulonguka kudedikisanga mambu na bankaka ava kubotama, diala ba diambu diluelo bo kala botama kuba kikundi kimboti na bankaka mu kimvuka.

16. Kibila mbi didi diambu dimboti kutumisa minsamuni minkaka muingi kulandakana ndongukulu’inu?

¹⁶ Tumisa batu bankaka ayi nkengididi wu bimvuka bo kela kuiza tala kimvuka kinu—muingi kulandakana ndongukulu’inu. Kibila mbi? Kubika kuandi to mambu tuma tubila, minsamuni minkaka balenda vana nlonguki’aku lusalusu ḿba ngie wisi ko wufuana muingi kumvana. Dedi, yindula boti nlonguki’aku khumbu ziwombo wutomba kubika volanga tsunga, vayi kanunganga ko. Tumisa Mbangi yi Yave wuba mvandi kifu beni, vayi wuvanga mangolo ma kubika kiawu muingi kalandakana ndongukulu’inu yi Kibibila. Ḿba khomba ayoyi kalenda vana malongi mankinza nlonguki’aku katidi kukuwa. Boti zitsoni widi mu kuvana ndongukulu vantuala khomba beni, wulenda kundinda muingi kuvana ndongukulu beni. Bo wuntumisa bankaka muingi balandakana ndongukulu’inu, nlonguki’aku wala baka ndandu mu kifuani kiawu. Tebuka moyo ti makani mitu madi ma kusadisa nlonguk’itu kukonzuka mu kiphevi.

17-18. Mbi ngie wufueti fiongunina ava kubaka makani ma kubika kubue longuka Kibibila na mutu?

¹⁷ Boti nlonguki’aku wu Kibibila kasi mu kukonzuka ko mu kiphevi, ngie wufueti kuyikuvusa: Yifueti bika kulonguka yandi Kibibila?’ Bo wumvanga mawu, wufueti yindula boti nandi wumvuanga nkinza mambu kanlongukanga. Batu bankaka bafika konzukanga, vayi bankaka thangu yiwombo yintombulu. Diawu wu kiyuvusa: ‘Nlonguki’ama widi mu kukonzuka mu phila yifueni mu kutadila mambu kamviokila?’ ‘Matona kusadila mambu kadi mu kulonguka?’ (Matai 28:20) Thangu yiwombo yilenda vioka muingi mutu kuba nlonguki wu Yesu, vayi buluelo buluelo nandi kafueti tona kubalula mavanga mandi.

¹⁸ Vayi mbi tufueti vanga boti tutona kulonga mu thama na mutu, vayi nandi kavuanga ko nkinza ndongukulu’itu? Yindulabu mu kifuani akiki: Nlonguki’aku wumanisa buku Mbi Kibibila Kilenda Kutulonga ayi ḿba mana tona kulonguka buku Buidi Bu Kutatamana Mu Luzolo Lu Nzambi? Vayi kalandakananga ko ni lukutukunu lumueka—ni kheti Mbambukulu Moyo Lufua lu Yesu, ayi wumvuzikisanga  ndongukulu mu mambu makhambulu nkinza. Boti nlonguki’aku bobo kadidi, yoluka yandi mu lukinzu matedi mambu amomo. *

19. Mbi ngie wulenda yuvula mutu wummonikina buka ti kasimvua ko nkinza ndonguku’inu yi Kibibila? Ayi mambu mbi wufueti fiongunina?

¹⁹ Ngie wulenda tona mu kunkuvula: ‘Kiuma mbi ngie wummonanga ki kutulanga nkaku muingi wuba Mbangi yi Yave?’ Nlonguki kalenda tuba: Minu yinzolanga kulonguka Kibibila, vayi yilendi ba ko Mbangi yi Yave!’ Kheti mu thangu yoso kama vanga mu kulonguka Kibibila, vayi wukhidi mayindu amomo, bukiedika ti vadi kibila muingi kutatamana kulonguka yandi? Nlonguki kalenda tuba kibila mbi kakhambu konzukila mu kiphevi. Dedi, nandi ḿba wunyindulanga ti kalendi nunga ko kusamuna nzo ka nzo. Bo wunzaba mambu ma kuntula nkaku, ngie wala zaba buidi bu kunsadisila.

20. Buidi Mavanga 13:48 yilenda kutu sadisila kuzaba ntindu mbi batu tufueti tatamana kuvana ndongukulu yi Kibibila?

²⁰ Kiadi ayi kiunda kuzaba ti minlonguki minkaka badi buka basi Isaeli mu thangu yi Yehezekeli. Yave wukamba Yehezekeli: ‘Ngie widi kuidi bawu buka tuimbu tu luzolo, bayimbila mu mbembo yimboti ayi yisiku mu bisengu bi mioko. Bawu bala kuwa mambu maku vayi ni mutu wala sadila mawu.’ (Yehezekeli 33:32) Tulenda mona phasi kukamba mutu ti tunkuiza bika kulongukanga yandi kibila “thangu yeka yikhufi.” (1 Kolinto 7:29) Buboti beni kubika viokisanga thangu kuidi batu bakhambu vanga ndionzukulu yi kiphevi, vayi tufueti tomba batu badi ‘bakubama mu kubaka luzingu lukalumani.’—Tanga Mavanga 13:48.

21. Matangu mbi basolizi mu mvu 2020, ayi kibila mbi madidi nkinza?

²¹ Mu mvu 2020, matangu mitu ma mvu mala tusadisa kutsikika mayindu mitu mu phila tulenda buela pisukila mu kisalu kitu ki kuvanga minlonguki. Mawu mammonisa mambu Yesu katuba mu lukutukunu katuadisa ku mongo Ngalili: “Yendanu, lukitula batu ba zitsi zioso minlonguki miami, lubabotika.”—Matai 28:19.