1. Mbi bi kukuizilanga va kilunzi bo wuyindula matedi Yave?

 NGIE mana yindula buidi yave kadidi? Bo ngie wunkoluka yandi mu nzila nsambu mbi bi kukuizilanga va kilunzi? Kheti Yave kamonikanga ko, vayi Kibibila kintubila matedi nandi mu ziphila ziwombu. Yave bakuntedilanga ‘thangu, nkaku ayi mbazu.’ (Minku. 84:11; Ebe. 12:29) Kimutu kiandi bakidedikisa na dimanya di safila, dimanya dinlezamanga ayi buka nkiama. (Yehe. 1:​26-28) Zi thangununu aziozo zilenda tuvanga kukuituka ayi kuba boma.

2. Mbi bilenda tula bankaka nkaku muingi kufikama Yave?

² Bo tukhambu monanga Yave dilenda ba diambu diphasi kukikinina ti nandi wutuzolanga. Bawombu banyindulanga ti Yave kalendi ko kubazola mu kibila ki mambu bavanga kumbusa. Bankaka ḿba basa ba ko tata waba ku bazolanga. Yave wumvisanga mabanza amomo ayi buidi bawu bamuenanga. Muingi kutusadisa, nandi wu tuzabikisanga kimutu kiandi mu Kibibila.

3. Kibila mbi tufueti longukila matedi luzolo lu Yave?

³ Luzolo, yawu khadulu yilutidi mu zikhadulu zioso zi Yave. (1 Yoa. 4:8) Kibibila kintuba ti Nzambi luzolo. Luawu luntuadisanga mamoso kamvanganga. Luzolo lu Nzambi luidi luwombu ayi nandi kamonisanga ko to luawu kuidi batu bankuzolanga vayi mvandi kuidi bo bakhambu kunzolanga. (Matai 5:​44, 45) Mu dilongi adidi, tuemmona buidi Yave kammonisinanga luzolo luandi. Bo tulonguka beni matedi Nzambi buawu mvandi tunluta kunzodila.

 YAVE WU TUZOLANGA BENI

4. Buidi ngie wummuenanga bo Yave ka kumonisina luzolo luandi? (Tala mvandi foto.)

⁴ “Yave widi luzolo luwombo.” (Tiagu 5:11) Kibibila, kindedikisa Yave banga ngudi widi luzolo luwombu. (Yesa. 66:​12, 13) Yindula ngudi wunkieba muan’andi mu luzolo. Nandi wunkolukanga yandi mu luzolo ayi mu mbembu yivumbama. Bo kandila voti kammona kienzu, nandi wukumvananga biuma kantomba. Bo tumviokila mu diambu diphasi, tulenda fiatila mu luzolo lu Yave. Nsoniki wu minkunga wutuba: ‘Mu thangu mayindu mawombu ma kukhuazula, ngie wumbomba ayi wumvumbika.’—Minku. 94:19.

5. Mbi binsundula luzolo lukuikama lu Yave kuidi ngiewu?

⁵ Yave widi wukuikama. (Minku. 103:8) Nandi katuvongilanga ko bo tumvanga diambu dimbi. Dikabu di Isaeli, khumbu ziwombu banyongisa Yave vayi nandi wuba monisa luzolo mu kutuba: ‘Ngie widi luvalu va meso mami, ngie widi nzitusu ayi minu yikuzolanga.’ (Yesa. 43:​4, 5) Luzolo lu Nzambi lubalukanga ko ayi tulenda kumfiatila kadika thangu. Kheti tumvanga disumu dingolo, Yave ka tuyekulanga ko. Bo tunyongina masumu mitu ayi tumvutuka kuidi nandi, tuntambulanga luzolo luandi. Nandi wukanikisa ‘kutumonisa kiadi.’ (Yesa. 55:7) Kibibila kintubila nlemvuandi, “muingi lubaka luvovomu ayi nlemvu [wu] Yave.”—Mava. 3:19.

6. Mbi Zakalia 2:8 yi tulonga matedi Yave?

⁶ Tanga Zakalia 2:8. Mu kibila ki luzolo luandi mu befu, Yave wumvuanga nkinza mabanza mitu ayi widi phuila muingi kutukieba. Nandi wumbanga mu kiunda mu thangu tumviokila mu ziphasi. Mu kibila akiokio, tulenda sambila: ‘Kheba banga kizunga ki diesu diaku.’ (Minku. 17:8) Diesu, kidi kinama kikhambulu beni phasi kutobuka ayi kidi beni nkinza mu nyitu’itu. Diawu bo Yave kandedikisa kizunga ki diesu, nandi wuntomba kutuba ti, ‘Woso wumvanga bubi dikabu diama, buna widi mu kuvava kiuma kilutidi luvalu kuidi minu.’

7. Mbi tufueti vanga muingi tukindisa lufiatu luitu mu luzolo lu Yave?

⁷ Yave wuntomba wuba lufiatu ti nandi wu kuzolanga. Vayi mu kibila ki mambu tuviokila  kumbusa ḿba tulenda kuyikuvusa boti nandi wu tuzolanga. Voti tulenda viokila mu mambu manthota lufiatu luitu mu Yave. Vayi mbi biala kindisa lufiatu luitu? Longuka buidi Yave kamonisina luzolo kuidi Yesu, kuidi Baklistu basolu ayi kuidi befu boso.

BUIDI YAVE KAMMONISINANGA LUZOLO LUANDI

8. Lufiatu mbi Yesu kaba mu Tat’andi?

⁸ Mu mimvu miwombo Yave ayi Muan’andi wu luzolo badi kikundi kifikama. Kikundi kiawu, kiawu kilutidi ayi kitheti mu nza yimvimba. Dedi bummonisina buku yi Matai 17:5 Yave khanu wutuba, ‘Awuwu nandi minu yikikinina.’ Vayi nandi waba tomba muingi tuzaba luzolo kadi mu Yesu bo katuba “Muana minu yinzolanga.” Yave wuyangalala mu Yesu ayi mu mambu kaba belama kuvanga. (Efe. 1:7) Yesu kasaba ko divuda mu luzolo Tat’andi kaba mu nandi. Yesu wuba luzolo mu Tat’andi ayi wuba lufiatu ti Tat’andi waba kunzolanga.—Yoa. 3:35; 10:17; 17:24.

9. Kikuma mbi kimmonisa luzolo Yave kadi kuidi Baklistu basolu? Sudikisa. (Loma 5:5)

⁹ Yave wumonisa luzolo luandi kuidi Baklistu basolu. (Tanga Loma 5:5.) Tala kikuma “badukula.” Buku yimueka yisudikisa kikuma akiokio muingi kudedikisa luzolo Yave kadi kuidi Baklistu basolu bandedikisa “banga muila.” Baklistu basolu bazebi ti “Nzambi wuba zolanga.” (Yuda 1) Mvuala Yoane wutubila mayindu mandi bo katuba: “Yindulanu phila Tata ka tuzodila, nandi wu tutedila bana!” (1 Yoa. 3:1) Bukiedika ti Yave wummonisanga to luzolo luandi kuidi Baklistu basolu? Ndamba, nandi wummonisanga luzolo luandi kuidi befu boso.

10. Mbi bimmonisa luzolo lu Yave mu ngiewu?

¹⁰ Mbi binluta monisa luzolo lu Yave? Khudulu—kidi kidimbu ki luzolo luwombu Yave kadi mu nza yimvimba! (Yoa. 3:16; Loma 5:8) Yave wuvana Muan’andi wu luzolo muingi kafua mu kibila ki batu boso, muingi kaba lemvukila ayi baba bakundi bandi. (1 Yoa. 4:10) Bo tunluta yindula mu thalu Yave ayi Yesu bafuta, buawu tunluta visila luzolo badi mu kadika mutu mu befu. (Ngala. 2:20) Khudulu yisa vanu ko to mu kibila ki busonga bu Yave, vayi mu kibila ki luzolo. Yave wumonisa luzolo luandi mu befu, mu kuvana Muan’andi wu luzolo Yesu Klistu. Yave wubika muingi Muan’andi kafua ayi katovuka mu kibila kitu.

11. Mbi tulenda longuka mu Yelemia 31:3?

¹¹ Yave katubanga ko to ti widi luzolo mu befu, vayi wummonisanga ti wu tuzolanga. (Tanga Yelemia 31:3.) Yave wututumisa kuidi nandi, kibila wu tuzolanga. (Dedikisa na Deutelonomi 7:​7, 8.) Vasi ko kiuma ayi ni mutu wulenda kututatula mu luzolo luandi. (Loma 8:​38, 39) Buidi ngie wumuenanga kuzaba ti Yave wu kuzolanga? Tanga Minkunga 23, ayi mona ndandu luzolo ayi lukiebu lu Yave kamonisa kuidi Davidi ayi ndandu lulenda tuadisa kuidi befu boso.

BUIDI NGIE WUMMUENANGA KUZABA TI YAVE WU KUZOLANGA?

12. Buidi wulenda tubila mu bukhufi mambu madi mu Minkunga 23?

¹² Tanga Minkunga 23:​1-6. Minkunga 23 widi nkunga wummonisa lufiatu lu luzolo ayi lukiebu lu Yave. Davidi, nsoniki wu nkunga awowo, wutubila luzolo lungolo kaba na nsungi’andi Yave. Davidi wumona nsika mu kubika Yave kantuadisa ayi nandi waba fiatilanga mamoso mu Yave. Davidi wuzaba ti Yave wala kummonisa luzolo luandi mu bilumbu biandi bioso bi luzingu. Mbi bimvana lufiatu alolo?

13. Kibila mbi Davidi kabela lufiatu mu lukiebu lu Yave?

 ¹³ “Yilendi khambu ko ni kiuma.” Davidi wumona ti Yave waba kunkiebanga kadika thangu. Davidi mvandi wubaka ndandu mu kikundi ayi mu nlemvu wu Yave. Diawu kabela lufiatu ti dioso kua diambu dilenda kummonikina ku ntuala, Yave wala kunkieba mu mamoso. Lufiatu Davidi kaba mu luzolo lungolo lu Yave, luluta ba lungolo kena dioso kua diambu dilenda kunkuazula ayi maba kumvananga mayangi mawombo.—Minku. 16:11.

14. Buidi Yave ka tukiebilanga?

¹⁴ Mu luzolo, Yave wu tukiebanga bulutidi bo tumviokila mu mambu maphasi. Yaya Claire, a wunsadilanga ku Beteli kuvioka 20 di mimvu wumona lusalusu alolo bo dikanda diandi khumbu ziwombo baviokila mu mambu maphasi. Tat’andi bambakula kimbevu kingolo, khomb’andi wumueka wunkietu wuvaikusu mu kimvuka ayi wumueka va dikanda diandi wuviokila mu mambu ma kukhambu ku zimbongo ayi nzo’andi yituluka. Buidi Yave kaba kiebila? Yaya Claire wutuba: “Yave waba kieba zitsatu zi dikanda diami mu kubavana biuma biaba tombulu kadika kilumbu. Ayi khumbu ziwombu Yave wubavana biuma biaba tombulu kuvioka kuandi mu phila yaba yindudila. Yalasa zimbakana ko luzolo lu Yave bo yinyindula mu phila katusadisila. Mambu amomo, ma tsadisa kusadila Yave mu mayangi ayi kuba wukubama mu mambu maphasi yala viokila.”

15. Buidi Davidi kabakila khindusulu? (Tala mvandi fikula.)

¹⁵ “Nandi wukukhindisanga.” Khumbu  zinkaka Davidi waba banga mu kiunda mu kibila ki mambu maphasi kaba viokilanga. (Minku. 18:​4-6) Diawu luzolo lu Nzambi ayi lukiebu lu’andi lunkindisa. Yave wunata nkundi’andi ku ‘kibuangu kimboti ayi kibuangu kikuvundila.’ Mu kibila akiokio, Davidi wubaka mangolo muingi kutatamana—Minku. 18:​28-32.

16. Buidi luzolo lu Yave lukukindisilanga?

¹⁶ Bubu mvandi mu kibila ki luzolo lu Yave lukhambu sukanga, buawu tumbakilanga khindusulu bo tumviokila mu zithotolo voti mu ziphasi. (Manio. 3:22; Kolo. 1:11) Tala kifuani ki Yaya Rachel. Nandi waba kuazuka beni bo nuni’andi kanyekula ayi bo kabika kusadila Yave mu thangu kivunga ki COVID-19. Mbi Yave kavanga mu nandi? Nandi wutuba: “Yave wutsadisa kumona luzolo luandi. Nandi wuphana bakundi, baba kundatinanga bidia, baba kumfilanga zimensagi ayi matangu makhindusulu ma Kibibila, baba sevanga yama ayi batatamana kuthebula moyo, ti Yave waba kukiebanga. Yimvutulanga matondo kuidi Yave, mu kuphana dikanda dinneni di luzolo.”

17. Kibila mbi Davidi ‘kakhambu bela beni boma’?

¹⁷ “Yalasa mona ko boma kibila ngie widi yama.” Luzingu lu Davidi luba va kingela ayi wuba zimbeni ziwombu. Vayi luzolo lu Yave luvanga Davidi kaba mu nsika. Davidi wumona ti Yave wuba yandi mu mambu moso ayi mawu mamvumbika. Diawu kayodila: ‘Nandi wuphukisa mu boma boso yiba.’ (Minku. 34:4) Davidi wuba mu boma, vayi luzolo lu Yave luawu luluta kumvana mangolo muingi kukindama.

18. Buidi lufiatu luaku mu luzolo mu Yave lulenda kindusulu bo wumviokila mu ziphasi?

¹⁸ Kuzaba ti Yave wutuzolanga, kulenda tukindisa bo tumviokila mu ziphasi. Khomba mueka wudi ntuami ntuala bantedilanga Susi wutuba buidi nandi ayi nnuni’andi babela bo muan’awu kayivonda. Nandi wutuba: “Mambu maphasi mammonikinanga mu kinzimbukulu, mantuadisanga beni ziphasi ayi kiunda kuidi mutu. Vayi luzolo lu Yave lutukieba ayi lutuvana nsika.” Yaya Rachel tube tubila, wuntebuka moyo: “Builu bumueka yaba mona kienzu mu ntima, minu yiba mu boma, yaba kuazuka ayi yitenduka kuidi Yave. Mu thangu ayoyo, yiba mu nsika ayi yiba wuvumbama dedi bo ngudi kambombilanga  muana. Bosi minu yinunga kulala. Yilendi zimbakana ko mambu amomo.” Yaya Tasos widi nkulutu wu kimvuka, wuba mu buloku mu mimvu minna, bo kamanga kukota mu kisodi. Buidi kamuena luzolo ayi lukiebu lu Yave? Nandi wutuba: “Yave wudukisa zitsatu ziama zioso bulutidi mu phila yaba khambu yindudilanga. Mawu makindisa lufiatu luama ti yilenda kunfiatila mu ntim’ami woso. Mvandi mu nzila phevi’andi yinlongo, Yave wuphana mayangi kheti bo yaba viokila mu ziphasi. Ayi mambu amomo, matsadisa kumona ti bo yiluta fiatila mu Yave, yimona luzolo luandi kuidi minu. Ayi yiba ntuami ntuala bo yiba mu buloko.”

FIKAMA KUIDI NZAMBI’AKU YI LUZOLO

19. (a) Buidi tulenda sambidila befu kuzaba ti Nzambi wutuzolanga? (b) Diambu mbi diphasi ngie wuviokila wumuena luzolo lu Nzambi? (Tala quadro yintuba “ Bikuma bi Tusadisa Kumona Luzolo lu Yave.”)

¹⁹ Bifuani tuma tubila, bimmonisa ti Yave widi “Nzambi yi luzolo,” ayi wumbanga yitu va khonzo! (2 Koli. 13:11) Nandi wumvuanga nkinza kadika mutu mu befu ayi tuidi lufiatu ti ‘luzolo lukuikama lu Yave lutukiebanga.’ (Minku. 32:10) Bo tunluta yindula phila Yave ka tumonisinanga luzolo, luawu lunluta banga lukiedika ayi lutuvanganga kufikama kuidi nandi. Tulenda kumfikama ayi kunzabikisa ti tuntomba beni luzolo luandi. Tulenda kunzabikisa mambu matukuazula ayi kuba lufiatu ti wu tuvisanga ayi widi phuila muingi kutusadisa.—Minku. 145:​18, 19.

20. Buidi luzolo lu Yave lu tufikikilanga kuidi nandi?

²⁰ Dedi bo befu tunzodilanga kukota mbazu mu thangu kiozi, mvitu tumbanga phuila yi kufikama Yave mu luzolo ka tumonisinanga. Luzolo lu Yave luidi mangolo ayi luidi lu mbombolo. Diawu ba mayangi mu kuzaba ti Yave wu kuzolanga. Ayi bika befu boso tumonisa luzolo luitu mu kutuba: ‘Minu yi kuzolanga Yave’!—Minku. 116:1.