DILONGI 4
NKUNGA 18 Vutula Matondo mu Khudulu
Mbi Khudulu yi Tulonga?
“Phila Nzambi ka tumonisina luzolo.”—1 YOA. 4:9.
MAMBU TUANLONGUKA
Mbi khudulu yimmonisa matedi zikhadulu zi Yave ayi Yesu Klistu?
1. Kibila mbi didi diambu dinkinza kulandakananga Mbambukulu Moyo lufua lu Yesu Klistu kadika mvu?
TUIDI lufiatu ti ngie wumvuanga beni nkinza nkhailu wu khudulu! (2 Ko. 9:15) Yesu wuvana luzingu luandi muingi ngie wubaka kikundi kifikama na Yave Nzambi. Mvandi wulenda ba kivuvu ki kuzinga mvu ka mvu. Diawu tuidi bibila biwombo muingi kutonda Yave mu luzolo katumonisa mu ku tuvana khudulu! (Lom. 5:8) Muingi kutusadisa kutatamana kuvutulanga matondo mu khudulu, Yesu wutubikila lutumu lu kulandakananga Mbambukulu Moyo lufua luandi kadika mvu.—Luk. 22:19, 20.
2. Mambu mbi tunkuiza tubila mu dilongi adidi?
2 Mu mvu awuwu, Mbambukulu Moyo yala vangama mu kisabala kilumbu 12 Ngonda Yinna mvu 2025. Tuisi ko divuda ti befu boso tunkuiza kubama muingi kulandakana nkungi awowo. Befu tuala luta baka ndandu befu kubotula thangu ava Mbambukulu Moyo muingi kuyindula mu mambu Yave ayi Muan’andi ba tuvangila. a Mu dilongi adidi, tunkuiza tubila mbi khudulu yi tulonga matedi Yave ayi Muan’andi. Ayi dilongi dinlanda, diala tusadisa kuzaba buidi tulenda bakila ndandu mu khudulu ayi buidi tulenda vutudila matondo mu yawu.
MBI KHUDULU YI TULONGA MATEDI YAVE?
3. Buidi lufua lu mutu wumueka to luvukisila bivevi na bivevi bi batu? (Tala mvandi fikula.)
3 Khudulu yi tulonga matedi busonga bu Yave. (Deute. 32:4) Buidi? Bo Adami kabayisa Yave, befu tutambakana disumu di tunatanga ku lufua. (Lom. 5:12) Muingi ku tukula mu kivika ki disumu ayi lufua, Yave wufila Yesu muingi ku tukula. Vayi buidi nkhailu wu mutu mueka to wuvukisila bivevi na bivevi bi batu? Mvuala Polo wusudikisa: “Dedi bo kukhambu tumukina ku mutu wumueka to, kuvangila bawombo kukituka minsumuki, bobuawu mvandi, kutumukina ku mutu wumueka to, kuala vanga batu bawombo, kukituka basonga.” (Lom. 5:19; 1 Ti. 2:6) Mawu mansundula ti, kukhambu tumukina ku mutu wumueka to ku tuvanga kuba mimvika mi disumu ayi lufua. Vayi kutumukina ku mutu wumueka to ku tuvukisa.
Mu kibila ki mutu wumueka Adami, befu boso tusumuka ayi tumfuanga. Vayi mu kibila ki mutu wumueka Yesu, befu boso tukulu mu disumu ayi lufua (Tala lutangu 3)
4. Kibila mbi Yave kakhambu bikila ko to batu badi mu nkunu wu Adami, ba kuntumukinanga bazinga mvu ka mvu?
4 Bukiedika kuandi ti vaba tombulu Yave kufila Yesu muingi ku tukula? Kibila mbi Yave kakhambu bikila ko to batu badi mu nkunu wu Adami, ba kuntumukinanga bazinga mvu ka mvu? Kuidi batu ba masumu, khanu mawu Yave kavanga. Vayi mayindu amomo masi ko nguizani na busonga bu Yave. Ayi khanu mawu mayiza monikina buka ti, Adami kasa vola ko disumu dingolo ayi ti nkunu’andi wisi ko wusumuka.
5. Kibila mbi tulenda bela lufiatu ti Nzambi wala tatamana kuvanga mambu masonga?
5 Boti Yave kasa vana ko khudulu, ayi wubika bana ba Adami kheti mu kuba batu ba masumu kuzinga mvu ka mvu, khanu mambu mbi mamonika? Khanu batu balenda tona kuyindula ti Yave kalandakananga ko zithuadusulu ziandi matedi mamboti ayi mambi. Boti wuvanga mawu, khanu batu baba divuda ti Yave wala dukisa zikhanu kakanikisa mu bilumbu binkuiza kuntuala. Vayi vasintombulu ko befu kutatubuka matedi mambu amomo. Mu kuvana Muan’andi wu luzolo kheti mu ziphasi mantuadisa, ma tuvana lufiatu ti nandi wala tatamana kuvanga mambu masonga.
6. Mu phila mbi khudulu yimmonisina luzolo lu Yave? (1 Yoane 4:9, 10)
6 Kheti khudulu yitusadisa kuvisa busonga bu Yave, vayi yawu yinluta ku tusadisa kuvisa luzolo luandi. (Yoa. 3:16; tanga 1 Yoane 4:9, 10.) Khudulu yimmonisa ti Yave kasintomba to ku tuvana luzingu lu mvu ka mvu vayi mvandi tuba mu khati dikanda diandi. Bo Adami kasumuka, nandi kasa bue tatamana ko mu dikanda di bisadi bi Yave. Diawu, befu boso tumbutukanga mu kukhambu bue ba mu dikanda di Yave. Vayi mu nzila khudulu, Yave wunlemvukilanga masumu mitu ayi wala vana luaku batu badi kiminu ayi ba kuntumukinanga muingi kubue ba mu dikanda diandi. Ayi bubu, befu tulenda ba kinkundi kifikama na Yave ayi zikhomba zitu. Ayi befu tummonanga luzolo lukiedika lu Yave!—Lom. 5:10, 11.
7. Buidi ziphasi Yesu kamona zi tusadisila kuvisa luzolo luwombo Yave kadi mu befu?
7 Befu tulenda luta visa luzolo Yave kadi mu befu, bo tumvisa ziphasi khudulu yintuadisa. Satana wutuba ti ni mutu wala tatamana wukuikama kuidi Yave na kuviokila mu mambu maphasi. Muingi kumonisa ti mambu Satana kutuba make ma luvunu, Yave wubika Yesu kutovuka ava kafua. (Yobi 2:1-5; 1 Pet. 2:21) Yave wumona batu kuvueza Yesu, masodi kumbula, ayi kumbanda va dikunzi. Yave wumona Muan’andi wu luzolo kutovuka ayi kufua lufua luphasi. (Mat. 27:28-31, 39) Yave wuba lulendu lu kutula nkaku muingi mambu amomo mabika kumonikina muan’andi. Dedi zimbeni batuba: “boti nandi widi lunungu va mesu mandi, bika Nzambi kamvukisa,” bukiedika Yave khanu wuvanga mawu. (Mat. 27:42, 43) Vayi boti Yave wutula nkanku muingi mambu amomo mabika kumonika, khanu khudulu yisa futu ko ayi khanu befu tuisi ko kivuvu. Vayi Yave wubika Muan’andi kutovuka nati kamana moyo.
8. Buidi Yave kabela bo kamona Muan’andi kutovuka? Sudikisa. (Tala mvandi fikula.)
8 Befu tulendi yindula ko ti Nzambi mu kuba nkua ngolo zioso, buna kasi ko mabanza! Befu tuvangulu mu kifuani kiandi ayi wu tuvanga na mabanza. Diawu tulenda tubila ti nandi mvandi widi mabanza. Kibibila kintuba ti nandi ‘wunyonganga’ ayi wumbanga ‘mu kiunda.’ (Minku. 78:40, 41) Mona kifuani ki Abalahami ayi Isaki. Yave wundinda muingi kavana muan’andi wumueka to Isaki banga nkhailu. (Ngene. 22:9-12; Ebe. 11:17-19) Befu tulenda yindula kiunda Abalahami kaba, bo kaba kubika muan’andi Isaki muingi kumvonda. Diawu, yindula kiunda Yave kaba bo kamona Muan’andi kutovuka nati kafua mu mioku mi bankua mambi!—Mona video Imite a Sua Fé—Abraão, Parte 2.
Yave wuba beni mu kiunda mu kumona Muan’andi kutovuka (Tala lutangu 8)
9. Mbi Loma 8:32, 38, 39 yi tulonga matedi luzolo lu Yave?
9 Khudulu yi tulonga ti vasi ko mutu wunluta tuzolanga beni kena Yave—ni basi dikanda ditu voti nkundi wulutidi. (Tanga Loma 8:32, 38, 39.) Tuisi ko divuda ti Yave wunluta ku tuzolanga kena befu veka. Ngie wuntomba kuzinga mvu ka mvu? Ba lufiatu ti mawu Yave kantomba mu ngiewu. Ngie wuntomba nlemvu wu masumu maku? Mawu Yave mvandi kantomba. Kiuma to nandi kantomba tuvanga kidi, kumvutudila matondo mu mamoso ka tuvangila mu kuba kiminu mu nandi ayi kuntumukina. Khudulu, yike kivisa ki luzolo lu kiedika lu Nzambi. Ayi mu nza yimona, befu tuala luta longuka matedi luzolo luandi.—Mpovi 3:11.
MBI KHUDULU YI TULONGA MATEDI YESU?
10. (a) Mambu mbi maluta tuadisa kiunda kuidi Yesu matedi lufua luandi? (b) Mu ziphila mbi Yesu kadiodisila dizina di Yave? (Tala mvandi quadro yintuba “ Lukuikumunu lu Yesu Ludiodisa Dizina di Yave.”)
10 Yesu wukakidila kimutu ki Tat’andi. (Yoa. 14:31) Yesu wuba beni mu kiunda mu phila batu bankuiza tadila Tat’andi, kibila wunkuiza fua banga mvuenzi wu Nzambi ayi buka ditongueni. Diawu kasambidila: “Tat’ami, boti kuba bika mbungu ayiyi yithatuka.” (Mat. 26:39) Mu kutatamana wukuikama kuidi Yave nati ku lufua, Yesu wudiodisa dizina di Tat’andi.
11. Buidi Yesu kamonisina luzolo mu batu? (Yoane 13:1)
11 Khudulu mvandi yi tulonga ti Yesu waba vuanga batu nkinza, bulutidi minlandikini miandi. (Zinga. 8:31; tanga Yoane 13:1.) Yesu wuzaba ti mambu kankuiza vanga va ntoto, mala ba beni phasi bulutidi lufua luandi. Vayi Yesu kasa vangila ko to mawu muingi kutumukina Yave, vayi mvandi kibila waba zolanga batu. Nandi wumonisa luzolo kuidi batu mu kuba samuna, kuba longa ayi mu kuba sadisa. Kheti mu kilumbu ki lufua luandi, Yesu wubotula thangu muingi kusukula malu ma bapostolo bandi, kuba bomba ayi kuba vana zithuadusulu. (Yoa. 13:12-15) Kheti bo kaba va dikunzi, Yesu wubotula thangu muingi kuvana kivuvu kuidi ditongueni diba va khonzu’andi ayi wutomba mutu muingi kakeba mam’andi. (Luk. 23:42, 43; Yoa. 19:26, 27) Yesu wumonisa luzolo kuidi batu mu phila kaba kubatadilanga ayi bo kavitika kufua mu kibila kiawu.
12. Mu ziphila mbi Yesu kakhidi vangila mawombu mu kibila kitu?
12 Kheti Yesu wufua “khumbu yimueka to”, nandi wukhidi vanga mawombu mu kibila kitu. (Lom. 6:10) Mu phila mbi? Nandi wukhidi sala muingi ku tuvana biuma biwombu bimboti mu nzila khudulu. Nandi widi Ntinu, Mfumu Zinganga Nzambi ayi mfumu kimvuka. (1 Ko. 15:25; Efe. 5:23; Ebe. 2:17) Nandi widi mu kukutikisa Baklistu basolu ayi nkangu wunneni, kisalu kio kala manisa ava tsukulu ziphasi zingolo. b (Mat. 25:32; Mala. 13:27) Mvandi wunsadilanga kisadi kikuikama, muingi ku kubika bidia bi kiphevi binsadisanga bisadi biandi batatamana bakuikama mu Yave mu bilumbu abibi bitsuka. (Mat. 24:45) Bukiedika, Yave wu tuvana Muan’andi muingi ku tuvangila mambu mawombu. Ayi mu luyalu Luandi lu Kivevi ki Mimvu, nandi wala tatamana kukieba zitsatu zitu!
TATAMANA KULONGUKA MAMBU MAMONA
13. Mbi bilenda kusadisa kutatamana kulonguka matedi luzolo Yave ayi Yesu badi mu ngiewu?
13 Ngie wulenda tatamana kulonguka matedi luzolo lu Yave ayi Yesu, mu kuyindulanga mu mambu bawu ba tuvangila. Wulenda vanga mawu mu mvu awuwu mu Mbambukulu Moyo, mu kutanga mu phila yifuana zibuku zintubila matedi Yesu. Bika kutanga zikapu ziwombo vayi tangila mu phila yinkuiza kusadisa kuvisa kibila tufueti zodila Yave ayi Yesu. Ayi tomba ziphila muingi kuzabikisa bankaka mambu wunlonguka.
14. Dedi bummonisina Minkunga 119:97 ayi nota, mbi bilenda kusadisa kutatamana kulonguka matedi khudulu ayi malongi mankaka? (Tala mvandi foto.)
14 Boti mana sadila Yave mu mimvu miwombo, ḿba wulenda yindula ti vasiedi ko mawombo muingi kulonguka matedi busonga bu Yave, luzolo luandi ayi khudulu. Vayi zaba ti kulonguka matedi mambu amomo ayi mankaka, masi ko tsukulu. Buabu, mbi wulenda vanga? Tanga ayi longuka mambu madi mu Kibibila ayi mu bilongulu bitu. Ngie kukhambu visa buboti mambu wunlonguka, buela fiongunina mawu ayi mona mbi mawu mantuba matedi Yave, Muan’andi ayi luzolo bawu badi mu ngiewu.—Tanga Minkunga 119:97 ayi nota.
Kheti tueka mimvu miwombo mu kiedika, befu tulenda luta vua nkinza, mambu Yave ayi Yesu ba tuvangila (Tala lutangu 14)
15. Kibila mbi tufueti tatamana kutomba kiuka kisuama bo tuntanga Kibibila?
15 Bika kuba mu kiunda boti wisimbakula ko diambu dimona kadika khumbu wuntanga Kibibila voti bo wumvanga ndongukulu’aku. Tebuka moyo ti ngie widi buka mutu wunsikanga wola. Mu mvibudulu batu abobo bamviokisanga bilokula voti bilumbu biwombo muingi kubakula kheti nkadu wola, kibila nkinza beni yidi kuidi bawu. Bobuawu mvandi kiedika ki Kibibila kilutidi nkinza ke na wola! (Minku. 119:127; Zinga. 8:10) Diawu ba mvibudulu ayi tatamana kulandakana thuadusulu’aku yi matangu ma Kibibila.—Minku. 1:2.
16. Buidi tulenda landikinina kifuani ki Yave ayi Yesu?
16 Bo wunlonguka, tomba ziphila zi kusadila mambu widi mu kulonguka. Dedi, landakana kifuani ki busonga bu Yave ki kukhambu monisa luvasanu. Mvandi landakana kifuani ki luzolo Yesu kaba mu Tat’andi ayi mu bankaka, mu kuba wukubama muingi kutovuka mu kibila ki dizina di Yave ayi kusadisa bankaka kheti khumbu zinkaka dilenda ba diambu diphasi. Mvandi landakana kifuani ki Yesu mu kuvana kimbangi kuidi bankaka, muingi mvawu babaka luaku lu kutambula nkhailu wu luzingu lu mvu ka mvu, mu nzila khudulu Yesu.
17. Mbi tuala longuka mu dilongi dinlanda?
17 Bo tuntatamana kulonguka matedi khudulu, luzolo luitu mu Yave ayi mu Yesu lumbuelamanga. Ayi mu kibila ki luzolo luwombo tuidi mu bawu, bawu mvawu bala luta tuzola. (Yoa. 14:21; Tia. 4:8) Diawu, tusadila mambu moso Yave ka tuvangilanga muingi tutatamana kulonguka matedi khudulu. Mu dilongi dinlanda, tuala mona mua ziphila tulenda bakila ndandu mu khudulu ayi buidi tulenda monisina ti tuntondanga Yave mu luzolo ka tumonisa.
NKUNGA 107 Yave Ntungulu Wumboti wu Luzolo
a TSUDUKUSU YI BIKUMA: “Kuyindula” kunsundula kutsikika thalu mu diambu ayi kufiongunina bivisa muingi kuvisa diawu buboti.
b “Kukutikisa biuma ku diyilu” Polo katubila, dedi bummonisina Efeso 1:10, disuasana bidi na ‘kukutikisa batu basolo’ Yesu katubila dedi bummonisina Matai 24:31 ayi Malaku 13:27. Polo waba tubila thangu Yave kasola bana bandi ba kiphevi, mu phevi yinlongo. Vayi Yesu waba tubila thangu Baklistu basolo bakhidi va ntoto, bala bakutikisa muingi kukuenda ku diyilu mu thangu ziphasi zingolo.
