1-2. Buidi Mpovi 11:6, luididi kithuadi na kisalu ki kusamuna zitsangu zi Kintinu?

MU ZITSI zinkaka, batu bawombo banzolanga kukuwa matedi zitsangu zimboti. Vayi mu zitsi zinkaka bawombo bavuanga ko nkinza kukuwa mambu matedi Nzambi voti Kibibila. Batu va kizunga kiaku, bambanga bakubama muingi kukuwa zitsangu zimboti? Kheti batu ba tukuwa voti ndamba, Yave wuntomba tutatamana kusamuna nati naveka kala tuba ti thangu yifueni muingi tubika kubue samuna.

² Yave wumana tsikika kilumbu, kisalu ki kusamuna kiala mana. Mvandi wumana tsikika kilumbu ‘tsukulu nza ayiyi yala kuiza.’ (Matai 24:14, 36) Vayi ava kilumbu beni kituka, buidi tulenda monisina ti tuidi mu kutumukina lutumu lu ‘kukhambu bika mioko mitu kuvonga’? *—Tanga Mpovi 11:6.

3. Mbi tunkuiza tubila mu dilongi adidi?

³ Mu dilongi dibedi, tutubidi mambu matatu tufueti vanga, muingi tuba “minlobi mi batu” voti minsamuni mipisuka. (Matai 4:19) Mu dilongi adidi, tunkuiza tubila mambu matatu malenda tusadisa kukindisa phuil’itu yi kulonga, kheti bo tumviokila mu mambu mawombo maphasi. Mvandi tunkuiza longuka kibila mbi didi diambu dinkinza (1) kutula kisalu ki kusamuna va theti mu luzingu luitu, (2) kuba mvibudulu, ayi (3) kutatamana kukindisa kiminu kitu.

4. Kibila mbi tufueti tsikikila mayindu mitu mu kisalu Yave ka tuvana muingi kuvanga?

⁴ Yesu wukamba minlonguki miandi buidi batu bala bela mu  bilumbu bitsuka. Mvandi wuba kamba mambu mala monika mu bilumbu bitsuka, malenda kuba vanga kuvukumuka mu kuvanga kisalu ki kusamuna. Nandi wukindisa minlonguki miandi muingi ‘batatamana balubuka.’ (Matai 24:42) Mu bilumbu bi Nowa, vaba mambu mawombo mabe vukumunanga batu ayi kuba vanga babika vua nkinza zindumbu Nowa kabe longanga. Ayi mambu beni mvandi mammonikanga bubu. Befu kumanga ba keba keba mawu malenda ku tuvukumuna. (Matai 24:37-39; 2 Petelo 2:5) Diawu tufueti tsikika mayindu mitu mu kisalu Yave ka tuvana muingi kuvanga.

5. Dedi bummonisina Mavanga 1:6-8, nate kiteso mbi kisalu ki kusamuna kinkuiza vangimina?

⁵ Bubu befu tufueti luta vua nkinza kisalu ki kusamuna zitsangu zi Kintinu. Yesu wutuba ti minlandikini miandi bala tatamana kusamuna kheti bo nandi kala fua. (Yoane 14:12) Ayi kisalu bala vanga, kiala luta na kisalu nandi kavanga bo kaba va ntoto. Bo Yesu kafua, minlandikini miandi miwombo bavutuka mu kisalu kiawu ki kuloba. Vayi bo kavulubuka, nandi wuba kamba ti kisalu ki kulonga ayi kuvanga minlonguki, kiawu kilutidi nkinza. (Yoane 21:15-17) Ava Yesu kavutuka ku diyilu, nandi wukamba minlonguki miandi ti kisalu ki kusamuna zitsangu zi Kintinu, kiala vangama mu nza yimvimba. (Tanga Mavanga 1:6-8.) Mua mimvu kuntuala, Yesu wumonisa kimona meso kuidi mvuala Yoane mu matedi mambu mala monika mu “kilumbu ki mfumu.” * Mu kimona meso beni, mvuala Yoane wumona mbasi yiba samuna zitsangu zimboti kuidi ‘mimvila mioso, zimbembo zioso ayi makanda moso.’ (Nzaikusu 1:10; 14:6) Mawu ma tuvana bivisa ti Yave Nzambi wuntomba befu bubu, tukivana mu kisalu ki kusamuna nate naveka kala tuba tubika kubue samuna.

6. Mbi bilenda ku tusadisa tutatamana kukivana mu kisalu ki kusamuna?

⁶ Bo tunyindulanga phila Yave ka tusadisilanga mu kisalu ki kusamuna, mawu ma tuvanga  tuluta kukivana mu kisalu beni. Dedi, nandi widi mu kutuvana bidia bi kiphevi mu ziphila ziwombo. Mu nzila bilongulu, zivideo, zi audio ayi mambu mankaka tumbakilanga ndandu mu nzila internet. Yindula mu khond’itu mayo: Muawu muidi bilongulu ngie wulenda tangila kuvioka, 1.000 di zimbembo! (Matai 24:45-47) Kheti nza yidi luvasanu mu matedi politika, binganga, ayi lungoso, vayi kuvioka 8.000.000 di bisadi bi Nzambi badi kithuadi kikiedika mu nza yimvimba. Dedi, mu Kintanu kilumbu 19 Ngonda Yinna, 2019, Zimbangi zi Yave mu nza yimvimba bakutakana mu kithuadi, muingi kufiongunina matangu ma kilumbu. Va builu beni, babue kutakana 20.919.041 di batu mu mbambukulu moyo lufua lu Yesu. Mu thangu tunyindulanga mu luaku tuidi lu kubuela mioko mu mangitukulu amomo madi mu kumonika mu bilumbu bitu, ma tuvanga kuluta kukivana mu kisalu ki kusamuna zitsangu zi Kintinu.

7. Buidi kifuani ki Yesu kilenda tusadisila kubika vukumuka mu zithotolo?

⁷ Phila yinkaka tulenda buedila phuil’itu mu kisalu ki kusamuna, yidi mu kulandakana kifuani ki Yesu. Nandi kasa bika ko ni kiuma kimvuvisa mu kisalu kiandi ki kuvana kimbangi ki kiedika. (Yoane 18:37) Nandi kasa vukumuka ko mu thangu Satana kammonisina “bimfumu bioso bidi va nza ayi minkembo miawu.” Mvandi kasa vukumuka ko mu thangu bankaka baba tomba kumbieka ntinu. (Matai 4:8, 9; Yoane 6:15) Nandi kasa bika ko kimvuama ki nza ayiyi kimvukumuna, ayi kasa bika ko zithotolo zimvanga kabika kusadila Yave. (Luka 9:58; Yoane 8:59) Bo tumviokila mu zithotolo, buboti beni kutebukilanga moyo dilongi mvuala Polo kavana kuidi baklisto. Nandi wutuba muingi tulandakananga kifuani ki Yesu ‘ki kukhambu vonga mu kiphevi.’—Ebeleo 12:3.

8. Mbi binsundula kumonisa mvibudulu, ayi kibila mbi khadulu ayoyi yididi nkinza bubu?

⁸ Mvibudulu, yinsundula kutatamana wuvumbama nati mambu mambaluka. Boti tuidi mu kukuazuka mu kibila ki mambu maphasi tuidi mu kuviokila voti mambu mamboti tuidi mu kuvingila, tufueti monisa mvibudulu. Mbikudi Habakuki waba tomba beni buphunya bumana ku divula di Yuda. (Habakuki 1:2) Minlandikini mi Yesu, baba tomba Kintinu kiandi “kiza mu nsualu”, muingi kuba vukisa mu kivika baba mu luyalu lu basi Loma. (Luka 19:11) Tuidi mu kutedimina mu mvibudulu mu thangu Kintinu ki Nzambi kiala manisa mambi moso va ntoto ayi kutuala nza yala zingila batu basonga ayi bantumukinanga Nzambi. (2 Petelo 3:13) Diawu, tufueti monisa mvibudulu ayi kutedimina kilumbu naveka Yave katsikika. Tuemmona ziphila Yave ka tulongisilanga kumonisa mvibudulu.

9. Bifuani mbi bidi mu Kibibila bimmonisa mvibudulu yi Yave?

⁹ Yave widi kifuani kimboti mu matedi kumonisa mvibudulu. Nandi wuvana Nowa thangu yifuana muingi kutunga nzaza ayi “kulonga mambu masonga.” (2 Petelo 2:5; 1 Petelo 3:20) Yave mvandi wumonisa mvibudulu mu thangu Abalahami kabe kumvana biuvu biwombo mu matedi makani kabaka ma kutulula divula di Sodoma ayi Ngomola. (Ngenesi 18:20-33) Mu mvimvu miwombo basi Isaeli bamonisa kukhambu ku lukuikumunu kuidi Yave, vayi kheti bobo nandi wuba monisa mvibudulu. (Nehemia 9:30, 31) Ayi bubu, tummona bivisa bi mvibudulu yi Yave mu thangu kadi mu kuvana ‘baboso batomba kubalula mavanga mawu.’ (2 Petelo 3:9; Yoane 6:44; 1 Timoteo 2:3, 4) Kifuani ki Yave, ki tuvana kibila kimboti muingi kumonisa mvibudulu bo tuntatamana kusamuna ayi kulonga bankaka.  Nandi mvandi wu tulonganga mu phila yi kumonisina mvibudulu mu kusadila kifuani kidi mu Diambu diandi Kibibila.

10. Dedi bummonisina Yakobi 5:7, 8, mbi kifuani ki mvati ki tulonga?

¹⁰ Tanga Yakobi 5:7, 8. Kifuani ki mvati ki tulonga mambu mankinza mu matedi kumonisa mvibudulu. Bukiedika ti vadi mbongo yifika konzukanga ayi yifika butanga. Vayi mbongo yinkaka, yintombuluanga thangu yiwombo muingi yibuta. Mvati ku Isaeli waba vingilanga zingonda zisambanu muingi kuvela mbongo. Bawu baba kunanga bo zimvula zitheti zintona kunoka ayi baba velanga yawu va thonono yi kisivu. (Malako 4:28) Disi ko diambu diluelo kukuna khadulu yi mvibudulu, vayi tufueti vanga mangolo ma kulandakana kifuani ki mvati.

11. Buidi mvibudulu yilenda tusadisila mu kisalu ki kusamuna?

¹¹ Befu batu ba masumu, tuidi beni kifu ki kutomba fika monanga ndandu yi kisalu tube vanga. Vayi boti tuntomba mbongo tube kuna yimena ayi yibuta buboti, tufueti kieba yawu buboti—dedi kulembanga nlangu, kusakula ayi mankaka. Bobuawu mvandi kisalu ki kuvanga minlonguki, mangolo ayi thangu yiwombo kintombuluanga. Dedi, thangu ayi mangolo mantombulu muingi kusadisa nlonguki wu Kibibila kumanisa mabanza ma kithatu kadi mu ntima mu matedi batu ba mimvila ove zitsi zinkaka. Ayi tufueti ba mvibudulu muingi tubika vongila mu nzila boti nlonguki wukhidi monisa phuila yi kulonguka. Tuisintomba ko kutuba ti tufueti kuika nlonguki wu Kibibila kayonzuka mu kiphevi. Vayi tutidi kulandakana kifuani ki Yesu, wuvibidila mu kulonga minlandikini miandi kheti bo bamanga fika simbidila dilongi kaba vana. (Yoane 14:9) Mvandi tufueti tebukanga moyo ti, kheti tube vata ayi tube lembila nlangu buboti, Nzambi to nandi wunkonzulanga.—1 Kolinto 3:6.

12. Buidi tulenda monisina mvibudulu mu thangu tunlonga basi dikanda?

¹² Tufueti luta monisa mvibudulu mu thangu  tumvana kimbangi kuidi basi dikanda. Nsua wu Kibibila widi mu Mpovi 3:1, 7 wulenda tusadisa. Wawu wuntuba: “Vadi . . . thangu muingi kuvuena sui ayi thangu muingi kukoluka.” Bukiedika ti kukoluka yilenda ba phila yimboti yi kuba vanina kimbangi, vayi khumbu zinkaka tulenda vuena sui ayi kubika mavanga mitu mamboti maba longa. (1 Petelo 3:1, 2) Buboti kuba kifuza mu kisalu ki kusamuna ayi ki kulonga, vayi mvandi buboti beni kumonisanga mvibudulu kuidi batu boso, kubunda mvandi basi dikanda.

13-14. Mu matedi kumonisa mvibudulu, bifuani bi banani tulenda landakana?

¹³ Tulenda longuka kuba mvibudulu, mu kufiongunina bifuani bi bisadi bi Yave bikuikama Kibibila kantubila ayi bankaka banzingila mu thangu’itu. Habakuki wuba tomba beni kumona tsukulu yi mambu mambi, vayi nandi wumonisa mvibudulu bo katuba: ‘Yela tatamana kuba wutelama ayi kuvingila va kibanga kiami ki nsungi.’ (Habakuki 2:1) Mvuala Polo mvandi wutuba ti wuba tomba “kumanisa” kisalu kiandi ki kusamuna. Vayi mu mvibudulu, nandi wutatamana kusamuna zitsangu zimboti mu mangolo mandi moso.—Mavanga 20:24.

¹⁴ Yindula mvandi kifuani ki zikhomba azizi badi bakuela. Bo bamanisa kikola ki Ngiliadi, baba fila muingi basadila ku tsi yimueka yikhambu ba Zimbangi zi Yave ziwombo ayi kuidi beni binganga bikhambu kikininanga mu Yesu Klisto. Diawu baba muenanga phasi kudengana batu batidi kulonguka Kibibila. Angi zikhomba zinkaka baba yawu mu kikola ki Ngiliadi ayi bafila ku tsi yinkaka, baba kuba telanga ayi kuba zabikisa ti ku tsi bayenda, babasa monanga ko phasi kutona ndongukulu yi Kibibila na batu. Vayi kheti bobo, bawu basa vonga ko, angi bamonisa mvibudulu. Kisalu ki kusamuna malembi malembi kiba konzuka ku tsi beni. Vayi kheti bobo, bawu batatamana. Bo vavioka 8 di mimvu, bosi nlonguki’awu wumueka wu Kibibila wubaka makani ma kubotama ayi bawu bayangalala beni. Buabu, mbi bifuani abiobio bi tulonga? Tulenda longuka ti Yave wusakumuna mvibudulu’awu, kibila bawu basa monisa ko bolo ayi basa vongisa ko mioko miawu. Bukiedika, mawu ma tuvanga ‘kulandakana kifuani ki batu bavingila kiuka bavangila tsila mu kiminu ayi mu mvibudulu.’—Ebeleo 6:10-12.

15. Phila mbi yitheti kiminu ki tusadisilanga kukindisa lufiatu luitu?

¹⁵ Befu tuidi lufiatu mu zitsangu tunlonganga. Diawu befu tumvangilanga mangolo mitu moso muingi kulonga ziawu kuidi baboso. Befu tumfiatilanga mu zikhanu zidi mu Diambu di Nzambi. (Minkunga 119:42; Yesaya 40:8) Ayi tuidi mu kumona phila zikhanu zi Yave zidi mu kusalimina mu bilumbu bitu. Mvandi tuidi mu kumona phila malongi ma Kibibila mansadisilanga batu baluta ba nzingulu yimboti. Bivisa bioso abiobio, biawu binlutanga kutuvana lufiatu ti batu boso bantombila kukuwa zitsangu zimboti.

16. Dedi bummonisina Minkunga 46:1-3, buidi kiminu kitu mu Yave ayi Yesu kimbuelanga kutu kindisila muingi kulonga?

¹⁶ Mvandi tuidi kiminu mu Yave, Tho yi zitsangu befu tunsamunanga. Ayi tuidi kiminu mu Yesu, Ntinu naveka Yave kasola muingi kayadila Kintinu kiandi. (Yoane 14:1) Bosokua bubela mambu maphasi tumviokila, Yave wala tatamana kuba kisuamunu ayi mangolo mitu. (Tanga Minkunga 46:1-3.) Mvandi tuidi lufiatu ti Yesu ku diyilu, nandi widi mu kudiatisa kisalu ki kusamuna kidi mu kuvangama mu nza yimvimba, mu kusadila mangolo ayi lutumu katambula kuidi Yave.—Matai 28:18-20.

17. Vana kifuani kimmonisa kibila befu tufueti tatamana kusamuna.

 ¹⁷ Kiminu kitubuelanga lufiatu ti Yave wala sakumuna mangolo mitu mu phila tukhambu yindudilanga. (Mpovi 11:6) Dedi, tuzebi ti bivevi na bivevi bi batu bammonanga makalu mitu ma bilongulu. Vayi bukiedika kuandi ti phila ayoyi yi kusamunina yimboti? Ngete! Dedi mu (km yi Ngonda Kumi Yimueka, mvu 2014), yitubila muana nkieto wumueka wuba mu kikola kinangama, waba tomba kusonika mua buku yaba tubila mvandi matedi Zimbangi zi Yave. Nandi kasa bakula ko Nzo yi Kintinu yifikama, vayi kilumbu kinkaka wumona meza yi bilongulu bitu kuna khati kikola kaba longukilanga. Ayi nandi wubakula mvandi kilongulu kiba mambu kaba tomba kutubila mu mua buku beni kaba sonika. Kuntuala, nandi wuyiza ba Mbangi yi Yave, ayi bubu nandi widi ntuami ntuala. Mambu maphila ayoyi, mambuelanga ku tukindisa tutatamana kusamuna. Mvandi ma tumonisa ti vakhidi batu bawombo bantomba kukuwa zitsangu zi Kintinu.

18. Kibila mbi tuididi lufiatu ti kisalu ki kusamumuna kiala vangama nati mu kiteso Yave kantombila?

¹⁸ Befu tulenda ba lufiatu ti kisalu ki kusamuna zitsangu zi Kintinu kiala mana mu thangu yifuana. Yindulabu mambu mamonika mu bilumbu bi Nowa. 120 di mimvu ava mvula yitona kunoka, Yave wutsikikila kilumbu voti thangu kala tuala mbungulu. Nandi wumonisa ti wuzaba buboti thangu yifuana muingi kubunga mbandu yinani. Mimvu miwombo mivioka, bosi Yave kavana Nowa nsua voti kiyeku ki kutunga nzaza. Ayi ḿba Nowa wutatamana kusala kisalu akiokio kingolo mu 40 voti 50 di mimvu ava Khuka yi minlangu yitona. Vayi kheti batu basa kunkuwila ko, nandi wutatamana kusamuna tsangu yi lufundusu, nati mu kilumbu Yave kankamba kakotisa bibulu ayi dikanda diandi mu khati nzaza. Bosi mu thangu yifuana, naveka Yave wuzibika muelu wu nzaza.”—Ngenesi 6:3; 7:1, 2, 16.

19. Mbi tulenda vingila befu manga vundisa mioko mitu?

¹⁹ Thangu yikhufi yisiedi, Yave wala tuba ti kisalu ki kusamuna zitsangu zi Kintinu kimeni. Nandi wala ‘zibika muelu’ wu nza ayiyi yi Satana ayi wala tuala nza yimona yisonga. Bo tumvingila thangu beni, tulandakananu kifuani ki Nowa, Habakuki ayi bisadi binkaka bi Yave bakhambu vundisa mioko miawu. Diawu tatamana kusamuna, ba mvibudulu ayi ba kiminu kingolo mu Yave ayi mu zikhanu ziandi.