Matangu amomo mantuba: ‘Ngie kumona ti ku divula diaku, bantovula nsukami voti kiphumbulu ayi basinzitisa ko mambu masonga ayi mamboti, buna bika kukuituka. Kibila mutu widi kimfumu, widi na mutu wunkaka wunlutidi wu kunkengidila. Ayi vadi mvandi bankaka badi kimfumu kilutidi na kio badi.’—Mpovi 5:8.

Mu mayindu ma batu, matangu amomo mantubila zimfumu zi luyalu. Vayi mvandi, mawu ma tuzabikisa kiedika kinkinza ki tubomba ayi ki tuvana luvovomu mu matedi Yave.

Mpovi 5:8 yintubila mfumu yintovula biphumbulu ayi wukhambu kuba vangila mambu masonga. Vayi mfumu beni, kafueti tebukanga moyo ti vadi mfumu yinkaka yinlutidi widi mu kunkengidila. Ayi khumbu zinkaka valenda ba zimfumu zi balutidi. Vayi kheti bobo, kiadi ayi kiunda kuzaba ti, zimfumu ziwombo mu nza, bamvukumukanga mu mavanga mambi mantuadisanga ziphasi ziwombo kuidi batu banyala.

Kheti mu thangu tunyindula ti tusiedi ko kivuvu, tulenda baka mbombolo mu kuzaba ti Yave wummonanga mambu zimfumu zi luyalu bamvanganga. (Minkunga 55:22; Filipi 4:6, 7) Tuzebi ti ‘Meso ma Yave manzungidilanga ntoto woso, muingi kumonisa mangolo mandi kuidi batu badi mintima misulama mu nandi’.—2 Lusansu 16:9.

Tulenda tuba ti buku yi Mpovi 5:8, yi tutebula moyo ti, mu nza tuidi mu kuzingila, vadi batu balutidi bankaka mu kimfumu. Vayi mvandi, matangu amomo ma tusadisa kuvisa ti vasi ko mutu wulutidi Yave mu kimfumu. Nandi widi mu kuyala bubu, mu nzila Muan’andi Yesu Klisto, Ntinu wu Kintinu kiandi. Yave, Nzambi Nkua Ngolo Zioso, mu kuba Mutu wusonga nandi ayi Muan’andi badi mu kumona mambu moso zimfumu zi luyalu badi mu kuvanga.