DILONGI 39
NKUNGA 125 ‘Mayangi Kuidi bo Badi Kiadi’
Kukaba Kuntuadisanga Mayangi
“Kuvana kunluta tuadisanga mayangi kena kutambula.” —MAV. 20:35.
MAMBU TUANLONGUKA
Tuammona ziphila tulenda buedila mayangi mankuizilanga mu kukaba.
1-2. Buidi tulenda luta bakila mayangi?
BO YAVE kavanga batu, wuba vanga na luaku lu kubaka beni mayangi mankuizilanga mu kuvana kena kutambula. (Mav. 20:35) Mawu mansundula ti tubakanga ko mayangi bo mutu katuvana kiuma? Ndamba. Kibila befu tuzebi mayangi tumbanga bo tuntambula nkhailu wumboti. Vayi tunluta bakanga mayangi bo tunkabila bankaka. Bukiedika, phila Yave ka tuvangila yitutuadisanga beni mayangi. Buidi?
2 Bo Yave Nzambi katuvangila mu phila ayoyo, mayangi mitu mambuelamanga. Mvandi mayangi mitu manluta buelamanga mu kutomba ziphila zi kusadisila bankaka. Mayangi beni kuzaba phila ayoyo Yave katuvangila—Minku. 139:14.
3. Kibila mbi tulenda tubila ti Yave widi ‘Nzambi yi mayangi’?
3 Kibibila kintuba ti kukaba kuntuadisanga mayangi, diawu tulendi kuituka ko bo kiawu kintuba ti Yave widi ‘Nzambi yi mayangi.’ (1 Ti. 1:11) Yave nandi lutidi mu kukaba ayi vasi ko mutu wunkaka wunlutidi. Kibila mu kibila kiandi “befu tuididi monyo, tunyikukinanga ayi tunzingilanga.” (Mav. 17:28) Diawu, “Nkhailu woso wumboti ayi wuvedila” kuidi Yave wumfuminanga.—Tia. 1:17.
4. Mbi biala tusadisa kuluta baka mayangi?
4 Befu boso tuntomba kumona mayangi mankuizilanga mu kuvana. Kibila tuntomba kulandakana kifuani ki Yave ki kukaba. (Efe. 5:1) Mu dilongi adidi, tunkuiza longuka kifuani ki mutu wulutidi kukaba ayi buidi tumbelanga bo batu bankaka basi mvutula ko matondo mu mambu tuba vangila. Mambu amomo mankuiza tusadisa kutatamana kubuela mayangi mitu mankuizilanga mu kukaba.
LANDAKANA KIFUANI KI YAVE KI KUKABA
5. Biuma mbi Yave katuvananga?
5 Ziphila mbi Yave kammonisinanga ti widi nkua kukaba? Ndoko tumona mua bifuani. Yave wutuvananga biuma tuntomba. Kheti tuisi ko busina, vayi mu lusalusu lu Yave tumbakanga biuma bintombulu. Dedi, nandi wu tusadisanga kubaka bidia, bi kuvuata ayi vama va kukala. (Minku. 4:8; Mat. 6:31-33; 1 Ti. 6:6-8) Buabu, bukiedika ti Yave wundukisanga zitsatu zitu zi kinsunyi mu lukuiku? Ndamba! Buabu, kibila mbi Yave katuvangilanga mawu?
6. Mbi tulenda longuka mu Matai 6:25, 26?
6 Yave wundukisanga zitsatu zitu zi kinsunyi kibila wutu zolanga. Mona mambu Yesu katuba mu Matai 6:25, 26. (Tanga.) Yesu wusadila bifuani bi zinuni mu kutuba: “bawu bavatanga ko, bavelanga ko mbongo ayi balundanga ko yawu mu bilundulu.” Mona mambu manlanda nandi katuba: “Tat’inu ku diyilu wu zidikilanga.” Bosi Yesu wuba yuvula: “bukiedika ti zinuni zilutidi luvalu kena benu?” Mbi tulenda longuka? Yave wunluta vuanga nkiza bisadi biandi kena bibulu. Boti Yave wunkebanga zitsatu zi bibulu, tulenda ba lufiatu ti nandi mvandi wala tukeba! Dedi tata yi luzolo, Yave wunkebanga dikanda diandi mu luzolo.—Minku. 145:16; Mat. 6:32.
7. Phila mbi tulenda landikinina kifuani ki Yave ki kukaba? (Tala mvandi foto.)
7 Dedi Yave, befu mvitu tulenda kabila biuma kuidi bankaka mu kibila ki luzolo tuidi mu bawu. Dedi, Ngie zebi khomba wuntomba bikhutu voti bidia? Yave kalenda kusadila muingi wunsadisa. Dikabu di Yave badi bazakana mu kusadisa batu. Dedi mu thangu kivunga ki COVID-19, zikhomba basadisa batu mu kubakabila bidia, bikhutu ayi biuma binkaka biaba tombulu. Bawombo bamvananga zimbongo muingi kubuela mioko kisalu ki Yave kimvangama mu nza yimvimba. Ziawu zinsadisanga zikhomba mu nza yimvimba bo bammonikina kivuka. Zikhomba aziozio bansadilanga mambu madi mu Ebeleo 13:16: mantuba “bikanu kuzimbakana kuvangilanga bankaka mamboti, ayi kukabilanga bankaka biuma luidi, kibila minkhailu amiomio, minkuangidikanga Nzambi.”
Befu boso, tulenda nunga kulandakana kifuani ki kukaba ki Yave (Tala lutangu 7)
8. Buidi tumbakilanga ndandu mu mangolo ma Yave? (Filipi 2:13)
8 Yave wumvananga mangolo. Yave widi mayangi mu kuvana mangolo mandi makhambu sukanga kuidi bisadi biandi. (Tanga Filipi 2:13.) Ngie wumana sambila mu kudinda mangolo muingi kununga zithotolo voti kukindama mu ziphasi? Ḿba ngie mana sambila mu kudinda mangolo mu mambu wuntomba kuvanga mu kilumbu. Bo wumona mvutu wu nsambu’aku ngie wukikinina mambu Polo kasonika: “Minu yinkindamanga mu mambu moso, mu kibila ki mangolo Mfumu ka kuphananga.”—Fil. 4:13.
9. Buidi tulenda landikinina kifuani ki Yave mu kusadila mangolo mitu? (Tala mvandi foto.)
9 Befu tuisi ko mangolo makhambu sukanga dedi Yave ayi tulendi vana ko mawu kuidi bankaka. Vayi tulenda landakana kifuani ki Yave mu kusadila mangolo tuidi muingi kusadisa bankaka. Dedi, tulenda sadisa biboba voti zikhomba babela mu kuba sadisa mu bisalu bi nzo voti kue basumbila biuma. Boti tuidi luaku tulenda kukivana muingi kudiodisa Nzo yi Kintinu voti kubuongisa yawu. Kusadila mangolo mitu mu ziphila aziozio, malenda sadisa bankaka mu mbuongimini’awu kuidi Yave.
Tulenda sadila mangolo mitu muingi kusadisa bankaka (Tala lutangu 9)
10. Buidi tulenda sadila mambu tuntuba muingi kukindisa bankaka?
10 Bika kuzimbakana ti wulenda kindisa bankaka mu mambu wuntuba. Wulenda yindula banani wulenda kindisa mu kuba kamba ti wunzolanga mangolo bawu bamvanganga? Ngie zebi nani wuntomba mbombolo? Boti buawu, ngie wulenda zaba mbi wulenda vanga muingi kumonisa ti wuku mvuanga nkinza. Ngie wulenda kuentala, kuntela mu telefoni, kunsonikina nkanda voti kumfila mensagem. Bika kukuazuka mu mambu wulenda tuba. Mambu maluelu tuntubila mu ntima woso, malenda ba mawu khomba kantomba muingi katatamana wukuikama mu kilumbu kinkaka voti kumona buboti mu mambu kadi mukuviokila.—Zinga. 12:25; Efe. 4:29.
11. Buidi Yave kansadilanga ndueng’andi?
11 Yave wumvananga nduenga. Mvuala Tiagu wusonika: “Boti vadi mutu mu benu wukhambulu nduenga, buna bika katatamana kudinda yawu kuidi Nzambi, kibila nandi wumvananga yawu mu luzolo kuidi baboso mu khambu fundisa. Ayi nandi wala kumvana yawu.” (Tia. 1:5) Bikuma abiobio bimmonisa ti Yave wumvananga ndueng’andi kuidi batu. Mona ti, bo Yave kamvananga nduenga, nandi wumvangilanga mawu ‘mu khambu fundisa.’ Nandi katutadilanga ko mu phila yimbi bo tundindanga thuadusulu’andi. Bukiedika, nandi wuntomba muingi tuvanga mawu.—Zinga. 2:1-6.
12. Luaku mbi tuidi muingi tusadila ndueng’itu?
12 Abu befu? Tulenda landakana kifuani ki Yave mu phila tunsadila ndueng’itu? (Minku. 32:8) Dikabu di Yave badi luaku luwombu lu kuzabikisa mambu banlongukanga. Dedi, befu tunsadisanga minsamuni mimona mu kisalu ki kusamuna. Bakulutu ba kimvuka bansadisanga mu mvibudulu minsadisi miawu. Zikhomba zibotama, banlongukanga buidi balenda kebila biyeku biawu mu kimvuka. Ayi zikhomba bazebi bisalu bi kutunga, bansadisanga kukubika bankaka mu bisalu bi kutunga bi kimvuka.
13. Buidi tulenda landikinina kifuani ki Yave bo tunsadila nduenga’itu muingi kusadisa bankaka?
13 Landakana kifuani ki Yave bo wunkubika bankaka. Tebuka moyo ti Yave wumvananga ndueng’andi. Bobuawu mvandi, befu tunlonganga mambu tuzebi kuidi bankaka. Tubika kusueka mambu tuzebi mu kuba boma ti mutu tunlongisa kalenda tuvinginina. Voti kuyindula ti: ‘minu basa kukhubika ko! Bika kalonguka naveka.’ Mayindu amomo masi ko va kati dikabu di Yave. Befu tumbanga mu mayangi ‘muingi kuzabikisa’ mamoso tuzebi ayi kuvanga momoso tulenda nunga muingi ku kubika bankaka. (1 Te. 2:8) Diawu befu tuntomba, ‘bawu baba bakubama muingi kulonga mawu kuidi bankaka.’ (2 Ti. 2:1, 2) Befu kusadila mambu tuzebi kuvanga muingi kusadisa bankaka, tuala ba mu mayangi.
BO BATU BAKHAMBU TONDA
14. Mbi nduka batu boso bamvanganga bo tuku bakabila biuma?
14 Bo tummonisa khadulu yi kukaba, bulutidi kuidi zikhomba zitu, bawu batuvutudilanga matondo. Bawu balenda vangila mawu mu kutusonikina nkanda voti mu phila yinkaka. (Kolo. 3:15) Kumona phila bawu ba tutondilanga, mawu mambuelanga mayangi mitu.
15. Mbi tufueti tebukanga moyo boti bankaka basi tutonda ko?
15 Batu bankaka, bavuanga ko nkinza ayi bavutulanga ko matondo. Khumbu zinkaka tulenda sadila thangu’itu, mangolo mitu voti biuma tuidi ayi kukikuvusa boti mutu tumvangila mawu wunkuiza mavua nkinza. Ma kumonika, buidi tulenda tatiminina mu mayangi ayi kubika ba mu kiunda? Tebuka moyo matangu mabongulu ntu dilongi, Mavanga 20:35. Mayangi mitu mayizilanga ko boti batu basi tutonda ko. Befu tulenda tatamana kuvana mu mayangi kheti bankaka basi tutonda ko. Buidi? Mona mua ziphila.
16. Mu mbi tufueti sikika thalu bo tunkaba?
16 Sikika thalu mu kulandakana kifuani ki Yave. Nandi wumvananga biuma bimboti kuidi batu kheti ba kuntonda voti ndamba. (Mat. 5:43-48) Yave wunkanikisa ti befu kukabila batu ‘mu khambu vingila batuvutudila,’ ‘mfutu’itu wala ba wunneni.’ (Luk. 6:35) Diawu bika kuba mu kiunda boti khumbu zinkaka basi kutonda ko. Tebuka moyo ti Yave wala kusakumuna mu mamboti wumvanganga muingi kusadisa bankaka, kibila ngie wumvananga mu mayangi.—Zinga. 19:17; 2 Ko. 9:7.
17. Kibila mbi kilutidi nkinza tufueti kabilanga? (Luka 14:12-14)
17 Diambu dinkaka tufueti vanga muingi kulandakana kifuani ki Yave bo tunkaba, didi mu kusadila mambu Yesu katuba madi mu Luka 14:12-14. (Tanga.) Disi ko diambu dimbi kuyamba voti kukabila batu balenda ku tukabila. Buabu, mbi tufueti vanga befu kuvisa ti khumbu zinkaka tunkabilanga bankaka muingi kuvingila batuvangila momawu? Didi diambu dimboti kusadila mambu Yesu katuba. Tulenda monisa khadulu yi kuyamba, kuidi mutu no tuzabizi ti kalendi nunga ko ku tuvutudila mamboti beni. Diawu tuala ba mu mayangi kibila tunlandakana kifuani ki Yave. Ayi boti tuisi mvingila ko batuvutudila, tuala tatamana kuba mu mayangi befu kukabila bankaka kheti bawu basintonda ko.
18. Mbi bilenda ku tusadisa kusadisa bankaka?
18 Bika kuba mayindu makhambu fuana mu bankaka. (1 Ko. 13:7) Boti bankaka basi mvutula ko matondo, befu tulenda kuyikuvusa: ‘Bukiedika ti bawu bavutulanga ko matondo voti bazimbakana kuvanga mawu?’ Ḿba vadi bibila bawu bakhambu vangila mawu mu phila tuaba tombila. Bankaka balenda vutula matondo mu ntima vayi bammonanga phasi kutuba mawu vamunu. Bawu balenda mona zitsoni kutambula lusadusu, bulutidi boti bawu basadisa bankaka kumbusa. Boso kuandi bubela, luzolo tuidi mu zikhomba luala tusadisa muingi kuba sadisa ayi kumona mayangi mankuizilanga mu kuvana.—Efe. 4:2.
19-20. Kibila mbi mvibudulu wididi nkinza bo tunkabila bankaka? (Tala mvandi foto.)
19 Ba mvibudulu. Mu matedi kukaba, ntinu Salomo mutu wunduenga wusonika: ‘Kuba dipha diaku mu nlangu, kibila va kuvioka mua bilumbu ngie wala bue dimona.’ (Mpovi 11:1) Mambu amomo mammonisa ti mutu kalenda vutula matondo bumviokila thangu. Tala kifuani kimmonisa mawu.
20 Mimvu miwombo kumbusa, nkazi nkengididi wu bimvuka wusonikina nkanda kuidi khomba mueka wuba nsamuni wubotama wumona, muingi katatamana mu kiedika. Bo vavioka nana di mimvu, khomba beni wuvana mvutu mu kusonika: “Minu yimona nkinza wukukusonikina nkanda awuwu mu lusadusu ngie wukuphananga mu mimvu mioso amimi kheti ngie sazaba ko mawu.” Nandi wutatamana: “[nkanda ngie wufila] wunyikuna mabanza mama ayi yizimbakananga ko mawu.” a Nandi wusudikisa mambu maphasi kaba viokila, mu mimvu mioso amiomio: “Khumbu zinkaka yaba monanga phuila yi kubika vanga ni diambu kubuda nvandi kubika sadila Yave—vayi nkanda wutsonikina wunyikuna ntimama ayi matsadisa kutatamana. . . Mu mimvu mioso amiomio vasi ko diambu dinkaka dikhindisa kena nkanda wutsonikina.” Wulenda yindula mayangi nkietu nkengididi wu bimvuka kaba bo katambula nkanda awowo kheti vavioka mimvu miwombo! Befu mvitu balenda tutonda mu mambu mamboti tuvangila bankaka kheti vamvioka thangu yiwombo.
Balenda tuvutudila matondo kheti vamvioka thangu yiwombu (Tala lutangu 20) b
21. Kibila mbi tufueti bakila makani ma kutatamana kulandakana kifuani ki Yave ki kukaba?
21 Dedi bo tuma tubila, Yave wu tuvanga na khadulu yinkinza. Kheti kutambula kuntuadisanga mayangi, befu tunluta bakanga mayangi bo tunkabila bankaka. Tumbanga beni mu mayangi bo tumbaka luaku lu kusadisa zikhomba zitu. Ayi tunkuangalalanga bo bawu bamvutula matondo. Bukiedika, kuba kuandi ba tutonda voti ndamba, befu tumbanga mu mayangi mu kuzaba ti tuvanga diambu dimboti. Bika kuzimbakana ti boso kua bubela biuma mavana, ‘Yave wala kuvana bilutidi.’ (2 Lusa. 25:9) Befu tulendi kaba ko dedi bo Yave kankabilanga! Ayi bo Yave ka kutusakumuna luawu lusakumunu lulutidi. Diawu, bika tubaka makani ma kutatamana kulandakana kifuani ki Tat’itu yi diyilu.
NKUNGA 17 ‘Yitidi’
b MAMBU MADI MU FOTO VA: Mu foto ayoyo, tummona nkanzi nkengididi wu bimvuka wunsonika nkanda wu khindusulu. Bosi bo vavioka mimvu miwombu, nandi wutambula nkanda wo bamvutudila matondo.
