DILONGI 37
NKUNGA 118 ‘Yave Wutubuela Kiminu’
Nkanda Wulenda Tusadisa Kutatamana Kukuikama Nati Kutsuka
‘Tufueti tatamana kuba lufiatu lo tuba tona vana thonono.’ —EBE. 3:14.
MAMBU TUANLONGUKA
Kulonguka malongi mankinza madi mu nkanda bafila kuidi basi Ebeleo, kunkuiza tusadisa kutatamana bakuikama nati kutsuka nza ayiyi.
1-2. (a) Mambu mbi Baklistu ku Yuda baba viokila bo Polo kaba sonikina nkanda? (b) Buidi nkanda awowo wubela wufuana?
BAKLISTU basi Ebeleo baba zingilanga ku Yelusalemi ayi ku Yuda, baviokila mu mambu mawombu maphasi mu mimvu milanda tona Yesu kafua. Vasa vioka ko beni thangu bo bazibula kimvuka ki Baklistu, bawu batona kuviokila mu zikhuamusu zingolo. (Mav. 8:1) Bo vavioka 20 di mimvu, bawu batovuka beni mu nzala ayi buphumbulu. (Mav. 11:27-30) Vayi nduka mu mvu 61 T.K., Baklistu bayiza ba mu mua ndembama mu kutadila zikhuamusu bayiza viokila kuntuala. Mu thangu beni, bawu batambula nkanda wufumina kuidi mvuala Polo—ayi wawu wuvitila mu thangu yifuana.
2 Nkanda bafila kuidi basi Ebeleo wuvitika mu thangu yifuana kibila ndebama baba yiba to yi mua thangu. Polo wuvana malongi mafuana kuidi Baklistu, maba sadisa kukindama mu mambu maphasi baba belama kuviokila. Lutululu lu Yuda Yesu katubila, luaba fikama. (Luk. 21:20) Polo ayi Baklistu basa zaba ko thangu mbi lutululu alolo luala monikina. Diawu vaba tombulu Baklistu abobo kusadila buboti thangu muingui kukuna zikhadulu dedi kiminu ayi lukuikumunu.—Ebe. 10:25; 12:1, 2.
3. Kibila mbi buku yi Ebeleo yididi nkinza kuidi Baklistu bubu?
3 Befu mvintu tuambelama kuviokila mu ziphasi zingolo, dedi zio Baklistu basi Ebeleo baviokila. (Mat. 24:21; Nzai. 16:14, 16) Diawu, tuammona malongi mankinza Yave kavana Baklistu abobo, malenda tusadisa mvintu.
“YONZUKA MU KIPHEVI”
4. Mambu mbi maphasi Baklistu basi Yuda baviokila? (Tala mvandi fikula)
4 Basi Yuda bayiza ba Baklistu, baviokila mu bikaku biwombu. Bawu baba dikabu Yave kasola. Mu mimvu miwombo Yelusalemi yiba kibuamgu kinkinza. Kuawu kuaba zingilanga ntinu waba yadilanga dikabu di Yave vamvingi’andi ayi batu baba buongimina Yave baba vangilanga mawu ku tempelo yiba ku Yelusalemi. Basi Yuda boso bakuikama baba landakananga nsiku wu Mose baba sudikisanga kuidi zifumu zi zinganga Nzambi. Malongi amomo mawu maba kuba tuadisanga matedi ntindu bidia bafueti dia, kuzengusu nyitu yi kibakala ayi phila bafueti zingila na batu bakambu ba basi Yuda. Diawu disa ba ko diambu diluelu kuidi basi Yuda bayiza ba Baklistu, kubalula phila yi kubuongimina. (Ebe. 10:1, 4, 10) Ayi kheti Baklistu bayonzuka mu kiphevi dedi mvuala Petelo, waba tombulu kukolama mu mambu mabaluka. (Mav. 10:9-14; Nga. 2:11-14) Mu kibila ki mambu amomo mabaluka, Baklistu bayiza viokila mu zikhuamusu kuidi zifumu zi zinganga Nzambi.
Baklistu baba tombulu kuba bakuikama mu kiedika ayi kumanga kikinina malongi ma luvunu ma basi Yuda baba zimbeni ziawu (Tala lutangu 4-5)
5. Mambu mbi Baklistu bakiedika baba viokila?
5 Mambu muadi maba kuamisa Baklistu ku Yuda. Ditheti; zifumu zi zinganga Nzambi zi basi Yuda baba kuba tadilanga dedi batu babalukila kinganga. Dimuadi; bankaka mu kimvuka baba kuba kambanga ti bafueti tatamana kulandakana nsiku wu Mose, ḿba muingi babika kuviokila mu zikhuamusu. (Nga. 6:12) Lusalusu mbi Baklistu baba tomba muingi batatamana mu kiedika?
6. Mbi Polo kakindisa Bakilstu bavanga? (Ebeleo 5:14–6:1)
6 Nkanda Polo kasonikina Baklistu basi Ebeleo, nandi wuba kindisa muingi balonguka buboti diambu di Nzambi. (Tanga Ebeleo 5:14–6:1.) Polo wutubila masonoko ma Kiebeleo ayi wusudikisa ti, phila Bakilstu baba buongimina Yave yiluta kena phila basi Yuda baba kumbuongimina. a Polo wuzaba ti kubuela nzailu ayi phisulu yikiedika, malenda sadisa Baklistu kubakula malongi ma luvunu ayi kubika kuvukumuka.
7. Mambu mbi maphasi tumviokilanga bubu?
7 Dedi Baklistu basi Ebeleo, befu mvitu tunkuwanga malongi maluvunu makhambulu nguizani na zithuadusulu zisonga zi Yave. Zimbeni zitu bantubanga ti befu tuidi batu bambi mu kutubila bubi malongi mabongulu mu Kibibila tunkikininanga matedi phila tunnatinanga luzingu. Phil’awu yi kuyindudila, yidi disusana na phila yisonga yikuyindudila yi Nzambi. (Zinga. 17:15) Diawu, tufueti kindisa kiminu kitu muingi kubakula ayi kubika kikinina malongi zimbeni zitu bansadilanga muingi kumeka kutuvongisa voti kutuvukumuna.—Ebe. 13:9.
8. Mbi tufueti vanga muingi tuyonzuka mu kiphevi?
8 Polo wukamba basi Ebeleo muingi batatamana kukonzuka mu kiphevi ayi mawu mvitu tufueti vanga. Mawu mansundula, kuba nzailu yiwombo yikiedika ayi kuyindudila mu phila Yave kanyindudilanga. Tufueti tatamana kuvanga mawu kheti tumana kukivana kuidi Yave ayi tubotama. Boso kua bubela thangu tueka mu kisalu ki Yave, befu boso tufueti tanganga Kibibila kadika kilumbu ayi kulongukanga kiawu. (Minku. 1:2) Thuadusulu yimboti yindongukulu yi Kibibila, yala tusadisa kukindisa khadulu Polo kaluta tubila beni mu nkanda kasonikina basi Ebeleo: Kiminu.—Ebe. 11:1, 6.
‘KIMINU MUINGI KUTAMBULA LUZINGU’
9. Kibila mbi vaba tombulu basi Ebeleo baba kiminu kingolo?
9 Baklistu basi Ebeleo, baba tombulu kuba kiminu kingolo muingi bakindama mu ziphasi zingolo basi Yuda baba belama kumonikina. (Ebe. 10:37-39) Yesu wulubula minlandikini miandi ti bakumona masodi ma zimbeni bama zungidila Yelusalemi, buna bafueti tina ku miongu. Vaba tombulu Bakilstu boso basadila dilongi di Yesu, kuba kuandi bo baba zingilanga ku divula voti mu mala. (Luk. 21:20-24) Mu thangu yikhulu, bo batu baba monanga masodi mankuiza banuanisa, bawu baba tinanga mu mavula maba bibaka bineni dedi Yelusalemi. Diawu, ndubu yi kutina mu miongu yaba monikina buka ti yisa ba ko tsundu ayi vaba tombulu kiminu kingolo muingi kuvanga mawu.
10. Mbi kiminu kingolo kisadisa Baklistu kuvanga? (Ebeleo 13:17)
10 Vaba tombulu Baklistu basi Ebeleu bafiatila batu Yesu kaba sadila muingi kutuadisa kimvuka. Ḿba vaba tombulu batu baba tuama ntuala kuvana zithuadusulu muingi kusadisa baboso mu bimvuka kulandakana thuadusulu yi Yesu mu thangu yifuana ayi mu phila yi fuana. (Tanga Ebeleo 13:17.) Kikuma ki Kingeleko basadila mu Ebeleo 13:17 muingi kutubila “kutumukina” kinsundula ti mutu wuntumukina, wumfiatilanga mu mutu wukumvana thuadusulu ayi nandi kasintumukina ko to kibila mutu beni nandi widi kiyeku kikumvana zithuadusulu. Diawu vaba tombulu Baklistu basi Ebeleo kukindisa lufiatu luawu mu zikhomba baba tuama ntuala ava ziphasi zingolo zitona. Boti mu thangu yindembama Baklistu baba kifu ki kutumukinanga Baklistu baba tuama ntuala, buna disa ba ko diambu diphasi kuvanga mawu mu thangu ziphasi.
11. Kibila mbi kuba kiminu kingolo didi diambu dinkinza kuidi Baklistu bubu?
11 Bubu mvandi vantombulu tuba kiminu dedi ki Baklistu basi Ebeleo Polo kasonikina nkanda. Tuidi mu kuzingila mu thangu nduka batu boso bammanganga ayi bamvuezanga ndubu yi Kibibila matedi tsukulu yi nza. (2 Pet. 3:3, 4) Mvandi kheti Kibibila kintubila mua mambu mala monika mu ziphasi zingolo, vadi mawombu tukhambu zaba. Diawu vantombulu tuba kiminu kingolo ti tsukulu nza ayiyi yala kuiza mu thangu yifuana ayi Yave wala tukieba.—Haba. 2:3.
12. Mbi biala tusadisa muingi tuvuka mu thangu ziphasi zingolo?
12 Vantombuluanga mvandi kuba lufiatu kuidi “kisadi ki kuikama ayi ki nduenga” batu Yave kansadilanga bubu muingi kututuadisa. (Mat. 24:45) Bo ziphasi zingolo ziala tona, ḿba tuala tambula zithuadusulu zifuana ziala vukisa luzingu dedi zio Baklistu basi Ebeleo batambula bo masodi mazungidila Yeluzalemi. Ayiyi yawu thangu tufueti kindisa lufiatu luitu ayi kufiatila batu Yave kansadila, muingi kutuadisa kimvuka kiandi. Tulendi vingila ko kutumukina zithuadusulu ziawu mu lufiatu mu thangu ziphasi zingolo ziala tona, boti tuvanganga ko mawu bubu.
13. Kibila mbi dilongi didi mu Ebeleo 13:5 dibela difuana?
13 Bo baba vingila kidimbu kumonika muingi batina, vaba tombulu Baklistu basi Ebeleo batatamana kunata luzingu lu khambulu kikhafi ayi kubika ba “luzolo mu zimbongu.” (Tanga Ebeleo 13:5.) Bankaka mu bawu baviokila mu mambu ma nzala ayi ma kukambu ku zimbongu. (Ebe. 10:32-34) Kheti baba bakubama muingi kununga zikhuamusu mu kibila ki zitsangu zimboti, ḿba bankaka batona kukivana beni muingi kubaka zimbongu ziwombu muingi babaka lukiebo mu thangu ziphasi. (Tia. 5:3) Diawu boti baba luzolo mu biuma bi nza, khanu bamona phasi kutina ayi kubika biuma biawu bioso.
14. Buidi kiminu kitu kilenda tuadisila makani tumbaka mu matedi biuma bi nza ayiyi?
14 Befu tuala manga kuzola biuma bi nza ayiyi, befu kuba kiminu kingolo. Tsukulu nza ayiyi yima fikama, mu kibila akiokio batu ‘bala loza palat’awu mu nzila’ kibila bawu bala zaba ti ‘Ne palat’awu voti wol’awu yala kuba vukisa mu kilumbu ki nganzi yi Yave’. (Yehe. 7:19) Diawu, tulendi kukivana ko muingi kukona zimbongu ziwombo vayi tufueti baka makani mala tusadisa kunata luzingu lu khambu kikhafi luala tusadisa befu ayi dikanda ditu kusadila Yave. Tufueti ba keba keba muingi tubika kota mu zipholo mu khambu kibila voti kusadila thangu yiwombu muingi tubaka ayi kukieba biuma tuidi. Mvandi tufueti ba keba keba muingi tubika zola beni biuma tuidi. (Mat. 6:19, 24) Bo tukue fikamanga ku tsuka nza ayiyi, kiminu kitu kilenda toto mu mambu matedi biuma bi nza voti mu mambu mankaka.
“BENU LUFUETI TATAMANA KUKINDAMA”
15. Kibila mbi vaba tombolu Baklistu basi Ebeleo kukindama?
15 Vaba tombulu Baklistu ku Yuda kukindama mu kisalu kiawu kuidi Yave kibila baba belama kumonikina mambu maphasi. (Ebe. 10:36) Kheti bawombu mu bawu baviokila mu zikhuamusu vayi bankaka bakikinina kiedika mu thangu yi mua ndembama. Polo wutuba ti kheti bawu bakindama mu zikhuamusu vayi bawu basa tovuka ko dedi Yesu, kibila nandi wuviokila mu mambu mannata nati ku lufua. (Ebe. 12:4) Bawombu mu basi Yuda bayiza ba beni nganzi ayi bamonisa buphunya kibila bankaka mu basi Yuda basola kuawu kuba baklistu. Mua mimvu kunbusa, bo Polo kavitila ku Yelusalemi dingumba dimueka di basi Yuda baba tomba kumvanga phasi. Kuvioka 40 di basi Yuda “babaka makani ayi bavanga tsila yi kubika nua ni kudia nati bankuiza nunga kuvonda Polo.” (Mav. 22:22; 23:12-14) Kheti mu mambu amomo ma phasi, vaba tombulu Baklistu bakutakana muingi kubuongimina Yave, kusamuna zisangu zimboti ayi kutatamana kukindisa kiminu kiawu.
16. Buidi nkanda Polo kasonikina basi Ebeleo wulenda tusadisila kutadila zithotolo mu phila yifuana? (Ebeleo 12:7)
16 Mbi bisadisa Baklistu basi Ebeleo kukindama mu zikhuamusu baba viokila? Polo wuzaba ti vaba tombulu bawu batadila mambu maphasi baba viokila mu phila yifuana. Nandi wusudikisa ti Nzambi kalenda bika bisadi biandi baviokila mu zithotolo muingi baluta ba baklistu bakubama. (Tanga Ebeleo 12:7) Khubumunu ayoyo yilenda sadisa kisadi ki Yave kukuna zikhadulu zimona ayi kukindisa zikhadulu zio kadi. Kusikika thalu mu ndandu yinkuizilanga mu zithotolo, kusadisa Baklistu basi Ebeleo kubika mona phasi kukindama.—Ebe. 12:11.
17. Mambu mbi Polo kazaba matedi kukindama mu zikhuamusu?
17 Mvuala Polo wukindisa Baklistu basi Ebeleo bakindama mu zikhuamusu. Nandi wuvana malongi mamboti matedi buidi bu kutatiminina kukindama mu zikhuamusu. Mu kuzaba ti nandi mvandi wuba nyamisi wu Baklistu, nandi wuvisa mambu Baklistu baba viokila. Mvandi wuzaba buidi bu kukindimina mu zikhuamusu kibila mvandi wuviokila mu zikhuamusu bo kayiza ba nlandikini wu Yesu. (2 Ko. 11:23-25) Polo wuzaba mambu mantombulu muingi kukindama. Nandi wutebula moyo Baklistu abobo bakindama mu zikhuamusu ayi kufiatila Yave, kubika kuandi mu mangolo mawu veka. Diawu Polo katubila mu lufiatu “Yave nandi nsandisi’ama, yilendi mona ko boma.”—Ebe. 13:6.
18. Buidi kuzaba mambu mankuiza kuntuala malenda tusadisila kukindama mu zikhuamusu?
18 Bubu zikhomba zitu ziwombo badi mu kukindama mu zikhuamusu. Phila yimueka tulenda monisina luzolo kuidi bawu yidi mu kuba natanga mu minsambu ayi kuba vana lusadusu luntombulu. (Ebe. 10:33) Kibibila kintuba ti “baboso bantomba kusadila Nzambi, mu kithuadi na Yesu Klistu, mvandi bala viokila mu ziphasi.” (2 Ti. 3:12) Mu kibila akiokio vantombulu befu boso kukubama mu mambu mankuiza kuntuala. Diawu, bika tutatamana kufiatila mu Yave ti nandi wala tusadisa kukindama mu dioso kuandi diambu diphasi diala tukuizila. Ayi mu thangu yifuana nandi wala tuala luvovomo kuidi bisadi biandi bikuikama.—2 Te. 1:7, 8.
19. Mambu mbi tulenda vanga malenda tusadisa kukubama mu ziphasi zingolo? (Tala mvandi fikula?)
19 Tulenda tuba mu lufiatu ti nkanda Polo kasonikina basi Ebeleo wusadisa Baklistu mu sekulu yitheti kukubama mu ziphasi zingolo ziaba belama kumonika. Polo wukindisa zikhomba muingi baba nzayilu yiphinda ayi kuvisa diambu di Nzambi. Kuvanga mambu amomo kuba sadisa kuba bakubama muingi kubakula ayi kumanga malongi malenda tula kiminu kiawu va kingiela. Nandi wuba kindisa, bakindisa kiminu kiawu muingi baba bakubama mu kulandakana thuadusulu yi Yesu ayi batu baba tuama ntuala mu kimvuka. Ayi nandi wusadisa Baklistu batatamana kukindama mu kutadila zikhuamusu mu phila yifuana ayi kutadila ziawu dedi khubumunu yi Tat’awu yi luzolo. Vantombulu befu mvitu kusadila malongi amomo. Kuvanga mawu kuala tukubika nati kutsuka.—Ebe. 3:14.
Baklistu bakuikama babaka lusakumunu mu kibila ki lukuikumunu luawu. Bo batina ku Yuda bawu batatamana kukutakananga va kimueka. Mbi tulenda longuka mu mawu? (Tala lutangu 19)
NKUNGA 126 Kotuka ayi Kala Kibakala
a Mu kapu yitheti, mvuala Polo wutubila tsambuadi di bibuku bi matangu ma Kiebeleo muingi kumonisa bivisa ti phila yi kubuongimina yi Baklistu yiluta kena phila basi Yuda baba buongiminanga.—Ebe. 1:5-13.
