DILONGI 36
NKUNGA 89 Yuwa, Tumamana, ayi Baka Lusakumunu
“Sadilanu Mambu Lunkuwa”
“Lubika ba batu bankuwanga to, vayi sadilanu mambu lunkuwa.”—TIA. 1:22.
MAMBU TUANLONGUKA
Dilongi adidi, dinkuiza tusadisa kubika to kutanga diambu di Nzambi vayi kuyindula ayi kusadila mawu mu luzingu luitu.
1-2. Mbi bimvanganga bisadi bi Yave kuba mayangi? (Tiagu 1:22-25)
Yave ayi Muan’andi bantomba tuba mu mayangi. Nsoniki wu Minkunga 119:2 wutuba: ‘Mayangi kuidi bo bantumukinanga zithuadusulu ziaku ayi ba kutombanga mu ntima woso.’ Yesu wutuba: “Mayangi kuidi bo bankuwa diambu di Nzambi ayi bansadila diawu!”—Luk. 11:28.
2 Bisadi bi Yave, badi batu ba mayangi. Kibila mbi? Tuidi bibila biwombo, vayi kibila kilutidi kidi mu kutanganga diambu di Nzambi ayi kusadila mambu tuntanga.—Tanga Tiagu 1:22-25.
3. Buidi tulenda bakila ndandu bo tunsadila mambu tuntanga mu diamblu di Nzambi?
3 Vadi ziphila ziwombo tulenda bakila ndandu bo “tunsadila mambu tunkuwa.” Dedi, bo tunsadila mambu tuntanga mu diambu di Nzambi, befu tunkuangidikanga Yave ayi tumbanga mu mayangi. (Mpovi 12:13) Mvandi kusadila mambu amomo mantuadisanga ndandu va dikanda ditu ayi ma tusadisanga kuba kikundi kimboti na zikhomba mu kimvuka. Tuidi lufiatu ti ngie wunkikininanga mu mambu amomo ayi mvandi ma tusadisanga kubika viokila mu mambu mawombo maphasi mammonikinanga batu bakhambu landakananga minsua mi Yave. Mawu madi makiedika dedi bummonisina mambu David katuba mu nkunga matedi nsiku, minsua ayi zifundusu zi Yave, nandi wumanisa mu kutuba: ‘Vadi ndandu yiwombo mu kulandakana ziawu.’—Minku. 19:7-11.
4. Kibila mbi tulenda tubila ti disi ko diambu diluelu kusadila mambu tuntanga mu Kibibila?
4 Tulenda tuba ti disi ko diambu diluelu, kutanganga Kibibila ayi kusadila mambu tuntanga. Ayi kheti tuidi mambu mawombu ma kuvanga mu luzingu, vantombuluanga kubotula thangu muingi kutanga ayi kulonguka Kibibila muingi tuvisa mbi Yave kantomba tuvanga. Tuemmona mambu malenda ku tusadisa ku tanganga Kibibila kadika kilumbu. Mvandi tunkuiza tubila mambu malenda tusadisa kuyindula mu mambu tuntanga ayi kumona ziphila tulenda sadila mawu mu luzingu luitu.
BOTULANGA THANGU MUINGI WUTANGANGA DIAMBU DI NZAMBI
5. Mambu mbi mantombuluanga beni thangu?
5 Nduka bisadi bioso bi Yave badi mambu mawombo mankinza ma kuvanga. Dedi bawombo mu bawu bansalanga muingi kuyizingisa ayi kukeba makanda mawu. (1 Ti. 5:8) Bankaka, bankebanga zimbevu voti biboba ayi bulutidi vantombuluanga thangu muingi tukeba buvinya buitu. Kubotula kuandi mambu amomo, mvandi tuidi mawombo ma kuvanga mu kimvuka. Ayi mu mambu moso tuidi ma kuvanga, kusamuna zitsangu zimboti diawu diambu dilutidi nkinza. Mu kutadila mambu moso amomo widi ma kuvanga, buidi wulenda bakila thangu muingi kutanga Kibibila, kuyindula ayi kusadila mambu beni?
6. Buidi wulenda tudila matangu ma Kibibila va theti? (Tala mvandi foto.)
6 Kutanga Kibibila didi dimueka mu “mambu malutidi nkiza” kuidi Baklistu. Diawu tufueti tula mawu va theti mu luzingu luitu. (Fil. 1:10) Kapu yitheti yi minkunga yintubila matedi dibakala di mayangi. Yawu yintuba: ‘Nandi wunkuangalalanga mu nsiku wu Yave ayi wuntanganga nsiku’andi mu mbembu yivumbama builu ayi muinya.’ (Minku. 1:1, 2) Bukiedika, vantombuluanga kubotula thangu muingi kutanga Kibibila. Vayi thangu mbi yidi yifuana muingi kutanga Kibibila? Kadika mutu mu befu kalenda sola thangu yifuana mu nandi, yilenda kunsadisa kutanga Kibibila kadika kilumbu. Khomba mueka bantedilanga Victor wutuba: “Minu yinzolanga kutanga Kibibila yimeni kheti yimmonanga phasi kukotuka, vayi ayoyo yawu thangu yikhambu monanga mambu ma kuphuvula.” Abu ngiewu, bukiedika ti yawu thangu mvaku wunzolanga kutanga Kibibila? Ḿba wulenda kuyikuvusa, thangu mbi yidi yifuana muingi yitanga Kibibila?’
Thangu mbi yidi yifuana muingi kutanga Kibibila? Thangu mbi wulenda tona kuvanganga mawu? (Tala lutangu lu 6)
YINDULA MU MAMBU WUNTANGA
7-8. Mbi bilenda kututula nkaku kubaka ndandu mu mambu tuntanga? Fuanikisa.
7 Befu tulenda tanga mambu mawombo vayi mu khambu baka ndandu. Ngie wumana vanga matangu ayi bo vamvioka mua thangu wisi bue tebukila ko moyo mambu matanga? Mawu mammonikanga kuidi batu boso. Kiadi ayi kiunda kuzaba ti mambu amomo mvandi malenda monika bo tuntanga Kibibila. Dedi ḿba khumbu zinkaka befu tulenda baka makani ma kudukisa kutanga mua zikapu kadika kilumbu. Tufueti baka makani ayi kudukisa mawu. (1 Ko. 9:26) Diawu, kutona kutanga Kibibila kadika kilumbu dike diambu dimboti vayi vasintombulu ko to kutona. Vantombulu mangolo boti tutidi kubaka ndandu mu diambu di Nzambi tuntanga.
8 Yindulabu mu kifuani akiki: Nlangu wumvula nkinza widi mu luzingu luitu. Vayi zimvula ziakunokina ngolo ntoto wulenda wala nlangu. Ayi makumonika, masinkuiza tuadisa ko ndandu mu bikunusu. Kibila ntoto wuntombuluanga thangu muingi kutitika nlangu wumvula muingi kutuadisa ndandu mu bikunusu. Bobuawu mvandi befu kutanga Kibibila mu thinu tuisinkuiza baka ko ndandu mu mambu tuntanga, kutebukila mawu moyo ayi kusadila mawu.—Tia. 1:24.
Dedi bo ntoto wuntombuluanga thangu muingi kutitika nlangu wu mvula ayi kutuadisa ndandu mu bikunusu, befu mvitu vantombuluanga thangu muingi kuyindula ayi kusadila mambu tuntanga mu diambu di Nzambi (Tala lutangu 8)
9. Mbi tufueti vanga boti tumana kuku kutanganga Kibibila mu thinu?
9 Ngie wuntebuka moyo ti Khumbu zinkaka wuntanganga Kibibila mu thinu? Boti buawu, mbi fueti vanga? Bika kutangila mu thinu, vanga mangolo muingi wuyindula mu mambu wuntanga. Disi ko diambu diphasi kuvanga mawu, kibila ngie wulenda baka makani ma kubotula thangu yifuana muingi kuyindula mu mambu wuntanga. Voti ngie wulenda sola kutanga matangu maluelu ayi sadila thangu yinsobila muingi kuyindula mu mambu ma tanga. Yaya Victor tube tubila kumbusa wutuba: “Yitanganga ko matangu mawombo ayi khumbu zinkaka yintanganga to kapu yimueka. Bo yintanganga mawu yimeni, yinnunganga kuyindula mawu mu kilumbu kioso.” Yoso kua phila wuntangila, vantombulu kutangila mu phila yifuana yilenda kusadisa kubaka ndandu mu mambu wuntanga.—Minku. 119:97; Tala Quadro yintuba “ Biuvu Muingi Kufiongunina.”
10. Vana kifuani kimmonisa buidi wulenda sadila mambu wuntanga. (1 Tesalonika 5:17, 18)
10 Boso kua bubela phila wuntangila Kibibila ayi thangu wumviokisa muingi kutanga kiawu, tomba ziphila wulenda sadila mambu wuntanga. Bo wuntanga Diambu di Nzambi wukiyuvusa: ‘Buidi yilenda sadila mambu amama mu bilumbu abibi ayi mu bilumbu binkuiza?’ Muingi kufuanikisa yindulabu boti widi mu kutanga mambu madi mu 1 Tesalonika 5:17, 18. (Tanga.) Bo wummana kutanga matangu amomo yindula khumbu zikua wunsambidilanga ayi buidi wumvangilanga miawu. Mvandi, wulenda yindula mu mambu wumvutudilanga matondo. Ngie wulenda yindula mambu matatu wulenda sikika makani muingi kutonda Yave. Kheti mu thangu yiluelu wulenda tangila, ngie wunkuiza sikika thalu mu mambu mankinza ayi kuba mutu wunkuwanga ayi wunsadilanga diambu di Nzambi! Ngie kuvanga mangolo kadika kilumbu ma kusadila mambu wuntanganga mu Kibibila, ngie wala ba kisadi kimbote ki Yave. Buabu mbi fueti vanga boti wummona ti vadi mambu mawombo wulenda ludika?
BAKA MAKANI MAFUANA
11. Kibila mbi thangu zinkaka tulenda bela mu kiuda? Vana kifuani.
11 Bo wuntanga Kibibila, Khumbu zinkaka wulenda ba mu kiunda ngie kuzaba ti vadi mambu mawombo ma kuludika. Yindula mu mambu amama: Matangu maku ma kilumbu madi mu kutubila malongi matedi kubika monisa luvasanu. (Tia. 2:1-8) Ayi ngie wumbakula ti vantombula kubalula phila wuntadilanga bankaka. Diawu ngie wumbaka makani ma kubalula mambu mantombulu. Adiodio, didi diambu dimboti! Mu kilumbu kinlanda ngie wuntanga matangu mantubila nkinza wukuyala mambu wuntuba. (Tia. 3:1-12) Ayi wumbakula ti thangu zinkaka mambu wuntubanga mabanga ko mamboti. Mu phila ayoyo ngie wumbaka makani ma kubuela kuyala mambu wuntuba ayi mankindisa. Mu matangu maku ma Kibibila ma kilumbu kinlanda mantubila ndubu yitedi kubika ba kikundi na nza. (Tia. 4:4-12) Ngie wumbakula ti vantombulu kuzaba kusola mambu wumviokisila thangu. Diawu mu kilumbu kinlanda ngie wulenda mona ti didi diambu diphasi kubalula mambu mantombulu.
12. Mbi biala kusadisa kubika ba mu kiunda bo wuntanga Kibibila ayi wunzaba ti vadi mambu fueti balula? (Tala mvandi nota.)
12 Boti vantombulu ngie wubalula mua mambu bika kuvonga. Didi diambu dimboti kuvanga mawu kibila mawu mammonisa ti ngie wu kikululanga. Mutu wukikululanga ayi wu yitadilanga mu phila yifuana, wuntanganga diambu di Nzambi muingi kubakula zikhadulu kalenda vangila mangolo muingi kubalula. a Tebuka moyo ti kuvuata “kimutu kimona” didi diambu fueti tatamana kuvangila mangolo. (Kolo. 3:10) Mbi biala kusadisa kutatamana kusadila mambu wuntanga mu diambu di Nzambi?
13. Buidi wulenda sikikila makani mafuana? (Tala mvandi foto.)
13 Bika kutomba kusadila mambu wuntanga mu khumbu mueka to, vayi baka makani mafuana. (Zinga. 11:2) Meka kuvanga mambu amama: Sonika mambu ngie wuntomba kubalula ayi va theti sola diambu dimueka voti mamuadi, mankaka bika mawu bumviokila thangu. Buidi wulenda tonina?
Bika kutomba kubalula mambu mantombulu mu khumbu yimueka to bo wuntanga Kibibila. Vayi sikika makani mafuana, dedi kutonina mu diambu dimueka voti mamuadi (Tala lutangu 13-14)
14. Makani mbi wulenda tonina?
14 Ngie wulenda baka makani ma kutonina kubalula diambu wummona ti disi ko beni phasi voti dio wummona ti fueti luta vangila mangolo. Bo wumbakula mambu fueti balula, wulenda tomba mu bilongulu bitu dedi mu Índice das Publicações da Torre de Vigia voti Kisuekulu ki bilongulu ki Zimbangi zi Yave. Sambila kuidi Yave muingi kakuvana ‘phuila, ayi mvandi mangolo ma kuvangila mambu’ muingi kudukisa diambu ditheti ma bakila makani. (Fil. 2:13) Bosi sadila mambu widi mu kulonguka. Vanga mangolo muingi wudukisa diambu ditheti mabakila makani, mu phila ayoyo wunkuiza luta ba phuila muingi kudukisa diambu dinkaka. Bo wunnunga kudukisa diambu ditheti wubakila makani voti khadulu yintombulu kubalula, dialasa ba ko diambu diphasi kudukisa mambu mankaka mantombulu.
‘BIKA DIAMBU DI NZAMBI DI MUSADISA’
15. Buidi dikabu di Yave badidi disuasana na batu bankaka bantanganga Kibibila? (1 Tesalonika 2:13)
15 Batu bawombo bantubanga ti bamana tanga Kibibila khumbu ziwombo. Vayi bukiedika ti bawu bankikininanga mu Kibibila? Bukiedika ti bawu bansadilanga mawu voti bambikanga mawu mabalula luzingu luawu? Tulenda tuba ti ndamba, kibila bawombo mu bawu basadilanga ko malongi ma Kibibila. Vayi mawu madi disuasana na dikabu bi Yave! Dedi Baklistu mu sekulu yitheti, befu tunkikininanga ti ‘Kibibila didi diambu di Nzambi.’ Befu tumvanganga mamoso tulenda nunga muingi kusadila malongi ma Kibibila mu luzingu luitu.—Tanga 1 Tesalonika 2:13.
16. Mbi bilenda tusadisa kusadila mambu tuntanga mu Kibibila?
16 Khumbu zinkaka dibanga ko diambu diluelu kutanga ayi kusadila malongi ma Kibibila. Ḿba dilenda ba diambu diphasi muingi kubaka thagu yi kutanga voti tulenda tangila mu thinu ayi mukhambu baka ndandu mu mambu tuntanga. Voti tulenda ba mu kiunda mu kumona ti vadi mambu mawombo mantombulu kubalula mu luzingu luitu. Zaba ti mu lusadusu lu Yave wulenda nunga dioso kua diambu wumviokila. Bika befu boso tuba makani ma kukikinina lusadusu tuntambula ayi kubika ba batu bankuwanga to vayi kusadila mambu tunkuwa. Bukiedika, bo tuntanga diambu di Nzambi ayi tunsadila mawu mu luzingu luitu befu tuala luta baka mayangi.—Tia. 1:25.
NKUNGA 94 Matondo mu Diambu Diaku
a Mona video mu jw.org yintuba Mbi Matoko Mankaka Bantubanga—Kutanga Kibibila.
