Tulendi yindula ko ti, bo 70 di minlandikini bakhambu ba bo Yesu kasikika Bidia Bimfumu va Masika ma Builu, buna basa bue ba ko lunungu luandi voti banyekula. Mu thangu ayoyo Yesu waba tomba to kuba na bapostolo bandi.

Mangumba mamamuadi kuba kuandi 12 voti 70 baba lunungu lu Yesu. Mu minlandikini miandi mioso Yesu kasola, nandi wusola theti kumi muali bo katedila bapostolo. (Luk. 6:​12-16) Nandi wuba ku Ngalili bo katumisa ‘kumi wadi di bapostolo bandi’ ayi “wuba fila muingi be samuna matedi Kintinu ki Nzambi ayi babelusa bimbevu.” (Luk. 9:​1-6) Bosi bo kaba ku Yuda Yesu “wubue fila 70 di minlandikini miandi, wuba fila buadi buadi.” (Luk. 9:51; 10:1) Diawu, Yesu wuba minlandikini miwombu mu bibuangu biviakana muaba samunu zitsangu zi Kintinu.

Basi Yuda baba minlandikini mi Yesu ḿba batatamana kukemba pasika ayi makanda mawu. (Esodu 12:​6-11, 17-20) Bo thangu yi lufua luandi yaba belama, Yesu ayi minlandiki miandi bayenda ku Yelusalemi. Vai nandi kasa vanga ko lukutukunu lunneni muingi kukemba pasika na minlandikini miandi mioso miba ku Yuda, Ngalili ayi Perea. Yesu waba tomba to kuba na bapostolo bandi mu thangu ayoyo. Nandi wuba kamba: “Yibedi beni phuila kudia yinu bidia bi Pasika ava yitovuka.”—Luk. 22:15.

Vaba kibila kinkinza mu mambu amomo. Yesu waba belama kufua buka “Muana Dimemi di Nzambi, no wunkuiza botula masumu mu nza.” (Yoa. 1:29) Vaba tombulu mambu amomo kumonika ku Yelussalemi, kibila kuawu baba vaninanga minkhailu kuidi Nzambi. Lufua lu Yesu lutuadisa luvukusu lulutidi, kena luvukusu lu basi Isaeli bo baba ku Ngipiti. (1 Ko. 5:​7, 8) Mambu Yesu kavanga mavana luanku muingi kumi muali di bapostolo baba tho voti lusersu lu kimvuka ki Baklistu. (Efe. 2:​20-22) Make mambu ma kukuitukila kuzaba ti Yelusalemi divula dinlongo, didi ‘12 di mamanya ma lusersu, muawu basonika mazina ma 12 di bapostolo ba Muana Dimemi.’ (Nzai. 21:​10-14) Ngete, bapostolo bakuikama baba kinyeku kinkinza mu lukanu lu Nzambi. Diawu tulenda visila kibila Yesu kaba tombila kuba na bapostolo bandi mu pasika yisuka ayi bosi wusikika—Bidia Bimfumu va Masika ma Builu.

70 di milandikini ayi minlandiki minkaka basa ba ko vakimueka na Yesu mu ndiwulu yi bidia bimfumu. Vayi kheti bobo, minlandikini miandi mioso batatamana bakuikama, babaka ndandu—mu Bidia Bimfumu Yesu Kasikika va Masika ma Builu. Diawu, baboso bayiza ba baklisto basolu, bakota mu Kintinu ki Nzambi dedi bo Yesu katubila mu builu beni.—Luk. 22:​29, 30.