‘Mutu Wusonga Wela Mona Mayangi mu Yave’
DIANA widi nduka 80 di mimvu, ayi wutovuka beni mu mimvu mima vyoka. Nnuni’andi wuba kimbevu bantedilanga Alzheimer, ayi wuba ku nzo bankyebilanga biboba, wufwa. Bana bandi babwadi ba babakala mvandi bafwa, ayi nandi widi mu kunwana na kimbevu bantedilanga Câncer de mama. Vayi zikhomba bo bammonanga Diana mu zikhutukunu ayi mu kisalu ki kusamuna, bammonanga ko mu kyunda, vayi mu mayangi.
John wusala buka nsungi wu kizunga mu 43 di mimvu. Nandi wuba zolanga beni kiyeku kyandi, ayi kabasa kukiyindulanga ko kuvanga kyuma kinkaka mu luzingu. Vayi, nandi wubika kusala buka nsungi wu kizunga mwingi kukyeba mutu wu dikanda dyandi wuba bela. Bo zikhomba zizaba John baba kummonanga mu zikhutukunu zinneni, bawu bamona ti nandi kasa baluka ko. Bila wuntatamana wuyangalala.
Bwidi Diana ayi John babakila mayangi? Bwidi mutu wuntovuka kalenda bakila mayangi? Bwidi mutu kalenda bela mayangi kheti kafweti bika kisalu kanzolanga? Kibibila kituvana mvutu. Kiawu kintuba: ‘Mutu wusonga wela mona mayangi mu Yave.’ (Minkunga 64:10) Tulenda luta visa buboti kyedika akiki befu zaba mbi byala tuvana mayangi mankadidila, ayi mbi bilendi ko kutuvana phila mayangi beni.
MAYANGI MAKHAMBU KADIDILANGA
Vadi mambu ma kututwadisanga mayangi. Dedi, yindul’abu batu bwadi bayizolasananga ayi bankwelana. Voti mutu weka tata voti ngudi, voti mutu wumbaka kiyeku kimona mu kisalu ki Yave. Mambu amama mantwadisanga mayangi bila madi minkhayilu mi Yave. Nandi wutuvana dikwela, lwaku lu kubuta bana ayi kusala mu kimvuka kyandi.—Ngenesi 2:18, 22; Minkunga 127:3; 1 Timoteo 3:1.
Vayi, mambu mankaka mantwadisanga mayangi, makadidilanga ko. Kyadi ayi kyunda, bila mutu wukwelana yaku kalenda fwa voti kukhambu bwe ba wukwikama. (Yehezekeli 24:18; Hosea 3:1) Bana balenda bika kutumamana matata mawu ayi Nzambi, ayi ḿba balenda kuba vayikisa mu kimvuka. Dedi, bana ba Samueli basa sadila ko Yave mu phila yisulama, ayi Davidi wuyiza monikina mambu mawombo va dikwela mu kibila ki disumu dyandi ayi Beta Seba. (1 Samueli 8:1-3; 2 Samueli 12:11) Bo mambu ma phila ayiyi mammonika, matwadisanga ko mayangi, vayi kyunda kiwombo.
Bobuawu mvandi, khumbu zinkaka tulendi nunga ko kutatamana mu kiyeku twidi mu kisalu ki Yave, bila tumbela voti tufweti kyeba mutu wu dikanda ditu, voti mambu malenda baluka mu kimvuka ki Yave. Bawombo babika kiyeku baba, bantubanga ti banyindulanga beni mayangi baba monanga mu kiyeku beni.
Tulenda mona ti bibila beni bi mayangi bikadidilanga ko. Bukyedika kwandi ti vadi ntindu wu mayangi mankadidilanga kheti bo tumvyokila mu ziphasi mu luzingu? Vafweti ba, bila Samueli, Davidi ayi bankaka batatamana kuba mayangi kheti bo bavyokila mu thangu ziphasi.
MAYANGI MANKADIDILANGA
Yesu wuzaba mbi binsundula kuba mayangi makyedika. Ava kiza va ntoto, Kibibila kitukamba ti nandi waba ‘kwangalala vantwala [Yave] zithangu zyoso. (Zingana 8:30) Bo Yesu kaba va ntoto, khumbu zinkaka wumonikina mambu maphasi. Vayi nandi wuba bakanga mayangi mu kuvanga luzolo lu Tat’andi. (Yoane 4:34) Mbi tulenda tubila mu bilokulu bitsuka bo kaba tovuka? Kibibila kintuba: ‘Mu kibila ki mayangi maba kuntwal’andi, nandi wuvibidila va dikunzi.’ (Ebeleo 12:2) Diawu, tulenda longuka beni mu mambu mwadi Yesu katuba matedi mayangi makyedika.
Khumbu mweka, 70 di minlandikini mivutuka kwidi Yesu bo bafumina ku kisalu ki kusamuna. Bawu baba bayangalala mu kibila ki mambu moso bavanga, ayi bo bakukisa ziphevi zimbi. Vayi Yesu wuba kamba: ‘Lubika mona mayangi mu kibila ki ziphevi zi kulutumukina, vayi luyangalala bila mazina minu mama sonama ku diyilu.’ (Luka 10:1-9, 17, 20) Ngete, kuzaba ti Yave wu kutukikinina, kulutidi nkinza ayi kututwadisanga mayangi makyedika ma tulendi baka ko mu kyoso kiyeku tulenda tambula.
Khumbu yinkaka, bo Yesu kaba koluka na nkangu wu batu, nkyeto mweka mwisi Yuda wuyituka beni mu kibila ki malongi mandi, ayi wutuba ti ngudi Yesu mayangi mawombo kadi mu kubaka phila mwana awowo. Vayi Yesu wumvutudila: ‘Ndamba, vayi, mayangi madi kwidi Luka 11:27, 28) Kumona mambu mamboti mwan’itu kamvanga kulenda tutwadisa mayangi. Vayi kutumamana Yave ayi kuba kikundi kimboti ayi nandi, mawu ma kututwadisanga mayangi mankadidila.
bobo bankuwanga ayi bantumamananga dyambu di Nzambi!’ (Tunkwangalalanga beni kuzaba ti Yave widi wuyangalala mu kibila kitu. Kheti zithotolo zisi ko zimboti, ziawu zibotulanga ko mabanza twidi. Bukyedika, bo tuntatamana bakwikama mu thangu yi ziphasi, mayangi mitu manluta bwelamanga. (Loma 5:3-5) Mvandi, Yave wumvananga phevi’andi kwidi batu ba kumfyatila, ayi mayangi, madi mbutu wu phevi yi Nzambi. (Ngalatia 5:22) Mawu ma kutusadisa kuvisa kibila mbi buku yi Minkunga 64:10 yintuba: ‘Mutu wusonga wela mona mayangi mu Yave.’
Mbi bisadisa John katatamana wukwikama?
Mawu mansudikisa mvandi kibila mbi Diana ayi John batatamana kuba mayangi kheti mu thangu yi ziphasi. Diana wutuba: “Yivanga Yave buka kiswamunu kyama, dedi bo mwana kilezi kamvangilanga kwidi matata mandi.” Nandi wubwe tuba: “Yimmonanga ti nandi wutsakumuna na lwaku lu kutatamana kusamuna thangu zyoso na disevu mu kizizi kyama.” Mbi bisadisa John katatamana kuba mayangi ayi kukivana mu kisalu ki kusamuna kheti bo kabika kiyeku kyandi? Nandi wutuba: “Tona mu mvu 1998 bo baphana kiyeku ki kulonga minlonguki mu kikola ki ETM, yinluta vanganga ndongukulu yi miveka, kuvyoka bo yiba vangilanga theti.” Nandi wutuba ti mambu nandi ayi nkazi’andi babalula, masa ba ko beni phasi, bila bawu baba bakubama mwingi kuvanga kyoso kyuma Yave ka kuba tuma. Nandi wubwela: “Twidi mu kuvanga mawu mukhambu nyonga.”
Bawombo mvandi bamona ti mambu madi mu buku yi Minkunga 64:10 madi makyedika. Tala kifwani ki bakwela ababa. Bawu basadila ku Beteli yi Estados Unidos mu 30 ma mimvu. Vayi baba fila basala buka mintwami ntwala mifilwa. Bawu bakikinina: “Kuba kyunda mu thangu wunzimbala kyuma wunzolanga, disi ko dyambu dimbi,” bawu babwe tuba: “Vayi wulendi tatamana ko mu kyunda mvu ka mvu.” Bo bayenda mu kiyeku kiawu kimona, batona kusamuna va kimweka na kimvuka. Bawu mvandi batuba: “Tusambila mu kutuba mambu tuba tomba. Diawu, kumona ti Yave wuba tambudilanga minsambu mitu, kutukindisa beni ayi kututwadisa mayangi. Vasa vyoka ko beni thangu, bankaka mu kimvuka batona kusala buka mintwami ntwala, ayi tubaka lusakumunu lu kubaka minlonguki myodi mi Kibibila miba konzuka mu kiphevi.”
‘MAYANGI MVU KA MVU’
Bukyedika, disi ko dyambu dilwelu kuba mayangi thangu zyoso. Vala ba thangu twala monanga kyunda. Vayi Yave wu kutukindisa mu mambu madi mu buku yi Minkunga 64:10. Kheti mu thangu twidi bavonga, tulenda ba lufyatu ti befu tatamana bakwikama kheti mu mambu moso tumvyokila, ‘twala mona mayangi mu Yave.’ Mvandi tulenda vingila mu thangu lukanu lu Yave lu kutwala ‘diyilu di mona ayi ntoto wumona’ lwala salama. Bosi batu boso bela ba basonga ayi bela mona ‘nyenze ayi mayangi mvu ka mvu,’ mu kibila ki mambu moso Yave kela vanga.—Yesaya 65:17, 18.
Yindula mbi mambu amomo mansundula. Twala ba buvinya buvedila ayi twala kotukanga kadika kilumbu na mangolo mu nyitu. Kheti mambu tumonikina kumbusa ma tutwadisa kyunda, mawu malasa bwe kututwadisa ko khyenzu. Yave wu kutukindisa ti ‘mambu mavyokidi malasa bwe tebukulu ko moyo, malasa bwe ba ko mu ntima.’ Twala yamba batu tunzolanga bafwa ayi twala ba buka matata ma mwana finkyeto fi 12 di mimvu Yesu kavulubusa: ‘Bo bamona mawu, baboso baba mayangi mawombo.’ (Malako 5:42) Mu thangu beni, kadika mutu va ntoto wela ba mayangi makyedika ayi wela ‘mona mayangi mu Yave’ mvu ka mvu.