1, 2. (a) Kisalu mbi kiluta ba nkinza mu luzingu lu Yesu, ayi kibila mbi? (b) Mbi tufweti vanga mwingi tununga kusala buka ‘minsadisi minsalanga va kimweka ayi Nzambi’?

 YESU KLISTO wuba nsadi wu mabaya bosi kuntwala wuyiza ba nlongisi. (Malako 6:3; Loma 15:8) Nandi wuvanga buboti bisalu beni byodi. Bo kaba nsadi wu mabaya, nandi wulonguka bwidi bu kusadila bisadulu kaba mwingi kuvanga byuma bimboti mu mabaya. Ayi bo kaba nlongi, nandi wusadila buboti nzayilu’andi mu Masonoko mwingi kusadisa batu kuvisa kyedika kidi mu Dyambu di Nzambi. (Matai 7:28; Luka 24:32, 45) Bo Yesu kaba 30 ma mimvu, nandi wubika kuba nsadi wu mabaya ayi wuyiza ba nlongisi, bila nandi wuzaba ti kiawu kisalu kilutidi nkinza kalenda vanga. Nandi wutuba ti kusamuna zitsangu zimboti zi Kintinu ki Nzambi, kiba mvandi kibila kinkaka Nzambi kamfidila va ntoto. (Matai 20:28; Luka 3:23; 4:43) Yesu wutsikika luzingu lwandi mu kusamuna zitsangu zimboti, ayi nandi wuba tomba bankaka mvandi bavanga kisalu beni.—Matai 9:35-38.

² Befu bawombo twisi ko minsadi mi mabaya, vayi twidi minlongisi minlonganga bankaka zitsangu zimboti. Kisalu akiki  nkinza beni kidi, bila naveka Nzambi mvandi wumvanganga kiawu. Diawu, ba tutedilanga ‘minsadisi minsalanga va kimweka ayi Nzambi.’ (1 Kolinto 3:9; 2 Kolinto 6:4) Tunkikinina mambu nsoniki wu minkunga katuba: “Mambu maku moso madi makiedika.” (Minkunga 119:159, 160) Dyambu di Yave didi kyedika. Kiawu kibila tufweti tomba zabila ti twidi mu ‘kusadila mu phila yifweni dyambu dikyedika’ mu kisalu kitu ki kusamuna. (Tanga 2 Timoteo 2:15.). Diawu tukhidi vangila mangolo mwingi tubwela pisuka mu kusadila Kibibila, bilongulu byoso twidi mwingi kulonganga bankaka matedi Yave, Yesu ayi Kintinu kyandi. Mwingi ku tusadisa kusamuna buboti, kimvuka ki Yave ki tuvana bilongulu bimboti, ayi tufweti zaba mvandi bwidi bu kusadila biawu. Bilongulu beni, bidi mu Bilongulu Tunsadilanga mwingi Kulonga.

3. Mu mambu mbi tufweti sikika mayindu mitu mu kisalu ki kusamuna, ayi bwidi Mavanga 13:48 yitu sadisila kuvanga mawu?

³ Ḿba ngye wulenda yikuvusa kibila mbi tuntedilanga biawu Bilongulu Tunsadilanga mwingi Kulonga bika ti Bilongulu Tunsadilanga mwingi Kusamuna. Tuntedilanga abobo, bila ‘kusamuna’ kunsundula kuzabikisa zitsangu, vayi ‘kulonga’ kunsundula kusudikisa buboti zitsangu mwingi mutu kavisa mambu kankuwa ayi mansadisa kusadila mambu kanlonguka. Mu thangu yikhufi yisyedi, befu tufweti sikika mayindu mitu mu kutona ndongukulu yi Kibibila ayi kulonga batu kyedika mwingi baba minlandikini mi Klisto. Mawu mansundula ti tufweti ba kifuza mu kutomba batu boso badi ‘bakubama mwingi kubaka luzingu lukalumani’ ayi kuba sadisa batona kusadila Yave.—Tanga Mavanga 13:44-48.

4. Bwidi tulenda bakudila batu badi ‘bakubama mwingi kubaka luzingu lukalumani’?

⁴ Bwidi tulenda bakudila batu badi ‘bakubama mwingi kubaka luzingu lukalumani’? Baklisto batheti bavangila mawu mu kusamuna. Yesu wukamba minlonguki myandi: “Thangu lunkota mu divula voti mu buala bumosi lutomba mutu wufuana mu kuluyakula.” (Matai 10:11) Befu mvitu mawu tufweti vanga bubu. Vayi, boti batu badi lungundayi, bantinanga, voti bavwanga ko nkinza mambu ma Nzambi, tulendi vingila ko bayuwa zitsangu zimboti. Befu tunsikika mayindu kwidi batu bakyedika, ba kuyikululanga, ayi batidi kuzaba kyedika. Tulenda fwanikisa mangolo tumvanga mwingi kutomba batu dedi mambu Yesu kavanga bo kaba nsadi wu mabaya. Ava nandi kavanga byuma dedi myelu, vangu, voti kyoso kyuma kinkaka, nandi wuba tombanga theti mabaya mafwana. Bosi kaba bonganga bisadulu byandi, kusadila biawu mwingi kuvanga kyuma katidi vanga. Bobuawu mvandi bubu, befu tufweti tomba theti kubakula batu batidi kuwa, bosi tulenda sadila bilongulu bitu bi kulongila mwingi kuba sadisa baba minlandikini mi Klisto.—Matai 28:19, 20.

5. Mbi tufweti zaba matedi bilongulu bidi mu Bilongulu Tunsadilanga mwingi Kulonga? Vana kifwani. (Tala zifoto zidi va thononu.)

⁵ Mu bisadulu bansadilanga mu kisalu, kadika kyuma kidi tsalulu’andi. Yindul’abu byuma Yesu kasadila bo kaba nsadi wu mabaya. a (Tala matangu madi va wanda.) Nandi wuba tomba bisadulu mwingi kuzonga, kutula ndimbu mu dibaya, kuzenga, kutobula, kufutika, ayi kubundisa byuma. Befu mvitu,  kadika kilongulu kidi mu Bilongulu Tunsadilanga mwingi Kulonga, kidi tsalulu’andi. Ndoko tuzaba bwidi bu kusadila bilongulu beni bi nkinza.

6, 7. (a) Bwidi ngye wunsadila minkanda mi kukotila mu khondi mayo? (b) Kibila mbi tunsadilanga minkanda mi kutumisina batu mu zikhutukunu?

⁶ Nkanda wu Kukotila mu Khondi Mayo. Midi minkanda milwelu, vayi mimboti beni bila minkamba batu banani twidi ayi miba tumisa kukota mu khond’itu mayo jw.org. Mu khond’itu mayo, bawu balenda bwela longuka matedi befu ayi kudinda ndongukulu yi Kibibila. Kuvyoka 400.000 di batu bama dinda ndongukulu yi Kibibila mu nzila jw.org, ayi khama di zikhama di batu bamvanganga mawu kadika kilumbu! Ngye wulenda nata mwa minkanda beni koso wunkwenda ayi kusadila miawu mwingi wuyoluka na batu.

⁷ Nkanda wu Kutumisina. Nkanda wu kutumisina mu zikhutukunu zitu wuntuba: “Tu kutumisa mo wu longuka Kibibila na Zimbangi zi Yave.” Nkanda beni wuntuba ti ngye wulenda vangila mawu mu “zinkutukunu zitu kwidi babonso” voti “na nlongisi’aku.” Nkanda awowo, wunkamba batu banani befu twidi ayi wuntumisa mvandi batu ‘bazebi zitsatu ziawu mu mambu ma Nzambi,’ mwingi kulonguka yitu Kibibila. (Matai 5:3) Diawu batu boso balenda kwenda mu zikhutukunu zitu, kheti bankikinina kulonguka Kibibila voti ndamba. Mu thangu bankwiza mu zikhutukunu zitu, bawu bela mona ti vadi mambu mawombo balenda longuka matedi Kibibila.

8. Kibila mbi didi dyambu dinkinza kutumisa batu biza kheti khumbu yimweka mu zikhutukunu? Vana kifwani.

⁸ Nkinza beni kutatamana kutumisa batu mu zikhutukunu zitu kheti khumbu mweka. Kibila mbi? Bila ba kukwenda mu zikhutukunu zitu, bala mona ti Zimbangi zi Yave banlonganga kyedika kidi mu Kibibila ayi bansadisa batu bazaba Nzambi, vayi binganga bi luvunu bavanga ko mawu. (Yesaya 65:13) Bakwela bamweka ku Estados Unidos bantedilanga Ray ayi Linda, bamona diswasana beni. Bawu baba kikininanga mu Nzambi ayi baba tomba kunzaba buboti. Babaka makani ma kukwenda mu binganga byoso va divula diawu ayi byuma byodi baba tomba kumona ava kuba musi kinganga beni. Kitheti, kulonguka kyoso kyuma kitedi Nzambi, ayi kimwadi, batu ba kinganga beni bafweti vwata dedi bisadi bi Nzambi. Mimvu miwombo mivyoka, bila binganga biwombo biba va divula diawu. Vayi bawu bayiza ba beni mu kyunda. Bila basa longuka ko ni kyuma, ayi batu ba binganga beni babasa vwatanga ko mu lukinzu. Bo babasika mu kinganga kitsuka ki baba tomba kota, Linda wuyenda ku kisalu ayi Ray wuvutuka ku nzo. Bo kaba vutuka, Ray wumona Nzo yi Kintinu. Nandi wuyindula, ‘Bika theti yikota kuawu ayi yimona mambu mbi madi koko.’ Bukyedika, nandi wuzola beni mambu kamona kuna! Baboso ku Nzo yi Kintinu baba bakundi bamboti ayi bavwata mvandi buboti. Ray wukala kuntwala ayi wuzola beni mambu kalonguka! Mawu ma tutebula moyo mambu mvwala Polo katuba matedi batu bankwizanga khumbu yitheti mu zikhutukunu zitu ayi bantunga: “Bukiedika Nzambi widi [yinu].” (1 Kolinto 14:23-25) Diawu, Ray wutona kwendanga mu zikhutukunu zyoso kilumingu. Bosi wutona mvandi kwendanga mu zikhutukunu va khati sabala. Linda mvandi wutona kwendanga mu zikhutukunu, kheti baba 70 di mimvu, bawu balonguka Kibibila ayi bayiza botama.

9, 10. (a) Kibila mbi kwisi ko phasi kusadila minkanda? (b) Sudikisa bwidi tufweti sadila mwa nkanda Mbi Kintinu ki Nzambi?

⁹ Minkanda. Befu twidi nana di minkanda mu bilongulu bitu. Misi ko phasi mu kusadila, ayi miawu midi mimboti mwingi kutona koluka na batu. Tona babasisa nkanda wutheti mu mvu 2013, bivevi bitanu bi minkanda bama basisa! Minkanda myoso phila mweka midi. Ngye longuka bu kusadila wumweka, wulenda nunga kusadila minkanda myoso! Bwidi wulenda sadila nkanda wumweka mwingi kutona disolo ayi mutu?

¹⁰ Ḿba ngye tidi kusadila nkanda Mbi Kintinu ki Nzambi? Monisa mutu kyuvu kidi va busu bu nkanda ayi nyuvula: “Ngye wumana yikuvusa Mbi Kintinu ki Nzambi? Wummwena ti . . . ?” Bosi nyuvula mvutu mbi kalenda sola mu mimvutu mitatu midi mu nkanda. Kheti mvutu kamvana wusulama voti ndamba, zibula to mwa nkanda beni vantuba ““Mbi Kibibila Kintuba”” ayi tanga matangu ma Danieli 2:44 ayi Yesaya 9:6 madi vana. Ku tsuka disolo, vanga kyuvu kidi kumbusa mwa nkanda, vantuba ““Yindula Dyambu Adidi”: “Bwidi bwala bela luzingu mu luyalu lu Kintinu ki Nzambi?” Ngye wulenda vana mvutu wu kyuvu beni bo wela kumvutukila kilumbu kinkaka. Bo wumvutuka kuna, wulenda sadila dilongi 7 mu mwa buku Zi Nsangu Zyaku Zimboti zi Fumini Kwidi Nzambi!, kiawu kidi kimweka mu bilongulu tunsadilanga mwingi kutona ndongukulu yi Kibibila.

11. Kibila mbi zi levista zitu zivangulu, ayi mbi tufweti zaba matedi ziawu?

¹¹ Zi levista. Kibanga ki Nsungi ayi Despertai! biawu bilongulu binluta kusekulu ayi kukabulu mu nza yimvimba! Bila batu ba zitsi zivyakana bantanganga zi levista beni, ayi mintu mi malongi minkwizanga va busu bu levista beni, nkinza midi kwidi batu boso. Tulenda sadila zi levista beni mwingi kusadisa batu kusikika mayindu mu mambu malutidi nkinza bubu mu luzingu. Vayi ditheti, tufweti zaba phila batu mbi balenda baka ndandu mu kadika levista.

12. (a) Levista Despertai! yivangulu mwingi kusadisa banani, ayi kibila mbi kinkaka yivangulu? (b) Mambu mbi mamboti wumonikini mu kukabula kilongulu beni?

¹² Levista Despertai! yivangulu mwingi kusadisa batu bazebi nkadu voti bakhambu zaba ni dyambu ditedi Kibibila. Ḿba badi batu bakhambu zaba matedi malongi ma Baklisto, bakhambulu lufyatu mu binganga, ayi bo bakhambu zaba ti Kibibila kilenda kuba sadila mu luzingu luawu. Kibila kinkaka bavangila Despertai! kidi mwingi kusadisa batu bakhambu kikininanga mu Nzambi. (Loma 1:20; Ebeleo 11:6) Mvandi mwingi kusadisa mintangi bakikinina ti Kibibila ‘bukiedika didi . . . dyambu di Nzambi.’ (1 Tesalonika 2:13) Mintu mitatu mi malongi mi Despertai! yi mvu 2018 mintuba: “O caminho para a felicidade,,” “12 Segredos para uma familia ser feliz,,” ayi “Ajuda para os que perderam alguém amado..”

13. (a) Kibanga ki Nsungi ki baboso kivangulu mwingi kusadisa phila batu mbi? (b) Mambu mbi mamboti wumonikini mu kukabula kilongulu beni?

¹³ Levista Kibanga ki Nsungi ki baboso, kivangulu mwingi kusudikisa malongi ma Kibibila kwidi batu badi lukinzu mu Nzambi ayi mu Kibibila. Balenda ba batu bazebi nkadu mambu matedi Kibibila, vayi bavisanga ko buboti malongi mandi. (Loma 10:2; 1 Timoteo  2:3, 4) Mintu mitatu mi malongi mi Kibanga ki Nsungi ki mvu 2018, mimvana mimvutu mi byuvu abibi: “Será que a Bíblia ainda é útil?,” “É possível saber o futuro?,” and “Será que Deus se importa com você?”

14. (a) Kibila mbi zi video zinna zidi mu Bilongulu Tunsadilanga mwingi Kulonga zivangulu? (b) Mambu mbi mamboti wumonikini mu kusadila ziawu?

¹⁴ Zi video. Mu bilumbu bi Yesu, nsadi wu mabaya, bisadulu bi myoko to kaba. Vayi bubu, nsadi wu mabaya mvandi widi bisadulu binsadilanga mu minda, dedi kisengu ki kuzengila mabaya, ki kutula divudu ayi ki kuludika. Bo tunsamuna bubu, kubika kwandi bilongulu tuntambulanga, mvandi twidi zi video zimboti mwingi kumonisa batu. Twidi zi video zinna mu bilongulu tunsadilanga mwingi kulonga, dedi: Kibila Mbi tu Fweti Longukila Kibibil’e?, Bwidi bu Ḿvamgiminanga Ndongukulu yi Kibibil’e?, Mambu mbi ma Monikanga ku Nzo yi Kintinu?, ayi Quem São as Testemunhas de Jeová? Zi video azizi zidi zilwelu ayi zimvanganga to minutu 2 voti 3, diawu tulenda sadila ziawu bo tumvana kimbangi kitheti. Zi video zilutidi kisina, tulenda sadila ziawu bo tumvutukila mutu voti kwidi bo badi thangu. Ziawu zidi zimboti, bila zinyikuna mabanza ma mutu mwingi kumvanga katomba longuka Kibibila ayi kukwenda mu zikhutukunu zitu.

15. Bwidi kumonisa mutu video mu mbembu kankolukanga kulenda nyikunina mabanza mandi? Vana bifwani.

¹⁵ Tala kifwani, khomba mweka yinkyeto wuyiza zaba nkyeto wufumina ku Micronésia ayi wunkolukanga mbembu yi Yapese. Khomba beni wummonisa video Kibila Mbi tu Fweti Longukila Kibibil’e? mu mbembu Yapese. Bo video yitona, nkyeto beni wutuba: “Ah Nzambi! Yilendi kikinina ko, yayiyi mbembu’ami! Mu phila kankolukila yizebi ti widi musi tsi’ami. Nandi wunkoluka mbembu’ami!” Bo kamana mona, wutuba ti wunkwiza tanga ayi kumona bilongulu byoso mu mbembu’andi mu jw.org. (Dedikisa mawu na Mavanga 2:8, 11.) Kifwani kinkaka, kidi ki khomba mweka yinkyeto ku Estados Unidos wuveka nzila yi kumwena video tuma tubila va mongo kwidi mwana khomb’andi, wunkalanga khonzo yinkaka mu mbembu’andi. Ditoko beni wutala video ayi wuveka e-mail kwidi nkyetu beni, nandi wutuba: “Yibe zola beni kutala video, vayi yibe luta zola vama vabe tuba ti vadi pheve yimbi yinkengidila batu va nza. Yibe dinda ndongukulu yi Kibibila.” Kifwani akiki kimboti beni, bila bakandika kisalu kitu ku tsi ditoko beni kankalanga!

16. Sudikisa kibila mbi kadika mwa buku yivangulu: (a) Yuwa Nzambi ayi Zinga M’vu ka M’vu. (b) Zi Nsangu Zyaku Zimboti zi Fumini Kwidi Nzambi! (c) Banani Bamvanganga Luzolo lu Yave Bubu?

¹⁶ Mwa Zibuku. Bwidi tulenda longila kyedika kwidi mutu wukhambu zaba tanga buboti voti bo bakhambu ni kilongulu ki Kibibila mu mbembu’andi? Tulenda sadila mwa buku Yuwa Nzambi ayi Zinga M’vu ka M’vu. b (Tala matangu madi va wanda.) Kilongulu kinkaka kimboti tulenda sadila mwingi kutona ndongukulu yi Kibibila yidi mwa buku Zi Nsangu Zyaku Zimboti zi Fumini Kwidi Nzambi! Wulenda monisa mutu beni 14 di mintu mi malongi midi kumbusa mwa buku beni ayi nyuvula dilongi mbi kaluta zola. Bosi tona  ndongukulu mu dilongi beni. Wumana vanga mawu bo wumvutukila mutu? Mwa buku yintatu yidi Banani Bamvanganga Luzolo lu Yave Bubu? Yawu yivangulu mwingi kulonga minlonguki mi Kibibila matedi kimvuka ki Yave. Mwingi wulonguka bwidi bu kusadila yawu, tala Nzingulu ayi Kisalu Kitu ki Buklisto—Thwadusulu yi Zikhutukunu yi Ngonda Yintatu mvu 2017..

17. (a) Kibila mbi kadika buku yi kulongukila yivangulu? (b) Mambu mbi baboso babotama bafweti vanga ayi kibila mbi?

¹⁷ Zibuku. Ngye kutona longuka na mutu mu mwa buku, wulenda kwaku kuvingisa yawu mu buku Mbi Kibibila Kilenda Kutulonga? Kilongulu akiki kilenda sadisa batu kulonguka malongi matheti ma Kibibila. Boti nlonguki wu Kibibila widi mu kukonzuka buboti mu kipheve ayi mamanisa buku ayoyi, wulenda tatamana kulonguka yandi buku Continue a Amar a Deus.. Kilongulu akiki kyela longa nlonguki’aku bwidi kalenda sadila minswa mi Kibibila kadika kilumbu mu luzingu lwandi. Tebuka moyo ti kheti nandi weka wubotama, kafweti tatamana ndongukulu’andi nate kela manisa zibuku beni. Mawu mela kunsadisa kukindisa kiminu kyandi mu Yave ayi katatamana wukwikama mu nandi.​—Tanga Kolosai 2:6, 7.

18. (a) Mbi nkanda 1 Timoteo 4:16 wu ku tukindisa kuvanga, ayi ndandu mbi tumbaka? (b) Makani mbi twidi bo tunsadila Bilongulu Tunsadilanga mwingi Kulonga?

¹⁸ Bo twidi Zimbangi zi Yave, befu twidi kiyeku ki kulonga batu “mambu ma kiedika ma nsamu wumboti” mwingi babaka luzingu lukalumani. (Kolosai 1:5; tanga 1 Timoteo 4:16.) Mwingi ku tusadisa kuvanga mawu, befu twidi Bilongulu Tunsadilanga mwingi Kulonga. (Tala quadro “ Bilongulu Tunsadilanga mwingi Kulonga.”) Tuvanganu mangolo ma kusadila bilongulu beni. Kadika mutu mu befu kalenda sola kilongulu mbi kansadila mu bilongulu tunsadilanga mwingi kulonga ayi thangu mbi kansadila biawu. Vayi tebuka moyo ti makani mitu, masi ko to ma kukabula bilongulu, ayi tuvananga ko bilongulu bitu kwidi batu bakhambu zola kuwa zitsangu zitu. Makani mitu madi ma kuvanga minlonguki mi batu batidi kukuwa, ba kikululanga, ayi batidi kuzaba Nzambi, batu badi ‘bakubama mwingi kubaka luzingu lukalumani.’—Mavanga 13:48; Matai 28:19, 20.