1, 2. Mbi Nkadi’ampemba kavanga mwingi kutwadisa ziphasi va nza?

 BYUMA batu bama vanga bubu, dedi zi telefoni, lâmpada yintatamanga mu minda, makalu ayi bisengu bi kyozi banlundilanga bidya, binsadisanga luzingu luba lumboti. Vayi byuma binkaka, dedi pólvora, zi bomba atómica, zitsunga zingolo ayi binkaka, bintulanga luzingu lwitu va kingela. Vayi, vadi dyambu dimweka dilutidi mu byuma byoso abyobi ayi diawu dima twadisa ziphasi ziwombo mu nza. Dyambu mbi? Luvunu! Kutuba luvunu kunsundula kutuba dyambu wuzebi ti disi ko dikyedika mwingi kuvuna mutu wunkaka. Nani wutuba luvunu lutheti? Nkadi’ampemba! Yesu Klisto wuntedila ‘tata yi luvunu.’ (Tanga Yoane 8:44.) Thangu mbi nandi katuba luvunu lutheti?

² Nandi wuvanga mawu bivevi bi mimvu kumbusa ku lumbu lu Edeni. Adami ayi Eva, baba zingila mu mayangi ku Paladizu Yave kaba kubikila bazingila. Nzambi wuba kamba ti ba kudya makundi ma ‘nti wu nzayilu wu mambu mamboti ayi mambi,’ bawu bankwiza fwa. Kheti Satana wuzaba mawu, nandi wusadila nyoka mwingi kakamba Eva: ‘Mwisinkwiza fwa ko.’  Alulu, luawu luvunu lutheti. Satana wubwe tuba: ‘Nzambi zebi ti kilumbu mwela dya mawu, mesu minu mela zibuka ayi benu mwela ba buka Nzambi, mu kuzaba mamboti ayi mambi.’—Ngenesi 2:15-17; 3:1-5.

3. Kibila mbi luvunu lu Satana luba beni lumbi, ayi mambu mbi mayiza monikina mu kibila ki luvunu beni?

³ Luvunu lu Satana luba beni lumbi, bila nandi wuzaba ti Eva na kunkikinina ayi kudya dikundi beni, nandi wunkwiza fwa. Ayi mawu mayiza monika. Eva ayi Adami balevula nsiku wu Yave ayi bayiza fwa. (Ngenesi 3:6; 5:5) Bosi kuntwala, mu kibila ki disumu beni, ‘lufwa lukotila mu batu boso.’ Bukyedika, “lufua luyala [buka ntinu] . . . , nate mu batu bobo bakhambu vola masumu banga Adami.” (Loma 5:12, 14) Diawu tukhambulu batu bavedila ayi tuzinganga ko mvu ka mvu dedi bo Nzambi kaba tombila. Vayi tunzinganga to ‘70 voti 80 di mimvu boti mangolo twidi,’ ayi luzingu lwitu ‘luwedi ziphasi ayi kyunda.’ (Minkunga 90:10) Mambu moso amomo, mammonikanga mu kibila ki luvunu lu Satana!

4. (a) Byuvu mbi tufweti zaba mimvutu? (b) Dedi buntubila Minkunga 15:1, 2, nani to kalenda ba nkundi Yave?

⁴ Yesu wutuba matedi Satana: ‘Nandi kasa zingila ko mu kyedika, bila mu nandi mwisi ko kyedika.’ Satana kasa baluka ko. Bila nandi wukhidi “vukumuna ntoto wumbimba widi batu” mu luvunu lwandi. (Nzaikusu 12:9) Vayi befu tumengi Satana katu vuna. Diawu tufweti zabila mimvutu mi byuvu bitatu. Bwidi Satana kamvuninanga batu bubu? Kibila mbi batu bamvuninanga? Ayi bwidi tulenda tubila kyedika thangu zyoso mwingi tubika zimbisa kikundi kitu na Yave dedi Adami ayi Eva?—Tanga Minkunga 15:1, 2.

5. Bwidi Satana kamvuninanga batu bubu?

⁵ Befu tulenda bika vunuka kwidi Satana. Mvwala Polo wutuba: ‘Befu tuzebi buboti mintambu myandi.’ (2 Kolinto 2:11, tala matangu madi va wanda mu nwt-TPO.) Tuzebi ti Satana wunkengidila nza yimvimba, kubunda mvandi binganga bi luvunu, minyadi mi política ayi batu bamvanganga lungosu. (1 Yoane 5:19) Diawu tulendi kwituka ko kuzaba ti Satana ayi zipheve zyandi zimbi bamvukumunanga batu badi kimfumu mu nza mwingi ‘kutuba mambu ma luvunu.’ (1 Timoteo 4:1, 2) Dedi batu bansadilanga mu zi empresa zinneni, bantubanga mambu ma luvunu matedi byuma bansumbisa voti bamvunanga batu mwingi kuba kwiba zimbongo.

6, 7. (a) Kibila mbi bulutidi bubi bakulutu ba binganga ba kuvuna? (b) Malongi mbi ma luvunu wunkuwanga bakulutu ba binganga kulonga?

⁶ Bulutidi bubi boti bakulutu ba binganga bawu bantuba luvunu. Kibila mbi? Bila boti mutu wunkikinina mu malongi mawu ma luvunu ayi wumvanga mambu Nzambi kanlenda, mutu awowo kalenda zimbisa lwaku lu kuzinga mvu ka mvu. (Hosea 4:9) Yesu wuzaba ti zimfumu zi binganga mu thangu’andi baba vunanga batu. Nandi wuba kamba: ‘Kyadi kwidi benu, minlongi mi zithumu ayi Bafalisi, lwidi batu ba luvunu! bila lundyengila mu ḿbu ayi ntoto mwingi mubalula wumweka, ayi bo lunnunga kuvanga mawu, lukunkitulanga wumweka wunkwenda ku bulungi,’ voti mbungulu. (Matai 23:15, tala matangu madi va wanda mu nwt-TPO.) Yesu wutuba ti bakulutu beni ba binganga baba buka tat’awu Nkadi’ampemba, widi ‘mvondi.’—Yoane 8:44.

 ⁷ Mu thangu’itu, mwidi mvandi bakulutu bawombo ba binganga. Bawu balenda tedulu minlongi, mimpelu, minlongisi mi zithumu, voti zithangununu zinkaka. Dedi Bafalisi, bawu balonganga ko kyedika kidi mu Dyambu di Nzambi, vayi “[bamviakisa] luvunu va buangu ki kiedika ki Nzambi.” (Loma 1:18, 25) Bawu banlonganga mambu ma luvunu dedi, “ngye kikinina Nzambi muna mabaka phulusu,” batu badi mwela wukhambu fwanga, mutu na kufwa wubwe butukanga, ayi banlonganga mvandi ti Nzambi wunkikininanga bakyeto bambundananga nyitu na bakyeto yawu voti babakala na babakala yawu ayi bakwelana.

8. Luvunu mbi minyadi mi política bambelama kutuba, vayi mbi befu tufweti vanga?

⁸ Minyadi mi política, mvandi bamvunanga mwingi kuvukumuna batu. Bawu bambelama kutuba mvandi luvunu lulutidi bo bala tuba ti bama twala ‘ndembama ayi nsika’ mu nza yimvimba. Vayi ‘mbungulu yingolu yela babwila mu kinzimbukila.’ Diawu tulendi kikinina ko minyadi mi política bantubanga ti mambu madi mu kuba mamboti. Bila befu ‘tuzebi buboti ti lumbu ki Yave, kyela kwiza buka mwivi va bwilu.’—1 Tesalonika 5:1-4.

9, 10. (a) Kibila mbi batu bamvuninanga, ayi bwidi mawu mansundukilanga? (b) Mbi tufweti tebukanga moyo matedi Yave?

⁹ Bubu, batu badi kimfumu basi ko to bawu bamvunanga. Buku yibasisa Yudhijit Bhattacharjee, yidi ntu dyambu “Kibila Mbi Befu Tumvuninanga?” yintuba ti “kuvuna kumana kituka khadulu yikadidila mu mintima mi batu.” Mansundula ti batu bammwena ti disi ko dyambu dimbi kuvuna. Batu banluta vunanga mwingi bakikyeba baveka, ḿba mwingi kusweka dyambu dimbi bavengi. Bawu bamvunanga mvandi mwingi kubaka zimbongu voti kubaka ndandu baveka. Buku beni yituba mvandi ti bakanka bamonanga ko zitsoni kuvuna batu “bakhambu zaba, bansalanga yawu, bakundi bawu voti batu banzolanga.”

¹⁰ Bwidi bunsundukilanga mambu moso ma luvunu? Mawu mamvanganga batu babika bwe kuyifyatila ayi mamvavanga bukundi na bankaka. Yindul’abu kyunda nnuni widi wukwikama mu nkazi’andi kalenda mona, bo kambakula ti nkazi’andi wuvanga kitsuza na dibakala dinkaka ayi wuntuba mambu ma luvunu mwingi kusweka dyambu dimbi kavanga. Voti, yindul’abu dibakala wuntovulanga nkyetu ayi bana bandi ku nzo, vayi vantwala batu bankaka wummonikina ti wuku bakyeba ayi kuba zola. Phila batu abobo, balenda vuna bankaka, vayi tufweti zaba ti balendi vuna ko Yave. Kibibila kintuba ti “bima bioso bidi va yambi ayi bisi ko bisuama va [mesu]” mandi.—Ebeleo 4:13.

11. Mambu mbi tulenda longuka mu kifwani kimbi ki Anania ayi Safila? (Tala fikula yidi va thononu.)

¹¹ Mu Kibibila mwidi kifwani ki bakwela bamweka Satana kavukumuna mwingi  bavuna Nzambi. Anania ayi Safila batomba kuvuna bapostolu. Bawu basumbisa mwa ndambu yi kitini kiawu ki ntoto ayi bavana to ndambu yi zimbongu kwidi bapostolu. Bakwela beni baba tomba kuyimonisa mu kimvuka ti baba batu bamboti, ayi bavuna bapostolu ti bavana zimbongu zyoso. Vayi Yave wumona ti bawu baba vuna ayi wuba sembila mu phila yifweni.—Mavanga 5:1-10.

12. Mambu mbi mela monikina bankwa luvunu bakhambu vilula madyela, ayi mu kibila mbi?

¹² Bwidi Yave kammwenanga batu bamvunanga? Batu boso bantubanga luvunu lungolu ayi bakhambu vilulanga madyela mu mambi mawu, bela sukila ku “diyenga di mbazu” dedi Satana. Bawu bela bungu mwingi babika bwe zinga. (Nzaikusu 20:10; 21:8; Minkunga 5:6) Mu kibila mbi? Bila Yave wuntadilanga batu bamvunanga phila yimweka na ‘batu bamvanganga mambu mambi va mesu mandi.’—Nzaikusu 22:15, tala matangu madi va wanda mu nwt-TPO.

13. Mbi tuzebi matedi Yave, ayi mbi mawu ma tunata kuvanga?

¹³ Befu tuzebi ti Yave ‘kasi ko mutu mwingi kavuna’ ayi “Nzambi kalendi vuna ko.” (Zintalu 23:19; Ebeleo 6:18) ‘Yave wunlendanga . . . lulimi lu luvunu.’ (Zingana 6:16, 17) Boti tutidi kunkwangidika, tufweti tubanga kyedika. Diawu befu ‘tuvunasananga ko befu na befu.’—Kolosai 3:9.

14. (a) Mbi bimvanga Baklisto bakyedika kuba diswasana na batu ba binganga bi luvunu? (b) Sudikisa nswa widi mu Luka 6:45.

¹⁴ Mbi bimvanga Baklisto bakyedika kuba diswasana na batu ba binganga bi luvunu? Befu ‘tuntubanga kyedika.’ (Tanga Zakalia 8:16, 17.) Polo wutuba: “[Befu tukimonisa] mu mambu moso [buka] bisadi bi Nzambi, . . . mu mambu makiedika.”  (2 Kolinto 6:4, 7) Yesu wutuba ti mambu mutu kantubanga ‘mu ntim’andi mamfuminanga.’ (Luka 6:45) Mawu mansundula ti mutu widi kyedika mu ntima, wela tubanga mambu makyedika. Nandi wala tuba kyedika kwidi batu kakhambu zaba, bo bansalanga yandi, kwidi bakundi ayi batu kanzolanga. Ndoko tumona bifwani bimmonisa bwidi tulenda monisina ti tuntubanga kyedika mu mambu moso.

15. (a) Kibila mbi didi dyambu dimbi kunata luzingu lukhambu fwana? (b) Mbi bilenda sadisa matoko kukindama mu ziphukumunu zi matoko mankaka? (Tala matangu madi va wanda.)

¹⁵ Boti widi ditoko, ḿba wutidi batu bankotanga yaku kikola bazola dyata yaku. Mu kibila ki mambu beni, matoko mawombo bannatanga luzingu lukhambu fwana voti lukabuka. Bawu bammonikanga ti badi batu bamboti bo badi na dikanda diawu ayi zikhomba mu kimvuka, vayi mu thangu bansadila internet voti badi na batu bakhambu sadilanga Yave, bammonisanga zikhadulu zimbi. Ḿba bawu bantubanga mambu makhambu fwana, bamvwatanga bikhutu bifyetama, bankuwanga minkunga mimbi, bankolwanga malavu, bantitikanga zitsunga zingolu, ayi bambakanga makangu ku kisweki voti bamvanganga mambu mankaka mambi. Bawu badi mu kuvuna matata mawu, zikhomba mu kimvuka ayi Yave. (Minkunga 26:4, 5) Vayi Yave zebi thangu befu tuntuba ti tu kunzitisanga vayi tumvanga mambu nandi kanlendanga. (Malako 7:6) Diawu, bulutidi kusadila mambu mantuba zingana: ‘Kawubika ntim’aku kumona nsoki bankwa masumu, vayi vuminanga Yave lumbu ka lumbu.’—Zingana 23:17. a (Tala Matangu madi va wanda.)

16. Phila mbi tufweti tambudila byuvu bidi mu nkanda mwingi kukota mu kisalu ki thangu ka thangu?

¹⁶ Boti ngye tidi kusala buka ntwami ntwala voti kukota mu kisalu ki thangu ka thangu, dedi ku Beteli, wulenda wesa theti nkanda widi byuvu. Mu thangu yi kuwesa nkanda beni, nkinza kuvana mimvutu mikyedika mitedi buvinya bwaku, ntindu bisavu wumvyokisilanga thangu ayi bwididi kilunzi kyaku. (Ebeleo 13:18) Mbi wufweti vanga boti ngye wuvengi dyambu dimbi dintatisa kilunzi kyaku ayi bakulutu ba kimvuka bakhambu zaba? Tomba lusalusu luawu mwingi wuba wukubama mu kusadila Yave na kilunzi kivedila.—Loma 9:1; Ngalatia 6:1.

17. Mbi tufweti vanga boti zimbeni ba ku tukuvula mambu matedi zikhomba zitu?

¹⁷ Mbi ngye wufweti vanga boti zimfumu bama kandika kisalu ki kusamuna ayi baku tumisa mwingi wutuba matedi zikhomba zyaku? Wufweti kuba kamba mambu moso  zebi? Mbi Yesu kavanga bo mfumu yi Loma kamvana byuvu? Mu kulandakana nswa wu Kibibila wuntuba ti vadi ‘thangu yi kukala swi ayi thangu yi kukoluka,’ khumbu zinkaka Yesu kasa tuba ko ni dyambu! (Mpovi 3:1, 7; Matai 27:11-14) Befu monikina mambu ma phila ayoyi, tufweti kala swi ayi kukikeba mwingi tubika tula zikhomba zitu va kingela.—Zingana 10:19; 11:12.

18. Kiyeku mbi twidi boti bakulutu ba kimvuka ba kutu kuvula byuvu bitedi khomba bevola disumu?

¹⁸ Mbi wulenda vanga boti khomba mu kimvuka bevola disumu ayi ngye zebi mambu beni? Bakulutu ba kimvuka badi kiyeku ki kukyeba kimvuka kitatamana kivedila, diawu bawu balenda kudinda wutuba mambu zebi. Mbi wala vanga boti mutu beni widi nkundi’aku voti musi dikanda dyaku? Kibibila kintuba: ‘Mbangi yikyedika wuntubanga kyedika.’ (Zingana 12:17; 21:28) Diawu, ngye widi kiyeku ki kutuba kyedika kyoso kwidi bakulutu ba kimvuka, kubika sweka ni dyambu. Bawu badi nswa wu kuzaba mambu moso mwingi bazaba phila yimboti yi kusadisila khomba widi mu nzimbala ayi kunsadisa kavutula kikundi kyandi na Yave.—Yakobi 5:14, 15.

19. Mbi tunkwiza longuka mu dinlongi dinkwiza?

¹⁹ Ntinu Davidi wusambila kwidi Yave: ‘Ngye tidi ti kyedika kiba mu khati ntima wu mutu.’ (Minkunga 51:6) Davidi wuzaba ti kimutu kikyedika twidi, kimfuminanga mu khati ntim’itu. Mu mambu moso ma luzingu, Baklisto bakyedika ‘bantubanga kyedika bawu na bawu.’ Phila yinkaka tulenda monisina ti twidi diswasana na batu ba binganga bi luvunu, yidi mu kulonga kyedika kidi mu Kibibila. Mu dilongi dinkwiza, tunkwiza longuka bwidi bu kuvangila mawu mu kisalu kitu ki kusamuna.