YIBUTUKA mu mvu 1934. Matata mami, Fred ayi Edna Molohan, baba Minlonguki mi Kibibila (Zimbangi zi Yave) mu 20 ma mimvu. Yintondanga beni bo bandongisa kuzola Yave. Befu tuba zingila ku Parsons, divula dimweka dilwelu diba ku Sudoeste yi Kansas. Zikhomba baba mu kimvuka kitu, baluta ba Baklisto basolo. Dikanda ditu diba beni kifuza ki kukwenda mu zikhutukunu ayi mu kisalu ki kusamuna. Mu kisabala va masika, twaba salanga mu bibwangu bimvyokanga batu bawombo, bubu tuntedilanga kisalu beni kimbangi ki baboso. Khumbu zinkaka tuba vonganga, vayi Tat’ami wuba tunatanga mwingi twe fifa gelado.

Mwa kimvuka kitu, kiba kizunga kinneni ki kusamunina, muba zindima ayi mavula mawombo malwelu. Bankaka babasa tuvananga ko zimbongo mu bilongulu bitu, vayi baba tuvananga makundi ma kudya, maki voti makyo ma tsusu voti ku tuvana zitsusu zimoyo. Tat’ami wuvana mvandi zimbongo mu zibuku beni, kuvanga mawu kunsadisa kusadila bidya beni mwingi kudikisa dikanda.

Matata mami baba fonógrafo mwingi kusadila mu kisalu ki kusamuna. Minu yiba beni mwana kilezi mwingi kusadila yawu, vayi yaba zolanga kusadisa tat’ami ayi mam’ami kusikisa masolo masweku mu fono ma Yaya Rutherford bo baba vutukilanga mutu ayi mu ndongukulu yi Kibibila.

Tat’ami wutula kyuma kintyamunanga mbembu va yilu dikalu ditu Ford yi mvu 1936, ayi wukitula diawu buka dikalu dintyamunanga mbembu. Luba lusalusu lunneni mu kisalu ki kusamuna. Theti tuba tulanga nkunga mwingi kuvanga batu bavwa nkinza, bosi tuba tulanga dilongi di Kibibila. Kutsuka, tuba vananga bilongulu kwidi batu baba zolanga malongi beni.

Ku mwa divula di Cherryvale, Kansas, Tat’ami wunata dikalu dintyamunanga mbembu ku kibwangu kimweka ki luvundulu, kuba batu baba vunda nkadu mu kilumingu. Diawu, mapolice mayiza ayi bakamba Tat’ami katula dikalu ditu ku khonzo yinkaka. Tat’ami wubotula diawu ayi wuditula va kibwangu  kifikama mwingi baboso bayuwa buboti. Diba dyambu dimboti beni kuba na Tat’ami ayi khomb’ami wunkulutu Jerry mu zithangu azyozi.

Mu mimvu amyomi, befu tuba samunanga mu mavula muba batu bakhambu zolanga kulonguka Kibibila. Dedi bo yibe tubila va thononu, befu twaba kwendanga va khati bwilu mwingi kubika minkanda ayi mwa zibuku ku tsi myelu mi zinzo zi batu. Bosi twaba dengananga ku divula dinkaka mwingi kuzaba ti masodi basa bwila ko ni khomba yimweka.

Kyuma kinkaka yaba zolanga mu kisalu ki kusamuna, kiba kudyata mu mangumba na minkanda misonama mu zinyitu zitu. Befu twaba sonikanga bisona binneni ayi kudyata mu divula dimvimba. Yintebuka moyo kilumbu kimweka zikhomba bavyokila va nzo’itu ayi baba dyata na minkanda miba tuba “Binganga Bidi Mintambu Minneni ayi Bankwibanga Batu.” Bawu batonina ku nzo’itu, badyata kilomete kimweka ayi ndambu ku divula ditu, bosi babwe vutuka ku nzo’itu. Mayangi beni, bila ni mutu kasa kuba tula ko nkaku, vayi bawombo baba tomba kuzaba mambu mbi maba vyoka.

Dikanda ditu diyenda mu lukutukunu lunneni ku divula di Texas. Tat’ami waba sadilanga mu comboio, ayi tuba lwaku lu kukwendila mu comboio mu khambu futa mu zikhutukunu zinneni ayi kumona basi dikanda ditu. Khomba nkulutu yi mam’ami, Fred Wismar, ayi nkazi’andi, Eulalie, baba zingila ku divula di Temple, Texas. Titi’ami Fred wulonguka kyedika va thononu mvu 1900 bo kaba ditoko, wubotama, ayi wulonga zikhomba zyandi zyoso, kubunda mvandi mam’ami mambu nandi kalonguka. Zikhomba ku Texas bazaba buboti Titi’ami Fred, bila nandi wuba nsungi wu divula. Nandi wuba mutu wumboti, wuyangalala, wuba kifuza kiwombo ayi kifwani kimboti kwidi minu.

Mu mvu 1941, tuyendila mu comboio ku Saint Louis, Missouri, mu lukutukunu lunneni. Batumisa matoko moso kukala ku ntwala mwingi kulandakana dilongi di Yaya Rutherford diba tuba “Bana ba Ntinu.” Kutsuka dilongi, 15.000 di matoko moso bayituka beni, bila Yaya Rutherford ayi zikhomba zinkaka ziba yandi ba tuvana buku yimona yiba ntu dyambu: Bana.

Mu Ngonda Yinna, mvu 1943 tuyenda mu lukutukunu lu divula ku Coffeyville, Kansas luba ntu dyambu “Batedulu Mwingi Kuvanga Dyambu.” Tuyuwa ndubu bavana yiba tuba ti bimvuka byoso binkwiza ba kikola kimona bantedilanga Nzo Nkanda yi Kisalu ki Nzambi. Tutambula mvandi mwa buku yiba 52 di malongi tulenda sadila mu kikola beni. Mu mvu beni, minu yivanga dilongi dyami ditheti mu kikola beni. Lukutukunu alolo, nkinza beni luba kwidi minu, bila muawu minu ayi zikhomba zinkaka tubotama mu mwila mweka wuba va ndeku ndima yiba yifika na vama tukutakana.

Yimanisa kikola mu mvu 1951 ayi yibaka makani mu mambu yinkwiza vanga mu luzingu lwami. Khomb’ami Jerry wusadila ku Beteli. Mvami yaba tomba kwenda kuna, diawu yiwesila nkanda mwingi kusadila ku Beteli. Vasa vyoka ko thangu yiwombo, bathumisa ku Beteli ayi yitona kusala mu kilumbu 10 Ngonda Yintatu, mvu 1952. Makani mamboti beni yibaka, bila matsadisa kubwela sadila Yave mu lukwikumunu.

Minu yiba tomba kusadila ku baba basisanga zi levista ayi bilongulu bitu. Vayi yisa vanga ko kisalu akyoki, bila yiba sadisanga kunata bidya va meza, bosi yiyiza sadila ku kikuku. Yiyangalala mu kisalu beni ayi yilonguka mambu mawombo. Tuba vingasananga mu kisalu beni, diawu yiba bakilanga thangu mwingi kuvunda nkadu. Yaba kwendanga beni ku kibwangu kiba zi buku zi Beteli ayi yaba sadilanga zi buku ziwombo mu ndongukulu yi Kibibila yi miveka. Mawu matsadisa kukindisa kiminu ayi kikundi kyami na Yave. Ayi yibaka mayindu ma kubwela sadila Yave ku Beteli mu mimvu yilenda nunga. Jerry wubasika ku Beteli mu mvu 1949 ayi wukwelana ayi Patricia, vayi nzo’awu yiba yifikama ku Brooklyn ayi bawu batsadisa ayi bakhindisa bo yiba wumona ku Beteli.

Vasa vyoka ko thangu yiwombo bo yikota ku Beteli, zikhomba batona kutomba Zibetelita balenda tula mu dingumba di zikhomba mwingi kuvanganga disolo di baboso. Zikhomba ziba mu dingumba beni baba vana kiyeku ki kukwenda ku bimvuka biba 320 di bilomete ku Brooklyn. Mu bimvuka beni, bawu baba kiyeku ki kuvanga malongi kwidi batu boso ayi  kusala na zikhomba mu kisalu ki kusamuna. Mvama yiba mu dingumba di zikhomba beni basola. Mu mayangi, yitona kwenda mu bimvuka ayi kuvanga malongi kwidi baboso. Mu thangu yinani malongi kwidi baboso maba vanganga kilokulu kimweka. Minu yaba kwendilanga ku bimvuka beni mu comboio. Yintebuka moyo mu lumingu lumweka va masika mu thangu kisivu mu mvu 1954. Yimaka mu comboio yiba vutuka ku Nova York, makani maba ma kutuka ku Beteli va thononu bwilu. Vayi bo tuba vutuka, mvula yitona kunoka ayi phemu yingolu. Comboio yisa bwe nunga ko kusala ayi yisa tuka ko ku Nova York nate mu kikunda mu kilokulu kintanu va meni. Yikuluka mu comboio, yiyenda kwe maka mu dikalu diba kwenda ku Brooklyn ayi bo yituka, yitona kusala ku kikuku. Yisa vitila ko mu thangu ayi yiba beni wuvonga bila yisa leka ko bwilu boso. Vayi mayangi yiba mu kusadila bimvuka ayi kuzaba zikhomba zimona, malutidi na mangolo moso yivanga.

Mu mimvu mitheti ku Beteli, yitona mvandi kwendanga mu ndongukulu yi Kibibila yiba vangiminanga ku dibweti ditu di rádio WBBR. Baba vangila yawu ku kibanga kimweka, mu nzo 124 ku Columbia Heights. Yaya Alexander H. Macmillan, wusadila ku Beteli mu mimvu miwombo, wuba kwenda khumbu ziwombo ku dibweti beni. Befu tuba kuntedilanga Yaya Mac. Nandi wuba kifwani kimboti kwidi befu matoko tuba ku Beteli, bila nandi wutatamana kukwikama kheti mu zithotolo zyoso kamonikina.

Mu mvu 1958, baphana kiyeku kimona ki kusala na zikhomba ziba mu Kikola ki Kibibila ki Ngiliadi. Minu yiba sadisanga zikhomba zi babakala ayi zi bakyeto kubaka minkanda mi kuba vana nswa wu kukwenda mu zitsi batambula biyeku ayi yiba kubikanga mamoso mwingi bavutuka. Kuba beni bukalu kwendila ku kibwangu kinkaka mu lupulanu, diawu zikhomba ziwombo baba basikanga ku kikola ki Ngiliadi baba kwendanga ku África ayi ku Ásia, baba kwendilanga mu makumbi manneni maba natanga mimfuna. Kutwala, bo badekula thalu yi zimbongo mu lupulanu, zikhomba ziwombo baba mu kisalu ki misyoni baba kwendilanga mu lupulanu.

Mu mvu 1960, yitomba lupulanu lulenda ku tubotula ku Estados Unidos ti ku Europa mwingi kukwenda mu zikhutukunu zinneni mu mvu 1961. Yiyendila mvandi mu lupulanu beni ku Hamburgo, Alemanha. Bo lukutukunu lumana, zibetelita zitatu ayi minu tubotuka ku Alemanha ayi tuyenda ku Itália mu dikalu mwingi kwe mona filiali yi Roma. Bo tubotuka kuna, tuyenda ku França, tuvyoka myongo mi Pireneus, bosi tukota ku Espanha ku bakandika kisalu kitu ki kusamuna. Befu tununga kuvana mwa bilongulu kwidi zikhomba zitu ku Barcelona, bila tutula biawu mu biphupulu mwingi kuba buka mikhayilu. Mayangi beni kuba zaba! Bo tubotuka kuna, tuyenda ku Amsterdão ayi tuvutuka ku Nova York mu lupulanu.

Mu mvu 1962, yitambula kiyeku ki kusadisa 583 di zikhomba kukubama mwingi kukwenda mu zikhutukunu zimfunu ziba vangama mu nza yimvimba. Lukutukunu beni luvangimina mu mvu 1963 ayi luba ntu dyambu “Zitsangu Zimboti zi Mvu ka Mvu.” Zikhomba beni ziba lwaku lu kukwenda mu zikhutukunu ku Europa, Ásia, ayi ku Pacífico Sul, ayi bayenda  ku Honolulu, Havaí, ayi ku Pesadena, Califórnia. Bayenda mvandi ku Líbano ayi ku Yolidani mwingi kulonguka matedi zitsi bantubila mu Kibibila. Dingumba ditu divanga mangolo mwingi kukubika lupulanu, bibwangu zikhomba bankwiza ladila ayi mvandi kubaka minkanda miba vana nswa mwingi zikhomba benda mu zitsi zinkaka.

Mvu 1963 nkinza beni wuba kwidi minu mu kibila kinkaka. Mu kilumbu 29 Ngonda Yinsambanu, yikwela Lila Rogers wufumina ku Missouri, ayi wutona kusala ku Beteli mu mvu 1960. Bo vavyoka sabala mweka tona tukwelana, Lila ayi minu tuyangalala beni bo tuba mu dingumba di zikhomba zi Beteli baba kwenda mu zitsi ziwombo ayi tuyenda ku Grécia, ku Ngipiti ayi ku Líbano. Bo tubotuka kuna, tuyendila mu lupulanu ku Jordão. Vayi, bakandika kisalu kitu ki kusamuna ayi zimfumu basa tuvana ko minkanda miba ku tuvana nswa wu kukala ku tsi beni. Diawu, tusa zaba ko mambu mbi malenda tumonikina befu vitila kuna. Vayi mayangi beni tuba bo tumona dingumba di zikhomba zi bakyeto ayi zi babakala baba ku tuvingila ku nganda lupulanu ayi baba simba nkanda mweka wukula wuba tuba “Ndizulu Mboti Zimbangi zi Yave”! Mayangi beni kumona zitsi bantubila mu Kibibila ayi kumona bibwangu bizingila Abalami, Izaki, ayi Yakobi, bibwangu Yesu ayi bapostulu balongila, ayi kibwangu malongi ma Klisto matona kutyamuka “nate musukisina nza.”—Mavanga 13:47.

Lila wuku tsadisanga beni mu biyeku byoso tuma tambula mu 55 di mimvu. Befu tuyenda khumbu ziwombo ku Espanha ayi Portugal bo bakandika kisalu kitu ki kusamuna. Tuba lwaku lu kukindisa zikhomba ayi kuba vana bilongulu ayi byuma binkaka baba tomba. Befu tuba bakubama mwingi kwe mona zikhomba zitu ziba ku buloku bu Cádiz, Espanha. Yiyangalala beni, bila yiba kuba vangilanga malongi malenda kuba kindisa.

Tona mu mvu 1963, yikubika byabyoso biba tombulu mwingi kukwenda mu zikhutukunu zimfunu ku África, América Central ayi Sul, Austrália, Europa, Extremo Oriente, Havaí, Nova Zelândia ayi Porto Rico. Lila ayi minu tubaka lwaku lu kukwenda mu zikhutukunu ziwombo zinneni zimboti, dedi lukutukunu luvangimina mu mvu 1989 ku Varsóvia, Polónia, tulendi zimbakana ko ziawu. Zikhomba ziwombo ku Rússia banunga kukwiza mu lukutukunu beni. Luawu luba lukutukunu lutheti lunneni baba! Befu tuzaba zikhomba ziwombo baba ku buloku ku União Suviética mu mimvu miwombo mu kibila ki kiminu kiawu.

Mu mayangi yitambudila kiyeku kinkaka ki kwe talanga ayi kukindisa makanda ma Beteli ayi zikhomba badi mu kisalu ki misyoni mu nza yimvimba. Mu khumbu yitsuka, tuyenda kwe mona zikhomba ku Coreia do Sul ayi tununga kukutakana na 50 di zikhomba baba ku buloku ku divula di Suwon. Bawu baba mayindu mamboti ayi baba bakubama mwingi kubwe sadila Yave mu khambu nkaku. Kukutakana yawu, ku tukindisa beni!—Loma 1:11, 12.

Minu yimmonanga phila Yave kansakumuninanga dikanda dyandi mu mimvu miwombo. Bo yibotama  mu mvu 1943, kuba to 100.000 di minsamuni. Vayi bubu bama vyoka 8.000.000 di batu bansadilanga Yave mu 240 di zitsi. Kisalu kingolo ki zikhomba zimbanga ku Ngiliadi bamvanganga, kinsadisa beni mu ndyonzukulu yi kimvuka ki Yave. Mawu ma thwadisa beni mayangi mu kuzaba ti yisala mu kithwadi na zikhomba ziwombo ziba ku Ngiliadi ayi kuba sadisa mu biyeku biawu.

IYinkwangalala beni mu makani yibaka ma kusadila luzingu lwami mwingi kusadila Yave bo yiba ditoko ayi kuwesa nkanda mwingi kusadila ku Beteli. Yave wu kutsakumunanga beni mu mimvu myoso amimi. Kubotula byuma binkaka tunzolanga mu kisalu kitu ku Beteli, Lila ayi minu tuzola beni lwaku tubaka lu kusamuna na bimvuka biwombo ku Brooklyn mu 50 ma mimvu ayi tubaka bakundi bawombo bakyedika.

Minu yikhidi sadila ku Beteli, ayi Lila wuku tsadisanga beni kadika kilumbu. Kheti yeka 84 di mimvu, yidi beni mayangi kuzaba ti yikhidi nunga kuvanga kisalu kinkinza ayi kusadisa dingumba di filiali mu kisalu ki kuveka minkanda.

Mayangi beni kuba wumweka mu kimvuka ki Yave ayi kumona kyedika kidi mu mambu madi mu Malaki 3:18 kintuba: ‘Beno lwela bwe mona diswasana mu mutu wusonga ayi wu mbi, kwidi mutu wunsadilanga Nzambi ayi wo wukhambu kunsadilanga.’ Kadika kilumbu tummona ziphasi kubwelama mu nza yi Satana ayi batu bakhambu kivuvu ayi mayangi mu luzingu. Vayi batu banzolanga ayi bansadilanga Yave, badi mayangi mu luzingu, kheti banzingila mu bilumbu biphasi ayi badi kivuvu kikyedika mu bilumbu binkwiza kuntwala. Kiyeku kimfunu beni kukamba bankaka zitsangu zimboti! (Matai 24:14) Thangu yikhufi yisyedi, Kintinu ki Nzambi kyela balula nza ayiyi paladizu. Mu mayangi tumvingila thangu beni! Bila kadika mutu wela ba buvinya, mayangi ayi luzingu lukalumani.