Batu Bankabilanga Badi Mayangi Makyedika
‘Mayangi ma kuvana, malutidi.’—MAVANGA 20:35.
MINKUNGA: 76, 110
1. Bivisa mbi bimmonisa ti Yave wunkabilanga byuma byandi?
AVA Yave katona vanga byuma byoso, naveka to wuba mu nza yimvimba. Diawu kabakila makani ma kuvana moyo kwidi bivangu binkaka ku diyilu ayi va ntoto. Yave widi ‘Nzambi yi mayangi,’ ayi wunzolanga kukabila batu byuma bimboti. (1 Timoteo 1:11; Yakobi 1:17) Kiawu kibila Yave kantombila befu mvitu tuba mayangi, nandi wutulonga bwidi tulenda bela koku kuyalubuka.—Loma 1:20.
2, 3. (a) Kibila mbi tumbelanga mayangi befu kabila bankaka? (b) Mbi tunkwiza longuka mu dilongi adidi?
2 Yave wuvangila batu mu kifwani kyandi. (Ngenesi 1:27) Mansundula ti nandi wutu vangila na zikhadulu kadi. Mwingi tubaka mayangi makyedika ayi lusakumunu lu Yave, tufweti landakana kifwani kyandi. Tufweti vwa bankaka nkinza ayi kuba kabilanga byuma bitu. (Filipi 2:3, 4; Yakobi 1:5) Kibila mbi? Bila buawu Yave katuvangila. Kheti twidi batu ba masumu, tulenda landakana kifwani ki Yave ayi kukabilanga mvandi bankaka.
3 Twanlonguka malongi ma Kibibila matedi kibila mbi tufweti kabilanga voti kuba koku kuyalubuka. Tunkwiza longuka kibila mbi Yave kambelanga mayangi befu kabila bankaka. Tunkwiza longuka mvandi bwidi kukabila bankaka kulenda kutu sadisila kuvanga kisalu Yave katu vana ayi kibila mbi tumbelanga mayangi befu kabila bankaka. Ayi mvandi tunkwiza tubila kibila mbi tufweti tatamana kukabilanga.
YAVE WUNKWANGALALANGA BO TUNKABILA BANKAKA
4, 5. Bwidi Yave ayi Yesu bammonisinanga ti bankabanga, ayi bwidi tulenda landikinina kifwani kiawu?
4 Yave tidi tulandakana kifwani kyandi, ayi wunkwangalalanga befu kabila bankaka. (Efeso 5:1) Yave mvandi kantomba batu baba mayangi. Tuzabidi mawu bila nandi wutu vangila mu phila yimboti, nandi wuvanga ntoto kibwangu kimboti beni kwidi befu, ayi byabyoso bidi muawu mwingi tuzingila mu mayangi. (Minkunga 104:24; 139:13-16) Tunzitisanga Yave bo tunyangidika bankaka.
5 Tunlandakana mvandi Yesu, bila nandi wutuvana kifwani kimboti kitedi bwidi tulenda kabila bankaka. Nandi wutuba: ‘Bila Mwana mutu kasa kwiza ko mwingi bansadila, vayi wuyiza mwingi kusadila bankaka ayi kuvana moyo’andi mwingi kukula batu bawombo.’ (Matai 20:28) Ayi mvwala Polo wukindisa Baklisto: ‘Lutatamana kuba mayindu mamweka mo maba mu Yesu Klisto. . . Wukikulula naveka, wukikinina kituka mvika.’ (Filipi 2:5, 7) Diawu, tufweti kuyikuvusa, ‘Bwidi yilenda landikinina kifwani ki Yesu mu phila yifwana?’—Tanga 1 Petelo 2:21.
6. Mbi Yesu ka tulonga mu nongu yi musi Samalia? (Tala fikula yidi va thononu.)
6 Yave wunkwangalalanga beni na kumona ti tunlandakana buboti kifwani nandi ayi Yesu ba tuvana. Tumvangila mawu mu kuvwa bankaka nkinza ayi kutala phila mbi tulenda kuba sadisila. Yesu wumonisa kibila tufweti vangila mawu bo kata nongu yi musi Samalia. (Tanga Luka 10:29-37.) Yesu wulonga minlandikini myandi ti bawu bafweti sadisa bankaka, mu khambu tadila nani mutu beni kadi ayi musi mvila mbi. Wuntebuka moyo kibila mbi Yesu katubila nongu ayiyi? Bila dibakala dimweka musi Yuda wunyuvula: ‘Nani wadi yami?’ Mvutu wu Yesu wu tulonga ti tufweti ba buka musi Samalia mu kukabilanga bankaka boti tutidi kukwangidika Yave.
7. Bwidi tulenda monisina ti phila Yave kamvangilanga mambu yawu yilutidi? Sudikisa.
7 Kibila kinkaka tufweti kabila, kidi mu mambu mamonika ku lumbu lu Edeni. Satana wutuba ti Adami ayi Eva bala luta ba mayangi ba kulevula nsiku wu Yave ayi kutsikika mayindu mu mamboti mawu veka. Eva wuba bwimi ayi wuba tomba kuba buka Nzambi. Adami wumonisa bwimi bo katomba kuyangidika Eva kuvyoka Nzambi. (Ngenesi 3:4-6) Mu kibila beni, bayiza monikina mambu ma kyunda. Bifwani biawu bi tumonisa ti mutu kalendi ba ko mayangi na kuba bwimi. Befu ba mamboti ayi kukabila bankaka, twala monisa ti tunkikininanga ti phila Yave kamvangila mambu yawu to yilutidi.
VANGA KISALU YAVE KATUVANA MWINGI TUVANGA
8. Bibila mbi Adami ayi Eva baba mwingi kuyindula bankaka ava kubaka makani babaka?
8 Kheti Adami ayi Eva baba zingila ku lumbu lu Edeni baveka, bawu baba kibila ki kuyindula mvandi bankaka ava kubaka makani babaka. Kibila mbi? Bila Yave wuba vana kisalu mwingi bavanga. Nandi wuba kamba bawesa ntoto mu bana bawu ayi bakitula wawu paladizu. (Ngenesi 1:28) Ḿba Adami ayi Eva baba tomba bana bawu baba mayangi, dedi bo Yave kaba tombila baboso baba mayangi. Bawu baba lwaku lu kusala va kimweka ayi kukitula ntoto woso paladizu. Kiba kisalu kinneni beni!
9. Kibila mbi batu babina bakila mayangi mu kubalula ntoto paladizu?
9 Khanu batu boso bakhambu masumu basala kithwadi na Yave mwingi kubalula ntoto paladizu ayi kuvanga luzolo lwandi. Yawu to phila baba mwingi bakota mu luvundulu lu Yave. (Ebeleo 4:11) Yindul’abu phila mayangi babina baka boti bavanga kisalu beni! Yave khanu wuba sakumuna beni boti basa ba ko bwimi ayi boti bakyeba buboti bankaka.
10, 11. Mbi byala kutu sadisa kusamuna ayi kuvanga minlonguki?
10 Bubu mvandi, Yave wutu vana kisalu kilutidi mwingi tuvanga. Nandi tidi tusamuna ayi tuvanga minlonguki. Mwingi tuvanga kisalu beni, tufweti monisa ti tumvwanga
bankaka nkinza. Diawu, tulenda nunga kuvanga kisalu beni befu ba mayindu mamboti matedi: luzolo twidi mu Yave ayi kwidi batu bankaka.11 Polo wutuba ti nandi ayi Baklisto bankaka mu sekulu yitheti baba ‘salanga va kimweka ayi Nzambi’ bila baba samunanga ayi kulonga batu kyedika. (1 Kolinto 3:6, 9) Bubu, befu mvitu tulenda ‘sala va kimweka ayi Nzambi’ mu kusadila thangu’itu, mangolo ayi byuma bitu mwingi kuvanga kisalu ki kusamuna Nzambi ka tuvana. Lwaku lunneni beni twidi!
Kusadisa bankaka kulonguka kyedika kwala kuvana mayangi (Tala lutangu 12)
12, 13. Mu mbwenu’aku, ndandu mbi tulenda baka befu sadisa bankaka baba minsamuni?
12 Kukabila thangu’itu ayi mangolo bo tunsamuna, kutu twadisanga beni mayangi. Zikhomba ziwombo babaka lwaku lu kuvana ndongukulu yi Kibibila, batuba mawu. Tunkwangalalanga beni kumona mayangi minlonguki mitu mi Kibibila bambanga ba kuvisa mbi Kibibila kilenda kutulonga, bo kiminu kiawu kinkonzuka, bo bambalula nzingulu’awu ayi bantona kukamba bankaka mambu banlongukanga mu Kibibila. Yesu wuyangalala beni mu thangu 70 di minsamuni kafila ‘mivutuka mu mayangi’ mu kibila ki mambu mamboti bamona bo bayenda samuna.—Luka 10:17-21.
13 Zikhomba zitu mu nza yimvimba, bankwangalalanga beni bo bammona phila tsangu yi Kibibila yinsadisila batu kubalula nzingulu’awu. Dedi, khomba mweka yi nkyeto widi dizina Ana, kasi ko wukwela ayi wuba tomba bwela thangu’andi mu kisalu ki Yave. * (Tala matangu madi va wanda.) Diawu kayenda zingila ku Europa Oriental kuba tsatu yi minsamuni. Nandi wusonika: “Akuku kwidi phwasa yiwombo yi kuvana ndongukulu yi Kibibila, ayi yinzolanga beni. Kisalu kyami kwidi Yave ki kuphananga beni mayangi. Bo yimvutukanga ku nzo, yitsikikanga ko mayindu mu mambu mami veka. Vayi yinyindulanga zitsatu ayi mambu mantwadisanga dibamu kwidi minlonguki myami mi Kibibila. Yinyindulanga phila yilenda kuba kindisila ayi kuba sadisa. Kuvanga mawu kutsadisa yivisa kyedika akiki: ‘Mayangi ma kuvana, malutidi mayangi madi mu kutambula.’”—Mavanga 20:35.
Tubika tsikika mayindu mu phila batu ba tutambudilanga, bila kusamuna dyambu di Nzambi kutu vananga mayangi
14. Bwidi wulenda bakila mayangi kheti batu basinzola ko kukuwa?
14 Kheti batu basinkuwa ko bo tunsamuna, befu tulenda baka mayangi bila tuku bavananga lwaku lu kukuwa zitsangu zimboti. Yave tidi tuvanga mambu kakamba Yehezekeli: ‘Ngye wufweti kuba kamba mambu mami, kheti bankuwa voti ndamba.’ (Yehezekeli 2:7; Yesaya 43:10) Tubika tsikika mayindu mu phila batu ba tutambudilanga, Yave wumvwanga nkinza mangolo tumvanga. (Tanga Ebeleo 6:10.) Khomba mweka yi dibakala wutuba matedi kisalu kyandi ki kusamuna: “Befu tunkunanga, tumvwilanga voti tunlembanga nlangu ayi tundindanga kwidi Yave na dyana ti kalenda menisa kyedika mu mintima mi batu beni.”—1 Kolinto 3:6.
Bo tumvanga mangolo ma kusamuna mu zinzo zyoso zidi va kizunga kitu, tumvananga batu lwaku lu kukuwa zitsangu zi Kintinu (Tala lutangu 14)
BWIDI TULENDA BAKILA MAYANGI?
15. Bukyedika ti tufweti kabila to kwidi batu ba tuvutulanga matondo? Sudikisa.
15 Yesu kantomba tukabilanga bankaka bila mawu maku tuvananga mayangi. Befu ba koku kuyalubuka, batu bawombo mvandi bela vanga mawu. Diawu nandi katu kindisila: ‘Luba kifu ki kukabila bankaka, ayi bela kulukabila benu mvinu. Bela dukudila mu bikhutu binu byuma bifwana, babanda bumboti ti biawu binsapuka. Kibila mu kitezo munzongila bankaka, kiawu bela ku luzongila benu mvinu.’ (Luka 6:38) Kuba koku kuyalubuka, kwisinsundula ko ti batu boso wunkabila bala kuvutulanga matondo. Diawu kheti batu basimvutula ko matondo, tatamana kukabilanga. Bila wusa zaba ko mambu mbi mamboti wulenda vangila bankaka mu kuba kifu beni.
16. Banani tufweti kabila ayi kibila mbi?
16 Mutu wunkabilanga bankaka mu ntima woso, kavangilanga ko mawu mwingi bankaka mvandi bamvana. Yesu wutuba: ‘Mu thangu wumvangisa ngyengu, tumisa minsukami, babela binama, bantyudikanga, ziphofo; ayi ngye wela baka mayangi, bila batu beni basi ko ni kyuma mwingi kuvutudila mambu moso wuba vangila.’ (Luka 14:13, 14) Kibibila mvandi kintuba: ‘Mutu wunkabanga wela sakumunu,’ ayi ‘Mayangi kwidi mutu wowo wumvwanga nkinza mutu wulebakana.’ (Zingana 22:9; ) Befu tufweti kabanga bila tutidi kusadisa bankaka. Minkunga 41:1
17. Ziphila mbi zinkaka tulenda kabila zyela kutu twadisa mayangi?
17 Mu thangu Polo kavutukila mambu Yesu katuba ti ‘mayangi ma kuvana, malutidi mayangi madi mu kutambula,’ nandi kabasa tubila ko to matedi kuvana byuma bitu. Mvandi tulenda vana batu khindusulu, malongi ma Kibibila, ayi kuba sadisa. (Mavanga 20:31-35) Mu mambu Polo kavanga ayi katuba, nandi wu tulongisa ti nkinza beni kukabila bankaka thangu’itu, mangolo, luzolo ayi kikundi kitu.
18. Mbi batu bawombo balonguka beni batuba mu matedi kukabilanga bankaka?
18 Batu banlongukanga mavanga ma batu, babakula mvandi ti kukabila bankaka kutu vananga mayangi. Buku mweka yintuba ti batu bankwangalala beni ba kuvanga dyoso dyambu mwingi kusadisa bankaka. Batu Balonguka beni bantubanga ti, bo tunsadisa bankaka, tummonanga ti luzingu lwitu lwidi tsundu ayi vadi kibila tunzingilanga. Mvandi bantubanga ti batu bakivananga mwingi kuvanga kisalu kilenda sadisa bankaka mu khambu futu, banluta bakanga mayangi ayi buvinya. Tuyitukanga ko mu mambu beni babakula, bila Mvang’itu wu luzolo Yave, tona mu thama wutu kambanga ti kukabila bankaka kutu vananga mayangi.—2 Timoteo 3:16, 17.
TATAMANA KUKABILANGA
19, 20. Kibila mbi ngye wutidi kukabilanga bankaka?
19 Boti batu bankalanga yitu bakivwanga to nkinza baveka, mawu malenda tula phasi kwidi bankaka kutatamana kuba kifu ki kukabilanga. Vayi Yesu wutu tebula moyo ti zithumu ziwadi zilutidi mu minsiku zidi: Kuzola Yave mu ntim’itu woso, mwela, mayindu, ayi mangolo mitu moso ayi kuzola badi yitu dedi bo tukizodilanga befu veka. (Malako 12:28-31) Tuma longuka mu dilongi adidi ti batu banzolanga Yave, banlandakananga kifwani kyandi. Yave ayi Yesu bankabilanga, diawu ba tukindisila tulandakana kifwani kiawu, bila bawu bazebi ti mawu mala tuvana mayangi makyedika. Boti twidi koku kuyalubuka mu kisalu ki Nzambi ayi kwidi batu bankaka, twala zitisa Yave ayi twala baka ndandu befu veka ayi bankaka.
20 Tuzebi ti ngye widi mu kuvanga mangolo mwingi kukabila ayi kusadisa bankaka, dedi zikhomba zyaku mu kimvuka. (Ngalatia 6:10) Ngye tatamana kuvanga mawu, batu bela kutondanga ayi kuzola, ayi wela ba mayangi. Kibibila kintuba: ‘Mutu wunkabilanga bankaka wela sakumunu, ayi woso wunkindisa bankaka mvandi wela kindusu.’ (Zingana 11:25) Mu luzingu lwitu ayi mu kisalu ki kusamuna, vadi ziphila ziwombo tulenda monisina mamboti ayi kukabila bankaka. Twala tubila ziawu mu dilongi dinkwiza.
^ Lut. 13 Bavingisa mazina ma batu mu dilongi adidi.