Byuvu Bi Mintangi
Kibila mbi ni mutu kasi ko nswa wu kutula bilongulu bi Zimbangi zi Yave mu zikhondi zinkaka zi mayo?
Bawombo banyindulanga ti bo befu tukhambu sumbisanga bilongulu bitu bi Kibibila, diawu vasi ko mambu kubonga biawu ayi kubwe bi tula mu zikhondi zinkaka zi mayo. Vayi batu bamvanganga mawu, ba kinzikanga ko Ntwadusulu yi Kusadila khond’itu mayo. * (Tala matangu madi va wanda.) Thwadusulu beni, yimmonisa ti ni mutu kasi ko nswa wu ‘kutula zifoto, zifikula, bilongulu bidi mu khond’itu mayo, bidimbu bi kimvuka kitu, minkunga, zivideo voti byuma binkaka bidi khond’itu mayo (mu yoso kwa khondi mayo, voti zikhondi zyo bamfilasananga zivideo ayi byuma binkaka).’ Kibila mbi didi dyambu dinkinza kukandimina kuvanga mambu amomo?
Vadi nsiku ayi dingumba dinkyeba byuma byoso bidi mu khond’itu mayo. Batu babika kimvuka ki Yave ayi bankaka batidi kubivisa kisalu kitu, khumbu zinkaka balenda tula bilongulu bitu mu zikhondi ziawu zi mayo mwingi kuvukumuna Zimbangi zi Yave ayi bankaka bakota muawu. Vayi mu zikhondi beni, bansonikanga mambu malenda tula divuda mu mintima mi batu. (Minkunga 26:4; Zingana 22:5) Bankaka bansadilanga byuma bitu voti kidimbu kitu ki jw.org mu zitsangu bantyamuna, mu zi aplicativo zi fono ayi mu byuma bansumbisanga. Vayi mu kibila ki minswa minkyeba byuma ayi bidimbu bitu, befu tulenda funda ku nzo lufundusu ayi kuba kandimina babika vanga mawu. (Zingana 27:12) Vayi lufundusu lulendi kutu sadisa ko ba kuzaba ti kheti Zimbangi zi Yave, bantulanga mvandi bilongulu bitu mu zikhondi zinkaka zi mayo.
Dilenda ba dyambu dimbi kukulula bilongulu bitu mu zikhondi zinkaka zi mayo bika kwandi mu jw.org. Yave wuku tuvananga to bidya bi kiphevi mu nzila yi ‘nnanga wukwikama.’ (Matai 24:45) ‘Nnanga’ beni, wunsadilanga to khondi tatu zi mayo—www.pr418.com, tv.pr418.com, ayi wol.pr418.com mwingi kutu vana bidya bi kiphevi. Mvandi twidi to zi aplicativo zitatu zinkaka zi kimvuka ki Yave tulenda sadila mu zitelefoni zitu dedi—JW Language®, JW Library®, ayi JW Library Sign Language®. Mu zikhondi azyozi, tulendi mona ko ni kyuma kitedi nza yi Satana kilenda bivisa kiphevi kitu. Vayi befu mona bilongulu bitu mu zikhondi zinkaka zi mayo, tubika tanga, bila balenda balula mambu masonama malenda kutu tula va kingela mu kiphevi.—Minkunga 18:26; 19:8.
Befu tula bilongulu bitu mu zikhondi zi mayo zyo batu bantubanga mambu bamweni, malenda vanga kheti bo babika kimvuka ki Yave basonika mambu mambi matedi Zimbangi zi Yave malenda dekula kiminu kitu. Zikhomba zinkaka bansombulanga na batu beni ayi mawu mambwelanga twadisa zitsoni mu dizina di Yave. Kuyambila ayi mutu beni mu internet, kulendi kunsadisa ko kubalula mayindu ayi kuvisa kyedika. (1 Timoteo 6:3-5; 2 Timoteo 2:23-25) Mvandi, vadi batu bawombo bamvanganga zikhondi ziawu kumonikina dedi zidi zi kimvuka ki Yave voti zi zikhomba badi mu Dingumba Dintwadisi. Vayi masi ko makyedika, bila vasi ko ni khomba mweka widi mu Dingumba Dintwadisi widi khondi’andi yi mayo naveka.
Bo tunkamba batu bakota mu jw.org, twidi mu kusadisa kusamuna ‘zitsangu zimboti.’ (Matai 24:14) Zikhondi zitu zi mayo ayi zi aplicativo zinkaka, zinluta salama buboti kadika kilumbu. Tutidi batu boso babakila biawu ndandu. Tulenda fila kilongulu kwidi mutu mu email voti kumfila nzila yilenda kunsadisa kukota mu khondi mayo. Befu vangila mu phila ayiyi, twala twadisa batu mwingi bakota mu tho Yave katu vaninanga bidya bi kiphevi, ‘nnanga wukwikama.’
^ Lut. 1 Ngye wulenda mona nzila yilenda kunata ku Ntwadusulu yi Kusadila mu khond’itu mayo, va tsyelo yitheti yimmonikanga ngye kuzibula jw.org, va wanda vadi bisono bitsuka.