1, 2. (a) Mbi Yesu kakamba minlandikini myandi mu bwilu butsuka ava nandi kafwa? (Tala fikula yidi va thonono.) (b) Kibila mbi didi dyambu dinkinza beni kutebukanga moyo kibila befu tunsamuninanga? (c) Mbi tunkwiza longuka mu dilongi adidi?

VA bwilu butsuka ava nandi kafwa, Yesu wuyoluka beni na bapostolo bandi. Nandi wuba kamba ti waba kubazolanga beni, ayi wubakamba mvandi matedi nongu yi nti wu vinu tulongukidi mu dilongi dibedi. Yesu waba tomba kukindisa minlonguki myandi ‘batatamana kubuta mimbutu miwombo,’ voti kutatamana kusamuna zitsangu zitedi Kintinu.​—Yoane 15:8.

² Yesu kasa kamba ko to minlandikini myandi mbi bafweti vanga, vayi wuba kamba mvandi kibila bafweti vangila mawu. Nandi wubavana bibila mwingi bawu batatamana kusamuna. Nkinza beni befu mvitu kutebukanga moyo kibila mbi tufweti tatamana kusamuna. Kuyindulanga mawu, kwala tusadisa kutatamana mu thangu tumvana ‘kimbangi kwidi batu ba makanda ma zitsi zyoso.’ (Matai 24:13, 14) Mu dilongi adidi, tunkwiza tubila matangu manna ma Kibibila mammonisa kibila tunsamuninanga. Mvandi, tunkwiza tubila makaba manna  mamfuminanga kwidi Yave malenda kutusadisa tutatamana kubuta mimbutu.

3. (a) Dedi buntubila Yoane 15:8, kibila mbi kilutidi nkinza befu tunsamuninanga? (b) Mu nongu Yesu kata, mbi bimfwanikisa na makundi ma vinu ayi kibila mbi kifwani beni kididi kifwanakana?

³ Befu tutidi kukembisa Yave ayi kuzitisa dizina dyandi. Akiki, kiawu kibila kilutidi nkinza befu tunsamuninanga. (Tanga Yoane 15:1, 8.) Bo Yesu kata nongu yi nti wu vinu, nandi wufwanikisa Yave banga mutu wunkyebanga nlumbu voti mvati wu vinu. Yesu wutuba ti naveka widi nti wu vinu ayi minlandikini myandi badi bitafi. (Yoane 15:5) Mu nongu ayiyi, makundi ma nti wu vinu mansundula mbutu wu minlandikini mi Yesu bambutanga, voti kisalu bawu bamvanganga ki kusamuna. Yesu wukamba bapostolo bandi: ‘Adidi diawu dyambu dimvananga nkembo Tat’ami: lutatamana kubuta mimbutu miwombo.’ Bo nti wu vinu wumbuta makundi mambote ma vinu, mawu mantwadisanga nzitusu kwidi mvati. Bobuawu mvandi mu befu, bo tumvanga mangolo mwingi kusamuna zitsangu zitedi Kintinu, befu tumvananga nzitusu voti nkembo kwidi Yave.​—Matai 25:20-23.

4. (a) Bwidi befu tunzitisilanga dizina di Nzambi? (b) Bwidi ngye wummwena mu kuzaba ti widi lwaku lu kuzitisa dizina di Nzambi?

⁴ Dizina di Nzambi didi dinlongo. Vasiko kyuma tulenda vanga mwingi diawu dibwela ba dinlongo. Vayi bwidi tulenda zitisila dizina di Nzambi mu thangu tunlonga? Tala mambu mbikudi Yesaya katuba: ‘Yave Mfumu yi Masodi​—nandi to beno mufweti byeka wunlongo.’ (Yesaya 8:13) Befu tunzitisanga dizina di Nzambi, Yave, bo tunluta ku dinangika mu mazina moso madi ayi bo tunsadisa bankaka kuvisa ti dizina beni didi dinlongo. (Matai 6:9; tala matangu madi va wanda mu nwt-TPO.) Dedi bo tunlonga bankaka kyedika kitedi zikhadulu zimbote zi Yave ayi lukanu lwandi mu batu lu kuzinga mvu ka mvu ku Paladizu, befu tuba sadisanga kumona ti mambu moso mambi Satana katuba mu matedi Yave ma luvunu. (Ngenesi 3:1-5) Befu tunzitisanga mvandi dizina di Nzambi bo tunsadisa batu kuzaba ti Yave, nandi wufweni ‘mu tambula nkembo, nzitusu ayi lulendo.’ (Nzaikusu 4:11) Rune, widi ntwami ntwala mu 16 di mimvu wutuba: “Mayangi beni kuzaba ti minu yidi lwaku lu kuba mbangi wu Mvangi wu byuma byoso. Mawu ma kutsadisanga kutatamana kusamuna.”

5. (a) Kibila mbi kimwadi kidi mu Yoane 15:9, 10 kituvanganga kusamuna? (b) Bwidi Yesu kasadisila minlandikini myandi kuvisa ti bawu bafweti tatamana?

⁵ Tanga Yoane 15:9, 10. Befu tunzolanga beni Yave ayi Yesu. Akiki, kiawu kibila kimwadi tunsamuninanga zitsangu zitedi Kintinu. (Malako 12:30; Yoane 14:15) Yesu wukamba minlandikini myandi ti bawu bafweti ‘tatamana mu luzolo lwandi.’ Kibila  mbi Yesu katubila mawu? Nandi wuzaba ti minlandikini myandi bafweti kwikama mwingi kuba Baklisto bakyedika. Diawu mu Yoane 15:4-10, befu tummona ti Yesu wusadila khumbu ziwombo kikuma ‘lutatamana’ mwingi kusadisa minlandikini myandi kuvisa ti bawu bafweti tatamana.

6. Bwidi befu tummonisinanga ti tutidi kutatamana mu luzolo lu Klisto?

⁶ Bwidi befu tummonisinanga ti tutidi kutatamana mu luzolo lu Klisto ayi kuba luvalu va meso mandi? Mu kuntumukinanga. Yesu wu tudinda tuvanga to mambu nandi mvandi kavanga. Nandi wutuba: ‘Minu yintumukinanga zithumu zi Tata ayi yintatamana mu luzolo lwandi.’ Yesu wubika ntungulu mwingi tulandakana.​—Yoane 15:10.

7. Bwidi kutumukina kwididi ngwizani ayi luzolo?

⁷ Yesu wumonisa ti kutumukina kwidi ngwizani ayi luzolo bo katuba: ‘Woso mutu wunkikininanga zithumu zyama ayi wu zitumukinanga buna nandi widi luzolo mu minu.’ (Yoane 14:21) Zithumu zi Yesu zimfuminanga kwidi Tat’andi, diawu, bo tuntumukina lutumu lu Yesu lu kusamuna, buna twidi mu kumonisa mvandi ti tunzolanga Yave. (Matai 17:5; Yoane 8:28) Befu kumonisa kwidi Yave ayi Yesu ti tubazolanga, bawu mvawu bala tusadisa tutatamana mu luzolo luawu.

8, 9. (a) Kibila mbi kinkaka tunsamuninanga? (b) Bwidi mambu Yave katuba mu Yehezekeli 3:18, 19 ayi 18:23 ma tukindisila tutatamana kusamuna?

⁸ Befu tutidi kulubula bankaka matedi kilumbu ki Yave kidi mu kufikama. Akiki, kiawu kibila kintatu tunsamuninanga. Mu Kibibila, Nowa ba kuntedila ‘nsamuni.’ (Tanga 2 Petelo 2:5.) Ava khuka yi minlangu yiza, Nowa wusamuna tsangu zitedi kulubula batu mu mbungulu yaba fikama. Bwidi tuzabidi mawu? Kibila Yesu wutuba: ‘Bila ava Khuka yi Nlangu yiza, batu badya ayi banwa, bakwelana, bakwedisa nate mu lumbu Nowa kakota mu nzaza. Vayi basa zaba ko dyambu di kubabwila nate Khuka yi Nlangu yiyiza ayi yimana vitumuna baboso. Bobo bwela bela mvandi thangu Mwana mutu kela kwiza.’ (Matai 24:38, 39) Kheti batu bawombo basa wilukila ko Nowa, nandi wutatamana kuvanga kisalu Yave kamvana: kusamuna tsangu yi kulubula batu.

⁹ Bubu, befu tunsamunanga zitsangu zitedi Kintinu, mwingi kuvana batu lwaku lu kulonguka matedi lukanu lu Nzambi mu batu  mu bilumbu binkwiza. Dedi Yave, befu mvitu tutidi batu bayuwa zitsangu tunsamuna ayi ‘batatamana kuzinga.’ (Yehezekeli 18:23) Bo tunsamuna mu nzo ka nzo ayi mu bibwangu bimbanga batu bawombo, befu tunlubulanga batu mu kuba kamba ti Kintinu ki Nzambi kyala kwiza ayi kyala tulula batu badi mavanga mambi.​—Yehezekeli 3:18, 19; Danieli 2:44; Nzaikusu 14:6, 7.

10. (a) Kibila mbi ki kusamuna kidi mu Matai 22:39? (b) Bwidi Polo ayi Sila basadisila nkengidi wu buloku ku Filipi?

¹⁰ Befu tunzolanga batu. Akiki, kiawu kibila kinna befu tuntatamananga kusamuna. (Matai 22:39) Luzolo beni, lu tusadisa kutatamana kusamuna kibila tuzebi ti batu bawombo balenda balula mavanga mawu mu thangu mambu mambaluka mu luzingu luawu. Dedi mambu mamonika bo mvwala Polo ayi Sila ba batula ku buloku ku Filipi. Va bwilu, kivuka kinneni kimonika kinyikuna buloku ayi kizibula myelo. Nkengididi wu buloku wuba ntima dibamu bila kamwena ti baboso baba mu buloku batina, diawu kaba tomba kuyivondila. Vayi mvwala Polo wuntendukila: ‘Bika kuyivonda!’ Nkengididi wunyuvula: ‘Mbi minu yifweti vanga mwingi yivuka?’ Polo ayi Sila bankamba: ‘Kikinina mu Mfumu Yesu, ayi ngye wala vuka.’​—Mavanga 16:25-34.

11, 12. (a) Mbi mambu mamonikina nkengididi wu buloko matulonga mu matedi kisalu ki kusamuna? (b) Kibila mbi tudidi kutatamana kusamuna?

¹¹ Mbi mambu mamonikina nkengididi wu buloku matulonga mu matedi kisalu ki kusamuna? Nkengididi wu buloku wubalula mavanga mandi ayi wudinda lusalusu bo kivuka kivyoka. Mawu mvandi malenda monikina kwidi batu bakhambu zola kuwa zitsangu zi Kibibila, bawu balenda balula mavanga mawu boti dyambu dimbi dibe monikina mu luzingu luawu. Dedi batu bawombo bambanga mu kyunda kibila bankukisidi mu kisalu voti dikwela dyandi difwidi. Bankaka bambanga mu kyunda na kubakula ti kimbevu kingolo kadi voti mutu kanzolanga beni befwa. Bo mambu ma phila ayoyo mammonika, mutu kalenda tona kukivana byuvu bitedi luzingu, byuvu kakhambu yindulanga mu luzingu lwandi. Bawu balenda kuyikuvusa: Mbi yifweti vanga mwingi yivuka? Bawu balenda tomba kuwa mu khumbu yitheti mu luzingu luawu zitsangu zitu zimvananga kivuvu.

¹² Befu tatamana kusamuna, twala baka lwaku lu kuba longa mu thangu mintima miawu midi mikubama mwingi kukikinina mbombolo tuba natina. (Yesaya 61:1) Charlote, widi ntwami ntwala mu 38 di mimvu wutuba: “Batu bubu badi buka bazimbala ayi lwaku bantomba mwingi kukuwa zitsangu zimbote.” Ejvor, widi ntwami ntwala mu 34 di mimvu wutuba: “Bubu mayindu ma batu masyala ko nsika mu kibila ki mambu mambi bandengana mu luzingu. Minu yitidi kuba sadisa, ayi mawu ma kukhindisanga mwingi yitatamana kusamuna.” Kuzola batu, kidi kibila kimbote twidi mwingi tutatamana kusamuna.

13, 14. (a) Khayilu mbi bantubila mu Yoane 15:11? (b) Bwidi tulenda bakila mayangi Yesu kabaka? (c) Bwidi mayangi ma tusadisilanga mu kisalu ki kusamuna?

¹³ Mu bwilu bu tsuka ava nandi kafwa, Yesu wutubila matedi mikhayilu milenda sadisa bapostolo bandi batatamana kubuta mimbutu.  Mikhayilu mbi, ayi bwidi miawu milenda kutusadisila bubu?

¹⁴ Khayilu yi kumona mayangi. Kisalu ki kusamuna, phasi beni kidi mu kuvanga? Ndamba. Bo Yesu kata nongu yi nti wu vinu, nandi wutuba ti bo befu tunsamuna befu twala baka mayangi mandi. (Tanga Yoane 15:11.) Bwidi mawu malenda monikina? Tebuka moyo ti mu nongu Yesu kata, nandi wuyifwanikisa banga nti wu vinu ayi minlandikini myandi banga matafi. Mwingi matafi ma nti matatamana kubaka nlangu ayi bidya binkaka bimfumina mu tsi ntoto, mafweti ba makwikama mu nti. Bobuawu mvandi mu befu, twala baka to mayangi banga Yesu befu tatamana kuba kithwadi mu nandi ayi kulandakana kifwani kyandi. Mu phila ayoyo, befu mvitu twala baka mayangi ma nandi kabaka, mayangi madi mu kuvanga luzolo lu Nzambi. (Yoane 4:34; 17:13; 1 Petelo 2:21) Hanne, widi ntwami ntwala mu 40 di mimvu wutuba, “Mayangi yimbakanga bo yimfumina mu kisalu ki kusamuna, mambwelanga kutsadisa yitatamana mu kisalu ki Yave.” Kumona mayangi, kwala tuvana mangolo mwingi tutatamana kusamuna kheti batu basi tukuwila ko.​—Matai 5:10-12.

15. (a) Khayilu mbi bantubila mu Yoane 14:27? (b) Bwidi ndembama yikutusadisilanga tutatamana kubuta mimbutu?

¹⁵ Khayilu yi ndembama. (Tanga Yoane 14:27.) Va bwilu butsuka ava Yesu kafwa, nandi wukamba bapostolo bandi: ‘Minu yikuluvana ndembam’ami.’ Bwidi ndembama yi Yesu yikutusadisilanga tutatamana kusamuna? Bo befu tuntatamana kusamuna, befu tumbakanga ndembama mu ntima kibila tuzebi ti twidi mu kukwangidika Yave ayi Yesu. (Minkunga 149:4; Loma 5:3, 4; Kolosai 3:15) Ulf, widi ntwami ntwala mu 45 di mimvu wutuba, “Khumbu zinkaka tumbanga beni bavonga bo tumfumina mu kisalu ki kusamuna, vayi tumbakanga mayangi makyedika ayi luzingu lwitu lwidi tsundu.” Matondo beni tumvutula mu kubaka mayangi makhambu tsukulu!

16. (a) Khayilu mbi bantubila mu Yoane 15:15? (b) Mbi bapostolo baba tombila kuvanga mwingi batatamana kuba bakundi ba Yesu?

¹⁶ Khayilu yi kikundi kimbote. Bo Yesu kakamba bapostolo bandi ti nandi waba tomba mwingi bawu babaka mayangi, nandi wusudikisa kibila mbi didi dyambu dinkinza kumonisa luzolo luntima. (Yoane 15:11-13) Diawu nandi katubila: ‘Minu yikulutedila bakundi bami.’ Kuba nkundi wu Yesu, khayilu  yimbote beni! Mbi bapostolo baba tombila kuvanga mwingi batatamana kuba bakundi bandi? Yesu wusudikisa: ‘Yendanu ayi tatamananu kubuta mimbutu.’ (Tanga Yoane 15:14-16.) Mu thubulu yinkaka, mawu mansundula kutatamana kusamuna. Mimvu myodi kumbusa ava kutuba mawu, Yesu wukamba bapostolo bandi: ‘Bo lunkwenda, longanu ti: ‘Kintinu ki diyilu kima fikama.’’ (Matai 10:7) Diawu, mu bwilu butsuka ava nandi kafwa, Yesu wukindisa minlandikini myandi batatamana mu kisalu ki kusamuna. (Matai 24:13; Malako 3:14) Bukyedika, Yesu wuzaba ti kutumamana minsiku myandi malenda ba mambu ma phasi mwingi kuvanga. Vayi bawu bala nunga kuvanga mawu ayi bala tatamana kuba bakundi bandi. Bwidi? Mu lusalusu lu khayilu yinkaka.

17, 18. (a) Khayilu mbi bantubila mu Yoane 15:7? (b) Bwidi khayilu beni yisadisila bapostolo ba Yesu? (c) Bwidi mikhayilu mi tusadisilanga bubu?

¹⁷ Khayilu yi kubaka mvutu wu minsambu mitu. Yesu wutuba: ‘Buna dindanu kyoso kyuma mutidi ayi bala kuluvana.’ (Yoane 15:7, 16) Mambu Yesu kakanikisa, makindisa bapostolo bandi! * (Tala matangu va wanda.) Bapostolo basa visa ko bumboti mu thangu beni ti lufwa lu Yesu lwaba fikama. Angi lufwa lwandi lwabasa sundula ko ti bapostolo bandi basi mbaka ko lusalusu. Yave waba tambudilanga minsambu miawu ayi waba basadisanga mu kisalu ki kusamuna. Tuzabidi mawu kibila bo vavyoka mwa thangu tona Yesu kafwa, bapostolo badinda kwidi Yave kabavana kibakala, ayi Yave wutambula minsambu miawu.​—Mavanga 4:29, 31.

¹⁸ Bobuawu mvandi bubu. Bo befu tuntatamana mu kisalu ki kusamuna, twidi mu kutatamana mvandi kuba bakundi ba Yesu. Ayi befu tulenda ba lufyati ti Yave, wuntambudilanga minsamu mitu mu kutusadisa mu thangu tummona ziphasi mu kisalu ki kusamuna. (Filipi 4:13) Befu tumvutulanga beni matondo bo Yave kantambudilanga minsambu mitu ayi befu twidi Yesu banga nkund’itu. Mikhayilu myoso mimfuminanga kwidi Yave, mi tukindisanga mwingi tutatamana kubuta mimbutu.​—Yakobi 1:17.

19. (a) Kibila mbi tuntatamananga kusamuna? (b) Mbi bi tusadisa kumanisa kisalu Nzambi katuvana?

¹⁹ Mu dilongi adidi, befu tuma longuka bibila binna bituvanga tutatamana kusamuna: kukembisa Yave ayi kuzitisa dizina dyandi, kumonisa ti tunzolanga beni Yave ayi Yesu, kulubula batu, ayi kumonisa ti tunzolanga batu. Tumalonguka mvandi matedi mikhayilu minna: mayangi, ndembama, kikundi kimbote ayi kubaka mvutu wu minsambu mitu. Mikhayilu amimi, mitukindisanga mwingi kumanisa kisalu Nzambi katuvana. Yave wunkwangalalanga beni bo katumona kuvanga mangolo mwingi ‘tutatamana kubuta mimbutu’!