1. Kibila mbi tulenda tubila ti Yave nandi vwidi byuma byoso? (Tala foto yidi va thonono.)

BYUMA byoso Yave wu bivwidi! Nandi wuvwidi ‘diyilu, diyilu dilutidi zangama, nandi wuvanga ntoto ayi byabyoso bidi momo.’ (Deutelonomi 10:14; Nzaikusu 4:11) Yave nandi wuvanga batu ayi befu boso nandi wu tuvwidi. (Minkunga 100:3) Vayi mu batu boso bama zinganga va ntoto, Yave wusola ndambu bamvwidi mu phila yilutidi.

2. Dedi buntubila Kibibila, banani badi mu dikabu di batu Yave kavwidi?

² Dedi buku yi Minkunga 135 yintubila bisadi bikwikama bi Yave biba zingilanga ku Isaeli mu thangu yikhulu banga ‘kyuka kavwidi nandi veka.’ (Minkunga 135:4) Hosea wubikula mvandi ti batu bankaka bakhambu ba basi Isaeli bala batedila dikabu di Yave. (Hosea 2:23) Mbikudulu beni yisunduka mu thangu Yave katona kusola batu bakhambu ba basi Isaeli mwingi bayala na Yesu ku diyilu. (Mavanga 10:45;  Loma 9:23-26) Bo badi basolo mu pheve yinlongo, ba kuba tedilanga ‘dikabu dinlongo.’ Bawu badi ‘batu Yave kavwidi.’ (1 Petelo 2:9, 10) Mbi tulenda tubila mu bisadi binkaka bikwikama badi kivuvu ki kuzinga mvu ka mvu va ntoto? Yave wu kubatedila mvandi ‘dikabu dyama’ ayi ‘basolo bami.’​—Yesaya 65:22.

3. (a) Banani badi kikundi kimboti na Yave bubu? (b) Mbi tunkwiza tubila mu dilongi adidi?

³ Bubu, “nkangu wu mamemi” badi kivuvu ki kuzinga mvu ka mvu ku diyilu, ayi “mamemi mankaka,” badi kivuvu ki kuzinga mvu ka mvu va ntoto, bambwongiminanga Yave va kimweka banga ‘nkangu wumweka.’ (Luka 12:32; Yoane 10:16) Befu tutidi kumonisa kwidi Yave ti tumvutulanga beni matondo mu kikundi kimboti twidi yandi. Mu dilongi adidi, tunkwiza tubila bwidi tulenda vutudila Yave matondo mu phila ka tuvwilanga nkinza.

4. Bwidi tulenda tondila Yave mu lwaku katuvana lu kuba yandi kikundi, ayi bwidi Yesu kamonisina mawu?

⁴ Befu tummonisanga ti tumvutula matondo kwidi Yave bo tukivana kwidi nandi ayi kubotama. Baboso balenda mona ti Yave nandi wu tuvwidi ayi twidi bakubama mwingi kuntumukina. (Ebeleo 12:9) Yesu wuvanga mvandi mawu bo kabotama. Kheti nandi wuba mu dikabu dikivana mwingi kusadila Yave, nandi wukivana naveka kwidi Yave. Buba dedi nandi waba tuba: ‘Minu yitidi kuvanga luzolo lwaku, Nzambi’ami.’​—Minkunga 40:7, 8, tala matangu madi va wanda mu nwt-TPO.

5, 6. (a) Mbi Yave katuba bo Yesu kabotama? (b) Kifwani mbi kilenda tusadisa kuvisa phila Yave kambelanga mu ntima bo tukivana kwidi nandi?

⁵ Bwidi Yave kabela mu ntima bo Yesu kabotama? Kibibila kintuba: ‘Bo kamana botama, Yesu wubasika mu nlangu ayi mu thangu beni diyilu dizibuka, ayi nandi wumona pheve yi Nzambi yikuluka mu nandi banga dibembi. Bosi mbembu yiba ku diyilu yiyuwakana ayi yituba: ‘Awuwu, Mwan’ami wu luzolo, nyenze yiwombo ka kumbonisanga.’’ (Matai 3:16, 17) Yave nandi wuvwa Yesu kheti ava kabotama. Vayi nandi wuyangalala bo kamona phila Yesu kabela wukubama mwingi kunsadila. Yave wunkwangalala mvandi bo tukivana kwidi nandi, ayi nandi wala ku tusakumuna.​—Minkunga 149:4.

⁶ Vayi Yave, nandi wuvwidi byuma byoso! Mbi tulenda kumvana? Yindul’abu dibakala dimweka widi biteka biwombo ku nlumbu’andi. Vayi mwan’andi wunkyeto wubongidi kiteka kimweka ayi kumvana. Kheti biteka beni nandi vwidi biawu, tata yi luzolo wunkwangalala mu khayilu bamveni. Bila yawu yimmonisa luzolo mwan’andi kadi mu nandi. Kiteka bamveni kwidi mwan’andi kilutidi luvalu kwidi nandi ke biteka byoso bidi ku nlumbu’andi. Bobuawu mvandi, Yave wunkwangalala bo tukivana kwidi nandi.​—Esodu 34:14.

7. Bwidi Malaki katusadisila kuvisa bwidi Yave kammwenanga batu bakunsadilanga mu luzolo luawu?

⁷ Tanga Malaki 3:16. Kibila mbi didi dyambu dinkinza kukivana kwidi Yave ayi kubotama? Tuzebi ti tona mu thangu wuvangu, Yave Mvangi’aku nandi wuvwidi. Vayi yindul’abu mayangi Yave kankwiza  mona ngye kunkikinina buka Ntinu’aku ayi kukivana kwidi nandi. (Zingana 23:15) Yave zebi batu badi bakubama mwingi kunsadila mu luzolo, ayi nandi wunsonikanga mazina mawu mu ‘buku’andi yi mbambukulu moyo.’

8, 9. Mbi Yave kantomba bo badi mazina mu ‘buku’andi yi mbambukulu moyo’ bavanga?

⁸ Vadi mambu tufweti vanga boti tutidi mazina mitu matatamana mu ‘buku yi mbambukulu moyo’ yi Yave. Malaki wutuba ti tufweti mona Yave boma ayi kuyindulanga dizina dyandi. Befu bwongimina kyoso kyuma voti mutu, Yave wala botula mazina mitu mu buku’andi!​—Esodu 32:33; Minkunga 69:28.

⁹ Diawu, busa fwana ko to kukanikisa kuvanga luzolo lu Yave ayi kubotama. Bila mambu amomo, khumbu yimweka to tumvangilanga mawu, vayi kubwongimina Yave yidi phila yi kuzingila. Kadika kilumbu, mu luzingu lwitu loso, tufweti monisa mu mavanga mitu ti tuntumamana Yave.​—1 Petelo 4:1, 2.

10. Diswasana mbi difweti ba mu batu bansadilanga Yave ayi bakhambu kunsadilanga?

¹⁰ Mu dilongi dibedi, tulongukidi ti Kaini, Salomo, ayi basi Isaeli batuba ti baba bwongimina Yave vayi basa kwikama ko mu nandi. Bifwani abyobi, bitulonga ti busa fwana ko to kutuba ti tumbwongina Yave. Befu tufweti mona khenene mambu mambi ayi kuzola mambu mamboti. (Loma 12:9) Yave wutuba ti vala ba diswasana ‘mu mutu wusonga ayi wu mbi, kwidi mutu wunsadilanga Nzambi ayi wo wukhambu kunsadilanga.’​—Malaki 3:18.

11. Kibila mbi difweti bela dyambu dilwelu batu boso kumona ti Yave to tumbwongiminanga?

¹¹ Tumvutulanga matondo kwidi Yave bo ka tusola mwingi tuba dikabu dyandi! Difweti ba dyambu dilwelu batu boso kumona ti befu ku khonzo yi Yave twidi. (Matai 5:16; 1 Timoteo 4:15) Wuyiyuvusa: Bankaka bammonanga ti minu yidi wukwikama kwidi Yave? Yidi mayangi ma kukamba batu ti yidi Mbangi yi Yave? Yindul’abu kyunda Yave kalenda mona befu ba zitsoni kukamba bankaka ti befu, nandi wutu vwidi.​—Minkunga 119:46; tanga Malako 8:38.

12, 13. Bwidi zikhomba ziwombo bamvangilanga bankaka kumona phasi kuzaba ti badi Zimbangi zi Yave?

¹² Kyadi ayi kyunda kumona phila Zimbangi zinkaka zi Yave banlandikininanga ‘pheve yi nza.’ Mu kibila akyoki, bawu basi ko beni diswasana na batu bakhambu bwongiminanga Yave. (1 Kolinto 2:12) ‘Pheve yi nza’ yinnatanga batu kutsikika mayindu mu zinzinunu ziawu zi kinsuni. (Efeso 2:3) Kheti mu malongi moso tuntambulanga, bawombo bansolanga kuvwata mu phila yikhambu fwana. Bamvwatanga bikhutu bifyetama ayi bimmonisa binama bi nyitu kheti bo  bankwenda mu zikhutukunu zi Baklisto. Voti bansolanga kukanga minlengi mu phila yikhambu fwana. (1 Timoteo 2:9, 10) Diawu khumbu zinkaka, batu bambanga divunza kuzaba ti bawu badi Zimbangi zi Yave voti ndamba.​—Yakobi 4:4.

¹³ Vadi mambu mankaka manswasisanga Zimbangi zi Yave na batu basi nza. Dedi mu minkungi, bawombo bankinanga ayi bammonisanga mavanga makhambu fwana kwidi Baklisto. Bankaka bantulanga zifoto ziawu ayi bansonikanga mu internet mambu mammonisa phila yi kuyindudila yi batu ba nza. Kheti basa ku basemba ko mu kimvuka mu kuvola disumu dingolo, bawu balenda ba bakundi bambi kwidi zikhomba zimvanga mangolo mwingi kuba diswasana na basi nza.​—Tanga 1 Petelo 2:11, 12.

14. Mbi tufweti vanga mwingi kukeba mboti kikundi twidi na Yave?

¹⁴ Byuma byoso bidi mu nza yi Satana, bivangu mwingi kutuvanga kutsikika mayindu mitu mu ‘zinzinunu zi kinsuni, zinzinunu zi meso ayi lunyemo lu luzingu.’ (1 Yoane 2:16) Befu, Yave wu tuvwidi, diawu twididi diswasana. Tummanganga ‘luzingu lukhambu lu kinzambi ayi zinzinunu zi nza’ mwingi tuzingilanga mu phila yifweni, mu busonga ayi mu khinzukulu yi Nzambi mu nza ayiyi.’ (Tito 2:12) Luzingu lwitu loso, dedi mambu tunkolukanga, byuma tundyanga, phila tunnwinanga, tumvwatilanga ayi tunsadilanga, bilenda fika zabikisa kwidi baboso ti Yave nandi wutu vwidi.​—Tanga 1 Kolinto 10:31, 32.

15. Kibila mbi tufweti bela batu bamboti ayi kuzolanga Baklisto bankaka?

¹⁵ Befu tummonisa luvalu mu kikundi twidi na Yave mu phila tunzingilanga na zikhomba zitu. Dedi befu, bawu mvawu Yave wu bavwidi. Befu tebukanga mawu moyo, twala bamonisa mamboti ayi luzolo. (1 Tesalonika 5:15) Kibila mbi mawu madidi nkinza? Yesu wukamba minlandikini myandi: ‘Buawu bobo baboso bela zabila ti mwidi minlonguki myama​—benu kuzolasana.’​—Yoane 13:35.

16. Mbi tulenda longuka mu Nsiku Yave kavana Mose mu matedi luzolo nandi kadi mu bisadi byandi?

¹⁶ Kifwani kimweka kidi mu Nsiku Yave kavana Mose kilenda kutusadisa kuvisa bwidi tulenda kyebila bankaka mu kimvuka. Mu tempelu yi Yave, muba byuma baba sadilanga to mu mbwongimini. Nsiku wusudikisa mboti bwidi bana ba Levi bafweti kyebila biawu ayi woso mutu wukhambu landakana zithwadusulu beni kafweti fwa. (Zintalu 1:50, 51) Boti Yave waba vwanga nkinza phila batu baba kyebilanga byuma baba sadilanga mu mbwongimini’andi, mammonisa ti nandi wunluta vwanga nkinza kumona bwidi batu bankyebilanga bisadi byandi bikivana ayi bikwikama bi kumbwongiminanga. Nandi wu tuzabikisa ti befu luvalu twidi kwidi nandi bo katuba: ‘Woso mutu wu kumuvanga dyambu dimbi, widi mu kutula luzala lwandi mu zunga ki dyeso dyami.’​—Zakalia 2:8.

17. Bwidi Yave ‘kanlekilanga dikutu ayi kankuwilanga’?

¹⁷ Malaki wutuba ti Yave ‘wunlekilanga  dikutu ayi wunkuwanga’ bwidi dikabu dyandi ba yikyebilanga bawu yi bawu. (Malaki 3:16) Yave ‘wuzebi batu nandi kavwidi.’ (2 Timoteo 2:19) Nandi zabizi mambu moso tumvanga ayi tuntuba. (Ebeleo 4:13) Yave wummonanga bo tummonisa mamboti kwidi zikhomba zitu. Vayi befu tulenda ba lufyatu ti Yave wummonanga mvandi bo tunyamba bankaka, tunkabila, tunlemvukila ayi tummonisa mamboti.​—Ebeleo 13:16; 1 Petelo 4:8, 9.

18. Bwidi tulenda vutudila Yave matondo bo katusola mwingi tuba dikabu dyandi?

¹⁸ Befu tutidi monisa kwidi Yave ti tumvutula matondo bo nandi ka tuvwidi buka dikabu. Tummonisa mawu bo tukivana kwidi nandi, ayi mawu makani malutidi nkinza tulenda baka. Kheti bo twidi mu kuzingila ‘va khati mbandu yi batu ba luvunu ayi bambi,’ tulenda tatamana kuba ‘batu bakhambulu tsembolo ayi bavedila’ ayi kulezama ‘banga minda va nza.’ (Filipi 2:15) Diawu tufweti ba makani ma kubika vanga mambu moso Yave kanlendanga. (Yakobi 4:7) Tunzolanga ayi tunkinzikanga zikhomba zitu zyoso bila bawu mvawu Yave wuba vwidi.​—Loma 12:10.

19. Bwidi Yave kansakumuninanga batu kavwidi?

¹⁹ Kibibila kinkanikisa: ‘Yave kalendi yekula ko batu bandi.’ (Minkunga 94:14) Tulenda fyatila mawu. Kheti mu moso kwa mambu tulenda monikina, Yave wala banga yitu. Kheti tufwidi, nandi kalasa tuzimbakana ko. (Loma 8:38, 39) ‘Boti tunzinga, buna tuzingila kwidi Yave, ayi boti tufwidi buna tufwila mu kibila ki Yave. Diawu, tuzinga voti tufwa, Yave nandi wutu vwidi.’ (Loma 14:8) Tumvingilanga thangu Yave kala vulubusa bakundi bandi boso bakwikama bafwa. (Matai 22:32) Ayi kheti bubu, tuntambulanga mikhayilu miwombo mimboti mimfumina kwidi Tat’itu Yave. Dedi bo Kibibila kintubila, ‘Mayangi kwidi dikanda di batu dyodi Nzambi kadidi Yave, batu bobo kasobula buka kyuka kyandi.’​—Minkunga 33:12.