1, 2. (a) Mbi zikhomba ziwombo batuba mu matedi kuba mutu wu kipheve? (b)  Byuvu mbi binkinza tunkwiza longuka mu dilongi adidi?

KHOMBA yimweka wunkyeto ku Canadá, wutuba ti kuba mutu wu kipheve voti widi mayindu ma Nzambi, ma kumvanganga kaluta ba mayangi ayi ma kunsadisanga mu ziphasi zi luzingu. Khomb’itu ku Brazil widi wukwela mu 23 di mimvu, wutuba ti kuba mutu wu kipheve, kunsadisa nandi ayi nkazi’andi kuba mayangi va dikwela. Khomb’itu ku Filipina wutuba ti kuba mutu wu kipheve ma kuntwadisanga ndembama ayi ma kunsadisanga kuzinga bubote na zikhomba zi zitsi zinkaka.

² Bukyedika, tulenda baka beni ndandu voti mayangi befu kuba batu badi mayindu ma Nzambi. Mbi tufweti vanga mwingi tuluta ba mayindu ma Nzambi ayi kubaka ndandu mu mawu? Ditheti, tufweti visa mambu Kibibila kantuba mu matedi mutu wu kipheve, voti mutu wumbikanga phevi yinlongo yi Nzambi yindyatisa, ayi wunyindulanga buka bo Yave kanyindudilanga. Mu dilongi adidi, tunkwinza baka mimvutu mi byuvu bitatu bi nkinza. (1) Mbi binsundula kuba mutu wu kipheve?  (2) Bifwani mbi bilenda kutusadisa kukonzuka mu kipheve? (3) Bwidi kuvanga mangolo mwingi kuba “mayindu ma Klisto” mala tusadisila kuba batu ba kipheve?

3. Bwidi Kibibila kimmonisina diswasana mutu wu kinsuni ayi mutu wu kipheve?

³ Mvwala Polo wutusadisa kuvisa diswasana didi mu “mutu wu kinsuni” ayi “mutu wu kiphevi”. (Tanga 1 Kolinto 2:14-16.) Mutu wu kinsuni “katambulanga ko mambu ma phevi yi Nzambi bila va meso mandi madi mambu ma buvungisi ayi kalendi kumazaba ko”. Vayi mutu kiphevi “[wumfyonguninanga] mambu moso” ayi widi “mayindu ma Mfumu,” Mansundula ti wumvanganga mangolo mwingi kuyindula buka Klisto. Polo wutukindisa tuba batu ba kipheve Phila mbi yinkaka mutu wu kinsuni kadidi diswasana na mutu wu kipheve?

4, 5. Bwidi tulenda zabila mutu wu kinsuni?

⁴ Mayindu mbi mutu wu kinsuni kadi? Mutu kinsuni widi mayindu ma nza, wuntsikikanga mayindu mandi mu mambu mambi. Polo wusonika ti kifu beni kidi buka ‘pheve yinsalanga bubu mu batu bakhambu tumamananga.’ (Efeso 2:2) Kifu akyokyo, kimvukumunanga bawombo kulandakana batu badi zikhadulu beni. Bawu bamvanganga mambu bammonanga ti madi mambote mu bawu, bavwanga ko nkinza zithumu zi Nzambi. Mutu wu kinsuni, wunyindulanga to mambu ma kinsuni, buka wuntombanga kimfumu, zimbongo ayi zitsatu zyandi ziba va ntwala mu mamoso.

⁵ Mutu wu kinsuni, wumvanganga mambu Kibibila kantedila “mavanga ma nsuni”. (Ngalatia 5:19-21) Mu nkanda wutheti Polo kasonikina baklisto ku Kolinto, nandi wutubila mambu mankaka batu ba kinsuni bamvanganga. Badi beni kinthatu, bamvasanga bankaka, bamvukumunanga bankaka kuba mambayisa, bakinzikanga ko zimfumu, bantulanga bidya ayi malavu va theti mu luzingu luawu. Mutu wu kinsuni kakindamanga ko mu thangu ba kuntota kuvanga mambu mambi. (Zingana 7:21, 22) Yuda wusonika ti batu badi mayindu ma kinsuni bala zimbisa phevi yi Yave.—Yuda 18, 19.

6. Bwidi tulenda zabila mutu wu kipheve?

⁶ Mutu wu kinsuni, wumvanganga mambu Kibibila kantedila “mavanga ma nsuni”. (Ngalatia 5:19-21) Mu nkanda wutheti Polo kasonikina baklisto ku Kolinto, nandi wutubila mambu mankaka batu ba kinsuni bamvanganga. Badi beni kinthatu, bamvasanga bankaka, bamvukumunanga bankaka kuba mambayisa, bakinzikanga ko zimfumu, bantulanga bidya ayi malavu va theti mu luzingu luawu. Mutu wu kinsuni kakindamanga ko mu thangu ba kuntota kuvanga mambu mambi. (Zingana 7:21, 22) Yuda wusonika ti batu badi mayindu ma kinsuni bala zimbisa phevi yi Yave.—Yuda 18, 19.

7. Mbi Kibibila kintuba mu matedi batu badi mayindu ma Nzambi?

⁷ Yesu wutuba ti batu badi mayindu ma Nzambi badi mayangi. Tutanga mu Matai 5:3: “[Mayangi] kwidi minsukami mu pheve,  bila bawu bavuidi Kimfumu ki Diyilu.” Loma 8:6 yinsudikisa ti luzingu lwitu luntombila kuyindula phila Yave kanyindudilanga: “Kutula mayindu mu mambu ma nsuni kunnatanga ku lufwa vayi kutula mayindu mu mambu ma phevi kunnatanga ku luzingu ayi ndembama.” Boti mayindu ma Nzambi madi yitu, tulenda ba mu ndembama ayi Nandi, ndembama yi befu veka ayi kivuvu ki luzingu lu mvu ka mvu.

8. Kibila mbi dilenda bela dyambu diphasi kuba voti kutatamana kuba mutu wu kipheve?

⁸ Angi twidi mu kuzingila mu nza yi mambi. Bo batu bakhambulu mayindu ma Nzambi ba kutuzungidila zikhonzo zyoso, diawu tufweti vangila mangolo mwingi tukeba kilunzi kitu mu mayindu mambi. Ti befu twisintula ko mu kilunzi kitu mayindu ma Yave, nza yi Satana yala wesa kilunzi kitu mayindu ma kinsuni. Mbi tufweti vanga mwingi kutatuka mawu? Bwidi tulenda konzukila mu kipheve?

9. (a) Mbi bilenda kutusadisa kuba batu badi mayindu ma Nzambi? (b) Bifwani mbi bimbote twentubila?

⁹ Buka bana banlongukilanga mu kutala ntungulu wu matata mawu, befu mvitu tufweti longuka bifwani bi batu baba kikundi kimbote na Yave. Mawu mala tulonga bwidi befu mvitu tulenda bela mayindu ma Nzambi. Mvandi twala zaba mambu tufweti bika vanga mu kutalanga batu badi bayindu ma kinsuni. (1 Kolinto 3:1-4) Mu Kibibila mwidi bifwani bimbote ayi bimbi. Twalonguka bifwani bimbote bi batu tulenda landakana: Yakobi, Malia ayi Yesu.

10. Bwidi Yakobi kamonisina ti wuba mutu wu kipkheve ki ngolo?

¹⁰ Buka befu bubu, luzingu lu Yakobi lusa ba ko beni diswasana, kibila mvandi wuzingila mu ziphasi. Esau khomb’andi waba tomba kumvonda. Kikwezi kyandi mvandi wuba kumvunanga thangu zyoso. Vayi zikhanu  Yave kavana Abalami zibwela kindisa kiminu ki Yakobi. Nandi wuzaba ti mu nzila yi dikanda dyandi, muawu mwala sundikila zikhanu Yave kakanikisa kwidi Abalami diawu kaba bedikila bumbote dikanda dyandi. (Ngenesi 28:10-15) Yakobi kasa bika ko mayindu ma batu ba nsunyi mamvanga kazimbakana zikhanu zi Yave. Buka, mu thangu Yakobi kamona ti luzingu lwandi luba va kingela, mu boma bu khomb’andi, nandi wudinda mu nsambu mwingi Yave kamvukisa. Nandi wusambila: “Yave ngye wukhamba ti ‘wala kukyeba bumboti ayi wala vanga mvil’ami wuba wuwombo banga nsengisini wu ḿbu.’” (Ngenesi 32:6-12) Yakobi wuba beni lufyatu mu zikhanu zi Yave, ayi nandi wumonisa mawu mu luzingu lwandi.

11. Bwidi tuzabidi ti Malia wuba mayindu ma Nzambi?

¹¹ Mvandi yindula Malia. Yave wunsola mwingi kaba ngudi yi Yesu, kibila nandi wuba mayindu ma Nzambi. Tanga mambu Malia katuba bo kayenda katala bibutu byandi Zakalia ayi Elizebeti. (Tanga Luka 1:46-55.) Tulenda mona ti nandi waba zolanga Dyambu di Nzambi ayi wuzaba mbote masonoko masonimina mu ki Ebeleo. (Ngenesi 30:13; 1 Samueli 2:1-10; Malaki 3:12) Kheti bo Yosefi ayi Malia bakwelana bawu basa bundana ko nyitu, ti Yesu kabutuka. Kiyeko batambula kwidi Yave, kivyoka nkinza mu bawu, na zitsatu ziawu zi nsunyi. (Matai 1:25) Mvandi nandi wumona bwidi Yesu kayonzukila ayi nandi wuyuwa mambu moso Yesu kalonga. Nandi “wulunda bumboti mambu moso mavyoka.” (Luka 2:51) Bukyedika nandi wuvwa beni nkinza zikhanu zi Yave mu matedi Mesiya. Tulenda landakana kifwani ki Malia ayi kutomba kuvanga mambu Yave kantomba befu tuvanga?

12. (a) Bwidi Yesu kalandikina kifwani ki Tat’andi? (b) Bwidi tulenda landikinina kifwani ki Yesu? (Tala foto yidi va thonono.)

¹² Mu batu boso bama zinga va nza, Yesu nandi wuluta monisa ntungulu wumbote mu  matedi kuba mayindu ma Nzambi. Kibila phila kanatina nzingulu’andi va ntoto ayi kisalu ki Yave nandi wumonisa ti tidi kulandakana ntungulu wu Tat’andi. Yesu wulandakana phila yi Yave yi kulongila, yi kuyindudila ayi mavanga mandi mamboti. Nandi wuvanga luzolo lu Nzambi ayi wulandakana minsiku myandi. (Yoane 8:29; 14:9; 15:10) Buka ngye kufwanikisa mambu mbikudi Yesaya katuba mu matedi khadulu yi Yave yi kuba nkwa nlemvu ayi mambu Malako katubila matedi Yesu, ma wumona ti mawu madedikini. (Tanga Yesaya 63:9: Malako 6:34.) Tunlandakananga kifwani ki Yesu, mu kubanga bakubama mwingi kusadisa batu bantomba lusadusu?. Tunlandakananga ntungulu wu Yesu mu kutula mayindu mitu mu kisalu ki kusamuna ayi kulonga batu zitsangu zimbote? (Luka 4:43) Batu badi mayindu ma Nzambi bankunanga zikhadulu zilenda sadisa batu bankaka.

13, 14. (a) Mbi tulenda longuka mu kifwani ki zikhomba zitu bubu badi mayindu ma Nzambi? (b) Vana kifwani.

¹³ Bubu, zikhomba ziwombo badi mayindu ma Nzambi ayi banlandakananga kifwani ki Yesu. Tummonanga mawu mu kifuzi badi mu kisalu ki kusamuna, mu kuba kifu ki kuyamba zikhomba bumboti ayi kulemvukila zinzimbala zi bankaka. Kheti basi ko batu balunga, vayi beta vanga mangolo mwingi kukuna zikhadulu zimbote ayi kuvanga mambu Yave katidi mu bawu. Buka khomba wumweka ku Brazil bantanguninanga Rachel, wutuba ti: “Minu yintyanga beni kulandakana phwatulu yi nza. Diawu yitonina kuvwata bikhutu bikhambulu bifwana ayi bi manga zitisa nyitu’ami ayi Nzambi. Vayi kulonguka kyedika ki Kibibila, kitsadisa kuvanga mangolo mwingi kuba mutu wu kipheve. Bukyedika ti disa ba ko dyambu dilwelo kuvanga mawu, vayi Minu yidi beni mu mayangi ayi luzingu lwami lweka tsundu.”

¹⁴ Reylene, khomba nkyeto wunkalanga ku Filipina, wumonikina mambu madi ma phila mu phila. Kheti mu kuzaba kyedika ki Kibibila, wutatamana kukivana mu bikola binangama ayi kutomba bisalu ba kumfuta zimbongo ziwombo. Buvyokila thangu, nandi wutona kubika mambu malutidi nkinza ku mbusa. Nandi wutuba: “Minu yitona kumona buka kyuma kiba kambwa mu luzingu lwami, kyuma kivyokizi nkinza na kisalu kyama.” Reylene wubalula mayindu kaba ayi wuvutuka kukivana mu kisalu kilutidi nkinza mu luzingu lwandi, kusadila Yave. Bubu, nandi wuntulanga lufyatu lwandi mu mambu masonama mu Matai 6:33, 34 ayi nandi wutuba ti, “Minu yidi lufyatu ti Yave wala keba zitsatu zyami!” Ḿba vadi zikhomba zi bakyeto voti zi babakala mu kimvuka kyaku babaka makani ma phila ayoyi. Thangu tummona phila bawu banlandikinina kifwani ki Yesu, bukyedika befu mvitu tuntombanga kulandakana kiminu kyawu.—1 Kolinto 11:1; 2 Tesalonika 3:7.

15, 16. (a) Mbi tufweti vanga mwingi tuba buka Klisto? (b) Bwidi tulenda bikila “mayingu ma Klisto” ma tubalula?

¹⁵ Bwidi tulenda landikinina kifwani ki Yesu? 1 Kolinto 2:16 yintuba ti tufweti ba “mayindu ma Klisto. Ayi nkanda Loma 15:5 wutu tebula moyo ti tufweti konzuka mu ‘mayindu ayi kuba zikhadulu buka zi Yesu Klisto kamonisa.’ Mwingi tuba buka Yesu, tufweti longuka kuyindula, kutadila ayi kuvanga  mambu mu phila nandi kaba vangilanga. Kibila Yesu wuvyoka beni kutatubukila kuvanga luzolo lu Tat’andi, kubika kwandi mambu mankaka. Ayi befu kuvanga mangolo mwingi kuba buka Yesu, buawu twala bwela kufikimina Yave. Diawu didi dyambu di nkinza beni kulandakana kifwani ki Yesu.

¹⁶ Bwidi tulenda longukila kuyindula buka Yesu? Minlonguki myandi bammona thangu kavanga mangitukulu, banyuwa bo kaba longa batu, bammona bo kamonisa luzolo kwidi batu boso ayi phila mayindu ma Yave maba kundyatisila. Bawu batuba: “Befu twidi zimbangi zi mambu moso kavanga.” (Mavanga 10:39) Bubu befu twisi ko bu kumwena Yesu. Vayi kutanga zibuku zintubila matedi luzingu lwandi bo kaba va ntoto, malenda kutusadisa kunzaba bumboti. Bo tuntanga ayi tunyindula madi mu zibuku buka Matai, Malako, Luka, ayi Yoane, buawu tumbwela kuzabila phila Yesu kaba yindudilanga. Mawu mvandi mala tusadisa “kulandakana mbote ndyatulu’andi” ayi ‘kuyindudila mu phila nandi kaba yindudilanga’.—1 Petelo 2:21; 4:1.

17. Ndandu mbi twala baka befu kuyindudila buka Yesu?

¹⁷ Ndandu mbi twala baka befu kuba mayindu buka ma Yesu? Buka bidya bimbote binsadisanga nyitu’itu yiba yikinda ayi kukonzuka bumbote, kuba mayindu buka ma Klisto, mvandi mala tuvanga tuba batu bakinda mu kipheve. Malembe malembe, twala tombanga kuzaba, boti Yesu nandi wumvyokila mambu amama, khanu makani mbi kalenda baka? Buawu mvandi twala bakilanga makani mambote, mankwangidika ntima Yave ayi mala bika kilunzu kitu nsika. Ngye wisimmona ko ti kidi kibila kimbote mwingi ‘kuvwata mayindu ma Mfumu Klisto’?—Loma 13:14.

18. Mbi malonguka mu matedi kuba mutu widi mayindu ma Nzambi?

¹⁸ Dilongi adidi, dima tusadisa kuvisa mbi binsundula kuba mutu widi mayindu ma Nzambi. Mvandi tuma mona bifwani bi batu badyatusu mu pheve yinlongo yi Nzambi. Ayi tuma longuka ti kuba “mayindu ma Klisto” ma tusadisa kuyindula mu phila Yave kanyindudilanga ayi kuba nkundi’andi wufikama. Vayi vadi mambu mankaka tulenda longuka. Buka: Bwidi tulenda zabila ti twidi kipheve kikinda? Mbi tulenda vanga mwingi kukindisa kipheve kitu? Ayi bwidi kipheve kitu kilenda kutusadisila? Byuvu abibi biawu twala longuka mu dilongi dinkwiza.