BATU batidi kuzingila mu mayangi. Vayi bo tunzigila mu bilumbu bi tsuka, batu bawombo bamvyokila mu mambu madi ‘phasi mwingi kudedikisa.’ (2 Timoteo 3:1) Bankaka mu kibila ki mambu mambi ba kubavangila, kimbevo, kubotuka mu kisalu, ayi kufwilu. Mambu amomo mamvanganga babika kuzingila mu mayangi voti mu nyenze. Bawombo bamana zingila mu kyunda mu kibila ki mambu mankaka mambi maba monikinanga. Bisadi bi Yave mvandi balenda vyokila mu mambu beni ayi kuzimbisa mayangi tuba. Enati mawu mambu wummonikina, bwidi wulenda vutudila mayangi maku?

Mwingi kuvutula kyuvu akyokyo, theti tufweti visa mboti mbi binsundula mayangi makyedika ayi bwidi bankaka banzingilanga mu mayangi kheti mu mambu ma phasi bandengana. Bosi tunkwiza tubila bwidi tulenda kyebila ayi bwedila mayangi mu luzingu lwitu.

Kuseva kwisinsundula ko ti twidi mu mayangi. Yindulabu: Mutu be kolwa malavu kalenda seva. Vayi malavu ma kusakuka kalenda vutuka kuba mu kyunda voti kubika kubwe seva mu kibila ki mambu madi yandi. Tulenda tuba ti nyenze kabe mona mu mwa thangu, angi masi ko mayangi makyedika.—Zingana 14:13.

Vayi mayangi makyedika, madi mabanza ma tsi ntima mu kibila ki mambu mambote tumvingila. Kuba mayangi masundula kukwangalala mu zithangu zyoso kuba mu ziphasi voti mu mayangi. (1 Tesalonika 1:6) Bukyedika ti tulenda dasuka mu mwa dyambu, vayi mayangi mitu malendi mana ko. Tala kifwani ki Bapostolo, thangu baba bula khuba ayi baba tula mu buloko mu kibila ki kulonga matedi Yesu. Angi mu thangu ba basika mu buloko, bawu ‘bamonika va meso ma zimfumu mu mayangi, kibila bazaba ti bamwena ziphasi beni, mwingi kuzitisa dizina di Yesu.’ (Mavanga 5:41) Bawu babela mu mayangi bakana ko mu kibila ki khuba baba bula, vayi mu kibila ki lukwikumu luawu mu kutumamana Nzambi.

Mayangi yisi ko khadulu yimbutukanga yitu, voti kyuma kinkwizinga mu mutu mu kuzimbukila. Mu kibila mbi? Kibila mayangi makyedika yidi khadulu yi mbutu yi pheve yinlongo yi Nzambi. Pheve yinlongo yi Nzambi yi ‘tusadisanga kuvwata bumutu bumona’ ayi kukuna zikhadulu buka mayangi. (Efeso 4:24; Ngalatia 5:22) Ayi befu kuba mayangi makyedika, mawu mala tuvanga kununga zithotolo.

Yave wutomba mambu mambote mavangana va ntoto, kubika kwandi mambu mambi tummona bubu. Vayi kheti batu bamvanga mambu mambi, bobuawu Yave wunzigilanga mu mayangi. Kibibila kintuba: ‘Mangolo ayi mayangi madi va kiandi voti kikundu ki Yave.’ (1 Lusansu 16:27) Mvandi mambu mambote bisadi bi Yave bamvanganga mankwangidikanga ntim’andi.—Zingana 27:11.

Tulenda landakana ntungulu wu Yave mu kumanga kuvonga kheti mambu masa vangamina ko mu phila tuntombila. Vayi tufweti tsikika mayindu mitu mu mambu mambote ayi kuvibidila  mu mambu malutidi mbote mu bilumbu binkwisa kuntwala. *—Tala matangu madi va wanda.

Mu Kibibila mwidi bifwani biwombo bi batu baba beni mayangi kheti mu thangu bavyokila mu ziphasi. Abalami wuba beni mayangi kheti thangu luzingu lwandi luba va kingela, ayi bo batu bankaka baba tomba kumvanga mambi. (Ngenesi 12:10-20; 14:8-16; 16:4, 5; 20:1-18; 21:8, 9) Bwidi nandi kanungina kuvanga mawu? Mu kuyindula kivuvu ki kuzinga mu nza yimona mu lutumu lu Yesu. (Ngenesi 22:15-18; Ebeleo 11:10) Yesu wutuba: “Tat’inu Abalami wumona nyenze bu kayindula ti wulenda mona lumbu kyami, nandi wumona kiawu ayi wuyangalala.” (Yoane 8:56) Tulenda landakana kifwani ki Abalami, mu kuyindula mayangi malutidi twala zingila mu bilumbu binkwiza kuntwala.—Loma 8:21.

Polo ayi Sila mvawu baba kiminu kingolo ayi batatamana kuba mayangi kheti mu ziphasi ziwombo bavyokila. Buka, thangu baba bula khuba ayi baba tula mu buloko, bawu ‘batatamana kusambila ayi kuzitisa Yave mu minkunga.’ (Mavanga 16:23-25) Bawu banunga zithotolo beni, kibila baba yindula mamboti Nzambi kakanikisa mu bilumbu biba kwisa kuntwala. Mvandi kuzaba ti baba tovukila mu kibila ki dizina di Yesu, kiba bwela mayangi. Befu tulenda landakana kifwani ki Polo ayi Silas mu kuyindulanga mayangi madi mu kusadila Yave mu ntima yoso.—Filipi 1:12-14.

Bubu mvandi, vadi bifwani bi zikhomba zi bakyeto ayi babakala badi mayangi kheti mu thangu bamvyokila mu ziphasi. Buka mu ngonda Kumi Mweka mu mvu 2013, kivuka kimweka kitulula kuvyoka 1.000 di zinzo zi makanda ma Zimbangi zi Yave ku Filipina. George mvandi nzo yituluka ku divula di Tacloban wutuba: “Kheti mu mambu mabe tumonikina, zikhomba badi mu mayangi. Yisa zaba ko bwidi yilenda tubila mayangi twidi kheti mu mambu mabe monika.” Befu kuyindula mambu Yave kavanga mu befu ayi kumvutudilanga matondo mu mamoso, malenda tuvana mayangi kheti bo twidi mu kuvyokila mu ziphasi. Bima mbi binkaka Yave katuvananga mwingi tuba mayangi?

Kibila kilutidi ki tuvananga mayangi, kuba kithwadi na Yave. Befu tuzebi Ntinu wu nza yimvimba. Nandi Tat’itu, Nzamb’itu ayi Nkund’itu!—Minkunga 71:17, 18.

Tufweti vutula mvandi matondo kibila Yave wutuvana luzingu ayi bu kubakila ndandu yi luzingu lwitu. (Mpovi 3:12, 13) Nandi wubika befu tumfikama, diawu tulenda visila mbote luzolo kadi mu befu, ayi bwidi tufweti natina luzingu lwitu. (Kolosai 1:9, 10) Batu bawombo ti bubu bavisanga ko kibila mbi tuvangulu. Mwingi kumonisa diswasana Mvwala Polo wusonika: ‘‘Biobi bisia mona meso ko, biobi bisia kuwa matu ko, biobi bisia zaba mutu ko, biawu biobi Nzambi kakubika mu dyambu di batu bobo bakunzolanga.’ Kibila Nzambi wutuzabikisa mawu mu pheve.’ (1 Kolinto 2:9, 10) Kuzaba lukanu lu Yave ayi luzolo lwandi, ma tuvananga beni mayangi.

Yave mambu mawombo mambote katuvangilanga. Mu nzila mwan’andi Yesu, nandi wunlemvukilanga masumu mitu. (1 Yoane 2:12) Mvandi wutuvana kivuvu ki kuzinga mu nza yimona yima fikama. (Loma 12:12) Yave wutuvananga bakundi bakyedika mu kimvuka mwingi tumbwongimina va kimweka. (Minkunga 133:1) Nandi wutukyebanga mvandi mu mintambu mi Satana ayi zipheve zimbi. (Minkunga 91:11) Befu tatamana kuyindula mambu amomo mambote Yave katuvangilanga, twala bwela ba mayangi.—Filipi 4:4.

Khomba widi mayangi kalenda kwandi bwela ba mayangi? Yesu wutuba: ‘Yikulukambila mambu mama, mwingi mayangi mami maba mvandi minu ayi mayangi minu maba maduka.’ (Yoane 15:11) Mawu mammonisa ti tulenda  bwela mayangi mitu. Ayi mayangi mitu madi buka mbazu. Mwingi mbazu yilema beni, tufweti bwelanga biswadi thangu ka thangu. Tebuka monyo: Pheve yinlongo yi tusadisanga tuba mayangi. Diawu ti tuntomba kubwela mayangi mitu, tufweti lindanga pheve yinlongo yi Yave mu nzila nsambu. Mvandi tufweti tatamana kuyindula mambu tunlonguka mu Kibibila, kibila mu thwadusulu yi pheve yinlongo masonimina.—Minkunga 1:1, 2; Luka 11:13.

Kuvyokisa beni thangu mu mambu mankwangidika ntima wu Yave, dyambu dinkaka dilenda kutubwela mayangi. (Psalm 35:27; 112:1) Kibila mbi? Kibibila kintuba ti befu tuvangulu mwingi ‘kutumukina zithumu zi Yave ayi kunsadila, wawu nswa wu kadika mutu.’ (Mpovi 12:13) Bukyedika, befu tuvangulu mwingi kuvanga luzolo lu Nzambi. Diawu kusadila Yave, yawu phila yilutidi tulenda bakakila mayangi makyedika mu luzingu lwitu. *—Tala matangu madi va wanda.

Befu kuba mayangi, malenda ku tutwadisa ndandu zinkaka. Buka, Yave wunkwangalalanga beni befu kunsadila mu mayangi, kheti mu thangu twidi mu ziphasi. (Deutelonomi 16:15; 1 Tesalonika 5:16-18) Mvandi befu kuba mayangi makyedika, twalasa yindula ko ti bima bi nza biawu bilutidi nkinza mu luzingu lwitu. Vayi twala vanga mangolo mwingi tutula Kintinu ki Nzambi va theti. (Matai 13:44) Thangu tummona ndandu mu mangolo tumvanga ma kubwela sadila Yave, twala bwela ba mayangi ayi mayangi mitu, mala tambakana kwidi bankaka.—Mavanga 20:35; Filipi 1:3-5.

Mvandi befu kuba mayangi, twala ba buvinya bumbote. Kibibila kintuba: ‘Ntima wuyangalala, widi mbuku wunneni.’ (Zingana 17:22) Nkwa luzabu wumweka wufyonguninanga matedi buvinya ku Nebraska, Estados Unidos nandi wutuba dyambu dimweka dindedakana na Kibibila. Nandi wutuba: “Enati wunkwangalalanga mu luzingu wunnata bubu kheti wisi ko bima biwombo, mawu mala kusadisa wuyangala mvandi mu bilumbu binkwiza ayi wuba buvinya bumbote.”

Kheti twidi mu kuzingila mu nza yiwedi mambi, befu tulenda ba mayangi mu kudinda pheve yinlongo mu nsambu, mu kutanga Kibibila ayi mu kufyongunina mambu tunlonguka. Mvandi tulenda ba mayangi befu kuyindula mambote Yave katuvangilanga bubu, befu kulandakana bifwani bi bisadi byandi binkaka ayi befu kuvanga luzolo lu Nzambi. Befu kuma vanga twala mona kivisa ki mambu masonama mu Minkunga 64:10 mantuba: ‘Mutu wusonga wala yangalala ayi wala swamina kwidi Yave.’