1. Kyuma mbi ki tuswasisa na bibulu?

 YAVE wuvana batu kyuma kimweka ki luvalu. Kyuma beni kilunzi kitu. Kiawu kidi kyuma ki tuswasisa na bibulu. Bwidi befu tuzabidi ti Adami na Eva baba kilunzi? Bo balevula nsiku wu Nzambi, bawu banswama. Kilunzi kiawu kyaba kuba tatisanga.

2. Bwidi kilunzi kitu kidi buka bússola? (Tala fikula yidi va thonono.)

² Kilunzi kitu, lwidi luzabu lumbutukanga yitu mwingi kutusadisa kuswasisa mambote ayi mambi voti kutudyatisa mu luzingu. Mutu widi kilunzi kikhambu kikubama bumboti, widi buka dikumbi didi bússola vayi kisengu ki kunsudikisanga nzila kivavuka. Phemu ayi mayo ma ḿbu malenda natisa dikumbi beni ku khonzo yinkaka. Vayi bússola yinsala bumboti, yinsadisanga mutu wunnata dikumbi kavitila ku kibwangu kankwenda. Bobuawu mvandi, befu kubika mboti kilunzi kitu, kiawu kyala tutwadisa mwingi tubaka makani mamboti.

3. Mbi bilenda monika befu manga kukubika bumboti kilunzi kitu?

 ³ Boti kilunzi kisi ko kikubuku bumboti, kilendi tulubula ko mu thangu tuntomba kuvanga mambu mambi. (1 Timoteo 4:1, 2) Kiawu kilenda tuvanga kumona ‘mambu mambi buka mamboti.’ (Yesaya 5:20) Yesu wukamba minlandikini myandi: ‘Mu bilumbu binkwiza, woso mutu bu kela kuluvonda, kela mwena kwandi ti Nzambi kalembo sadila.’ (Yoane 16:2) Mawu mayindu batu bavonda mvwala Stefano mu mamanya baba. (Mavanga 6:8, 12; 7:54-60) Befu kutala kumbusa, bawombo bantubanga ti bansadilanga Nzambi, bama vanga mambu ma buphunya, bama vondisa bankaka mu kuyindula ti mu luzolo lu Nzambi bavangila mambu beni. Vayi mambu bamvanganga masi ko ngwizani na minsiku mi Nzambi. (Esodu 20:13) Angi bawu bamvangilanga mawu bila kilunzi kiawu kisyala bwe batwadisa ko bumboti!

4. Bwidi tulenda zabila ti kilunzi kitu kidi mu kusala bumboti?

⁴ Vayi bwidi tulenda zabila ti kilunzi kitu kidi mu kusala bumboti? Minsiku ayi minswa mi Kibibila ‘[midi] mfunu mwingi kulonga, kusemba, kusungika ayi kulonga mu dyatila mu busonga.’ (2 Timoteo 3:16) Tufweti longuka Kibibila lumbu ka lumbu, kuyindula mambu kiawu kintuba ayi kusadila mawu mu luzingu lwitu. Mu phila ayoyi, twala longuka kuyindula mu phila Yave kanyindudilanga. Bosi tulenda ba lufyatu ti kilunzi kitu kidi mu ku tutwadisa bumboti. Twantubila bwidi tulenda sadila minsiku ayi minswa mi Yave mwingi kukubika kilunzi kitu.

5, 6. Bwidi minsiku mi Yave mi tusadisilanga?

⁵ Boti tutidi minsiku mi Nzambi mi tusadisa, tubika to kuba kifu ki kutanga miawu voti kumi zaba. Vayi tufweti ku mizola ayi ku mikinzika. Kibibila kitukamba: ‘Lumona khenene mambu mambi ayi zolanu mamboti.’ (Amosi 5:15) Vayi bwidi tulenda vangila mawu? Tufweti longuka kutadila mambu mu phila Yave kantadilanga. Yindula kifwani akiki. Yindul’abu ti wisinnunga ko kulala bumboti, ayi mfelimi wu kukembi ntindu bidya fweti dya, phila yi bisavu wufweti nyikunina binama bi nyitu ayi mambu mankaka wufweti balula mu luzingu lwaku mwingi wubaka tolo tumboti. Bo wuntona kuvanga mambu beni, ngye wummona ti madi mu kusadisa! Mayindu mbi wulenda ba mu mfelimi beni ayi zithwadusulu zyandi?

⁶ Dedi mfelimi awowo, Mvang’itu wu tuvananga minsiku mi tukyebanga mu mambu mambi ayi ma tusadisanga kubaka luzingu lumbote. Kibibila ki tulonga ti tufweti bika luvunu, bwivi, kubika vanga butsuza, kubika ba buphunya voti kuvanga kyoso kyuma kidi kithwadi na zipheve zimbi. (Tanga Zingana 6:16-19; Nzaikusu 21:8) Luzolo lwitu mu Yave ayi mu minsiku myandi lumbwelamanga mu thangu tummona ndandu tumbaka mu kuntumukina.

7. Bwidi binongu bi Kibibila bilenda tusadisila?

⁷ Tulendi vingila ko kuvyokila theti mu ziphasi, mu kulevula minsiku mi Nzambi mwingi tulonguka mambote ayi mambi. Tulenda longuka mu zinzimbala zi batu bankaka bavanga kumbusa. Bifwani beni bidi mu Kibibila. Buku yi Zingana 1:5 yintuba:  ‘Mutu widi ndwenga wunkuwanga ayi wumbwela bakanga nzayilu.’ Nzayilu beni yimfuminanga kwidi Nzambi ayi yawu yilutidi tulenda baka. Yindul’abu phila Davidi katovukila bo kabika tumukina Yave ayi wuvanga kitsuza na Beta Seba. (2 Samueli 12:7-14) Bo wuntanga nongu ayoyo, wu kiyuvusa: ‘Khanu mbi Davidi kavanga mwingi kabika vola disumu beni? Mbi yilenda vanga boti mambu ma phila ayoyo mamonikini mu luzingu lwama? Mi kuthoto mwingi kuvanga mambu ma kitsuza yinkwiza ba buka Davidi voti buka Yosefi?’ (Ngenesi 39:11-15) Befu kuyindula mbote ziphasi tulenda vyokila mu kibila ki disumu, twala mona ‘khenene voti kulenda mambu mambi.’

8, 9. (a) Mbi kilunzi kitu kilenda ku tusadisa kuvanga? (b) Bwidi kilunzi kitu kinsadilanga na minswa mi Yave?

⁸ Tufweti tatuka byuma Nzambi kanlendanga. Vayi mbi tulenda vanga boti tundengana dyambu Kibibila kikhambu vana nsiku? Bwidi tulenda zabila mambu Nzambi kantomba tuvanga? Boti tumbikila Kibibila kikubika kilunzi kitu, twala baka makani mambote.

⁹ Yave bo ka tuzolanga, nandi wu tuvana minswa milenda twadisa kilunzi kitu. Nandi wusudikisa: ‘Minu Yave, minu Nzambi’aku, Wu kulonganga malutidi mbote mu ngyewu, Wu kutwadisanga mu nzila wufweti dyatila.’ (Yesaya 48:17, 18) Bo tunyindula mbote minswa mi Kibibila ayi tumbika  miawu mikota mu ntim’itu, tulenda sungika ayi twadisa mbote kilunzi kitu. Mawu ma ku tusadisanga kubaka makani mambote.

10. Mbi byo minswa mi Kibibila, ayi bwidi Yesu kasadila minswa mu malongi mandi?

¹⁰ Minswa mi Kibibila, midi kyedika kimfunu kintwadisa mayindu mitu mwingi ku tusadisa kubaka makani mambote. Kuzaba minswa mi Yave ku tusadisanga kuzaba bwidi nandi kanyindudilanga ayi bila mbi ka tuvaninanga minsiku. Yesu wusadila minswa mwingi kulonga minlandikini myandi ti mavanga ayi zitsalulu zimbi zintwadisanga mambu mambi. Nandi wulonga ti ngazi yilenda twadisa buphunya, ayi mayindu ma butsuza malenda nata mutu kuvanga kitsuza. (Matai 5:21, 22, 27, 28) Befu kubikila minswa mi Yave mi tutwadisa, kilunzi kitu kyala ba kikubama mboti ayi twala baka makani manzitisa Nzambi.—1 Kolinto 10:31.

11. Bwidi bilunzi bilenda vyakinina?

¹¹ Kheti Baklisto bankubika kilunzi kiawu mu kusadila Kibibila, bawu balenda baka makani mavyakana mu dyambu dimweka. Tulenda tubila matedi kunwa malavu mankoloswanga. Kibibila kisintuba ko ti didi disumu kunwa, vayi kiawu ki tulubula mu matedi kunwina ngolo voti kukolwa malavu. (Zingana 20:1; 1 Timoteo 3:8) Bukyedika ti mawu mansundula ti bo mutu kannwinanga mu kiteso kifwana, kalendi bwe yindula ko ni dyambu ava kubaka makani mandi? Mve. Kheti kilunzi kyandi kisi kuntatisa ko mu kuvanga mawu, nandi kafweti tadila mvandi kilunzi bi bankaka.

12. Bwidi mambu madi mu Loma 14:21 malenda ku tusadisila kukinzika kilunzi ki bankaka?

¹² Mvwala Polo wumonisa ti buboti beni kukinzikanga kilunzi ki bankaka bo kasonika: ‘Bulutidi mboti mu khambu dya mbizi, ni mu khambu nwa vinu, voti mu khambu vanga dyoso dyambu dilenda vanga khomb’aku kusumuka.’ (Loma 14:21) Diawu, kheti twidi nswa wu kunwa malavu, tulenda ba bakubama mwingi kubika nwa boti tuzabizi ti kuvanga mawu kulenda tatisa kilunzi ki khomb’itu. Ḿba khomba kumbusa wuba kikolo mbungu, vayi bo kalonguka kyedika nandi wubaka makani ma kulembu bwe nwanga malavu. Befu tumengi kuvanga dyoso dyambu dilenda vutula zikhadulu nandi kaba. (1 Kolinto 6:9, 10) Boti khomba beni widi nzenza ku nzo’aku, ngye beki nzo, buna wulenda kunkwika kunwa malavu kheti nandi mengi kwandi? Mve, tulendi vanga ko mawu!

13. Bwidi Timoteo kakinzikila kilunzi ki bankaka mwingi kuba sadisa bakikinina zitsangu zimbote?

¹³ Timoteo bo kaba ditoko, nandi wukikinina ba nzenga kibakala kheti phasi kuba kuvanga mawu. Nandi wuzaba ti kuzengusu, nkinza beni kuba kwidi basi Yuda kayenda kwe longa. Timoteo ayi Polo, basa tomba ko kuvanga mambu malenda tatisa kilunzi ki bankaka. (Mavanga 16:3; 1 Kolinto 9:19-23) Ngye mvaku, wumbika vanganga ma wunzolanga mwingi kusadisa bankaka?

14, 15. (a) Bwidi tulenda konzukila mu kipheve? (b) Bwidi Baklisto bayonzuka mu kipheve banzingilanga na bankaka?

¹⁴ Befu boso tufweti tomba kukonzuka mu ‘malongi matheti ma Klisto’ ayi ‘kukonzuka mu kipheve.’ (Ebeleo 6:1) Befu tubanga ko Baklisto bayonzuka mu kipheve mu kibila ki mimvu miwombo twidi mu kimvuka ki Yave. Tufweti vanga mangolo mwingi tuyonzuka mu kipheve. Tufweti tatatamana kukonzuka mu nzayilu ayi ndwenga. Diawu tufweti tanganga Kibibila kadika kilumbu. (Minkunga 1:1-3) Bo wuntanga Kibibila kadika kilumbu, ngye wala luta visa mbote minsiku ayi minswa mi Yave.

¹⁵ Nsiku mbi wulutidi nkinza kwidi Baklisto? Widi nsiku wu luzolo. Yesu wukamba minlandikini myandi: ‘Buawu bobo baboso bela zabila ti mwidi minlonguki myama—benu kuzolasana.’ (Yoane 13:35) Luzolo ba lutedilanga ‘nsiku wu Kimfumu ki Nzambi’ ayi ‘kukinzika nsiku.’ (Yakobi 2:8; Loma 13:10) Befu tuyitukanga ko kuzaba ti luzolo nkinza lwidi, bila Kibibila kintuba ti ‘Nzambi luzolo.’ (1 Yoane 4:8) Kwidi Nzambi, luzolo lwisi ko to mabanza. Vayi nandi wummonisa luzolo lwandi mu mavanga. Yoane wusonika: ‘Mu phila ayiyi, buawu Nzambi kamonisina luzolo lwandi mu befu, Nzambi wufidisa Mwan’andi wumweka to va nza, mwingi tubaka moyo mu nzil’andi.’ (1 Yoane 4:9) Bo befu tummonisa luzolo mu Yave, Yesu, zikhomba zitu, ayi batu bankaka, tummonisa ti twidi Baklisto bayonzuka mu kipheve.—Matai 22:37-39.

16. Kibila mbi tunluta kinzikilanga minswa mi Kibibila bo tumbwela konzuka mu kipheve?

¹⁶ Befu kuba Baklisto bayonzuka mu kipheve, twala zola beni minswa mi Nzambi. Minsiku ba misadilanga mu dyambu dimweka to, vayi minswa ba misadilanga mu mambu  mawombo. Khumbu zinkaka, matoko balendi visa ko mbote dyambu dimbi didi mu kuvanga kikundi na batu bambi, diawu matata mawu bamvaninanga minsiku mwingi ku bakyeba. (1 Kolinto 15:33) Vayi, khumbu bana bankonzuka mu kipheve, bawu bala longuka bu kusadila minswa mi Kibibila. Minswa beni myala basadisa kusola bakundi bambote. (Tanga 1 Kolinto 13:11; 14:20.) Befu kusadila beni minswa mi Kibibila, kilunzi kitu kyala ba mvandi kikubama ayi kikinda. Mvandi twala luta visa mbote ma Nzambi katidi tuvanga mu dyoso kwa dyambu.

17. Kibila mbi tulenda tubila ti twidi byuma byoso tuntomba mwingi kubaka makani mambote?

¹⁷ Befu twidi byabyoso tuntomba mwingi kubaka makani mankwangidika Yave. Mu Kibibila, tulenda bakula minsiku ayi minswa milenda ku tusadisa kuba ‘[baduka, bakubama] mu vanga mavanga moso mamboti.’ (2 Timoteo 3:16, 17) Minswa mi Kibibila, mi tusadisanga kuzaba bwidi Yave kanyindudilanga. Vayi mangolo mantombulu mwingi tubakula miawu. (Efeso 5:17) Mwingi ku tusadisa, befu twidi Índice das Publicações da Torre de Vigia, Guia de Pesquisa para Testemunhas de Jeová, Watchtower Library, Kibanga ki Nsungi KISWEKULU KI ZIBUKU MU KHONDI MAYO, ayi JW Library. Bo tunsadila byuma abyobyo, twala baka ndandu mu ndongukulu yi befu veka voti va dikanda.

18. Mbi bilenda monika befu kusadila minsiku ayi minswa mi Kibibila mu luzingu lwitu?

¹⁸ Luzingu lwitu lunlutanga kuba lumboti mu thangu tunsadila minsiku ayi minswa mi Yave. Buku yi Minkunga 119:97-100 yintuba: “Minu yinzolanga beni minsiku myaku! Minu yinyindulanga miawu kilumbu kyoso. Minsiku myaku mimvanganga minu yiba ndwenga kuvyoka zimbeni zyami, kibila miawu midi yami thangu zyoso. Minu yiluditi ndwenga na minlongisi myami, Kibila minu yinyindulanga zindubu zyaku. Yinlutanga kuvanga mambu masulama kuvyoka na bakulutu, Kibila yintumamananga minswa myaku.” Befu kubotula thangu mwingu kuyindula matedi minsiku ayi minswa mi Nzambi, twala luta vanga mambu mammonisa ndwenga ayi phisulu. Ayi befu sadila minsiku ayi minswa mi Nzambi mwingi kukubika kilunzi kitu, twala tula ‘mu tezo ki mutu wuyonzuka; mutu wowo wudedikini mu khudulu yiduka yi Klisto.’—Efeso 4:13.