1. Kibila mbi ki nkinza twidi mwingi kumona mayangi?

 BEFU TWIDI beni bayangalala, mu kukuwa bwidi bisadi bi Nzambi badi mu kubikila mwind’awu kulezama! Mu mvu wubedi, bisadi bi Yave batwadisa kuvyoka kumi di bivevi na bivevi (10.000.000) di ndongukulu yi Kibibila. Mafunda ma batu bayiza mu mbambukulu moyo ayi balonguka matedi khudulu, yidi khayilu yi luzolo lu Yave.—1 Yoane 4:9.

2, 3. (a) Mbi bikhambu tutulanga nkaku mwingi ‘tulezama banga minda”? (b) Mbi tunkwiza tubila mu dilongi adidi?

² Mu nza yimvimba, Zimbangi zi Yave bankolukanga zimbembo ziwombo zivyakana. Vayi mawu ma batulanga ko nkaku mwingi kubwongimina Yave banga dikanda dibumbana. (Nzaikusu 7:9) Voso kwa vama tunkalanga voti yosokwa mbembo tunkolukanga, befu tulenda lezama “banga minda va nza.”—Filipi 2:15.

³ Kisalu kitu ki kusamuna, kithwadi kitu ki Baklisto ayi kifuza twidi mu kisalu ki kusamuna bimvananga nkembo kwidi  Yave. Bwidi befu tulenda bikila mwind’itu wulezama mu mambu matatu amama?—Tanga Matai 5:14-16.

4, 5. (a) Kubotula kisalu ki kusamuna, bwidi tulenda bikila mwind’itu wulezama? (b) Ndandu mbi tulenda baka befu kumonisa lukinzu? (Tala foto yidi va thonono dilongi.)

⁴ Kusamuna ayi kusadisa bankaka kuba minsamuni yidi phila yimbote yi kubikila mwind’itu wulezama. (Matai 28:19, 20) Mu dilongi didi mu Kibanga ki Nsungi, Ngonda Yinsambanu, mvu 1925 diba tubila ntu dyambu ‘Mwinda mu Nza yi Kitombi’ yituba ti ni mutu kalendi ba ko wukwika mu Mfumu na khambu sadila mbote “lwaku lu kubika mwind’andi wulezama.” Diawu yibwela tuba: “Mutu kalenda sadila lwaku beni mu kusamuna zitsangu zimbote kwidi batu bankaka, ayi kudedikisa nzingulu’andi mu zinzila zi mwinda.” Kubotula kisalu ki kusamuna, zikhadulu zitu mvandi zimvananga Yave nkembo. Batu bawombo ba tumonanga bo tunsamuna. Bo tummonisa mwa disevu ayi tumvana bankaka mboti mu mayangi, yilenda basadisa ku tutadila mu phila yimbote ayi kutadila mbote Nzambi tumbwongiminanga.

⁵ Yesu wukamba minlandikini myandi: “Thangu lukotidi mu nzo, luvana basi nzo beni mboti.” (Matai 10:12) Mu bibwangu Yesu kasamuna, batu baba zolanga kutumisa zinzenza mu zinzo ziawu. Mu bibwangu binkaka bubu, basyala bwe vanga ko mawu. Batu batyanga ko voti bafika fwemanga boti mutu wunkokuta mwelo nzo’awu kasi ko wuzabakana. Vayi befu monisa zikhadulu zimbote, bawu balenda tya koluka yitu. Bo wumvana kimbangi mu kusadila makalu ma bilongulu, wummonanga ti bo wunseva ayi wumbila batu mu lukinzu, bawu banluta fikamanga mwingi kubonga kyoso kwa kilongulu? Bawu balenda zola kubwela koluka nkadu!

6. Mbi bisadisa biboba byodi badi bakwela kutatamana mu kisalu ki kusamuna?

⁶ Biboba byodi badi bakwela ku Inglaterra, basa bwe ba ko lwaku lu kusamuna nzo ka nzo, bila basyala ko buvinya bumbote. Bawu bambasisanga mwa meza vanganda ayi bantulanga bilongulu. Nzo’awu yiba yifikama na kikola kimweka, diawu baba tudilanga bilongulu matata baba ke landanga bana bawu mu kikola balenda zola tanga. Matata mankaka bambonganga mwa bilongulu, dedi Os Jovens Perguntam—Respostas Práticas, Volume 1 ayi 2. Ntwami ntwala mweka wu nkyeto wumbanga yawu. Matata bammonanga ti bawu badi mavanga mambote ayi zikhomba zitu zi biboba baba tomba ku basadisa. Tata mweka wutona kulonguka Kibibila.

7. Bwidi wulenda sadisila batu ba zitsi zinkaka badi va dibweti ditu?

⁷ Bubu, batu bawombo babika kuzingila mu bibwangu babutukitila mu kibila ki mimvita ayi bayenda mu zitsi zinkaka. Mbi wulenda vanga mwingi wusadisa batu abobo kulonguka matedi Yave? Ditheti, ngye wulenda  tona longuka bu kuvanina mutu mbote mu mbembo’awu. Ngye wulenda sadila JW Language, mwingi kulonguka mwa bikuma bilenda kusadisa kukoluka yawu. Voti wulenda bamonisa zivideo voti bilongulu bidi mu mbembo’awu mu jw.org.—Deutelonomi 10:19.

8, 9. (a) Bwidi zikhutukunu zitu va khati sabala zi tusadisilanga? (b) Bwidi matata balenda sadisila bana bawu babwela vana mimvutu mimbote mu zikhutunu?

⁸ Yave wu tuvananga byabyoso tuntomba mwingi kusamuna. Dedi mambu tunlongukanga mu Lukutukunu Nzingulu ayi Kisalu Kitu ki Buklisto ma tusadisanga tuluta kubama mbote mwingi kuvutukila mutu ayi kutonina ndongukulu yi Kibibila.

⁹ Batu bamona bankwizanga mu zikhutukunu zitu, bansiminanga beni kumona mimvutu bana balezi bamvananga. Ngye wulenda longa mwan’aku kuvana mimvutu mu bikuma byandi. Batu bawombo bakikinina kyedika bila bayuwa bana balezi kumonisa kiminu kiawu mu phila yimbote ayi yilenga.—1 Kolinto 14:25.

10. Bwidi mbwongimini va dikanda yilenda sadisila makanda mabwela ba kithwadi?

¹⁰ Bo tumvanga mangolo mwingi kusadisa dikanda ditu kusadila mu kithwadi ayi ndembama, befu tumvananga nkembo kwidi Yave. Boti ngye widi tata voti ngudi, ludika mbote bisalu byaku mwingi kubaka thangu yi kuvangila Mbwongimini yi Dikanda. Makanda mawombo bantalanga JW Broadcasting va kimweka, ayi kutsuka bantubilanga  bwidi balenda sadila mambu ba belonguka. Tebuka moyo ti phila wunlongila mwana kilezi bwisi ko buawu mvandi fweti longila ditoko. Vanga mangolo mwingi kadika mutu va dikanda kabaka ndandu mu mbwongimini yi dikanda.—Minkunga 148:12, 13.

11-13. Bwidi tulenda sadisila kimvuka kibwela ba kithwadi?

¹¹ Boti ngye widi ditoko, wulenda sadisa bankaka mu kimvuka bamona ti bawu nkinza badi. Wulenda tona kuvangila mawu mu kuvanga kikundi na zikhomba beka biboba. Bosi wuba yuvula mbi biba sadisanga batatamana kusadila Yave mu mimvu miwombo. Bawu balenda kuvana malongi mawombo ma luvalu. Ayi mawu mala kukindisa ayi mala kuba kindisa! Ayi befu boso, kheti twidi matoko voti bakulutu, tulenda sadisa zinzenza zitu kumona mayangi mu khumbu yitheti bankwiza mu lukutukunu. Wulenda tona mu kumvana mbote, kuseva nkadu yandi, kunsadisa kabaka vama va kukala ayi kunzabikisa kwidi zikhomba zinkaka. Wuba yamba mu phila yi kuba kwangidika.

¹² Boti ngye wuntwadisa lukutukunu lu kubasikila mu kisalu ki kusamuna, wulenda sadisa biboba kutatamana kubika mwind’awu wubwela lezama. Tulenda vanga mawu mu kuba tombila kizunga kimboti ayi kifikama mwingi basamuna. Ayi wulenda tula matoko basala yawu. Zikhomba zima nuna ayi bakhambu buvinya, balenda ba mu kyunda bila basyala bwe samuna ko mu phila baba samuninanga. Vayi bawu bela kwangalala beni kuzaba ti ngye wu bavwanga nkinza ayi wumvisa mbote ziphasi bamvyokila. Kheti bawu beka bakulutu voti mimvu miwombo beka mu kusadila Yave, mambote maku malenda ku bakindisa mwingi batatamana kusamuna mu kifusa.—Levitiku 19:32.

¹³ Basi Isaeli baba kwangalalanga beni kubwongimina Yave va kimweka. Davidi wusonika: ‘Phila yimbote ayi kitoko kwidi zikhomba mu thangu zinzingilanga va kimweka mu kithwadi.’ (Tanga Minkunga 133:1, 2.) Nandi wufwanikisa kithwadi ki zikhomba banga mfimbu yimboti yi mafuta voti malasi bamvindanga mwingi kulebisa ayi kukindisa nkanda nyitu. Dedi mafuta voti malasi, befu mvitu tulenda kindisila zikhomba zitu mu ku bavangila mambote ayi ku bakwangidika. Mawu mamvanganga kimvuka kibwela ba kithwadi. Ngye beki bu kuzabila mbote zikhomba zyaku mu kimvuka? —2 Kolinto 6:11-13; tala matangu madi va wanda mu nwt-TPO.

14. Bwidi ngye wulenda bikila mwind’aku wulezama va nsengi wukala?

¹⁴ Mwind’aku wulenda lezama voso kwa vama widi. Mambote maku malenda vanga batu badi va nsengi’aku kutomba longuka matedi Yave. Wulenda kuyikuvusa: ‘Mayindu mbi batu banzinganga yama va nsengi badi mu minu? Nzo’ama yidi yidyodila ayi yilulama? Yinsadisanga kizunga kitu kimonika bumbote? Yinsadisanga bake yama va nsengi?’ Yuvula zikhomba zinkaka bwidi mambote mawu ayi kifwani kiawu kisadisila  basi dikanda, banzinganga yawu va nsengi, bansalanga yawu, ayi bankontanga yawu kikola.—Efeso 5:9.

15. Kibila mbi tufweti tatamana kuba bakotuka mu kipheve?

¹⁵ Boti tutidi kutatamana kubika mwind’itu wulezama, tufweti zaba mbote thangu twidi mu kuzingila. Khumbu ziwombo Yesu wukamba minlandikini myandi: ‘Tatamananu bakotuka mu kipheve.’ (Matai 24:42; 25:13; 26:41) Befu kuyindula ti ‘ziphasi zinneni’ zisi fika kwiza ko, twisi nkwiza sadila ko lwaku loso tumbaka mwingi kusadisa bankaka kulonguka matedi Yave. (Matai 24:21) Mwinda beni wisi bwe lezama ko, vayi mu malembe wuntona kuzima ti wala mana.

16, 17. Mbi wulenda vanga mwingi wumona ti thangu yidi mu kuvyoka nswalu?

¹⁶ Ayiyi, yawu thangu tufweti luta ba bakotuka mu kipheve. Ziphasi mu nza ayiyi, zidi mu kubwelama. Vayi befu tuzebi ti tsukulu yi nza yala tuka mu thangu yifwana Yave kasola. (Matai 24:42-44) Diawu tufweti bela mvibudulu ayi kutsikika thalu’itu kuntwala.  Tanganga Kibibila kadika kilumbu, ayi bika vonga kusambila kwidi Yave. (1 Petelo 4:7) Landaka ntungulu wumbote wu zikhomba zidi mu kusadila Yave mu mimvu miwombo. Ngye wulenda tanga zinongu zi luzingu, dedi dilongi dintuba Setenta Anos ‘Agarrando a Aba da Veste de um Judeu,’ didi mu Kibanga ki Nsungi, Ngonda Yinna, mvu 2012, zitsyelo 18-21.

¹⁷ Wukivana mu kisalu ki Yave. Vangila mamboti kwidi bankaka ayi vyokisanga thangu va kimweka na zikhomba. Ngye wala ba mayangi ayi wala mona ti thangu yidi mu kuvyoka nswalu. (Efeso 5:16) Mu khama di mimvu mi mavyoka, bisadi bi Yave bima vanga mambu mawombo. Ayi bubu, kisalu ki Yave kima luta bwelama beni mu phila tukhambu yindudilanga. Mwind’itu wunluta kulezama.

18, 19. Bwidi bakulutu ba kimvuka balenda tusadisila mwingi tusadila Yave mu kifuza? Vana kifwani.

¹⁸ Kheti khumbu ziwombo tumvolanga masumu, Yave wumbikilanga tunsadila. Mwingi ku tusadisa, nandi wu tuvana bakulutu ba kimvuka badi banga ‘makaba ma batu.’ (Tanga Efeso 4:8, 11, 12.) Diawu, bo bakulutu ba kimvuka bankwiza kutala mwingi kukindisa, sadila mbote lwaku beni mwingi wubaka ndandu mu ndweng’awu ayi malongi mawu.

¹⁹ Dedi dikanda dimweka ku Inglaterra bo baba vyokila mu mambu va dikwela diawu, bawu badinda lusalusu kwidi bakulutu ba kimvuka. Nkazi kaba mwenanga ti nnuni’andi kabasa zabanga ko kutwama ntwala mu mambu matedi kisalu ki Yave. Nnuni wuba kimonanga banga kasa ba ko nlongisi wumbote ayi nandi wukikinina ti kabasa vanganga ko mangolo mwingi baba mbwongimini va dikanda kadika sabala. Bakulutu basadisa nnuni ayi nkazi bayindula kifwani ki Yesu. Bawu bakindisa nnuni kalandakana phila Yesu kaba kyebilanga minlandikini myandi. Ayi bakindisa nkazi mwingi kaba mvibudulu mu nnuni’andi. Bawu mvawu baba vana mwa diyindu mu phila balenda vangila mbwongini’awu va dikanda na bana bawu babwadi. (Efeso 5:21-29) Nnuni wuvanga mangolo mwingi kuba mfumu yimboti yi dikanda. Bakulutu bankindisa kabika kuvonga vayi kafyatila mu pheve yinlongo yi Yave. Luzolo ayi mamboti bakulutu bamonisa, bukyedika masadisa dikanda beni!

20. Mambu mbi malenda monika ngye kubika mwind’aku wulezama?

²⁰ ‘Nyenzi kwidi mutu widi boma bu Yave, ayi wundyatilanga mu zinzila Zyandi.’ (Minkunga 128:1) Wala ba mu mayangi ngye kubika mwind’aku wulezama. Diawu longanga bankaka matedi Nzambi, vanganga mangolo ma kusadisa dikanda dyaku ayi tatamana kuba wukotuka. Batu bankaka bala mona kifwani kyaku kimbote ayi bala tomba kuvana nkembo kwidi Tat’itu, Yave.—Matai 5:16.