1, 2. Bwidi Yave kadidi koku kuyalumuka mu befu?

 YAVE widi Nzambi yi mamboti. Bima byoso twidi, kwidi nandi bifumina. Nandi vwidi bima byoso bi luvalu bidi va nza, ayi nandi wubisadilanga mwingi kuzingisa myela myoso. (Minkunga 104:13-15; Hangai 2:8) Kibibila kitulonga ti Yave khumbu ziwombo kavangila mangitukulu mu kusadila byuma byandi bi luvalu mwingi kukyeba zitsatu zi dikabu dyandi.

² Buka mu thangu, yikhulu Yave wuvana bidia ayi nlangu kwidi bana ba Isaeli bo bawu baba zingila mu thandu mu 40 di mimvu. (Esodu 16:35) Kutsuka bawu babaka bima byoso baba tomba. (Nehemia 9:20, 21) Kuntwala, Yave wuvanga mangitulu mu nzila mbikudi Elisa, mwingi mafuta ma nkyeto wumweka wufwilu nnuni mabika mana. Khayilu beni Nzambi kamvana, yisadisa nkyeto beni kafuta zipholo kaba ayi kubwe baka mwa lubongo mwingi kuzingisila bana bandi. (2 Mintinu 4:1-7) Mu lusadusu lu Yave, Yesu mvandi mu mangitukulu wudikila batu  bawombo ayi wusadisa kubaka zimbongo mu thangu baba tomba.— Matai 15:35-38; 17:27.

3. Mbi tunkwiza longuka mu dilongi adidi?

³ Yave kalenda kwandi sadila kyoso kyuma mwingi kusadisa bivangu byandi. Vayi nandi wumvananga lwaku bisadi byandi mwingi bankabila bosokwa babakidi mwingi kubwela myoko kisalu ki kimvuka kyandi (Esodu 36:3-7; tanga Zingana 3:9.) Kibila mbi Yave kantombila tubwe nkabila bima bitu bi luvalu? Bwidi bisadi bi Yave mu thangu yikhulu baba bwedilanga myoko bisalu bi Yave? Bwidi kimvuka ki Yave kinsadilanga mikhayilu tumvananga? Tunkwiza baka mimvutu mi byuvu abyobyo mu dilongi adidi.

4. Kibila mbi tunkabilanga Yave?

⁴ Befu tunkabilanga Yave mu kibila ki luzolo twidi mu nandi. Befu kuyindula mambote Yave kama tuvangila, tumbanga beni phwila yi kumvangila mvandi mawu. Tumbanga mayindu buka maba Ntinu Davidi bo kaba tomba kutungila Yave tempelo. Davidi wutuba ti byabyoso twidi kwidi Yave bifumina ayi kyoso kyuma tunkabila Yave kwidi nandi kifumina.—Tanga 1 Lusansu 29:11-14.

5. Bwidi Kibibila ki tumonisina ti kukabila Yave yidi phila yi kumbwongimina mu bukyedika?

⁵ Befu tulenda kabila mvandi Yave kibila yidi phila yi kumbwongimina. Mu kimona mesu, mvwala Yoane wumona bisadi bi Yave bidi ku diyilu bantuba: “A Mfumu eto ayi Nzambi eto, ngeyo fueni mu tambula nkembo, nzitusu ayi lulendo bila ngeyo wuvanga bima bioso ayi mu diambu di luzolo luaku bivangulu ayi bidi moyo.” (Nzaikusu 4:11) Bukyedika, Yave fweni mu tambula nkembo woso ayi nzitusu, diawu befu tufweni tomba kumvana bima bitu bilutidi. Mu nzila Mose, Yave wuvana bana ba Isaeli lutumu lu kukutakananga khumbu zitatu mu mvu. Mu zikhutukunu beni bawu baba kiyeko ki kukabila Yave mikhayilu miawu. Yave wukamba bana ba Isaeli ‘babika kumonika va ntwal’andi mu khambu nata kyosokwa kyuma.’(Deutelonomi 16:16) Bubu mvandi kuvana makaba yidi phila yi kubwongimina Nzambi. Kibila phila yikubwedila myoko ayi yi kumonisina luvalu mu kisalu kimvuka ki Yave kimvanga va ntoto.

6. Kibila mbi dididi dyambu dimbote kukabanga? (Tala foto yidi va thononu dilongi)

⁶ Bubote beni kubanga kifu ki kukaba, bika to ki kutambula. (Tanga Zingana 29:21.) Yindulabu mwana kilezi wuntambulanga mwa zimbongo kwidi matata mandi. Bwidi matata mandi balenda mwena, na kubwe bonga mwa zimbongo beni mwingi kubasumbila mikhayilu? Voti yindula mwa ditogo widi ntwami ntwala wunkalanga ayi matata mandi, bongidi mwa zimbongo matata mandi ba kunkabilanga mwingi kasadisa matata mandi bafutila nzo ove basumbila bidya. Matata mandi, basa kunkwika ko kavanga mawu, vayi bawu balenda kikinina khayilu yi mwan’awu. Kibila mbi? Kibila phila yi kuvutudila matondo kwidi matata mandi mu mamoso ba kumvagilanga. Buawu bwididi mvandi Yave, nandi zabizi bilutidi mbote mu befu, ayi wuntomba tunkabila byuma bitu bi luvalu.

7, 8. Bwidi bisadi bi Yave mu thangu yikhulu babikila kifwani kimbote mu matedi (a) kubwela myoko kisalu ki kutunga? (b)  kusadisa bisadi binkaka bi Yave?

⁷ Mu Kibibila, tunlongukanga ti dikabu di Yave baba vananga mikhayilu mwingi kusadisa kisalu ki Yave. Khumbu zinkaka baba kuba kambanga ntindu byuma bafweti vana. Buka Mose, wukindisa bana ba Isaeli bakabila bima byawu bi luvalu mwingi kutungila tempelo voti nzo yinlongo yi Nzambi. Kuntwala mawu Ntinu Davidi kavanga bo kaba kubama mwingi kutunga tempelo. (Esodu 35:5; 1 Lusansu 29:5-9) Mu thangu luyalu lu ntinu Yoasi, zinganga zi Nzambi basadila zimbongo dikabu bavana mwingi kubwongisa tempelo. (2 Mintinu 12:4, 5) Mu mbandu yitheti, bo baklisto ba zitsi zinkaka bazaba ti zikhomba baba ku Yuda nzala baba vyokila ayi lusadusu baba tomba, kadika khomba mu mbakulu’andi, wuvanga mangolo mwingi kuba fila lusalusu.—Mavanga 11:27-30.

⁸ Dikabu di Yave mvandi mu thangu yikhulu, baba vananga mwa thalu yi lubongo mwingi kusadisa baba twamanga ntwala mu kisalu ki Yave. Buka mu minsiku mi Mose, nkunu wu Levi basa ba ko kyuka ki ntoto dedi minkunu minkaka. Kibila Yave kaba tomba batadila to matedi kiyeko kiawu batambula ku tempelo. (Zintalu 18:21) Bakyeto bawombo mu mbandu yitheti mvandi baba vananga bima biawu bi luvalu mwingi kusadisa Yesu ayi bapostolo bandi.—Luka 8:1-3.

9. Kuawu kubasikila lusalusu mu thangu yikhulu?

⁹ Lusalusu beni lubasikila kwidi batu baba mbakulu yivyakana. Buka mwingi kutunga tempelo, bana ba Isaeli baba lwaku lu kuvana byuma banata bo bafumina ku Ngipiti. (Esodu 3:21, 22; 35:22-24) Mu mbandu yitheti mvandi, Baklisto bawombo basumbisa bima byawu buka zitsola voti zinzo, ayi bavana zimbongo beni kwidi bapostolo. Bosi bapostolo baba sadilanga zimbongo beni mwingi kusadisa zikhomba baba mu zitsatu. (Mavanga 4:34, 35) Baklisto bankaka baba tulanga va khonzo mwa lubongo mwingi kubwela myoko kisalu ki Nzambi. (1 Kolinto 16:2) bukyedika, kutona kwandi bo baba busina ti bo bakhambu ba zimbongo ziwombo, bavana kyosokwa kyuma. —Luka 21:1-4.

10, 11. (a) Bwidi tulenda landikinina kifwani ki bisadi bi Yave mu thangu yikhulu mu matedi kuvana mikhayilu? (b) Bwidi wummwena diyindu di kubwela myoko kisalu ki Kintinu?

¹⁰ Mu thangu ayiyi mvandi balenda kutudinda tuvana kyoso kwa kyuma mwingi kukyeba yosokwa tsatu mu kimvuka ki Yave. Voti kimvuka kinu, ḿba makani mwidi kubwe bongisa Nzo yi Kintinu ove kubwe tunga yinkaka. Khumbu zinkaka ḿba filiali yi tsi mukala yintombulu kubongisa. Voti tulenda vana bosokwa tubakidi mwingi kubwela myoko byuma bansumbanga mu zikhutukunu zitu zinneni, ayi kusadisa zikhomba zitu bantomba lusalusu badi mu bibwangu bimonikini bivuka bingolo. Makaba mitu mvandi mansadisanga badi mu kisalu ki  thangu ka thangu buka, zimisionario, mintwami ntwala mifilwa, minkengididi mi bimvuka, ayi baboso bansadilanga mu zibeteli mu nza yimvimba. Voti kimvuka kinu ḿba bamfilanga nkadu zimbongo mwingi kusadisa kutunga Bibwangu bi Zikhutukunu Zinneni mu nza yoso.

¹¹ Befu baboso tulenda vana kyoso kwa kyuma mwingi kusadisa kimvuka ki Yave mu bilumbu abibi bi tsuka. Mikhayilu beni mitombulwanga ko kusonika mazina mitu ayi thalu tube vana. Bo tuntula mwa lubongo mu zikasu bakubika mu Zinzo zi Kintinu, voti mu nzila khond’itu mayo jw.org, bwisa fwana ko kuzabikisa mawu kwidi bankaka. Vayi mbi fweti tebuka moyo boti wudi mu kuyindula ti makaba maku masi ko beni luvalu? Zaba ti mikhayilu kimvuka ki Yave kantambulanga, minlutanga fumina kwidi bakhambulu beni kubika kwandi badi busina. Kheti zikhomba zitu bakhambulu mbakulu yiwombo balenda landakana kifwani ki baklisto baba ku Makedonia. Bawu baba beni “buphumbulu,” vayi bawu badinda mwingi bavana lusalusu kwindi zikhomba zinkaka ayi bavanina mu ntim’awu woso.— 2 Kolinto 8:1-4.

12. Bwidi kimvuka ki Yave kinsadilanga mikhayilu mu phila yifwana?

¹² Dingumba Dintwadisi didi dikwikama ayi didi ndwenga mu phila yi kusadila mikhayilu. (Matai 24:45) Zikhomba badi mu dingumba beni, bansambilanga theti ayi banyindulanga bumbote bwidi balenda sadila zimbongo. (Luka 14:28) Mu thangu yikhulu, bisadi bi Yave baba tadilanga matedi mikhayilu, baba banga keba keba mwingi kusadila zyawu to mu kisalu ki Yave. Buka Esala wuvutuka ku Yelusalemi ayi wunata mikhayilu mivana Ntinu wu Pelesi, buka wola, palata ayi byuka binkaka, bubu bilenda vyoka khama di bivevi na bivevi bi zidolar (U.S.) Esala wumona kyuka beni buka khayilu wu Yave. Diawu kavanina malongi kwidi batu baba yandi mwingi baba keba keba kibila ntoto baba wisa ba ko nsika. (Esala 8:24-34) Bo kuvyoka mimvu miwombo, mvwala Polo wukongula zimbongo mwingi kusadisa zikhomba baba ku Yuda. Nandi wuba tomba kuzaba ti batu baba nata zimbongo beni, baba batu ‘bamvanganga mambu mamboti, bika sia ti va meso ma mfumu to, vayi ayi va meso ma batu.’ (Tanga 2 Kolinto 8:18-21.) Bubu mvandi, kimvuka ki Yave kinlandakananga kifwani ki Esala ayi Polo mu matedi kusadila mboti mikhayilu.

13. Kibila mbi mambu mawombo mambalukilanga mu kimvuka ki Yave?

¹³ Dikanda balenda bila phila yimboti yi kusadila zimbongo mwingi babika kukota zipholo. Voti balenda dekula nzingulu’awu, mwingi babwela kukivana mu kisalu ki Yave. Mawu kimvuka ki Yave kimvanganga. Mu bilumbu bima vyoka, tuma mona bisalu biwombo bima vangama mu matedi kutunga bibwangu bi zikhutukunu, ayi zimbongo tuma basisa zilutidi na zimbongo tuma tambula. Diawu kimvuka ki Yave buka dikanda, kyeta tomba kudekula bisalu mwingi kusadila mu phila yifweni zimbongo ayi mikhayilu tuntambulanga.

14-16. (a) Bwidi bansadilanga mikhayilu tumvananga? (b) Bwidi bisadulu beni bi kusadisilanga?

¹⁴ Bawombo beka mimvu mu kimvuka ki Yave, bantubanga ti bubu tuma luta mona ndandu yintwadisanga mikhayilu mitu. Kibila  bubu tweka khondi mayo jw.org ayi JW Broadcasting. Tweka mvandi Kibibila kimona mu zimbembo ziwombo. Mu mvu 2014/2015 mvandi tuba zikhutukunu zinneni mu 14 di mavula mu nza yimvimba mu bilumbu bitatu. Ntu dyambu wuba tubila “Lutomba Theti Kimfumu ki Nzambi ayi Busonga Buandi”. Zikhomba bafumina mu zitsi ziwombo, balandakana ziawu bayangalanga beni!

¹⁵ Bawombo bayenda kuawu, bavutula beni matondo mu mikhayilu myoso Yave kantwadisanga mu nzila kimvuka kyandi. Buka zikhomba bakwela bansadilanga ku Asia batuba: “Befu batufila mwingi kusamuna mwa divula dimweka. Diawu thangu zinkaka tumbelanga mu kyunda ayi tunzimbakananga kisalu ki Yave kimvangama mu nza yoso. Vayi thangu tuntalanga video mu JW Broadcasting, ma tutebulanga monyo ti twidi mu khati dikanda di Yave mu nza yimvimba. Zikhomba badi yitu akuku, bankwangalalanga beni kulandakana JW Broadcasting kadika ngonda, kibila mambwelanga kuba fikika na zikhomba badi mu Dingumba Dintwadisi. Bubu badi beni mayangi mu kuzingila mu kithwadi na zikhomba zyoso mu nza yimvimba.”

¹⁶ Mu nza yimvimba 2.500 di Zinzo zi Kintinu bantunga ayi zinkaka bambongisa. Zikhomba zi kimvuka ku Honduras batuba ti yiba buka ndosi kubaka Nzo’awu Kintinu, vayi ndosi’awu bubu yima sunduka. Bawu basonika: “Twidi beni mu mayangi kuba mu dikabu di Yave ayi kuzingila mu kithwadi na zikhomba zi nza yimvimba.” Zikhomba ziwombo mvandi bantubanga mawu mu thangu bantambulanga Kibibila ayi bilongulu binkaka mu mbembo’awu, voti bo zikhomba zinkaka baba sadisa bo bamonikini bivuka, ayi thangu bammona kisalu kimbote ki kulonga zikhomba bamvanga mu bibwangu bimvyokila batu bawombo.

17. Bwidi tuzabidi ti Yave nandi wundyatisa kisalu kyandi?

¹⁷ Batu bawombo bakhambulu Zimbangi zi Yave, bankwitukanga bwidi tumvangilanga  mamoso amomo mu kusadila to mikhayilu. Mfumu yi empresa mweka widi zimbongo ziwombo, wuyenda kwe tala beteli ayi wuvyokila khonzo bambasisilanga bilongulu bitu, wuyituka kuzaba ti bansadilanga kuna baba futanga ko ayi kisalu beni kimvangiminanga mu mikhayilu tumvananga. Nandi wutuba ti empresa kansadilanga, yilendi nunga ko kuvanga mawu, kibila kisalu kilutidi ngolo. Mawu makyedika! Kibila Yave to wutunungisanga. Yave nandi wunnatisa kisalu kyandi.—Yobi 42:2.

18. (a) Lusakumunu mbi tumbakanga mu kubwela myoko kisalu ki Kintinu? (b) Bwidi tulenda longila bana bitu ayi batu bamona mu kimvuka kuvanga mawu?

¹⁸ Yave wutuvananga lwaku lu kubwela myoko kisalu ki Kintinu. Nandi wunkanikisa ti befu vanga mawu, twala tambula lusakumunu lwandi. (Malaki 3:10) Yave wunkanikisa ti befu sadila bima bitu byoso mwingi kunkabila, mambu moso mala ba mbote mu befu. (Tanga Zingana 11:24, 25.) Nandi mvandi wutukamba ti twela luta mona mayangi befu kukaba bika kwandi bo tuntambula. (Mavanga 20:35) Mambu tuntuba ayi tumvanga, malenda longa bana bitu ayi batu bamona mu kimvuka baba kifu ki kubwela myoko kisalu ki Yave mwingi mvawu batambula lusakumunu lwandi.

19. Bwidi dilongi adidi dima kukindisila?

¹⁹ Byuma byoso bidi yitu kwidi Yave bifumina. Diawu bo tu kunkabila biawu, phila tummonisina luzolo lwitu mu nandi ayi mu mamoso katuvangilanga. (1 Lusansu 29:17) Bo bana ba Isaeli bavana mikhayilu miawu mwingi kutungila tempelo, bawu ‘bayangalala beni kibila bavanina miawu kwidi Yave mu ntima woso ayi mukhambu kwiku.’ (1 Lusansu 29:9) Tutidi befu mvitu kumona mayangi ma phila beni mu kubwe kabila Yave byuma byoso naveka katuvana.