1, 2. Mu mvu 2018 nkungi mbi wala ku tukutikisa va kimweka, ayi kibila mbi? (Tala foto yidi va thononu dilongi.)

 MU Kilumbu 31, mu ngonda Yintatu, mvu 2018, mafunda na mafunda ma batu mu nza yoso bala kwenda mu nkungi wumvangamanga khumbu yimweka mu mvu. Ku tsuka mwinya mu kilumbu beni, Zimbangi zi Yave ayi batu bankaka bala kutakana mwingi kutebuka moyo lufwa lu Yesu. Kadika mvu nkungi beni, wunkutikisanga batu mu phila yilutidi mbote, kuvyoka kwandi mikungi minkaka mi nza ayiyi.

² Yave ayi Yesu bankwangalalanga beni kumona batu bawombo mu nza yoso bankwenda mu nkungi beni mu bilokolo bivyakana. Kibibila kiba fwanikisa buka ‘Nkangu wunneni wu batu wowo mutu kalendi tangikisa ko, wubasikila mu zitsi zyoso, mimvila, makanda ayi zimbembo zyoso,’ Bantenduka: ‘Phulusu yidi kwidi Nzamb’itu yoyi yivwendi va kundu ki kimfumu ayi kwidi Muana Dimemi.’ (Nzaikusu 7:9, 10) Mayangi  mawombo kumona ti kadika mvu mu mbambukulu moyo, mafunda na mafunda ma batu bankwiza kembisanga Yave ayi Yesu mu mamboti bawu batuvangila.

3. Byuvu mbi tunkwiza baka mimvutu mu dilongi adidi?

³ Mu dilongi adidi tunkwiza baka mimvutu mi byuvu abibi: (1) Bwidi yilenda kubimina mu nkungi beni mwingi yibaka ndandu? (2)  Mu phila mbi mbambukulu moyo lufwa lu Yesu yinsadisilanga dikabu di Nzambi kuba kithwadi? (3)  Mbi yilenda vanga mwingi kubwela kithwadi kidi mu dikabu di Nzambi? (4)  Kwala ba mbambukulu moyo yitsuka? Boti kwala ba muna thangu mbi?

4. Kibila mbi ki nkinza tufweti kwendilanga mu nkungi wu mbambukulu moyo?

⁴ Kibila mbi ki nkinza tufweti kwendilanga mu nkungi wu mbambukulu moyo? bila phila yi kubwongimina Yave. Tulenda ba lufyatu ti Yave ayi Yesu bammonanga kadika mutu mangolo kamvanganga mu kukwenda mu nkungi beni wulutidi nkinza mu mvu. Boti kwisa monika ko dyambu dingolo dibe tukaka mwingi tubika monika, tuntomba ti Yave ayi Yesu bamona mangolo tube vanga mwingi kumonika mu nkungi beni. Boti zikhadulu zitu zimmonisanga ti zikhutukunu nkinza zidi kwidi befu, muna Yave kalasa kubula ko mazina mitu mu “buku yi mbambukulu.” Buku beni mvandi ba kuyitedilanga “buku yi moyo.” Muawu mwidi mazina ma baboso Yave kantomba kuvana luzingu lu mvu ka mvu.—Malaki 3:16; Nzaikusu 20:15.

5. Ava sabala yi mbambukulu moyo, bwidi wulenda ‘fyongunina ti wulembu zingila mu kiminu’?

⁵ Ava sabala yi mbambukulu moyo lufwa lu Yesu, tufweti botula thangu mwingi kusambila ayi kufyongunina bwididi kikundi kitu na Yave. (Tanga 2 Kolinto 13:5.) Mvwala Polo wukamba baklisto: “Lukifyongunina benu veka ayi lukitala mu diambu di zaba kani lulembo zingila mu minu.” Bwidi tulenda vangila mawu? Tulenda ku yikuvusa: ‘Bukyedika ti akiki, kyawu kimvuka Yave kasola mwingi kuvanga luzolo lwandi? Minu yilembu vanga mangolo mwingi kusamuna ayi kulonga zitsangu zimbote? yimmonisanga mu zikhadulu zyami ti yitidi vuka mu bilumbu bisuka voti tsukulu yi nza yi Satana yima belama? Lufyatu lwama mu Yave ayi mu Yesu, lukhidi lukinda dedi bo lubela va thononu?’ (Matai 24:14; 2 Timoteo 3:1; Ebeleo 3:14) Kuyindula matedi mimvutu mi byuvu abyobyo, malenda kutusadisa ‘tutatamana kumonisa’ phila batu mbi twidi va meso ma Yave.

6. (a) Phila mbi tulenda bakila luzingu lu mvu ka mvu? (b) Bwidi nkulutu wu kimvuka kankubiminanga ava kukwenda mu Mbambukulu Moyo kadika mvu, ayi bwidi ngye wulenda kubumina mvaku mu phila beni?

⁶ Phila yi kukubimina mu Mbambukulu Moyo lufwa lu Yesu, mu kutanga ayi kuyindula bilongulu binsudikisa nkinza nkungi beni widi. (Tanga Yoane 3:16; 17:3.) Kubaka nzayilu mu matedi Yave ayi kumonisa kiminu  mu Yesu mwan’andi, yawu to phila tulenda bakila luzingu lu mvu ka mvu. Mwingi tukubama mboti, tulenda kwitu sola kutanga bilongulu bilenda kutusadisa kufikama Yave ayi Yesu. Mawu khomb’itu wusala buka nkulutu wu kimvuka mu mimvu miwombo kamvanganga. Nandi wunkubikanga zi ASentinela zyoso zintubila matedi Mbambukulu Moyo ayi zimmonisa phila Yave ayi Yesu batumonisina luzolo. Ava sabala yi Mbambukulu Moyo nandi weta botula thangu mwingi kubwe tanga malongi beni ayi kufyongunina mbote nkinza widi nkungi beni. Thangu ka thangu, nandi wumbwelanga mu kyuka kyandi bilongulu bimona bintubila mambu beni. Mvandi wuntanganga ayi wunyindulanga matangu ma Kibibila matedi Mbambukulu Moyo. Nkulutu beni wutuba ti kuvanga mawu, ma kunsadisanga kulonguka mambu mamona kadika mvu. Vayi dyambu dilutidi, lozolo lwandi na Yave ayi Yesu lweti bwela kinda. Ngye kuvanganga mawu, wala baka ndandu buka nandi ayi wala vutulanga matondo mu mamboti bawu batuvangila.

7. (a) Mambu mbi Yesu kadinda va bwilu butheti badya Bidya bi Mfumu ? (b) Mbi bimmonisa ti Yave wutambudila nsambu wu Yesu?

⁷ Va bwilu butheti badya Bidya bi Mfumu va Masika ma Bwilu, Yesu wutuba mambu ma nkinza mu nsambu kavanga. Nandi wutubila kithwadi kimboti kadi ayi Tat’andi. Mvandi wudinda mwingi minlandikini myandi baba ntindu kithwadi beni. (Tanga Yoane 17:20, 21.) Yave wuntambudilanga nsambu beni Mwan’andi kavanga. Kibila botula kwandi zikhutukunu tumbanga, Mbambukulu Moyo yinlutanga monisa ti Zimbangi zi Yave badi kithwadi. Mu kilumbu beni mafunda na mafunda ma batu mu zitsi zyoso ayi badi minkanda mi nyitu mivyakana, bankutakananga mwingi kumonisa ti bankikininanga ti Yave nandi wufila Mwan’andi. Mu bibwangu binkaka, kisi ko kifu kumona batu ba mimvila mivyakana kukutakana mu nkungi, kheti dibundu dimweka bansambilanga. Voti ba kuvanga mawu, bankaka bammonanga buka bwisa fwana ko. Vayi bakana buawu ko Yave ayi Yesu banyindudilanga. Kwidi bawu, kithwadi kitu mu Mbambukulu Moyo mayangi kiba twadisanga.

8. Tsangu mbi Yave kavana kwidi Yehezekeli?

⁸ Befu Dikabu di Yave, tuyitukanga ko mu phila kithwadi beni twidi. Kibila Yave wubikula mawu mu nzila Yehezekeli. Nandi wukamba Yehezekeli kabonga minti myodi, nti wutheti wuba fwanikisa dikabu di “Yuda” ayi wunkaka dikabu di “Yosefi,” ayi wunkamba kambundisa miawu va kimweka. (Tanga Yehezekeli 37:15-17.) “Kyuvu ki Mintangi” kibasika mu A Sentinela, mu ngonda Sambwadi, mvu 2016 mu Kiphutu yisudikisa ti: “Mu nzila Yehezekeli Yave wubikula ti Dikabu dyandi dyala vutuka ku tsi ka bakanikisa ayi bawu bala zingila mu kithwadi buka Dikabu di mweka. Mbikudulu beni yiba monisa mvandi kithwadi mimbwongimini mi Yave bala ba mu bilumbu bitsuka, buka Dikabu di mweka.”

9. Mu Mbambukulu Moyo yi kadika mvu, bwidi tummwenanga kithwadi ki dikabu di Yave dedi bo Yehezekeli kabikudila?

⁹ Va thononu mvu 1919, Yave theti wutona kuludika ayi kubundisa basolwa va ntoto. Bawu baba buka nti voti dikabu di “Yuda.” Bosi bo bala zingila va ntoto batona kubundana ayi bankwenda ku diyilu. Bala zingila  va ntoto badi buka nti voti dikabu di “Yosefi.” Yave wukanikisa ti wala bunda minti mimyodi ayi wala “bavanga bakituka nti wumweka” mu myoko myandi. (Yehezekeli 37:19) Nandi wuvanga basolwa ayi “mamemi mankaka” bakituka “nkangu wumweka to wu mameme.” (Yoane 10:16; Zakalia 8:23) Bubu minkangu mimyodi badi va kimweka ayi badi mu kusadila Yave mu kithwadi. Ayi bawu badi Ntinu wumweka, Yesu Klisto, nandi mu mbikudulu yi Yehezekeli bantedila “Davidi kisadi ki Nzambi.” (Yehezekeli 37:24, 25) Kadika mvu bo tunkutakananga ayi zikhomba mwingi kubambukila Moyo lufwa lu Yesu, tummonanga kithwadi kidi mu mangumba beni mamwadi Yehezekeli katubila. Vayi mbi kadika mutu mu befu kalenda vanga mwingi kukeba ayi kubwela kithwadi mu Dikabu di Nzambi?

10. How can we promote unity among God’s people?

¹⁰ Diambu Mbi ditheti tulenda vanga mwingi kubwela kithwadi ki dikabu di Nzambi? Mu kuba mutu wu kuyikululanga. Bo Yesu kaba va ntoto, wukamba minlandikini myandi baba batu ba kikululanga. (Matai 23:12) Batu mu nza yi tunzingila bantombanga kukinangika va meso ma bankaka. Vayi befu kuyikulula, twala kinzika zikhomba bantwama ntwala mu bimvuka ayi twala tumamana thwadusulu’awu. Ayi mawu mala vanga kimvuka  kiba kithwadi. Dilutidi nkinza befu ku kikulula, twala kwangidika Nzambi, kibila nandi “weti kakumukina bankwa lunyemo vayi weti vana nlemvo’andi kwidi batu bobo beti ku yikulula.”—1 Petelo 5:5.

11. Mu Mbambukulu Moyo yi kadika mvu, bwidi tummwenanga kithwadi ki dikabu di Yave dedi bo Yehezekeli kabikudila?

¹¹ Diambu mbi dimwadi tulenda vanga mwingi kubwela kithwadi kitu? Mu kuyindula bumboti tsundu yi dipha ayi vinu bamvyokisanga mu nkungi beni. Tufweti vanga mawu ava nkungi wu Mbambukulu Moyo ayi mu bwilu beni. (1 Kolinto 11:23-25) Dipha dikhambu luvi , dinsundula nyitu Yesu kavana buka khayilu. Vinu yinsundula menga mandi. Vayi bakana mawu to tufweti vanga. Tufweti tebuka moyo ti khayilu yi Yesu yimmonisa luzolo lu batu bwadi. Theti lu Yave wutuvana mwan’andi, ayi lu Yesu wukikana kuvana luzingu lwandi mu kibila kitu. Kuyindula mawu, mala vanga tubwela kuzola Yave ayi Yesu. Ayi luzolo kadika mutu mu befu kadi mu Yave lwala bwela kindisa kithwadi voti kikhomba kitu.

12. Mu nongo yitedi ntinu ayi kisadi kyandi, bwidi Yesu kamonisina ti Yave wuntomba tulemvukilanga bankaka?

¹² Diambu mbi dintatu tulenda vanga mwingi kubwela kithwadi kitu? Tufweti lemvukilanga zinzimbala zi bankaka. Befu kuvanga mawu, tulembu monisa ti tumvutudila Yave matondo wufila mwan’andi mwingi tubaka nlemvo wu masumu. Mwingi kumonisa nkinza widi kulemvukila bankaka, diawu Yesu katela nongo yitedi ntinu wumweka ayi kisadi kyandi. Tanga Matai 18:23-34 ayi wu yiyuvusa: ‘Yidi wukubama mwingi kutumamana mambu Yesu kalonga? Yidi mvibudulu ayi yinkuwilanga zikhomba? Yidi wukubama mwingi kulemvukilanga zinzimbala zi bankaka?’ Bo twidi batu bamasumu, tuzabizi ti vadi masumu mankaka mangolo tulenda mona phasi kulemvukila. Vayi nongo yi Yesu yi tumonisa mambu Yave kantomba mwingi befu tuvanga. (Tanga Matai 18:35.) Yesu wutuzabikisa ti Yave kalendi kutulemvukila ko befu manga lemvukila khomba boti nandi be tulinda nlemvu . Adyodyo dyambu tufweti yindulanga. Mwingi tukeba kithwadi kitu, tufweti lemvukilanga bankaka dedi bo Yesu katulongila.

13. Bwidi bu kubwedila ndembama ayi kithwadi na bankaka?

¹³ Bo tunlemvukila bankaka, buawu tumbwedila ndembama na zikhomba zitu. Mvwala Polo wutuba ti tufweti vanga mangolo mwingi tutatamana zingila mu kithwadi ayi mu ndembama na bankaka. ( Efeso 4:3) Mu thangu Mbambukulu Moyo, voti va bwilu beni, tufweti yindula phila tunzingilanga ayi bankaka. Tulenda yifyongunina: ‘Bukyedika ti batu bazebi ti minu yilundanga ko nganzi kwidi mutu be phangila dyambu dimbi? Batu bammonanga ti minu yimvanganga mangolo mwingi kutula ndembama ayi kithwadi?’ Abibi bidi byuvu binkinza tufweti yindula.

14. Bwidi tulenda monsina ti twidi mu ‘kuzaba kuvibidila zikhomba zitu mu luzolo’?

¹⁴ Diambu mbi dinna tulenda vanga mwingi kubwela kithwadi kitu? Mu kulandakana kifwani ki Yave mu kumonisa luzolo. (1 Yoane 4:8) Tubika tubanga: “Minu yifweti zola zikhomba zyoso, vayi yilendi kuba fikama ko, voti kuba yawu kikundi.” Befu kuyindudila phila ayoyi, muna twisinlandakana ko dilongi mvwala Polo kavana bo katuba “luzaba vibidila zikhomba beno na  benu mu luzolo.” (Efeso 4:2) Polo kasa tubila ko to tuvibidila zinzimbala zi zikhomba zitu, vayi nandi wutuba tuvangila mawu “mu luzolo.” Diswasana didi. Mu kimvuka twidi batu badi zikhadulu zivyakana, vayi tufweti tebukanga moyo ti Yave nandi wutumisa baboso. (Yoane 6:44) Nandi wutadila mambote madi mu bawu, diawu kaba tumisina. Diawu boti zikhomba zitu bafweni mu tambula luzolo lu Yave, bukyedika kwandi ti basa fwana ko kutambula luzolo lwitu? Bukyedika befu tufweti luta tomba kumonisa luzolo mu bawu dedi bo Yave kantombila.—1 Yoane 4:20, 21.

15. Bwidi tuzabidi ti kwala ba Mbambukulu Moyo yitsuka?

¹⁵ Kwala ba kilumbu kitsuka twala bambukila moyo lufwa lu Yesu. Bwidi tuzabidi mawu? Polo wukamba baklisto basolwa ti mu thangu bamvanga mbambukulu moyo lufwa lu Yesu kadika mvu, badi mu “kuyamikisanga lufwa lu mfumu ti kala kwiza.” (1 Kolinto 11:26) Yesu mvandi wutubila “phutukulu’andi” bo kabikula matedi tsukulu yi nza ayiyi. Bo kaba tubila thangu yi ziphasi zi ngolo yima fikama, nandi wutuba: “Dimbu ki mwana mutu kyala monika ku diyilu ayi batu ba makanda moso ma ntoto bala nyonga ayi bala mona Mwana mutu wunkwizila mu matuti ma diyilu mu lulendo ayi mu nkembo wunneni. Thangu phungi yinneni yela siku, niandi wela tuma zimbasi zyandi. Zyawu zyela kutikisa batu bandi boso bobo kasobula mu zitsongi ziya zi nza, tona ku kutonina nate kusukisina nza.” (Matai 24:29-31) Yesu wala kutikisa batu bandi boso bobo kasobula’ bala ba mu thangu beni va ntoto ayi wala banata ku diyilu. Mawu mala monika bo ziphasi zingolo zyala tona, ayi ava mvita wu Alimangedoni wutona. Mu mvita beni, Yesu va kimweka na 144.000, bala nwanisa mintinu mi nza ayiyi. (Nzaikusu 17:12-14) Mbambukulu moyo yitsuka twala landakana, yala ba ava Yesu kiza kutikisa bo basolwa mu pheve bala ba mu thangu beni va ntoto ayi kuba nata ku diyilu.

16. Kibila mbi tufweti bakila makani ma kulandakana Mbambukulu Moyo mu mvu awuwu?

¹⁶ Ba wukindama mu kulandakana mbambukulu moyo mu kilumbu 31, ngonda Yintatu, mvu 2018. Ayi dinda Yave ka kusadisa wuvanga mangolo ku khonzo’aku mwingi dikabu dyandi ditatamana kuba dibundana ayi mu kithwadi. (Tanga Minkunga 133:1.) Vadi kilumbu twala kwenda khumbu yitsuka mu mbambukulu moyo. Vayi ava kilumbu beni kifwana, tumonisanu ti kithwadi ki kyedika twidi mu mbambukulu moyo yi kadika mvu, mayangi ki tutwadisanga.