Mu Kintatu, kilumbu 24, Ngonda Yitheti, mvu 2018, dikanda di Beteli ku Estados Unidos ayi ku Canada bayangalala beni kukuwa tsangu yimboti batambula: Khomba Kenneth Cook, Jr., weka mu Dingumba Dintwadisi di Zimbangi zi Yave.

Khomba Cook wubutuka ayi wuyonzukila ku Pennsylvania, EUA. Nandi wulonguka kyedika mu nzila nkyeto mweka waba kotanga yandi kikola ayi wubotama mu kilumbu 7, Ngonda Yinsambanu, mvu 1980. Nandi wutona kisalu ki thangu ka thangu mu kusala buka ntwami ntwala mu kilumbu 1, Ngonda Yivwa, mvu 1982. Bo kasala mimvu myodi buka ntwami ntwala, bantumisa ku Beteli, ayi wutona kusadila ku Beteli yi Wallkill, Nova York, mu kilumbu 12, Ngonda Yinana, mvu 1984.

Khomba Cook wuvanga 25 di mimvu mu kusadila mu biyeku biwombo ku Kibwangu Bambasisanga Bilongulu ayi ku Beteli. Mu 1996, nandi wukwelana na nkazi’andi Jamie, ayi batona kusala va kimweka ku Beteli yi Wallkill. Mu Ngonda Kumi Yimwadi, mvu 2009, Yaya Kenneth Cook ayi nkazi’andi baba fila ku Kibwangu ki Nzo Nkanda yi Kibanga ki Nsungi, ku Patterson, Nova York, ayi Yaya Cook wutona kusadila mu Dingumba Dimfyonguninanga Mambu mu Dikabu di Minsoniki. Mu Ngonda Yinna, mvu 2016 bo bavutuka ku Wallkill, Yaya Cook ayi nkazi’andi baba fila ku Brooklyn, Nova York. Zingonda zitanu zivyoka, bawu bayenda ku kikulutu kimona ku Warwick, Nova York. Mu Ngonda Yitheti, mvu 2017, Yaya Cook wutambula kiyeku ki kuba nsadisi mu Dikabu di Minsoniki di Dingumba Dintwadisi.