1. Dilongi mbi mvuala Petelo kavana baklisto, ayi kibila mbi tulenda muena ti tulendi nunga ko kuba banlongo?

KUBA kuandi ti tuidi kivuvu ki kuzingila ku diyilu voti va ntoto, befu boso tulenda baka ndandu mu dilongi mvuala Petelo kavana baklisto mu sekulu yitheti. Nandi wuba sonikina: “Dedi bo mutu wu lutela kadidi wunlongo, lukituka banlongo mu zikhadulu zinu, kibila masonama: ‘Luba banlongo kibila minu yidi wunlongo.’” (1 Pete. 1:15, 16) Bikuma abiobio bimmonisa ti tulenda landakana kifuani ki Yave, ntungulu wulutidi mu kuba wunlongo. Befu tufueti ba banlongo mu zikhadulu zitu, vayi mu kuba batu ba masumu, malenda monikina buka ti tulendi nunga ko. Mvuala Petelo wuvanga zinzimbala ziwombo; vayi kifuani kiandi ki tumonisa ti tulenda nunga “kuba banlongo.”

2. Buivu mbi tukuinza tambudila mu dilongi adidi?

² Mu dilongi adidi, tunkuiza tambudila biuvu binlanda: Mbi binsundula kuba banlongo? Mbi Kibibila ki tulonga matedi bunlongo bu Yave? Buidi tulenda bela banlongo mu zikhadulu zitu? Ayi nguizani mbi yidi kuba banlongo ayi kuba kikundi na Yave?

3. Bo batu bankuwanga kikuma wunlongo mbi bawu banyindulanga? Buabu kuidi tulenda bakila mvutu wukiedika?

³ Batu bawombo bo bankuwanga kikuma wunlongo, banyindulanga ti widi mutu widi kizizi kikangama, wumvuatanga mazuela ayi wukhambu sevanga. Vayi bakana ko mawu. Kibibila kintuba ti Yave widi wunlongo, ayi widi “Nzambi yi  mayangi.” (1 Timo. 1:11) Ayi dikabu diandi ba kuditedilanga dikabu di “mayangi.” (Minku. 144:15) Diawu Yesu kasa kuangalala ko mu batu baba vuatanga mazuela muingi baba disuasana na bankaka, ayi baba fundisanga bankaka mu phil’awu muingi baba zitisa. (Matai 6:1; Malako 12:38) Vayi kuidi befu baklisto diambu difueti monisa ti tuidi banlongo, phila tunsadilanga mambu tunlonguka mu Kibibila. Befu tuidi lufiatu ti Nzamb’itu yinlongo ayi yi luzolo, kalendi ko ku tudinda kuvanga mambu mo kazebi ti tulendi nunga ko. Diawu mu thangu Yave kantuba: “Luba banlongo,” tuisi ko divuda ti tulenda nunga. Vayi ava tuba banlongo mu zikhadulu zitu, tufueti visa mbi binsundula kuba banlongo.

4. Mbi bikuma “wunlongo” ayi “kuba wunlongo” binsundula?

⁴ Mbi binsundula kuba wunlongo? Mu Kibibila bikuma “wunlongo” ayi “kuba wunlongo” binsundula kuba wudiodila voti wunlongo mu mayindu ayi mu mbuongimin’itu. Mvandi binsudula kuba wuvasuka muingi kuvanga kisalu ki Nzambi. Mu phila yinkaka, tulenda tuba ti muingi tuba banlongo voti badiodila mu mayindu, mbuongimin’itu yifueti ba yisulama va meso ma Yave ayi mvandi kuba kikundi kifikama ayi nandi. Bo tunyindula kuba kikundi kifikama na Nzamb’itu yinlongo, tunkuitukanga beni, bulutidi bo tumfiongunina mbi Kibibila kinlonga mu matedi bunlongo bu Yave.

5. Mbi zimbasi zikuikama zi tulonga matedi Yave?

⁵ Yave widi wusama ayi wudiodila mu ziphila zioso. Tuzabidi mawu, mu mambu baselafa—zimbasi zilutidi fikama va kikundu ki Yave batuba: “Yave, Mfumu minkangu, widi wunlongo, wunlongo, wunlongo.” (Yesa. 6:3) Tuzebi ti muingi zimbasi baba kikundi kifima ayi Nzambi yinlongo, mvawu bafueti ba banlongo. Diawu bo mbasi yi Yave kabe kulukanga va kibuangu, kiawu kiaba banga kinlongo. Mawu mamonika bo Mose kamona mua nti waba lema mbazu.—Esodu 3:2-5; Yosua 5:15.

6-7. (a) Dedi bummonisina Esodu 15:1, 11, buidi Mose kasudikisila ti Nzambi widi wunlongo? (b) Mbi biaba sadisanga bana ba Isaeli kutebukanga moyo bunlongo bu Nzambi? (Tala fikula yidi va thonono levista.)

⁶ Mu thangu bana ba Isaeli bataba ḿbu wubenga, Mose wutubila khumbu ziwombo ti Yave, Nzambi’awu widi wunlongo. (Tanga Esodu 15:1, 11.) Zikhadulu zi batu baba buongiminanga zinzambi zi Ngipiti ayi zi Kanani, zisa ba ko zinlongo. Kibila mu mbuongimini’awu baba vikanga bana banga minkhayilu ayi baba vanganga mambu ma kitsuza. (Levi. 18:3, 4, 21-24; Deute. 18:9, 10) Yave bo kadi wunlongo, kabasa dindanga ko dikabu diandi bavanga mambu amomo malenda vueza dizina diandi. Thata yi wola yaba banga mu ntu yi Mfumu yi Zinganga Nzambi, yawu yaba sadisanga dikabu di Isaeli kutebukanga moyo bunlongo bu Yave. Muawu muba musonama bikuma abibi “Yave widi wunlongo.”—Esodu 28:36-38.

⁷ Bo basi Isaeli baba monanga bikuma abiobio, baba tebukanga moyo ti Yave, widi wunlongo. Ayi kheti bankaka babasa bakanga ko bu kumuena bikuma beni va belama, bawu mvawu bazaba ti Yave widi wunlongo. Buidi bazabila mawu? Dikabu dioso di Isaeli kuba kuandi dibakala, nkieto, muana, bayuwa mu thangu batanga bikuma abiobio mu Minsiku. (Deute. 31:9-12) Boti ngie mvaku wuba mu thangu beni khanu wuyuwa  bikuma abibi: “Minu yidi Yave Nzambi’aku ayi luba banlongo kibila minu yidi wunlongo.” “Luba banlongo kuidi minu, kibila minu Yave yidi wunlongo.”—Levi. 11:44, 45; 20:7, 26.

8. Kibila mbi tufueti longukila mambu madi mu Levitiku 19:2 ayi 1 Petelo 1:14-16?

⁸ Buabu tutala mambu Yave katuma muingi batangila dikabu di Isaeli. Bikuma beni bidi mu Levitiku 19:2 ayi mu lutangu beni Yave wukamba Mose: “Kamba dikabu dioso di Isaeli, ‘benu lufueti ba banlongo kibila minu Yave Nzamb’inu yidi wunlongo.’” Ḿba mvuala Petelo waba tanguna lutangu alolo mu thangu kaba kindisa baklisto muingi “baba banlongo.” (Tanga 1 Petelo 1:14-16.) Kheti bubu tusiedi ko ku tsi minsiku mi Mose, vayi mambu mvuala Petelo katuba, madi nguizani na mo madi mu Levitiku 19:2, mantuba ti Yave widi wunlongo ayi bo ba kunzolanga bafueti vanga mangolo muingi baba banlongo. Ayi befu boso tufueti vanga mawu kuba kuandi ti kivuvu kitu kidi kuzingila ku diyilu voti va ntoto.—1 Pete. 1:4; 2 Pete. 3:13.

9. Kibila mbi didi diambu dinkinza kulonguka madi mu Levitiku kapu 19?

⁹ Bo tutidi kukuangidika Nzamb’itu widi wunlongo, diawu tufueti vangila mangolo muingi tuba banlongo. Mu Levitiku kapu 19, Yave wu tuvana malongi mu phila tulenda vangila mawu. Marcus Kalisch widi wupisuka mu mbembo yi Kiebeleo wusonika: “Kapu 19, yidi yimueka mu zikapu zilutidi nkinza mu buku yi Levitiku voti mu zibuku zitanu zitheti zi Kibibila.” Diawu tunkuiza fiongunina mua matangu mu kapu beni ayi kumona malongi mankinza tulenda longuka mu luzingu luitu lu lumbu ka lumbu. Ayi mu dilongi adidi, buboti kutebuka moyo ti malongi moso tunkuiza longuka madi kumbusa bikuma bintuba “benu lufueti ba banlongo.”

10-11. Mbi Levitiku 19:3, luntuba tuvanga ayi kibila mbi?

¹⁰ Bo kamana kukamba basi Isaeli ti bafueti ba banlongo, Yave wubue tuba: “Kadika mutu mu benu kafueti kinzika tat’andi ayi ngudi’andi . . . Minu yidi Yave Nzamb’inu.”—Levi. 19:2, 3.

 ¹¹ Tufueti vua beni nkinza lutumu Nzambi kavana lu kukinzika matata mitu. Kibila bo dibakala dimueka kayuvula Yesu: “Mbi yifueti vanga muingi yibaka luzingu lu mvu ka mvu?” Mu mvutu Yesu kamvana, nandi wutubila mvandi nsiku wu kukinzika tata ayi ngudi. (Matai 19:16-19) Ayi Yesu wufundisa Bafalisi kibila babasa vuanga ko nkinza kiyeku ki kukieba matata mawu. Mu kibila akiokio, Yesu wu bakamba ti bawu “babasa kinzikanga ko Diambu di Nzambi.” (Matai 15:3-6) “Mu kumi di minsiku Nzambi kavana basi Isaeli, muidi mvandi nsiku widi mu Levitiku 19:3. (Esodu 20:12) Ayi tufueti tebuka moyo ti lutumu luidi mu Levitiku 19:3—lu kuzitisa tata ayi ngudi—luidi va wanda bikuma “Benu lufueti ba banlongo kibila minu Yave Nzamb’inu yidi wunlongo.”

12. Buidi wulenda sadila lutumu luidi mu Levitiku 19:3, ayi kiuvu mbi fueti kuyikuvusa?

¹² Mu kuyindula lutumu Yave kavana lutedi kukinzika tata ayi ngudi wukiyuvusa: ‘Bukiedika ti yidi mu kuvanga mawu?’ Boti wummona ti vadi mambu wufueti vangila mangolo, buna va khidi thangu muingi kuvanga mawu. Bukiedika ti wulendi balula ko mambu mavioka, vayi wulenda vanga mangolo muingi kumonisa ti wunkinzikanga matata maku. Ḿba mu kuviokisanga yawu thangu, mu kuba sadisa mu zitsatu ziawu zi kiphevi ayi zi kinsuni. Ngie kuvanga mawu, buna widi mu kulandakana dilongi didi mu Levitiku 19:3.

13. (a) Dilongi mbi dinkaka didi mu Levitiku 19:3? (b) Buidi tulenda landikinina kifuani ki Yesu kidi mu Luka 4:16-18?

¹³ Levitiku 19:3 mvandi yitulonga matedi kuba banlongo. Lutangu alolo lu tutebula moyo nkinza wu kukinzika kilumbu ki Kisabala. Befu baklisto tuisi ko ku tsi nsiku wu Mose, diawu tulundilanga ko kilumbu ki Kisabala. Vayi kheti bobo, tulenda longuka mawombo mu phila basi Isaeli babe lundilanga kilumbu ki Kisabala ayi kibila mbi dibela diambu dinkinza kuvanga mawu. Kisabala kiba kilumbu muingi basi Isaeli kuvunda mu kisalu kiawu ayi kutsikika mayindu mu mambu ma kiphevi. * Diawu Yesu kabe kuendilanga ku tempelo muingi kue tanga Diambu di Nzambi. (Esodu 31:12-15; Tanga Luka 4:16-18.) Lutumu Nzambi kavana mu Levitiku 19:3 luntuba: “Benu lufueti lunda bilumbu [biandi] bi kisabala.” Luawu lu tukindisa kubotulanga thangu muingi kutsikika mayindu mu mambu ma kiphevi. Ngie kuvanga mawu wunkuiza ba kikundi kifikama na Yave. Ayi mawu mala kusadisa kuba wunlongo. Mu matedi kubotulanga thangu mu mambu ma kiphevi, vadi mambu wufueti balula muingi wuluta vanga mawu?

14. Diambu mbi dinkinza bantubila mu Levitiku kapu 19?

¹⁴ Levitiku kapu 19 yintubila diambu dimueka di nkinza dilenda tusadisa kuba banlongo. Kutsuka lutangu 4 muidi bikuma abibi: “Minu yidi Yave Nzambi’aku.” Ayi bikuma abiobio bansadila biawu 16 di zikhumbu mu kapu ayoyo. Mawu ma tutebula moyo lutumu lutheti: “Minu yidi Yave Nzambi’aku . . . Bikanu kuba zinzambi zinkaka.” (Esodu 20:2, 3) Baklisto boso bantomba kuba banlongo, bafueti ba lufiatu ti ni kiuma voti mutu wulenda tula nkaku muingi baba kikundi na Yave. Ayi mu kuba Zimbangi zi Yave, tubaka makani ma kukhambu  vanga ni kiuma kimvueza dizina dinlongo di Yave.—Levi. 19:12; Yesa. 57:15.

15. Mbi matangu madi mu Levitiku kapu 19 mantubila matedi minkhayilu, ma tukindisa kuvanga ayi kibila mbi?

¹⁵ Basi Isaeli bamonisa ti babe kikininanga Yave banga Nzambi’awu mu kutumukina minsiku miwombo. Levitiku 18:4 luntuba: “Benu lufueti tumukina zithumu ziama, ayi lufueti lunda minsiku miama ayi kudiatila mu miawu. Minu yidi Yave Nzambi’aku.” Kapu 19 yintubila matedi mua minsiku Yave kavana kuidi basi Isaeli. Dedi, mu matangu 5-8, 21, 22 mantubila matedi minkhayilu mi bibulu. Ayi yintuba ti bawu bafueti vanga mawu mu phila yinkhambu vuezila biuma binlongo bi Yave. Kutanga matangu amomo malenda ku tusadisa kukuangidika Yave ayi kumvana minkhayilu mu phila kankuiza kikinina dedi bo Ebeleo 13:15 yi tukindisila.

16. Mbi bi tutebula moyo disuasana didi mu batu bansadilanga Nzambi ayi bo bankhambu kunsadilanga?

¹⁶ Muingi tuba banlongo tufueti ba bakubama muingi tuba disuasana na batu bankaka. Khumbu zinkaka, batu bankotanga yitu kikola, bansalanga yitu, basi dikanda voti batu bankaka, balenda ku tukuika kuvanga mambu malenda bivisa mbuongimin’itu. Mambu amomo ma kumonika, tufueti baka makani mankinza. Vayi mbi binkuiza tusadisa kubaka makani mamboti? Yindula mu nsua widi mu Levitiku 19:19, wuntuba: “Bikanu kuvuata bikhutu batungila mu mintindu miodi mi minsinga.” Nsiku awowo wabe suasisanga basi Isaeli na batu ba mimvila minkaka babe zingilanga va ndeku’awu. Bubu disi ko disumu kuvuata bikhutu batungila mu mintindu miodi mi minsinga. Vayi befu tukikinanga ko kuba dedi mueka na batu bakhambu tumukinanga minsua mi Kibibila kuba kuandi batu bansalanga yitu, bankotanga yitu kikola voti basi dikanda ditu. Befu tunzolanga basi dikanda ditu ayi tumvanganga mangolo ma kuzola wadi yitu. Bo tumbaka makani mankinza mu luzingu, tufueti ba bakubama muingi kuba bavasuka, kibila tuidi bisadi bi Yave. Befu tumvangilanga mawu kibila tuntomba kuba banlongo ayi kuba bavasuka muingi kuvanga luzolo lu Nzambi.—2 Koli. 6:14-16; 1 Pete. 4:3, 4.

17-18. Malongi mbi mankiza tulenda longuka mu Levitiku 19:23-25?

¹⁷ Bikuma “Minu yidi Yave Nzambi’aku” ḿba bisadisa basi Isaeli, kutula kikundi kiawu na Yave va theti mu luzingu. Buidi? Phila yimueka yidi mu Levitiku 19:23-25. (Tanga.) Yindula tsundu bikuma abiobio biba bo  basi Isaeli bakota ku ntoto Nzambi kaba Kanikisa. Dibakala dimueka na kuvata minti mimbutanga makundi, nandi kasa ba ko nsua wu kumidia mu mimvu mitatu. Ayi mu mvu wunna baba vananga makundi beni ku nzo yinlongu yi Nzambi. Bosi mu mvu wuntanu nandi wuba nsua wu kudia makundi beni. Nsiku awowo wabe sadisanga basi Isaeli kuvisa ti balendi tula ko zitsatu ziawu va theti mu luzingu. Vayi vabe tombulu bawu kuba lufiatu ti Yave wunkuizi dukisa zitsatu ziawu mu kuba vana biabioso bintombulu ba kutula mbuongimini’andi va theti mu luzingu. Nzambi mvandi wuba kindisa baba koku kuyalubuka mu kuvananga minkhayilu ku nzo yinlongo kibuangu babe kumbuongiminanga.

¹⁸ Nsiku wusonama mu Levitiku 19:23-25 wu tutebula moyo mambu Yesu katuba mu dilongi kavanga ku Mbata Mongo. Nandi wutuba: “Bikanu kukuazuka beni . . . Matedi bi kudia ayi bi kunua.” Ayi wubue tuba: “Tat’inu yi diyilu zebi ti mufueti baka biuma abiobio.” Dedi bo kankiebilanga zinuni, Nzambi wunkuiza kieba zitsatu zitu. (Matai 6:25, 26, 32) Mvandi “tumvananga minkhayilu” muingi kusadisa bo badi mu tsatu ayi kubuela mioko zitsatu zi kimvuka. Yave wummonanga koku kuitu kuyalubuka, ayi wunkanikisa ku tusakumuna. (Matai 6:2-4) Bo tunkabila bankaka, befu tummonisanga ti tumvisanga malongi madi mu Levitiku 19:23-25.

19. Mbi ngie bezola kulonguka mu kapu yi Levitiku tuma tubila?

¹⁹ Tuma tubila mua matangu madi mu Levitiku kapu 19, mabe tusadisa kuvisa buidi tulenda bela banlongo dedi Nzambi. Bo tunlandakana kifuani kiandi, tummonisanga ti tuntomba ‘kuba banlongo mu zikhadulu zitu zioso’. (1 Pete. 1:15) Bawombo bakhambu sadilanga Yave bo bammona zikhadulu zitu zimboti, bawu banzitisanga Yave. (1 Pete. 2:12) Vayi vadi malongi mankaka tulenda longuka mu Levitiku kapu 19. Mu dilongi dinkuiza, tunkuiza tubila matangu mankaka madi mu kapu ayoyo ayi kumona ziphila zinkaka tulenda sadila malongi beni mu luzingu luitu, muingi “kuba balongo” dedi bo mvuala Petelo ka tukindisila.