DILONGI 49
Mbi Buku yi Levitiku yi Tulonga mu Matedi Phila Tunzingila na Bankaka?
“Ngie fueti zola wadi yaku dedi bo wukizodilanga.”—LEVI. 19:18.
NKUNGA 109 Tuzolasananga mu Ntima Woso
MAMBU TUANLONGUKA *
1-2. Mbi tulongukidi, ayi mbi tunkuiza longuka mu dilongi adidi?
MU DILONGI dibedi tulongukidi malongi madi mu buku yi Levitiku 19 tulenda sadila mu lumbu ka lumbu. Dedi bummonisina lutangu 3, Yave wulubula basi Isaeli muingi bakinzika matata mawu. Tumueni buidi befu bubu tulenda sadila dilongi adiodio muingi kukieba zitsatu zi kinsuni ayi zi kiphevi zi matata mitu. Mu lutangu beni mvandi, Yave wutebula moyo dikabu diandi nkinza wu kulundanga kilumbu ki kisabala. Ayi kheti befu bubu tuisi ko ku tsi nsiku wu Mose, tulongukidi ti tulenda landakana nsua awowo mu kubotulanga thangu muingi kukieba kiphevi kitu. Befu kuvanga mawu, tunkuiza monisa ti tutidi kuba banlongo ayi kulandakana dilongi didi mu 1 Petelo 1:15.
2 Mu dilongi adidi, tunkuiza tatamana kulonguka matedi kapu 19 yi Levitiku. Mbi kapu ayoyo yilenda kutulonga matedi kumonisa mamboti kuidi batu babela, kutubanga kiedika bo tumvanga lungosu ayi kumonisanga luzolo kuidi wadi yitu? Befu tuntomba kuba banlongo mu zikhadulu zitu dedi bo Nzambi kadidi. Diawu, tuemmona mbi tulenda longuka mu kapu ayoyo.
MONISA MAMBOTI KUIDI BATU BABELA
Mbi buku yi Levitiku 19:14 yi tukindisa kuvanga kuidi batu bafua matu ayi bafua meso? (Tala matangu 3-5) *
3-4. Dedi bummonisina Levitiku 19:14, buidi babe kiebilanga batu bafua meso ayi bafua matu?
3 Tanga Levitiku 19:14. Yave waba tomba basi Isaeli bamonisa mamboti kuidi batu babela. Dedi, bawu babasa singanga ko batu bafua matu, kuba tulanga boma voti kuba tubilanga bubi. Diba diambu dimbi kuvanga mawu, kibila mutu beni kabasa kuwanga ko mambu baba tubanga ayi kasa ba ko bu kuyikakidila.
4 Mvandi Lutangu 14 luntuba ti dikabu di Yave babasa tulanga ko ‘nkaku va ntuala batu bafua meso.’ Buku yimueka yitubila matedi batu babela yituba: “Ku Isaeli batu babe vangilanga mambu makhambulu masonga kuidi batu babela ayi kuba tovula. Dedi, nkua mambi kalenda tula kiuma va ntuala mutu wufua meso muingi kabunda ayi banseva. Kuvanga mawu diba diambu dimbi beni.” Lutumu Yave kavana kuidi basi Isaeli luba sadisa kumona ti bafueti monisa mamboti kuidi batu babela.
5. Buidi tulenda monisina mamboti kuidi batu babela?
5 Yesu wumonisa mamboti kuidi batu babela. Dedi, tala mambu kakamba Yoane Mbotiki: “Bafua meso badi mu kumona, babela malu badi mu kudiata, bo badi buazi beka badiodila, bafua matu badi mu kukuwa ayi bafua badi mu kuvulubuka.” Ayi mu kibila ki mangitukulu amomo Yesu kavanga, batu bawombo bazitisa Nzambi.” (Luka 7:20-22; 18:43) Baklisto banlandakananga kifuani kimboti Yesu kabika mu matedi phila yi kukiebila batu babela. Diawu befu tuba vuilanga nkinza ayi tuba monisinanga mvibudulu. Kheti Yave kasa tuvana ko lulendu muingi tuvanga mangitukulu, vayi tuidi luaku lu kulonga zitsangu zimboti kuidi batu badi ziphofo mu kinsuni voti mu kiphevi. (Luka 4:18) Ayi zitsangu aziozio, zidi mu kuvanga batu bawombo kuzitisa Nzambi.
TUBANGA KIEDIKA BO WUMVANGA LUNGOSO
6. Mambu mbi madi mu Levitiku kapu 19 bantubila mvandi mu kumi di minsiku?
6 Matangu mankaka madi mu buku yi Levitiku kapu 19 mantubila matedi kumi di minsiku. Dedi, nsiku wu nana wuntuba: “Wulendi kuiba ko.” (Esodu 20:15) Mutu kalenda yindula ti bo kakhambu bonga kiuma kingana kakhambulu nsua, buna widi mu kutumukina nsiku awowo. Vayi nandi kalenda kuiba mu ziphila zinkaka.
7. Buidi nkua lungosu kalenda bika kutumukina nsiku wu nana?
7 Mutu wumvanganga lungosu, kalenda ba mu mayangi kibila kabonganga ko biuma bingana kakhambulu nsua. Vayi buidi nandi kamvangilanga lungosu luandi? Dedi bummonisina Levitiku 19:35, 36, Yave wutuba: “Bo munzonga kukula, kizitu ayi kutola, bikanu kusadila bizongulu bi luvunu, vayi sadilanu balança yifuana muingi luzongila biuma biyuma ayi binlangu.” Diawu, mutu wumvanganga lungosu ayi wunsadilanga bizongulu bi luvunu, widi mu kukuiba batu ba kunsumba biuma. Ayi matangu mankaka ma Levitiku kapu 19 mansudikisa mawu buboti.
Mbi Levitiku 19:11-13, yinkindisa mfumu kisalu widi Mbangi yi Yave kafueti fiongunina mu matedi phila kamvangilanga lungosu luandi?(Tala matangu 8-10) *
8. Buidi Levitiku 19:11-13 yisadisila basi Isaeli kulandakana lutumu lu nana, ayi buidi befu tulenda bakila ndandu?
8 Tanga Levitiku 19:11-13. Bikumba bitheti bidi mu Levitiku 19:11 bintuba: “Wulendi kuiba ko.” Muingi kumonisa nguizani yidi kukuiba ayi kukhambu tubanga kiedika mu lungosu, lutangu 13 luntuba: “Wulendi vuna ko wadi yaku.” Mawu mammonisa ti kukhambu tubanga kiedika mu lungosu, yidi phila yi kukuibila. Nsiku wu nana, wuntuba ti tulendi kuiba ko. Vayi mambu madi mu Levitiku masadisa basi Isaeli kuvisa buidi balenda sadila nsua awowo mu luzingu luawu. Tulenda baka ndandu mu kuyindula phila Yave kantadilanga kukuiba ayi kukhambu tubanga kiedika. Diawu tufueti kuyikuvusa: ‘Mu kutala mambu madi mu Levitiku 19:11-13, vadi mambu mu luzingu luama yifueti ludika? Yifueti balula mua mambu mu phila yimvangilanga lungosu luama voti mu phila yinsadilanga?’
9. Buidi nsiku widi mu Levitiku 19:13 waba kiebilanga batu?
9 Vadi mambu mankaka matedi kuvanga lungosu baklisto bafueti yindulanga. Levitiku 19:13 yintuba: “Wulendi kala ko na zimbongo zi mutu be kuvangila kisalu mu builu bumvimba nati va meni.” Batu baba vatanga ku Isaeli, baba tumisanga batu muingi baba vangila kisalu beni, ayi baba kuba futanga ku tsuka kilumbu. Kukhambu vanga mawu, mabe sundula ti mutu beni kasinkuiza nunga ko kukieba zitsatu zi dikanda diandi mu kilumbu beni. Diawu Yave katubila: “Nandi widi mu tsatu ayi luzingu luandi lutedi mu kumfuta zimbongo.”—Deute. 24:14, 15; Matai 20:8.
10. Mbi tulenda longuka mu Levitiku 19:13?
10 Bawombo bansalanga, ku tsuka ngonda to bantambulanga zimbongo. Vayi kheti bobo, nsua widi mu Levitiku 19:13 wukhidi nkinza bubu. Zimfumu ziwombo zi bisalu, bamvunanga batu baba sadilanga mu ‘kumanga ku bafuta zimbongo bafueni tambula. Bawu bazebi ti bankuiza tatamana kuba sadila kibila bisalu phasi bidi.’ Diawu tulenda tuba ti zimfumu aziozio, bammanganga kuvana zimbongo zi bisadi biawu. Vayi mfumu kisalu widi Mbangi yi Yave, kafueti vanga mangolo muingi kulandakana nsiku awowo. Buabu, mbi binkaka tulenda longuka mu Levitiku kapu 19?
ZOLA WADI YAKU DEDI BO WETI KUKIZODILA
11-12. Buidi Yesu kamonisina nkinza nsiku widi mu Levitiku 19:17, 18?
11 Yave kayazukanga ko to mu phila tunzingila na bankaka mu khambu ku bavangila mambi. Tulenda mona bivisa mu Levitiku 19:17, 18. (Tanga.) Tala nsiku widi mu matangu amomo: “Ngie fueti zola wadi yaku dedi bo weti kukizodila.” Muingi kukuangidika Nzambi, befu baklisto tufueti tumukina nsiku awowo.
12 Tala buidi Yesu kamonisina nkinza mu nsiku widi mu Levitiku 19:18, bo wumueka mu bafalisi kayuvula Yesu: “Lutumu mbi lulutidi mu nsiku?” Yesu wumvutudila: Zola Yave Nzambi’aku mu ntim’aku woso, mu muel’aku woso ayi mu mayindu maku moso. Bosi Yesu wutuba mambu madi mu Levitiku 19:18, mantuba: “Nsiku wummuadi widi: ‘Zola wadi yaku dedi bo weti kukizodila.’” (Matai 22:35-40) Vadi ziphila ziwombo tulenda monisina luzolo kuidi wadi yitu. Ndoko tumona mbi tulenda longuka mu kapu 19 yi Levitiku.
13. Buidi tulenda visila nsiku wu Levitiku 19:18, bo tuntanga kinongo ki Yosefi?
13 Tulenda monisa luzolo kuidi wadi yitu, mu kulandakana dilongi didi mu Levitiku 19:18 dintuba: “Bika kuba lundila nganzi.” Bawombo mu befu ḿba tuzebi mutu wukangila nganzi mu mimvu miwombo kuidi mutu wunsalanga yandi, wunkotanga yandi kikola voti musi dikanda diandi. Vayi tebuka moyo ti Yosefi banlundila nganzi kuidi kumi di zikhomba ziandi. Ayi mu kibila akiokio, bawu bamvangila mambu mawombo mambi. (Ngene. 37:2-8, 25-28) Buidi Yosefi kamonisina disuasana na bawu? Bo kayiza ba mfumu, Yosefi wuba luaku lu kuvutudila mambi moso zikhomba ziandi bamvangila. Vayi nandi kasa vanga ko mawu ayi kasa ba lundila ko ngazi mu kulandakana nsiku widi mu Levitiku 19:18.—Ngene. 50:19-21.
14. Mbi bimmonisa ti nsiku widi mu Levitiku 19:18 wukhidi tsadulu bubu?
14 Baklisto bantomba kukuangika Nzambi, bafueti landakana kifuani ki Yosefi wulemvukila zikhomba ziandi. Mawu madi nguizani na mambu Yesu katuba mu nsambu wu Tat’itu, bo kakindisa kulemvukilanga batu ba tuvangilanga mambi. (Matai 6:9, 12) Bobuawu mvandi, mvuala Polo wukindisa baklisto: “Zikhomba ziama zi luzolo bikanu kukanga nganzi.” (Loma 12:19) Nandi wubue tuba: “Tatamananu kumonisa mvibudulu beno na beno ayi kulemvukilanga beno na beno mu ntima woso, kheti vadi kibila muingi kukangila nganzi wadi yandi.” (Kolo. 3:13) Minsua mi Yave, mibalukanga ko. Diawu tufueti tumukina lutumu luidi mu Levitiku 19:18.
Dedi bo tunkhambu tatamananga kutonzuna mbeza, busa fuana ko kutatamana kuyindula mambi ba tuvangila. Vayi tufueti vanga mangolo ma kuzimbakana mawu.(Tala lutangu 15) *
15. Buidi tulenda fuanikisila nkinza wu kuzimbakana mambi ba tuvangila?
15 Tulenda fuanikisa mutu wuluala ntima na zimbeza mu nyitu. Ziawu zilenda ba ziluelu voti zinneni. Dedi, bo tuntenda zingongolo voti mikhondo mu lamina, tulenda luala ayi kumona khienzu mu mua thangu. Vayi mua mbeza beni yifika belukanga. Ayi va kuvioka kilumbu kimueka voti bilumbu biodi, ḿba tubue tebukanga ko moyo vama tuluala. Bobuawu mvandi, nkundi voti mutu wunkaka, kalenda tuba voti kuvanga diambu dilenda tulueka ntima. Befu tulenda fika kunlemvukila. Vayi befu kuba mbeza yinneni ḿba vala tombulu mfelimi muingi kubuka yawu. Ayi befu kutatamana kutonzuna mbeza beni, tunkuiza mona beni khienzu. Bobuawu mvandi, befu tatamana kuyindula mambi ba tuvangila ayi kukangila bankaka nganzi, tunkuiza yituadisa ziphasi. Kiadi ayi kiunda kuzaba ti batu bawombo bamvanganga mawu ba kuba lueka ntima. Diawu, buboti beni kutumukina nsiku widi mu Levitiku 19:18!
16. Dedi bummonisina Levitiku 19:33, 34, buidi basi Isaeli babe kiebilanga zinzenza, ayi mbi tulenda longuka mu mawu?
16 Bo Yave kavana nsiku kuidi basi Isaeli wu kuzola wadi yawu, nandi kabasa tomba ko kutuba ti bafueti monisa to luzolo kuidi batu ba mvil’awu. Vayi nandi wuba kamba ti bafueti zola mvandi zinzenza baba kalanga yawu. Ayi nsiku awowo widi mu Levitiku 19:33, 34. (Tanga.) Vabe tombulu kuzola zinzenza dedi bo babe zodilanga ‘musi Isaeli’. Dedi, basi Isaeli babe bikanga mbongo muingi zinzenza ayi biphumbulu babaka ki kudia. (Levi. 19:9, 10) Nsua wu kuzola zinzenza wukhidi nkinza bubu kuidi baklisto. (Luka 10:30-37) Mu phila mbi? Ḿba va divula wunkalanga vadi zinzenza ziwombo. Buawu, didi diambu dimboti ku bamonisanga luzolo ayi lukinzu.
DIAMBU DINKAKA BAKHAMBU TUBILA MU LEVITIKU KAPU 19
17-18. (a) Mbi Levitiku 19:2 ayi 1 Petelo 1:15 ma tukindisa kuvanga? (b) Kisalu mbi mvuala Petelo ka tukindisa kuvanga?
17 Matangu ma Levitiku 19:2 ayi 1 Petelo 1:15 mankindisa dikabu di Nzambi kuba banlongo. Matangu mankaka mu Levitiku kapu 19 ma tukindisa kumona mbi tufueti vanga boti tuntomba kubaka lunungu va meso ma Yave. Mu dilongi adidi tube tubila mambu mamboti tufueti vanga ayi mo tufueti bika kuvanga. * Masonoko ma Kingeleku mvandi mantubila nkinza wu kuba banlongo mu zikhadulu zitu. Vayi mvuala Petelo wubue tubila diambu dinkaka dinkinza.
18 Kheti vadi mambu mawombo ma kiphevi tulenda vanga ayi mambu mankaka mamboti, vayi mvuala Petelo wutubila diambu dinkaka dinkinza bakhambu tubila mu Levitiku kapu 19. Mu kusadila dilongi kavana di kuba banlongo mu zikhadulu zitu, mvuala Petelo wu tukindisa: “Kubikanu mayindu minu mu kuvanga kisalu.” (1 Pete. 1:13, 15) Mbi kisalu beni kiaba sundula? Mvuala Petelo wutuba ti baklisto basolu bala “‘samuna zikhadulu zimboti’ zi mutu wuba sola.” (1 Pete. 2:9) Bukiedika, baklisto boso bubu badi luaku lu kuvanga kisalu akiokio kinkinza ki tuvananga luaku lu kuvanga mamboti kuidi batu. Mu kuba dikabu dinlongo, tuidi luaku lunneni lu kusamuna ayi kulonga mu kifuza. (Malako 13:10) Befu kuvanga mangolo ma kulandakana minsua midi mu Levitiku kapu 19, tunkuiza monisa ti tunzolanga Nzambi ayi wadi yitu. Ayi mvandi tunkuiza monisa ti tutidi “kuba banlongo” mu zikhadulu zitu.
NKUNGA 111 Mambu Matuvananga Mayangi
^ Lut. 5 Baklisto bubu basi ko ku tsi nsiku wu Mose, vayi nsiku beni wuntubila mambu mawombo tufueti vanga ayi mo tulendi vanga ko. Kulonguka matedi minsiku amiomio, kunkuiza tusadisa kumonisa luzolo kuidi bankaka ayi kukuangidika Nzambi. Mu dilongi adidi, tuentubila ndandu tulenda baka mu malongi madi mu Levitiku kapu 19.
^ Lut. 17 Matangu tube khambu tubila mu dilongi adidi, mantubila matedi kukhambu monisa luvasanu, kukhambu tubila bubi bankaka, kudia menga voti kuvutula menga, kindoki, kutesa ayi kuvanganga butsuza.—Levi. 19:15, 16, 26-29, 31.—“Tala Biuvu bi Mintangi mu Kibanga ki Nsungi akiki.
^ Lut. 52 MAMBU MADI MU ZIFIKULA: Khomba widi mu kusadisa khomba wufua matu kukoluka na mfelimi.
^ Lut. 54 MAMBU MADI MU ZIFIKULA: Khomba widi lungosu lu kutula ndimba mu zinzo widi mu kufuta kisadi kiandi.
^ Lut. 56 MAMBU MADI MU ZIFIKULA: Khomba yinkieto wunzimbakana mu thinu mua mbeza kaluala. Bukiedika ti nandi wunkuiza nunga kuvanga mawu boti mbeza beni yidi yinneni?
