Zikhadulu Yesu kalonguka ku diyilu, zinsadisa kusala mu kithuadi na bankaka. Ayi bo kayiza va ntoto, nandi wulongisa zikhadulu beni kuidi minlandikini miandi ayi befu mvitu tulenda longuka mawombo mu kifuani ki Yesu. Kutsikika thalu mu kifuani kiandi, ku tusadisa kubakula minsua mitatu milenda tusadisa kusala buboti na bankaka ayi kubuela kithuadi ayi ndembama na zikhomba zitu.

Muingi tusala mu kithuadi na bankaka, tufueti kukikululanga. Mutu wu kikululanga wumvuanga nkinza mayindu ma batu bansalanga yandi ayi katombanga ko mamoso mavangimina mu phil’andi. Yesu waba kukikululanga kibila mawu kalonguka kuidi Tat’andi Yave. Tuzebi ti Yave to fueni kutedulu Mvangi, vayi kheti bobo nandi wubika baboso bazaba ti Muan’andi wunsadisa bo katuba: “Tuvanganu mutu mu kifuani kitu.” (Ngene. 1:26) Mawu masadisa Yesu kuvisa ti Yave wu kikululanga.—Minku. 18:35.

Yesu waba kukikululanga bo kaba va ntoto. Dedi bo baba kuntondanga, nandi waba vananga nzitusu kuidi Yave. (Mala. 10:17, 18; Yoa. 7:15, 16) Mvandi waba vanganga mangolo muingi kuzingila mu mayangi ayi mu ndembama na minlandikini miandi. Yesu waba ku batadilanga banga bakundi kubika kuandi mimvika. (Yoa. 15:15) Nandi wusukula bitambi bi minlandikini miandi muingi ku balonga nkinza wu kikululanga. (Yoa. 13:5, 12-14) Tufueti landakana kifuani  ki Yesu mu kutulanga zitsatu zi zikhomba va ntuala. Tuala nunga kusala buboti na bankaka, befu kuba zitisanga ayi kubika kuazuka beni boti batu bankuiza tutonda voti ndamba.—Loma 12:10.

Mutu wu kikululanga zebi ti ‘mayindu ma batu bawombo mantuadisanga ndandu.’ (Zinga. 15:22) Diawu tufueti tebukanga moyo ti vasi ko mutu zebi mambu moso, kheti widi wupisuka voti weka mimvu miwombo mu kisalu beni. Yesu mvandi wukikinina ti kasa zaba ko mambu moso. (Matai 24:36) Diawu kaba tombilanga kuzaba mvandi mayindu ma minlandikini miandi kheti baba batu ba masumu. (Matai 16:13-16) Mu kibila akiokio, bawu baba zolanga kuba yandi va kimueka. Befu kukikululanga dedi Yesu, mu kukikinina ti tusa zaba ko mambu moso ayi kukuwanga mayindu ma bankaka, tunkuiza tatamana mu ndembama ayi “kubaka ndandu yiwombo.”

Bakulutu ba kimvuka bafueti luta landakana kifuani ki Yesu ki kukikulula bo bansala na bankaka. Bawu bafueti tebukanga moyo ti phevi yinlongo yilenda sadila woso kuandi nkulutu muingi kutuba diambu dinkuiza basadisa kubaka makani ma nduenga mankuiza tuadisa ndandu kimvuka kioso.

Muingi tusala mu kithuadi na bankaka, tufueti ba bankua nlembami ayi kubika tomba mambu moso mavangimina mu phil’itu. Khumbu ziwombo Yesu wumona phila Yave kabaludila mayindu mandi. Dedi, wumona buidi Yave kamonisina kiadi kuidi batu mu kuvana nkhayilu wu khudulu muingi ku tukula mu masumu.—Yoa. 3:16.

Khumbu zinkaka Yesu mvandi wubalula mayindu mandi. Ayi kivisa mu mawu kidi phila kasadisila nkieto mueka musi Finisi. Kheti Yesu wuyiza muingi kusadisa dikabu di Yave kubika kuandi bapakanu, vayi nandi wusadisa nkieto beni. (Matai 15:22-28) Yesu mvandi, kabasa tombanga ko minlandikini miandi bavangila mambu mu phila yivedila. Ayi kivisa mu mawu kidi mu thangu kalemvukila mvuala Petelo, kheti nandi wummanga khumbu zitatu. Ayi buviokila thangu Yesu wumvana biyeku biwombo. (Luka 22:32; Yoa. 21:17; Mava. 2:14; 8:14-17; 10:44,45) Kifuani ki Yesu ki tulonga ti khumbu zinkaka buboti beni kubalulanga mayindu ayi kuvanga mangolo muingi ba tuzabila bankua nlembami.—Fili. 4:5.

 Befu kuba nkua nlembami, tunkuiza fika kolamanga ayi kusala mu ndembama na bankaka. Yesu waba kiebanga buboti batu boso, diawu zimbeni ziandi bamvunina mambu ti nandi wuba nkundi wu batu babe kongulanga ziphaku ayi minsumuki babe kikininanga zitsangu kabe longanga. (Matai 11:19) Buidi tulenda landikinina kifuani ki Yesu? Louis, widi nkengididi wu bimvuka ayi wusadila ku Beteli na batu baviakana, wutuba: “Kuidi minu kusala na batu baviakana, kuidi dedi mueka na kutunga kibaka na mamanya maviakana mu kutola. Dilenda ba diambu di phasi kuvanga kibaka beni kiba kilulama ayi kikinda. Vayi befu kutula kadika dimanya va kibuangu kiandi tunkuiza nunga kuvanga mawu. Minu yimvanganga mangolo muingi kukolama na batu boso ayi kusala mu kithuadi ayi ndembama.” Befu mvitu tuntomba kuvanga mawu!

Thangu mbi tufueti balula mayindu mitu, bo tunsala na zikhomba mu kimvuka? Mu thangu tunsala na zikhomba badi mu dingumba ditu di kubasikila mu kisalu ki kusamuna. Tulenda meka kusala na minsamuni miviakana ayi badi ziphunga ziviakana. Befu tulenda balula mayindu mitu mu kukolama phila kadika nsamuni kamvangilanga kisalu ki kusamuna ayi kusamunina mu phila nandi kanluta zolanga.

Mutu wunsalanga na bankaka kafueti ba wukubama “muingi kukaba.” (1 Timo. 6:18) Thangu yoso Yesu kasala na Tat’andi ku diyilu, nandi wumona ti Yave kabasa suekanga ko mambu kazebi kuvanga. Dedi, bo Yave kakubika diyilu ayi biuma bioso, Yesu wuba va khonzo’andi ayi wulonguka mawombo. (Zinga. 8:27) Ayi bo Yesu kaba va ntoto, wulonga minlandikini miandi mambu kayuwa kuidi Tat’andi. (Yoa. 15:15) Befu mvitu tulenda landakana kifuani ki Yesu mu kuba bakubama muingi kulonga bankaka mambu tuma zaba kuvanga. Ayi busa fuana ko kuyindula ti befu kulonga bankaka mambu tuma zaba kuvanga, buna tuisinkuiza bue ba ko tsadulu voti bawu bankuiza tuvinginina. Vayi tufueti banga mu mayangi muingi kulongisa bankaka.

Mvandi bo tunkindisa zikhomba bansala yitu, yidi phila tuku bakabila. Ngie wuyangalalanga ko bo ba kutonda mu kisalu bevanga? Bukiedika ti wunkuangalalanga. Yesu waba tondanga ayi waba nyunganga minlandikini miandi. (Dedikisa na madi mu Matai 25:19-23; ayi mu Luka 10:17-20.) Diawu Yesu katubila ti minlandikini miandi bala vanga kisalu kilutidi. (Yoa. 14:12) Va builu butsuka ava kafua, Yesu wunyunga minlandikini miandi mikuikama bo katuba: “Benu luidi batu babedi yama bakuikama mu zithotolo.” (Luka 22:28) Bukiedika mawu maba kindisa mu kisalu! Diawu bo tuntonda zikhomba bansala yitu, bawu banluta banga mayangi ayi kisalu kindiatanga buboti!

Khomba Kayode, wutuba: “Vasintombulu ko kuba mutu wuvedila muingi kusala buboti na bankaka. Vayi diambu to dintombulu, kubika bansalanga yaku mu mayangi muingi kulengisa kisalu kiawu.” Bukiedika ti ngie wunsalanga buboti na bankaka? Kibila mbi wunkhambu kuvudila mawu kuidi zikhomba bansalanga yaku? Boti bawu bantianga kusala yaku, dedi bo minlandikini mi Yesu baba zolanga kusala yandi, ngie wulenda tuba momawu mvuala Polo katuba: “Tuidi mu kusala va kimueka muingi kubuela mayangi maku.”—2 Kolo. 1:24.