DILONGI 51
Tatamana “Kukuwa Mbembu yi Yesu”
“Awuwu muan’ama wu luzolo, nyenzi beni kakumbonisanga. Yuwanu mambu kantuba.”—MATAI 17:5.
NKUNGA 54 ‘Ya yiyi Nzila’
MAMBU TUANLONGUKA *
1-2. (a) Mbi Nzambi kakamba bapostolo batatu batatamana kuvanga, ayi bukiedika ti bawu bantumukina? (b) Mbi tunkuiza longuka mu dilongi adidi?
BO PASIKA mu mvu 32 T.K. yivioka, mvuala Petelo, Yakobi ayi Yoane bamona diambu dimueka di kukuitukila. Ḿba ku mongo Hermon, bamuena Yesu kukituka. Kibibila kintuba “kizizi Kiandi kiaba lezama buka thangu, ayi bikhutu biandi biaba lezama buka muinda.” (Matai 17:1-4) Bosi kutsuka bayuwa mbembu yi Nzambi yituba: “Awuwu Muan’ama wu luzolo, nyenzi beni kakumbonisanga. Yuwanu mambu kantuba.” (Matai 17:5) Bapostolo abobo bavanga mambu Nzambi kaba kamba. Kibila mu luzingu luawu loso, bamonisa ti baba kuwanga mbembu yi Yesu. Ayi befu tutidi kulandakana kifuani kiawu.
2 Mu dilongi dibedi, befu tumueni ti, kukuwa mbembu yi Yesu kunsundula kubika kuvanga mua mambu. Vayi mu dilongi adidi, tunkuiza mona mambu muadi Yesu katuba, tufueti vanga.
“LUKOTA MU MUELU WUFIETAMA”
3. Dedi bumonisina Matai 7:13, 14, mbi tufueti vanga?
3 Tanga Matai 7:13, 14. Mu lutangu alolo, Yesu wutuba ti vadi mielu miodi to miviakana ayi miawu minnata mu zinzila ziviakana. Muelu wutheti widi “wuyalubuka” ayi wummuadi widi “wufietakana”. Ayi kadika mutu kafueti sola muelu voti nzila yo katidi kudiatila. Amomo madi makani mankinza tufueti baka—boti tutidi kubaka luzingu lu mvu ka mvu.
4. Kibila mbi bawombo banzodilanga kudiatila mu nzila “yiyalubuka”?
4 Tulendi zimbakana ko ti zinzila aziozio, disuasana zidi. Batu bawombo bansolanga kudiatila mu nzila “yiyalubuka” kibila bamonanga ko phasi kudiatila mu nzila beni. Kiunda beni kumona ti bawombo bansolanga kutatamana mu nzila yiyalubuka ayi kuvangila mambu mu phil’awu. Vayi bawu bavisanga ko ti nzila ayoyo yidi yi Satana, ayi yinnatanga ku lufua ayi mbungulu.—1 Koli. 6:9, 10; 1 Yoa. 5:19.
5. Mbi bawombo bavanga bo babakula nzila “yifietakana”?
5 Vayi nzila “yifietakana” disuasana beni yidi, ayi Yesu wutuba ti batu baluelu to bambakulanga yawu. Kibila mbi? Mu kibila ki mimbikudi mi luvunu, dedi bo Yesu kalubudila milandikini miandi mu Matai 7:15. Batu bantanganga binganga, babakula ti vadi mafunda ma bivevi bi binganga mu nza yimvimba. Ayi binganga bioso, bantubanga ti banlonganga kiedika. Diawu bivevi na bivevi bi batu bamvonganga kutomba kinganga ki kiedika, voti badi divuda mu mambu banlongukanga. Vayi ngie wulenda bakula nzila yinnata ku luzingu. Yesu wutuba: “Benu kutatamana mu mambu mami, buna benu luidi minlonguki miami, benu luala zaba kiedika ayi kiedika kiala muvukisa.” (Yoa. 8:31, 32) Boti mabakula nzila yikiedika ayi kumanga landakana bankaka, buna tu kutonda beni. Kibila widi mu kuvanga luzolo lu Nzambi ayi widi mu kukuwa ‘mbembu yi Yesu’. Ngie wulonguka ti Yave wuntomba muingi wubika landakana malongi ma luvunu, wubika kembanga minkungi mikhambulu kithuadi ayi kiedika. (Matai 10:34-36) Ḿba disa ba ko diambu diluelu kubalula nzingulu’aku. Vayi kheti bobo ngie wusa vongila ko mu nzila kibila wunzolanga Yave ayi tidi kukuangidika ntim’andi. Bukiedika, Yave wunkuangalala beni mu ngiewu!—Zinga. 27:11.
BUIDI TULENDA TATIMININA MU NZILA YIFIETAKANA
Minsiku ayi malongi ma Yave, ma tusadisanga kutatamana kudiatila mu nzila “yifietakana”(Tala lutangu 6-8) *
6. Dedi bummonisina Minkunga 119:9, 10, 45, 133, mbi biala tusadisa tutatamana mu nzila yifietakana?
6 Mbi biala tusadisa tutatamana kudiatila mu nzila yifietakana? Yindula kifuani akiki: Zinzila ziwombo zifietakana zidi mu miongo ayi muidi mayenga voti mimbuinga, bantulanga mua bibaka muingi kusadisa mutu wundiatisa dikalu kabika vekuka ku diyenga. Diawu ni mutu kalendi tuba ko ti batudila mua bibaka beni—muingi kutula nkaku kuidi mutu wundiatisa dikalu. Bobuawu mvandi minsiku mi Yave midi mu Kibibila, midi buka mua bibaka bio bantulanga mu nzila, miawu mi tukiebanga ayi mi tusadisanga muingi tudiatila mu nzila yifietakana.—Tanga Minkunga 119:9, 10, 45, 133.
7. Buidi Satana kantomba matoko bayindudila nzila yifietakana?
7 Boti widi ditoko, ḿba khumbu zinkaka wunyindulanga ti, Yave wusabisa beni mu minsiku katuvana. Kibila mi kuvananga ko luaku lu kuvanga mambu moso wuntomba. Vayi zaba ti Satana nandi wuntomba ngie wuyindula ti bo wunsadila Yave, widi mu kuvutula luzingu luaku mbusa ayi wisimbaka ko ndandu mu luzingu. * Diawu nandi kalenda sadila batu bankotanga yaku kikola ayi internet, muingi ka kuvanga kuyindudila phila ayoyo. Vayi bika kuzimbakana ti Satana wuntomba ngie wubaka tsukulu yimbi mu luzingu. Vayi Yave disuasana kadi. Kibila Nandi wuntomba muingi wutatamana kudiatila mu nzila yinnata ku luzingu.—Minku. 37:29; Yesa. 35:5, 6; 65:21-23.
8. Mbi matoko balenda longuka mu mambu Olaf kamonikina?
8 Tala mambu khomba Olaf kamonikina. * Batu baba kotanga yandi kikola baba kunkuikanga kabundana nyitu na bakieto ku kikola. Bo kasudikisa ti widi Mbangi yi Yave ayi wunzingilanga mu minsiku mi Kibibila, bakieto bankaka mu sala kaba, babaka makani ma kuvanga mamoso muingi kubundana yandi nyitu. Vayi Olaf wutatamana wukuikama ayi kasa vukumuka ko. Ayi masi ko to mawu kaviokila. Olaf wutuba: “Minlongisi miama baba kukhambanga muingi yikota kikola kinangama, kibila buawu to, bankaka bankuiza khinzikila ayi yinkuiza bakila luzingu lumboti.” Buabu mbi bisadisa Olaf kukindama mu mambu moso amomo? Nandi wutuba: “Minu yivanga kikundi na zikhomba mu kimvuka, ayi bawu baba buka basi dikanda diama. Mvandi bo yitatamana kutanganga Kibibila, buawu yiluta bela lufiatu ti minu yibakula kiedika. Mawu matsadisa yitatamana kusadila Yave.”
9. Makani mbi tufueti baka muingi tutatamana mu nzila yifietakana?
9 Satana wuntomba tubika diatila mu nzila yi luzingu ayi tutona kudiatila mu nzila bawombo bansolanga, mu “nzila yinnatanga ku mbungulu.” (Matai 7:13) Vayi befu tubaka makani ma kukuwa mbembu yi Yesu ayi kudiatila mu nzila yifietakana yitukiebanga. Ndoko tumona diambu dinkaka Yesu katuba tufueti vanganga.
DEDIKISA MAMBU NA KHOMB’AKU
10. Dedi bumonisina Matai 5:23, 24, mbi Yesu katuba tufueti vanganga?
10 Tanga Matai 5:23, 24. Mu matangu amomo Yesu wutubila diambu dinkinza diaba tombulu basi Yuda kuvanga. Yindula mu mambu amama: Mutu widi ku tempelo, muingi kuvana nkayilu’andi kuidi Nganga Nzambi. Vayi muna thangu beni wuntebuka moyo ti vadi khomba widi yandi mambu. Diawu kambikila nkhayilu’andi ayi “wunkuenda” muingi kudedikisa mambu na khomba. Kibila mbi kamvangila mawu? Kibila vantombulu kuvanga mawu ava kuvana nkayilu kuidi Yave. Yesu wusudikisa mawu bo katuba: “Dedikisa theti mambu na khomb’aku.”
Yakobi wukikulula ayi wuvutula kithuadi kaba na khomb’andi. Ngie mvaku widi wukubama muingi kuvanga mawu?(Tala lutangu 11-12) *
11. Sudikisa mbi Yakobi kavanga muingi kudedikisa mambu na Esau
11 Mambu Yakobi kaviokila malenda ku tulonga diambu dinkinza matedi kudedikisa mambu. Yakobi wuvanga 20 di mimvu mu kukhambu kuenda ku tsi kabutukila, vayi Yave mu nzila mbasi wukamba Yakobi kavutuka kuma kabutukila. (Ngene. 31:11, 13, 38) Vayi vaba tombulu theti kudedikisa mambu na khomb’andi Esau waba tomba kumvonda. (Ngene. 27:41) Yakobi, “wuyazuka beni” ayi wuba beni boma kibila waba yindulanga ti khomb’andi wukhidi kunlendanga. (Ngene. 32:7) Mbi Yakobi kavanga muingi kudedikisa na mambu na Esau? Theti nandi wuzibudila ntima kuidi Yave mu nzila nsambu. Mvandi wuvana Esau minkhayilu miwombo. (Ngene. 32:9-15) Bosi bo badengana nandi wumonisa lukinzu, mu kufukama sambuadi di zikhumbu vantuala khomb’andi. Yakobi wununga kudedikisa mambu na khomb’andi kibila wukikulula ayi wumonisina lukinzu.—Ngene. 33:3, 4.
12. Mbi tulenda longuka mu kifuani ki Yakobi?
12 Malongi mawombo mankinza tulenda longuka mu kifuani ki Yakobi mu matedi kutuadisa ndembama na khomba. Yakobi wukikulula ayi wulinda lusalusu lu Yave. Ayi wuvanga mamoso maba mu kitesu kiandi muingi mamoso maviokila bumboti. Yakobi kasa tomba ko kubakula nani wuba foto mu mambu beni. Vayi makani mandi maba kubue vutula ndembama na khomb’andi. Buidi tulenda landikinina kifuani ki Yakobi?
BUIDI TULENDA DEDIKISILA MAMBU NA BANKAKA
13-14. Mbi tufueti vanga boti tube nyongisa khomba ntima?
13 Boti tutidi kutatamana kudiatila mu nzila yi luzingu, tufueti zingila mu ndembama na zikhomba zitu. (Loma 12:18) Vayi, boti tube nyongisa khomba, mbi tufueti vanga? Mu kulandakana kifuani ki Yakobi, tufueti sambila theti kuidi Yave, muingi ka tusadisa tuvutula kithuadi na khomba beni.
14 Mvandi tufueti botula thangu ayi kuyindula mu biuvu abibi binlanda: ‘Yidi wukubama muingi kukikulula ayi kudinda nlemvu muingi kutuadisa ndembama? Buidi Yave ayi Yesu bankuiza muena minu kutuama ntuala muingi kuvutula kithuadi ayi khomba widi yama mambu?’ Kufiongunina mu biuvu abiobio, kunkuiza tuvana mangolo muingi kukuwa mbembu yi Yesu ayi kukikulula muingi kutomba kithuadi na khomb’itu. Mu phila ayoyo, tuala nunga kulandakana kifuani ki Yakobi.
15. Buidi kusadila mambu madi mu Efeso 4:2, 3 malenda tusadisila kudedikisa mambu na khomba?
15 Yindula mambu Yakobi kabina monikina boti wukinangika mu thangu kadengana Esau! Khanu mu phila yinkaka mambu mamonikina. Diawu, boti tutidi kudedikisa diambu na khomba, buboti beni kukikululanga. (Tanga Efeso 4:2, 3.) Zingana 18:19 yintuba: “Kulembika khomba be fuema, kulutidi phasi kena kukota ku divula didi mielu mingolo. Vadi mambu tumbakasananga madi buka kisengu bankambikanga muingi kuzibika mielu mingolo.” Kukikulula mu kudinda nlemvu, kuidi buka befu tumbotula kisengu beni bankambika.
16. Mbi binkaka tufueti yindula ava kudedikisa mambu ayi kibila mbi?
16 Buboti kuyindulanga theti mambu tunkuiza yoluka ayi phila tunkuiza yolukila na khomb’itu. Bosi, befu kumona ti tuma kubama, tufueti tomba khomba tunyongisa ntima muingi kubue vutula kikundi kitu. Ḿba va thonono nandi kalenda tuba mambu malenda ku tunyongisa, mu thangu ayoyo ḿba tulenda ba mu nganzi voti kutomba kukikakidila, vayi kuvanga mawu mansinkuiza sadisa ko kudedikisa mambu. Bika kuzimbakana ti kudedikisa mambu tuidi na khomba, kulutidi nkinza kena kumonisa bivisa nani widi foto mu mawu.—1 Koli. 6:7.
17. Mbi ngiewu wulenda longuka mu kifuani ki yaya Gilbert?
17 Khomba bantedilanga Gilbert wuvanga mangolo mawombo muingi kutuadisa ndembama na muan’andi wunkieto. Nandi wutuba: “Minu yisa ba ko kithuadi kimboti na muan’ama. Mu mimvu miodi yaba vanganga mangolo muingi kuvutula kithuadi ayi nandi.” Mbi binkaka yaya Gilbert kavanga? “Nandi wubue tuba, khumbu zioso yaba kuendanga muingi kukoluka yandi, theti minu yaba sambilanga, ayi yaba kubamanga mu thangu nandi kankuiza phutudila mimvutu mimbi. Yizaba ti, yifueti ba wukubama muingi kunlemvukila. Ayi yivisa ti vasi ko nkinza kuzaba nani wuba fotu. Kibila yivisa ti, minu yiba kiyeku ki kutuadisa ndembama. Yaya Gilbert wutuba buidi mawu masukila: “Bubu, yidi mu ndembama kibila dikanda diama dioso didi kithuadi.”
18-19. Boti tube nyongisa khomba, mbi tufueti vanga ayi kibila mbi?
18 Befu kubakula ti tube nyongisa khomba, mbi tufueti ba bakubama kuvanga? Buboti kusadila dilongi Yesu ka tuvana ayi kutuadisa ndembama. Kamba Yave mambu beni ayi fiatila mu lusalusu lu phevi’andi yinlongo muingi kutuadisa ndembama. Ngie kuvanga mawu, wala baka mayangi ayi wala monisa ti, widi mu kukuwa mbembu yi Yesu.—Matai 5:9.
19 Buboti beni kuzaba ti Yave mu luzolo luandi, wunsadilanga “Yesu Klisto widi ntu wu kimvuka”, muingi kututuadisa. (Efe. 5:23) Tufueti ba bakubama muingi “kukuwa mbembu yi Klisto” mu kulandakana kifuani ki mvuala Petelo, Yakobi ayi Yoane. (Matai 17:5) Mu dilongi adidi, tumamona buidi tulenda dedikisila mambu ayi khomba. Befu ku mavanga ayi kutatamana kudiatila mu nzila yifietakana yinnata ku luzingu, tunkuiza baka mayangi bubu ayi mu bilumbu binkuiza mayangi mala kadidila.
NKUNGA 130 Ba Nkua Nlemvu
^ Lut. 5 Yesu wutukamba tukota mu muelu wufietama, nzila yinnata mu luzingu. Nandi mvandi wutuba tutatatamana kutuadisa ndembama na zikhomba zitu. Vayi bikaku mbi tulenda dengana bo tumvanga mangolo muingi kusadila mambu Yesu katuba? ayi mbi tulenda vanga muingi tununga bikaku beni?
^ Lut. 7 Kiuvu 6 mu mua buku Mimvutu mi 10 di Biuvu Matoko Bankuvulanga, kintuba: “Buidi yilenda kindimina mu ziphukumunu?” mvandi tala video yi zifikula va quadro yiphembi yidi ntu diambu Kindama Bo Bakuthota Kuidi Bankaka! yidi mu www.pr418.com. (kota vantuba MALONGI MA KIBIBILA > MATOKO.)
^ Lut. 8 Bavingisa mazina mankaka.
^ Lut. 56 MAMBU MADI MU ZIFIKULA: Befu kutatamana kulandakana zithuadusulu zi Yave zidi buka mua bibaka bi lukiebu bantulanga mu nzila, tuala nunga mintambu minkaka, dedi tuala nunga kutina kutala pornografia, kutina bakundi banzolanga kitsuza ayi kumanga bua mu phukumunu yi kukota kikola kinangama.
^ Lut. 58 MAMBU MADI MU ZIFIKULA: Muingi kubue vutula kithuadi na khomb’andi Esau, Yakobi wufukama khumbu ziwombo va ntual’andi.
