DILONGI 43
Bika Kuvonga!
“Tubikanu kuvonga mu kuvanga mamboti.” —NGALA. 6:9.
NKUNGA 68 Longa Kiedika ki Kintinu
MAMBU TUANLONGUKA *
1. Mayangi mbi tuidi?
MAYANGI beni kuba Mbangi yi Yave! Befu tunnatanga dizina di Yave ayi tunzabikisanga diawu kuidi bankaka mu kisalu ki kusamuna. Tunkuangalalanga kusadisa mutu widi “wukubama muingi kubaka luzingu lu mvu ka mvu” kuba Mbangi yi Yave. (Mava. 13:48) Mayangi mitu mandedakana na mo Yesu kaba bo minlandikini miandi bavutuka mu “mayangi” mu kibila ki ndandu babaka mu kisalu ki kusamuna.—Luka 10:1, 17, 21.
2. Buidi tulenda monisina ti tumvuanga nkinza kisalu kitu ki kusamuna?
2 Befu tumvuanga nkinza kisalu kitu ki kusamuna. Mvuala Polo wukindisa Timoteo: “Wu kikieba ngie veka ayi kieba mambu wunlonga.” Ayi wubue tuba: “Bila ngie kuvanga mawu wala kukivukisa ayi wala vukisa baboso ba kukuwa.” (1 Timo. 4:16) Kisalu kitu ki kusamuna kimvukisanga miela mi batu, vayi befu tufueti kukikieba kibila tuidi bisadi bi Nzambi. Diawu mambu moso tumvanga mafueti zitisa Yave ayi kuba nguizani na zitsangu zimboti tunlonganga. (Fili. 1:27) Tummonisanga ti tumvuanga nkinza kisalu kitu ki kusamuna mu ‘kukubamanga buboti’ ayi kudindanga lusakumunu lu Yave ava tulonga bankaka.
3. Buidi batu bankaka bantadilanga kiedika? Vana kifuani.
3 Kheti bo tumvanga mangolo mitu moso muingi kulonga, ḿba bankaka basinkuiza vua ko nkinza zitsangu zi Kintinu. Tala kifuani ki yaya Georg Lindal, wusamuna naveka ku tsi Irlanda tona mu mvu 1929—1947. Kheti wukabula bilongulu biwombo vayi ni mutu kasa kikinina ko kiedika. Nandi wutuba: “Bawombo baba lendanga kiedika ayi bankaka babasa vuanga ko nkinza mawu.” Ayi kheti bo bafila kuna zikhomba bakota kikola ki Ngiliadi, vavioka vua di mimvu bosi bayiza baka minlonguki ayi bankaka ba kivana kuidi Yave ayi babotama. *
4. Buidi tumbelanga bo batu bammanga kukikinina zitsangu zi Kintinu?
4 Tumbanga mu kiunda bo batu bammanga kukikinina mambu tunlonga. Tulenda ba dedi mvuala Polo bo katuba “kiunda kingolo kidi yama” kibila basi Yuda bamanga kukikinina Yesu banga Mesia. (Loma 9:1-3) Buidi wulenda muena boti ngie fueti bika kulonguka na nlonguki wukhambu konzuka mu kiphevi kheti mu mangolo ayi minsambu mioso wumvanga? Ove boti wusadisidiabu ko ni mutu nati kambotama, buna wufueti kukivana fotu mu kuyindula ti Yave kasinsakumuna ko kisalu kiaku? Mu dilongi adidi, tunkuiza baka mimvutu mi biuvu binlanda: (1) Mbi bimmonisa ti tuidi mu kubaka ndandu mu kisalu kitu ki kusamuna? (2) Mbi tufueti tebukanga moyo bo tunsamuna?
MBI BIMMONISA TI TUIDI MU KUBAKA NDANDU MU KISALU KITU KI KUSAMUNA?
5. Kibila mbi khumbu zinkaka mambu masinkuiza vangimina ko mu phila tuntombila?
5 Kibibila kintuba ti mutu wumvanganga luzolo lu Yave, “wumbakanga ndandu mu mamoso kamvanga.” (Minku. 1:3) Vayi mawu masinsudula ko ti mamoso tuala vanga mala vangimina mu phila tuntombila. Mu kibila ki masumu mitu ayi ma bankaka, luzingu “luidi beni ziphasi.” (Yobi 14:1) Mvandi zimbeni zitu bala tomba kutu tula nkaku muingi tubika samuna. (1 Koli. 16:9; 1 Tesa. 2:18) Buidi Yave kammuenanga boti kisalu tumvanga kidi mu kutuadisa ndandu? Tuemmona minsua mi Kibibila milenda tusadisa kubaka mvutu wu kiuvu akiokio.
Yave wumvuanga nkinza mangolo mitu, kheti tunsamuna nzo ka nzo, mu minkanda voti mu telefoni (Tala lutangu 6)
6. Mbi bimvanganga kisalu kitu kiba ndandu va meso ma Yave?
6 Yave wummonanga mangolo ayi lukuikumunu luitu. Va meso mandi kisalu kitu kidi ndandu bo tukivangila mu kifusa ayi mu luzolo, kuba kuandi boti ba tukuwa voti ndamba. Mvuala Polo wusonika: “Nzambi widi wusonga ayi kalendi zimbakana ko kisalu kiaku ayi luzolo wumonisa mu dizina diandi bo wusadila banlongo ayi wukhidi basadila.” (Ebe. 6:10) Yave wuntebukanga moyo mangolo maku ayi luzolo kheti wisimbaka ko ndandu yimboti mu kisalu beni. Diawu tulenda sadila mu befu veka mambu mvuala Polo katuba: “Kisalu kiaku mu Mfumu kisi ko kiphamba.”—1 Koli. 15:58.
7. Mbi tulenda longuka mu mambu mvuala Polo katuba matedi kisalu kiandi?
7 Mvuala Polo wuba wupisuka mu kisalu ki misioni, wusadisa kutsikika bimvuka bimona mu mavula mawombo. Vayi mu thangu vaba tombulu ka kakidila kiminu kiandi, nandi kasa tubila ko thalu yi batu kanunga kasadisa muingi basadila Nzambi. Vayi mu lufiatu nandi wukamba kuidi batu baba tomba kukinangika: “Minu yiluta vanga kisalu.” (2 Koli. 11:23) Dedi mvuala Polo, tebukanga moyo ti mangolo ayi lukuikumunu mawu Yave kanluta vuanga nkinza.
8. Mbi tufueti tebukanga moyo matedi kisalu kitu ki kusamuna?
8 Yave wunkuangalalanga mu kisalu kitu ki kusamuna. Khumbu yimueka, Yesu wufila 70 di minlandikini muingi besamuna zitsangu zi Kintinu. Ku tsuka kisalu bawu “bavutuka mu mayangi.” Mbi biba tuadisa mayangi? Bawu batuba: “Ziphevi zimbi, zidi mu kutu tumukina bo tube sadila dizina diaku.” Vayi Yesu wuba semba mu mayindu amomo ayi wuba kamba: “Bikanu kumona mayangi mu kibila ki ziphevi zimbi zimu tumukina, vayi luyangalala kibila mazina minu mama sonama ku diyilu.” (Luka 10:17-20) Yesu wuzaba ti bakana ko khumbu zioso bankuiza baka ndandu mu kisalu ki kusamuna. Mvandi tusa zaba ko thalu yi batu bayuwa zitsangu mu kilumbu beni ayi bayiza ba bisadi bi Nzambi. Vaba tombulu minlandikini kuba mayangi bakana ko mu kibila ki ndandu babaka mu kisalu, vayi mu kuzaba ti Yave wuyangalala mu kifusa ayi mangolo bamonisa.
9. Dedi bummonisa Ngalatia 6:7-9, ndandu mbi tuala baka befu khambu vonga mu kisalu ki kusamuna?
9 Befu tatamana kusamuna tuala baka luzingu lu mvu ka mvu. Bo tumvanga mamoso tulenda nunga muingi kusamuna ayi kulonga, befu tuidi mu kumuanga, mbongo yi “kiphevi, “kibila tuidi mu kubikila phevi yinlongo yi Nzambi yituadisa luzingu luiti. Befu “tatamana”mu khambu “vonga” Yave wukanikisa ti wala tuvana luzingu lu mvu ka mvu kheti tuisinsadisa ko ni mutu kuba Mbangi yi Yave.—Tanga Ngalatia 6:7-9.
MBI TUFUETI TEBUKANGA MOYO BO TUNSAMUNA?
10. Buidi Yesu kafuanikisila phila batu bantambudilanga zitsangu zi Kintinu?
10 Mvutu wu kiuvu akiokio widi mu phila batu bankuiza tadila mambu tuba longa. Yesu wusudikisa mawu mu kusadila kifuani ki mvati wuvata mbongo yiviakana mu mintoto miviakana, vayi yimueka to yivana mimbutu. (Luka 8:5-8) Yesu wutuba ti mintoto miviakana minsundula phila batu bantambudilanga “Diambu di Nzambi.” (Luka 8:11-15) Ayi dedi mvati, tulendi vanga ko ni kiuma muingi kiedika kiyonzuka mu mintima mi batu. Kiyeku kitu kidi, kutatamana kusamuna zitsangu zi Kintinu. Dedi bo mvuala Polo katubila, “kadika mutu wala tambula mfutu boso buididi kisalu kiandi,” kubika kuandi mu ndandu kambaka.—1 Koli. 3:8.
Kheti Nowa wusamuna mu lukuikumunu mu mimvu miwombo, kubotula kuandi basi dikanda diandi, ni mutu wunkaka kasa vitika ko mambu kaba longa. Vayi Nowa wubaka ndandu bo katukumukina Nzambi! (Tala lutangu 11)
11. Kibila mbi Yave kamuena ti Nowa “wubaka ndandu” mu kisalu kiandi? (Tala foto yidi va thonono levista.)
11 Bisadi biwombo bi Yave mu thangu yikhulu basamuna vayi ni mutu kasa bakuwila ko. Dedi Nowa, wuba“nsamuni wu mambu masonga,” mu mimvu miwombo. (2 Pete. 2:5) Ayi nandi waba tomba batu bavitika mambu kaba kuba longa, vayi Yave kasa tuba ko ti mawu mankuiza monika. Bo kavana Nowa zithuadusulu muingi kutunga nzaza Yave wunkamba: “Kota mu nzaza ngiewu, bana baku, nkieto’aku ayi bakazi ba bana baku.” (Ngene. 6:18) Mu kutadila zindilu Yave kamvana muingi kutunga nzaza beni, ḿba Nowa wuyindula ti kheti mua ndambu batu bankuiza kikinina mambu kaba longa. (Ngene. 6:15) Ayi dedi bo tuzabidi ni mutu kasa vitika ko mambu Nowa kalonga. (Ngene. 7:7) Mawu mansundula ti Yave kasa vua ko nkinza kisalu kiandi? Ndamba! Va meso mandi Nowa wubaka ndandu yiwombo kibila wutatamana mu lukuikumunu mu kisalu kamvana.—Ngene. 6:22.
12. Buidi mbikudi Yelemia kanungina kubaka mayangi mu kisalu ki kusamuna kheti mu zikhuamusu kaviokila?
12 Mbikudi Yelemia mvandi wusamuna mimvu miwombo vayi batu basa kunkuwila ko. Ayi mu kibila ki zikhuamukusu, nandi wuyiza “bua mu kiunda kingolo” ayi wubaka makani ma kubika kubue samuna. (Yele. 20:8, 9) Vayi kheti bobo nandi kasa vonga ko! Mbi binsadisa kununga mabanza ma kiunda ayi kubaka mayangi mu kisalu ki kusamuna? Nandi wutsikika mayindu mu mambu muadi ma nkinza. Ditheti, zitsangu zi Nzambi Yelemia longa, ziaba vana kivuvu mu mambu mala monika “kuntuala.” (Yele. 29:11) Dimuadi, Yave wusola Yelemia muingi kaba mvual’andi ayi kazabikisa zitsangu kuidi dikabu diandi. (Yele. 15:16) Befu mvitu tunsamunanga zitsangu zi kivuvu mu nza yi kitombi ayi mu kuba Zimbangi zi Yave tunnatanga dizina diandi. Kheti tuisinnunga ko kusadisa mutu kuba Mbangi yi Yave, befu kutsikika mayindu mu mambu amomo mankiza tunkuiza nunga kubaka mayangi.
13. Mbi tulenda longuka mu kinongu ki Yesu kidi mu Malako 4:26-29?
13 Batu bankozukanga mu kiphevi malembe malembe. Yesu wulonga mambu mankinza mu kusadila kinongu ki mvati wunlala tolo. (Tanga Malako 4:26-29.) Kheti wumvanganga mangolo ma kuvata mbongo, vayi kamonanga ko buidi yawu yinkozukilanga. Dedi mvati, ḿba ngie wisi fika mona ko ndionzukulu yi nlonguki’aku kibila yawu yimmonikanga malembe malembe. Dedi bo mvati kasi ko bu kuvangila ni diambu muingi mbongo yi yonzuka mu phila kantombila, bobuwau mvandi tulendi kuika ko minlonguki mitu kukonzuka mu kiphevi. Diawu, bika kuba mu kiunda boti minlonguki miaku basinkonzuka ko mu phila wuntombila. Kibila dedi mvati, kuvanga nlonguki kuntombuluanga mvibudulu.—Yako. 5:7, 8.
14. Kifuani mbi kimmonisa ti ndandu mu kisalu ki kusamuna yimmonikanga malembe malembe?
14 Mu bibuangu binkaka vantombuluanga mimvu miwombo muingi kumona ndadu yi kisalu ki kusamuna. Tala kifuani ki khomba Gladys ayi Ruby Allen. Mu mvu 1959 baba fila banga mintuami ntuala ku Canadá ku divula di Quebec. * Mu kibila ki batu va nsengi ayi zikhuamukusu zi kinganga ki Católica, batu babasa vuanga ko nkinza zitsangu zi Kintinu. Yaya Gladys wutuba: “Mu mimvu miodi kadika kilumbu tuaba kuendanga nzo ka nzo vayi ni mutu kasa vua ko nkinza mambu tuaba longa. Bo tuaba vitilanga mu zinzo ziawu bawu baba zibikanga mielu. Vayi befu tusa vonga ko.” Buviokila thangu batu batona kubalula mayindu mawu. Ayi bubu ku divula beni kueka bimvuka bitatu.—Yesa. 60:22.
15. Mbi 1 Kolinto 3:6, 7 yitu longa matedi kuvanga minlonguki?
15 Vantombuluanga mangolo ma baboso muingi kuvanga nlonguki. Diawu nkinza baboso mu kimvuka kubuela mioko muingi kuvanga nlonguki. (Tanga 1 Kolinto 3:6, 7.) Dedi, yindula nsamuni wumvana kimbangi kuidi mutu mu kusadila mua nkanda voti levista. Bo kammona ti kasi ko thangu muingi kuvutukila mutu beni, nandi wundinda nsamuni wunkaka muingi kamvutukila. Ayi nsamuni beni bo kantona ndogukulu yi Kibibila na mutu beni, wuntumisa minsamuni miviakana muingi kulandakana ndogukulu. Ayi kadika nsamuni kannata, wunkindisa nlonguki mu ziphila ziviakana. Mambu amomo, mankuiza sadisa nlonguki kukonzuka mu kiphevi. Diawu Yesu katubila ti mvati ayi mvedi bankuiza yangalala va kimueka.—Yoa. 4:35-38.
16. Kheti mu ziphasi zi kimbemvu voti bununu, buidi wulenda bakila mayangi mu kisalu ki kusamuna?
16 Ḿba ngie wusiala bue nunga ko kusamuna mu phila waba samuninanga mu kibila ki buvinya voti bununu. Vayi kheti bobo, ngie wulenda baka mayangi mu kisalu ki kusamuna. Tala kifuani ki Ntinu Davidi, bo nandi ayi masodi mandi bayenda kuekula makanda ayi biuma biawu kuidi basi Amaleki. Mu thangu beni, vaba 200 di masodi baba beni bavonga muingi kuenuana. Diawu basiadila kumbusa muingi kukengidila biuma. Bo banunga mvita, Davidi wutuma bakabula biuma mu phila yidedakana. (1 Samu. 30:21-25) Ayi mawu mammonikanga bubu mu kisalu kitu ki kusamuna. Diawu baboso bamvanganga mo bannunga mu kisalu beni balenda ba mayangi bo nlonguki wu Kibibila kambaka makani ma kukivana kuidi Yave ayi kambotama.
17. Mu mambu mbi tulenda tondila Yave?
17 Tumvutulanga matondo mu phila yimboti Yave kantadilanga kisalu kitu. Yave zebi ti tulendi kuika ko batu ba tukuwa muingi bansadila. Nandi wummonanga kifusa kitu mu phila tumvangilanga kisalu kiandi ayi wu tusakumunanga mu mawu. Yave mvandi wu tusadisanga kubaka mayangi mu kiyeku ki kuvanga minlonguki. (Yoa 14:12) Diawu, tulenda ba lufiatu ti Yave wunkuiza tusakumuna befu khambu vonga!
NKUNGA 67 ‘Longa Diambu di Nzambi’
^ Lut. 5 Tumbanga mu kiunda bo batu bakhambu kikinina mambu tuba longa vayi tunkuangalalanga bo bawu bankikinina zitsangu zimboti. Buabu, boti nlonguki’aku wu Kibibila kasinkonzuka ko mu kiphevi voti wusadisidiabu ko mutu nati kambotama? Wufueti kukivana fotu mu mawu? Mu dilongi adidi, tunkuiza mona buidi tulenda tatiminina kuba mayangi mu kisalu kitu ki kusamuna kheti ba tukuwa voti ndamba.
^ Lut. 14 Tala kinongu ki luzingu ki yaya Gladys Allen kidi ntu diambu, “Eu Faria Tudo Outra Vez!,” mu Kibanga ki Nsungi kilumbu 1 Ngonda Yivua, mvu 2002.
