MIMVU mioso bawombo babika kusadila Yave bamvutukanga mu kimvuka kiandi. Yindula “mayangi ku diyilu” bo wumueka kamvutuka kusadila Yave! (Luka 15:7, 10) Boti ngie mavutuka mu kimvuka, wulenda ba lufiatu ti Yesu, zimbasi ayi naveka Yave bambanga beni mu mayangi mu kumona ti ngie bebaka makani ma kuvutuka mu kiedika. Vayi bo wumvanga mangolo ma kuvutula kikundi kiaku na Yave, ngie wulenda viokila mu bikaku biwombo. Bikaku mbi? Ayi mbi bilenda kusadisa?

Zikhomba ziwombo bo bamvutuka mu kimvuka bantatamananga kuba mayindu ma kiunda. Ḿba balenda visa buidi Ntinu Davidi kabela. Kheti bo Yave kanlemvukila nandi wutuba: “Masumu mami madi mu kuthatisa.” (Minku. 40:12; 65:3) Bo mutu kamvutuka kusadila Yave manyindu ma kukivana fotu ayi matsonyi malenda tatamana mu mimvu. Yaya Isabelle, * wuba wuvayikusu kuvioka 20 di mimvu wutuba: “Yaba monanga phasi kukikinina ti Yave wundevukila.” Kiunda kilenda ku tuvanga kubue ba wulebakana mu kiphevi. (Zinga. 24:10) Diawu ka wubika mawu mamonika.

Bankaka bankuazukanga beni mu kuyindula ti, balendi nunga ko kuvanga mamoso mantombulu muingi kubue vutula kikundi kiawu na Yave. Bo kavutuka mu kimvuka Antoine wutuba: “Yimuena ti yizimbakana mamoso yaba vanganga bo yaba sadilanga Yave.” Mayindu ma phila ayoyo malenda vanga bawombo kumona boma boti balenda bue kukivana mu kifuza mu kisalu ki Yave.

Muingi kufuanikisa mawu yindula mutu wumviokila mu kivuka kingolo ayi nzo’andi yintuluka. Mawu malenda kuntuadisa ziphasi ayi kiunda mu kuyindula thangu ayi mangolo mantombulu muingi kubue tunga nzo beni. Mawu mammonikanga boti  bevola disumu ayi wumvava kikundi kiaku na Yave. Ngie wulenda yindula ti vantombulu beni mangolo muingi kubue vutula kikundi kiaku na Yave vayi zaba ti vadi lusalusu.

Yave wu tutumisa: “Yizanu tudedikisa mambu tuidi.” (Yesa. 1:18) Ngie wuvanga mangolo mamwombo “muingi kudedikisa mambu.” Yave wuku zolanga mu mangolo wuvanga. Kibila bo wuvutuka kuidi Yave, nandi kalenda sadila kifuani kiaku muingi kumonisa ti, Satana widi nkua luvunu—Zinga. 27:11.

Bo wuvutuka kuidi Yave ngie wumfikama ayi nandi wala kufikama. (Yako. 4:8) Vayi vantombulu kuvanga mambu mankaka kubika kuandi to batu kuzaba ti ngie mavutuka mu kimvuka. Mvandi fueti tatamana kukindisa luzolo luaku kuidi Tat’aku Yave. Buidi wulenda vangila mawu?

Ḿba ngie wukhidi tebuka moyo mambu wulonguka matedi Yave, zikhanu ziandi—ayi mambu mankuiza kuntuala. Vayi vantombulu kubue vutula kikundi kiaku na Yave mu kuba thuadusulu—yimboti yi mambu ma kiphevi. Dedi kusamuna, kulandakananga zikhutukunu ayi kuviokisanga thangu na zikhomba ziaku zi kiphevi.

Tatamana kusambila. Yave wumvisanga ti kutatamana kukivana fotu kulenda kutula nkaku muingi kukoluka yandi. (Loma 8:26) Diawu ‘tatamana kusambila’ ayi kamba kuidi Yave ti ngie wuntomba kikundi kiandi. (Loma 12:12) Andrej wuntebuka moyo: “Yaba monanga zitsonyi ayi yaba kukivananga fotu. Vayi kadika nsambu yaba vanganga kuidi Yave, mabanza amomo matona kudekuka ayi yaba monanga ndembama mu ntima.” Boti wusa zaba ko mbi wunkuiza dinda mu nsambu, tala kifuani ki Ntinu Davidi wunyongina masumu mandi kidi mu Minkunga 51 ayi 65.

Tanganga Kibibila kadika kilumbu. Mawu mala kusadisa kukindisa kiminu kiaku ayi kubuela luzolo luaku mu Yave. (Minku. 19:7-11) Felipe wutuba: “Kukhambu tula mambu ma kiphevi va theti mu luzingu luama mawu ma phanga kulebakana ayi kunyongisa Yave.” “Minu yabasa tomba ko kuvutukila nzimbala ayoyo, diawu yibakila makani ma kutula ndongukulu yiminu veka va theti.” Ngie mvaku wulenda vanga mawu. Vayi boti wusa zaba ko mambu wulenda longuka ngie veka? Dinda lusalusu kuidi nkundi

Vutula kikundi kiaku na zikhomba ziaku. Bawombo bamvutukanga mu kimvuka bammonanga boma ti, bankaka balenda kuba tadila mu phila yikhambu fuana. Larissa wutuba: “Yaba monanga zitsoni. Yimona ti yibundula kimvuka ki Yave. Mayindu amomo matatamana yama mu thangu yiwombo.” Diawu ba lufiatu ti, bakulutu ba kimvuka ayi zikhomba zinyonzuka mu kiphevi badi beni phuila yi kusadisa bo wumvanga mangolo muingi kuvutula kikundi kiaku na Yave. (Tala quadro yintuba “ Mbi Bakulutu ba Kimvuka Balenda Vanga?”) Bawu bayangalala bo wuvutuka kuidi Yave ayi bantomba wutatamana kunsadila.—Zinga. 17:17.

Mbi bilenda kutu fikika kuidi zikhomba? Vanga mambu moso zikhomba badi mu kuvanga—kulandakananga zikhutukunu ayi kubasikanga mu kisalu ki kusamuna. Buidi mawu mankuiza kusadisila? Felix wutuba: “Zikhomba baba beni mu phuila muingi yivutuka. Mambu amomo mambonisa ti bawu baba kuphuanga nkinza. Mvandi matsadisa kumona ti yiba wumueka mu dikabu di Yave ayi makhindisa kubika vutuka mbusa.”— Tala quadro yintuba “ Mbi Wulenda Vanga?”

Bo wumvanga mangolo ma kuvutula kikundi kiaku na Yave, Satana wala tatamana “kukuthota” muingi kaku vanga kulebakana. (Luka 4:13) Diawu ba wukubama muingi wutatamana kukindisa kiphevi kiaku bubu.

Mu matedi mamemi mandi Yave wukanikisa: “Yala tomba mazimbala, yala vutula mo makhambulu mu phaka, bo badi baluala yala kieba zimbeza ziawu ayi bo badi balebakana yala bakindisa.” (Yehe. 34:16) Yave wusadisa bawombo bavayikusu mu kimvuka. Diawu ba lufiatu ti Yave wuntomba wutatamana kukindisa kinkundi kiaku ayi nandi.