MU THANGU yikhulu, dikanda di dibakala dintomba kukuela baba vananga biuma kuidi dikanda di nkieto. Baba vananga biuma dedi bibulu voti zimbongo. Ayi khumbu zinkaka dibakala wuntomba kukuela, waba sadilanga dikanda di nkieto kantomba kukuela ayi mawu Yakobi kavanga. Nandi wukikinina kusadila tata yi Lakeli mu 7 di mimvu (Ngene. 29:17, 18, 20) Kibila mbi babe vangilanga mawu?

Nkieto wumueka wuba luzabu luwombo lu Kibibila wutuba: “Biuma dikanda di dibakala babe vananga kuidi dikanda di nkieto, yiba phila yi kutondila mu mamoso bavanga muingi kunkieba ayi kufuta phuasa muana nkieto kankuiza bika mu bisalu kaba vanganga.” Biuma beni mvandi biaba sadisanga kukindisa kithuadi ki makanda ma mamuadi ayi kuyisadisanga mu thangu yi ziphasi. Mawu maba monisanga mvandi ti nkieto wunkuiza ba mu lukiebu lu nnuni’andi.

Kuvana biuma kuidi dikanda di nkieto kuisinsundula ko ti dibakala kafueti tadila nkieto banga mvika voti kisadi kiandi. Buku yintubila matedi basi Isaeli—luzingu luawu ayi zithuadusulu yintuba ti: “Nsiku wu kufuta biuma kuidi dikanda di nkieto wunkuela, waba monikanga buka ti kusumba wunsumba nkieto beni. Vayi masi ko mawu, kibila yawu yiba phila yi kutondila dikanda di nkieto mu mamoso bavanga muingi kunkieba.”

Bubu, mu zitsi ziwombo batu bakhidi landakananga kikhulu ki kuvananga biuma kuidi dikanda di nkieto kankuela. Matata badi baklisto ba kukhambu dinda biuma biwombo, “bawu badi mu kubika muingi batu boso baba zabila buka batu balembama” (Fili. 4:5; 1 Koli. 10:32, 33) Ayi mu phila ayoyo, bawu bammonisanga ti “basi ko luzolo mu zimbongo”, voti phuila yi kuba biuma biwombo. (2 Timo. 3:2) Mvandi matata badi baklisto ba kukhambu dinda biuma biwombo, bankuiza sadisa dibakala kabika viokisa thangu yiwombo mu kukubika biuma beni nati kankuiza nunga. Mvandi bankuiza nsadisa kubika salanga bilokula biwombo muingi kusumba biuma bandinda ayi kubua mu ntambu wu kubika kisalu ki ntuami ntuala.

Mu zitsi zinkaka zimfumu zi luyalu bawu bansikikanga thalu yi biuma dibakala kafueti vana. Mu mambu amomo matata badi baklisto, bafueti tumukina minsiku amiomio. Kibila mbi? Kibila, Kibibila kintuba ti baklisto “bafueti tumukina zimfumu zi luyalu” ayi kutumukina minsiku miawu boti miawu misinlevula ko minsiku mi Nzambi.—Loma 13:1; Mava. 5:29.