1. Mu phila mbi balenda tuvanina malongi, ayi kibila mbi befu boso tuntombila mawu?

 BEFU boso tuntombuluanga khumbu zinkaka kutabulanga malongi. Ayi Khumbu zinkaka befu tulenda tuama ntuala mu kudinda dilongi kuidi khomba voti mutu tunkinzikanga. Khumbu zinkaka khomba kalenda kuazuka bo kammona ti tuentona “kuvekuka mu khambu zaba”. (Ngala. 6:1) Ayi balenda tuvana malongi mu phila yi tsembolo bo tumvanga disumu dingolo. Bosokua bubela, tufueti kuwanga malongi. Kuvanga mawu dinkuiza ba diambu dimboti kuidi befu veka ayi tulenda vukisa luzingu luitu!—Zinga. 6:23.

2. Dedi bummonisina Zingana 12:15 ayi nota, kibila mbi tufueti kuwila malongi?

² Lutangu lubongulu ntu diambu lutu kindisa, “kukuwa mambu ma bankua nduenga.” (Zinga 22:17) Vasi ko mutu widi nzayilu mu mambu moso ayi vadi batu ba tulutidi nduenga voti nzayilu. (Tanga Zingana 12:15 ayi nota.) Diawu kukuwa malongi yidi mbonosono yi kukikulula. Ayi mvandi yimmonisa ti tuzebi ti tuntombulu lusalu lu bankaka muingi kudukisa makani mitu. Ntinu Salomo mu lusalusu lu phevi yinlongo wusonika: “Mayindu ma batu bawombo mawu mantuadisanga ndandu [voti “tsembolo,” nota.].”—Zinga 15:22.

3. Mu ziphila mbi ziwadi tulenda tambudila tsembolo?

³ Balenda tuvana malongi mu ziphila ziwadi. Theti bo tuntanga bilongulu bitu. Biawu bilenda kutuvanga kuyindula phila tunnatina luzingu luitu ayi bo tumbaka makani ma kubalula mavanga mitu. (Ebe. 4:12) Phila yimmuadi; khomba wuyozuka mu kiphevi, kalenda kutu sadisa kumona mambu  tufueti balula mu luzingu. Bo mutu katuvana malongi mabongulu mu Kibibila, mawu mammonisa ti nandi wu tuzolanga. Diawu tufueti vangila mangolo muingi kuntonda, kukuwa ayi kusadila mawu.

4. Dedi bummonisina Mpovi 7:9, mambu mbi tufueti bika kuyindula bo ba tuvana malongi?

⁴ Bo tuidi batu ba masumu, tulenda mona phasi kusadila malongi bo khomba katukamba vama tufueti vangila mangolo. Ayi ḿba tulenda kunkangila nganzi. (Tanga Mpovi 7:9.) Khumbu zinkaka tulenda tomba kuyikakudila. Ayi mvandi tulenda kuyikuvusa: ‘Kibila mbi kabe phanina dilongi adiodio? Nandi kasa tubila ko mu phila yifuana. Mvandi tulenda tomba zinzimbala zi mutu beni muingi tubika sadila dilongi kabe tuvana ayi ḿba tulenda tuba: Nsua mbi kadi muingi kutsemba? Nandi mvandi wumvanganga zinzimbala! Mu phila ayoyi ḿba tulenda tomba mutu wunkaka katu vana dilongi mu phila tuntombila.

5. Mbi tunkuiza longuka mu dilongi adidi?

⁵ Mu dilongi adidi, tunkuiza tubila bifuani bi Kibibila bi batu bamanga malongi ayi bo bakikinina malongi. Mvandi tunkuiza mona mbi bilenda ku tusadisa kukikinina malongi ayi ndandu tulenda baka befu kuvanga mawu.

6. Mbi tulenda longuka mu phila Lobuami kasadila malongi bamvana?

⁶ Tala kifuani ki Lobuami. Bo bambieka ntinu wu Isaeli, dikabu bandinda muingi kabotula ziphasi tat’andi Salomo katuadisa kuidi dikabu. Lobuami wudinda malongi kuidi bakulutu ba Isaeli muingi kazaba mvutu mbi kankuiza vana dikabu. Bakulutu bankamba ti na kuvanga mambu dikabu dintomba, bawu bankuiza kumbuela mioko. (1 Minti. 12:3-7) Vayi Lobuami kasa kuangalala ko mu malongi bamvana, diawu katombila malongi kuidi matoko baba yandi phunga yimueka. Ḿba bawu baba nduka 40 di mimvu ayi baba mua nzayilu yi mambu ma luzingu. (2 Lusa. 12:13) Vayi bavana Lobuami malongi mambi. Bankamba muingi kabuela ziphasi kuidi dikabu. (1 Minti. 12: 8-11) Lobuami wuba malongi muadi masuasana. Nandi khanu wutomba thuadusulu yi Nzambi mu nzila nsambu muingi kazaba mambu kafueti vanga. Vayi nandi wusadila malongi kaluta zola. Wulandakana malongi matoko bamvana. Mu kibila akiokio, nandi ayi dikabu baviokila mu ziphasi. Mvitu, ḿba malongi tunkuwa masi ko mawu tuntomba. Vayi boti mawu mambongulu mu Kibibila, buboti kusadila mawu.

7. Mbi kifuani ki Ntinu Uzia ki tulonga?

⁷ Ntinu Uzia wubayisa malongi. Nandi wukota ku kibuangu kilutidi kinlongo ki tempelo kio zinganga Nzambi to baba nsua wu kukota. Nandi waba tomba kuvika malasi. Zinganga Nzambi bankamba: “Ngie wisi ko nsua wu kuvika malasi kuidi Yave! Zinganga Nzambi to badi nsua wu kuvanga mawu.” Mbi Uzia kavanga? Boti nandi wukikinina dilongi di kubasika ku tempelo muna thangu, khanu ḿba Yave wunlemvukila. Vayi, “Uzia . . . wudasuka.” Kibila mbi nandi kamangina dilongi? Ḿba nandi wuyindula ti mu kuba ntinu, wuba nsua wu kuvanga mamoso kaba tomba. Vayi buisi ko buawu Yave kaba yindudilanga. Mu kibila ki Lungudayi luandi, Uzia wubakana buazi “ayi wutatamana na kimbevo akiokio nati kafua.” (2 Lusa. 26:16-21) Kifuani ki Uzia ki tulonga ti boso kuandi  bubela biyeku tuidi, befu kumanga kukikinina malongi mabongulu mu Kibibila, tunkuiza zimbisa lunungu tuidi va meso ma Yave.

8. Buidi Yobi katadila malongi bamvana?

⁸ Kubika to bifuani bimbi tuma tubila, mu Kibibila muidi mvandi bifuani bimboti bi batu basakumunu mu kukikinina malongi. Tala kifuani ki Yobi. Kheti nandi waba tumukinanga Nzambi, vayi kasa ba ko mutu wuvedila. Bo kaba viokila mu ziphasi, nandi wutuba mambu makhambu fuana. Mambu mbi mayiza monika? Mu kibila akiokio Elihu ayi Yave bamvana malongi. Mbi Yobi kavanga? Nandi wukikulula ayi wukikinina malongi. Nandi wutuba: “Yiyoluka mu khambu yindula. . . Diawu bika kusimbidila mambu yibe tuba, Kibila yibe nyongina mawu mu mbungi yi ntoto ayi va dibombi.” Yave wusakumuna Yobi bo kayikulula.—Yobi 42:3-6, 12-17.

9. Buidi Mose kavanina kifuani kimboti mu matedi kuvitikanga malongi?

⁹ Mose widi kifuani kimboti ki mutu wukikinina tsembolo bo kavanga zimbala. Khumbu yimueka nandi kasa monisa ko mvibudulu ayi kasa vana ko nzitusu kuidi Yave. Mu kibila akiokio, Mose wuzimbisa luaku lu kukota ku Ntoto Baba Kanikisa. (Zinta. 20:1-13) Bo Mose kazabikisa Yave kiunda kaba mu makani kabaka, Yave wunkamba: “Kawu bue khamba matedi diambu adiodio.” (Deute. 3:23-27) Mose kasa dasuka ko mu kibila akiokio. Vayi wukikinina tsembolo yi Yave ayi wutatamana kunsadila ayi kutuadisa dikabu di Isaeli. (Deute. 4:1) Yobi ayi Mose, badi bifuani bimboti tufueti landakana matedi kukikinina malongi. Yobi wubalula phil’andi yi kuyindudila mu khambu kuyikakidila. Mose wumonisa ti wukikinina malongi ma Yave, mu kutatamana wukuikama kheti mu kuzaba ti kasinkuiza kota ko ku ntoto baba kanikisa.

10. (a) Mbi Zingana 4:10-13 yintuba matedi ndandu tumbakanga mu kusadila malongi? (b) Mayindu mbi mafuana zikhomba baba matedi malongi batambula?

¹⁰ Tumbakanga ndandu mu kulandakana bifuani bi batu bakuikama dedi Yobi ayi Mose. (Tanga Zingana 4:10-13.) Ayi zikhomba ziwombo bavanga mawu. Tala mambu yaya Emmanuel, wunkalanga ku Congo katuba matedi kutambula malongi: “Zikhomba banyozuka mu kimvuka bamona ti yaba tona kusinda mu kiphevi. Diawu baphanina malongi muingi kutsadisa. Yisadila malongi beni ayi mawu matsadisa kubika viokila mu ziphasi.” * Megan ntuami ntuala wunkalanga ku Canadá wutuba matedi kutambula malongi: “Disi ko diambu diluelu kuvitika malongi, kibila khumbu zinkaka bawu basinkuiza tuba ko mambu yintomba kukuwa. Vayi mawu yifueti vanga.” Yaya Marko wunkalanga ku Croácia wutuba: “Bubu yisiedi ko biyeku yiba vayi yivisa ti dilongi baphana ditsadisa kukindisa kinkundi kiama na Yave.”

11. Mbi yaya Karl Klein katuba matedi kuvitika dilongi?

¹¹ Yaya Karl Klein, wuba mu dingumba dintuadisi mvandi wubaka ndandu mu kusadila dilongi bamvana. Mu kinongu kiandi ki luzingu yaya Klein wutuba ti yaya Joseph F. Rutherford wuba nkund’andi wufikama, wumvana malongi. Yaya Klein wutuba ti va thonono kasa zola ko dilongi kamvana. Nandi wubue tuba: “Bo [Yaya Rutherford] kambona, nandi wumbila mu mayangi vayi bo yiba mu nganzi minu yisa kuntambudila ko buboti. Yaya Rutherford wuvisa mawu ayi wukhamba, yaya ‘Karl, keba  kuaku, Satana wuntomba kuku buisa.’ Minu yimona zitsonya ayi yituba, ‘Vasi kuandi diambu ko yaya Rutherford’. Vayi nandi wutsaba buboti ayi wubue vutukila mambu katuba. ‘Ba keba keba kibila Satana wuntomba kuku buisa.’ Ayi nandi waba nunga! Befu kukangila nganzi khomb’itu bo ka tuvana malongi, tuidi mu kubika Satana ka tulekila ntambu.” * (Efe. 4:25-27) Yaya Klein wuvitika dilongi yaya Rutherford kamvana ayi kinkundi kiawu kitatamana kikinda.

12. Buidi kukikulula ku tusadisilanga kukikinina malongi? (Minkunga 141:5)

¹² Mbi bilenda ku tusadisa kukikinina malongi? Tufueti kuyikululanga ayi kutebukanga moyo ti befu boso, tuidi bankua masumu ayi khumbu zinkaka tulenda vanga mambu makhambu fuana. Yobi mvandi wutona kuba mayindu amomo, vayi buviokila thangu nandi wubalula phil’andi yi kuyindudila ayi Yave wunsakumuna. Kibila mbi? Kibila Yobi wukikulula ayi wumonisa mawu mu kukikinina malongi Elihu kamvana, kheti nandi wuba kilezi kiandi. (Yobi 32:6, 7) Kukikulula kunkuiza tusadisa mvandi kukikinina malongi ba tuvana kheti bo tummona ti tuisintomba ko mawu ayi kheti mutu wu tuvana malongi beni widi kilezi kitu. Nkulutu wu kimvuka wunkalanga ku Canadá wutuba: “Befu veka tumonanga ko zinzimbala zitu dedi bo bankaka ba tutadilanga. Diawu, buidi tulenda konzukila mu kiphevi boti ni mutu kasi tuvana ko malongi?” Befu boso, tuntomba kubuela monisa mimbutu mi kiphevi ayi kubuela pisuka mu kisalu ki kusamuna.—Tanga Minkunga 141:5.

13. Buidi tufueti tadilanga malongi ba tuvananga?

¹³ Malongi madi mbonosono yi luzolo lu Yave. Yave wuntomba mamboti mitu. (Zinga. 4:20-22) Mu thangu ka tuvana malongi mu nzila Kibibila, bilongulu bitu bibongulu mu Kibibila voti mu nzila khomba wuyonzuka mu kiphevi, Yave widi mu kumonisa luzolo kadi mu befu. Dedi bummonisina Ebeleo 12:9, 10 ‘Nandi wumvangilanga mawu kibila wuntomba mamboti mitu.’

14. Mu mambu mbi tufueti tsikika mayindu bo ba tuvana malongi?

¹⁴ Tsikika mayindu mu malongi ba kuvana, bika mu mutu wu kuvana mawu. Khumbu zinkaka tulenda mona ti basa tuvanina ko malongi mu phila yimboti voti yifuana. Tuzebi ti mutu wumvana malongi kafueti vangila mawu mu phila yinkuiza sadisa wunkaka kusadila mawu. * (Ngala. 6:1) Boti befu bamvana  malongi, didi diambu dimboti kutsikika mayindu mu mambu ba tukamba kheti tuisinzolanga ko phila ba tuvanina mawu.—Tulenda kuyikuvusa: ‘Kheti minu yisa zola ko phila babe kuphanina malongi beni vayi bukiedika ti mawu masi ko nkinza? Yilenda tsikika mayindu mu malongi ba kumphana kubika kuandi mu phila ba kuphanina mawu?’ Yidi mbonosono yi nduenga kumona ziphila zi kubakila ndandu mu mosokua malongi ba tuvana.—Zinga. 15:31.

15. Kibila mbi tufueti dindilanga malongi?

¹⁵ Kibibila kitu kindisa kudindanga malongi. Mambu madi mu Zingana 13:10 madi makiedika: “Batu bantombanga malongi badi nduenga.” Bo bantuamanga ntuala muingi kudinda malongi, bawu banluta konzukanga mu kiphevi kena batu bakhambu tombanga malongi. Diawu tuama ntuala mu kudindanga malongi.

16. Mu mambu mbi tufueti dindilanga malongi?

¹⁶ Thangu mbi tufueti dindila malongi kuidi zikhomba? Tala mambu amama. (1) Khomba yinkieto wundinda khomba yinkaka yinkieto kanlandakana bo kantuadisa ndongukulu yi Kibibila. Kutsuka wundinda malongi muingi kazaba vama kafueti buela pisukila. (2) Khomba yi kikhupa wuntomba kusumba kalsa ayi wundinda malongi kuidi khomba yinkieto wuyonzuka mu kiphevi muingi kazaba mbi kafueti vanga. (3) Khomba wu dibakala wuntambula kiyeku ki kuvanga dilongi diandi ditheti di babaso. Nandi wundinda kuidi khomba wupisuka mu kuvanga malongi muingi kanyuwa mu khubumunu ayi kankamba vama kafueti ludika. Mvandi khomba wupisuka mu kuvanga malongi mu mimvu miwombo, kafueti dindanga malongi kuidi zikhomba zinkaka zipisuka ayi kusadila malongi beni.

17. Buidi tulenda bakila ndandu mu kukuwa malongi?

¹⁷ Mu zisabala voti zingonda zinkuiza, befu boso tunkuiza tambula malongi, kuba kuandi mu nzila Kibibila, bilongulu voti khomba wuyonzuka mu kiphevi. Mambu amomo ma kumonika, tebuka moyo mambu tuma tubila mu dilongi adidi. Tatamana kukikulula ayi tsikika mayindu mu malongi kubika kuandi mu phila ba kuvanina mawu. Ayi sadila malongi ba kuvana. Ni mutu mu befu wumbutukanga na luzabu. Vayi befu “kukuwanga malongi ayi kukikinina tsembolo,” “tunkuiza ba nduenga” dedi bo Diambu di Nzambi di tukanikisila.—Zinga. 19:20.