1-2. Dedi bummonisina Minkunga 34:8, buidi tulenda longukila matedi mamboti ma Yave?

YINDULABU ti bama kukabila bidia bimboti bio ngie ka wudidiabu ko. Ngie welenda tomba kuzaba ti biawu bimboti mu kutalanga to va mbata, mu kunukuna, voti mu kukuvula batu mu phila banlambilanga biawu. Vayi muingi ngie wuvisa buboti ti, biawu bidi bimboti voti ndamba ngie veka theti fueti tota biawu.

² Bo buawu mvandi befu tulenda longuka mambu mawombo mu matedi mamboti ma Yave bo tuntanga Kibibila, bilongulu bitu voti tunkuwa bisadi binkaka bi Yave kutubila mu phila Yave kaba sakumunina. Vayi muingi befu veka tuvisa ti Yave widi nkua mamboti, befu veka tufueti bimba ayi kumona ti Nandi widi khadulu ayoyo. (Tanga Minkunga 34:8.) Ayi tulenda fuanikisa mawu mu phila ayiyi. Yindulabu ti ngie wuntomba kukivana mu kusadila Yave thangu ka thangu, vayi muingi wununga kudukisa makani beni, ngie wuntomba kulengisa nzingulu’aku. Ḿba befu tuma tanganga khumbu ziwombo mambu Yesu ka kanikisa ti, befu kutula Kintinu ki Nzambi va theti mu luzingu luitu, Yave wala tudukisila biuma binkaka tuntomba. Vayi befu veka tumekiziabu ko mawu mu luzingu luitu, muingi kumona lutangu alolo kusalama. (Matai 6:33) Vayi kheti bobo, ngie mu kiminu wunlandakana dilongi di Yesu ayi mvandi wundekula bilokula bi kusadila muingi wuluta baka thangu yi kukivana mu kisalu ki kusamuna. Ngie kuvanga mawu, wala mona bivisa ti Yave bukiedika, widi mu kukieba zitsatu ziaku. Mawu mansundula “kubimba” muingi kumona ti Yave, widi nkua mamboti mu luzingu luitu veka.

3. Dedi bummonisina Minkunga 16:1, 2, banani bantambulanga mamboti ma Yave?

³ Yave widi “nkua mamboti kuidi batu boso,” kheti bo bakhambu kunsadilanga. (Minku. 145:9; Matai 5:45) Vayi bo banzolanga Yave ayi ba kunsadilanga mu muel’awu woso, bawu Nandi kanluta sakumunanga. (Tanga Minkunga 16:1, 2.) Tala mua ziphila  befu tumbakilanga ndandu mu mamboti ma Yave.

4. Buidi Yave kammonisinanga mamboti mandi kuidi baboso bamvanga mangolo muingi kumfikama?

⁴ Kadika thangu befu tunsadila mambu Yave katulonganga mu luzingu luitu, befu tummonanga mamboti mandi mu ndandu tumbakanga mu mambu beni. Mu thangu befu tutona kulonguka mu matedi Yave ayi tutona kunzola, Nandi wu tusadisa kununga bifu bimbi biba kutu tatulanga kuidi nandi. (Kolo. 1:21) Ayi mu thangu tukivana kuidi Yave ayi tubotama, befu tubue mona mamboti mankaka ma Yave, kibila mu thangu beni nandi wutuvana kilunzi kisama ayi luaku lu kuba nkundi’andi wufikama.—1 Pete. 3:21.

5. Mamboti mbi ma Yave ngie wumana bimba mu kisalu ki kusamuna?

⁵ Befu tuntatamananga kumona mamboti ma Yave bo tukivananga mu kisalu ki kusamuna. Ngie widi mutu wu zitsoni? Bawombo mu dikabu di Yave badi batu bammonanga zitsoni. Ḿba ava kuba Mbangi yi Yave, ngie wabasa yindulanga ko ti, wulenda nunga kukokuta muelu wu nzo muingi kuvana kimbangi kuidi mutu no ngie wukhambu zaba. Vayi bubu ngie wumana vanga mawu. Ayi bulutidi mu lusalusu lu Yave, ngie wumana kuangalala mu kuvanga kisalu ki kusamuna! Ḿba ngie mamonanga lusalusu lu Yave mu ziphila ziwombo. Ayi ḿba wuntebuka monyo phila kaku sadisila kuba wuvumbama mu thangu wudengana zithotolo. Nandi mvandi wu kusadisa kutebuka monyo lutangu lu Kibibila fueti tangila mutu beki nzo. Ayi wukuvana mangolo muingi wutatamana mu thangu batu va kizunga kiaku bakhambu vua nkinza mambu wu kubalonga.—Yele. 20:7-9.

6. Buidi phila Yave ka tukubikilanga yimmonisina kivisa ki mamboti mandi?

⁶ Yave mvandi wu tumonisinanga mamboti mu kutu kubika mu matedi kisalu ki kusamuna. (Yoa. 6:45) Mu zikhutukunu va khati sabala, befu tunlandakananga zimbonosono zikhambulu phasi, ayi ba tukindisanga muingi tusadila ziawu mu kisalu ki kusamuna. Va thonono, ḿba befu tulenda ba nkadu divuda mu matedi kusamunina mu phila ayoyi yimona. Vayi mu thangu tumvanga mawu befu tumbakulanga ti, phila yimona yi kusamunina yidi mu kunyikuna mintima mi batu badi va kizunga kitu. Mvandi ba tukindisanga mu zikhutukunu zi kimvuka ayi zi mavula, muingi tukivana mu ziphila zinkaka zi kusamunina zio ka tumekiziabu ko kumbusa. Bukiedika, kuvanga mawu malenda sundula kubika biuma binkaka kumbusa, bio tunzolanga. Vayi bo tumvanga mawu befu tuidi mu kuvana luaku muingi Yave katu sakumuna. Buabu tuentubila lusakumunu tulenda tambula mu kutomba ziphila zimona zi kukivanina mu kisalu ki Yave, boso kua bubela mambu tuidi mu kuviokila mu luzingu luitu. Bosi tuinkuiza mona ziphila tulenda buedila kifuza kitu mu kusamuna.

7. Lusakumunu mbi tuala tambula befu buela kukivana mu kisalu ki kusamuna?

⁷ Befu tunluta fikamanga kuidi Yave. Tala kifuani ki nkulutu wu kimvuka bantanguninanga Samuel. * Nandi ayi nkazi’andi badi mu kusadila Yave ku Colômbia. Bawu baba kuangalalanga beni mu kisalu ki ntuami ntuala mu kimvuka kiawu, vayi baba tomba kubuela kukivana mu kisalu ki kusamuna mu kusadisa kimvuka kiba beni tsatu. Muingi kudukisa makani amomo, bawu babika biuma biwombo kumbusa. Samuel wutuba: “Befu tusadila dilongi didi mu Matai 6:33 ayi tubika kue sumbanga biuma bikhambulu beni nkinza.” Samuel wubue tuba. “Vayi diambu diluta ba phasi kuvanga diba kubika nzo’itu, kibila yawu yitungulu muingi befu tuzingila, vayi tusa yibikila bobo.” Ku  kibuangu kimona bayenda kue sadila, bawu babasa tombanga ko zimbongo ziwombo muingi babaka bu kuzingila. Samuel wutuba: “Befu tumona buidi Yave kaba tutuadisilanga ayi kaba tambudilanga minsambu mitu.” Befu tumona ti “tuba lunungu va mesu mandi ayi tumona luzolo luandi mu phila yo tuabasa muenanga ko mu bilumbu bima vioka kumbusa.” Buabu ngie mvaku wulenda yindula ziphila zinkaka wulenda buedila kukivana mu kisalu ki kusamuna? Ngie kuvanga mawu, bukiedika ngie wala buela fikama Yave ayi nandi wala kieba zitsatu ziaku.—Minku. 18:25.

8. Mbi wulenda longuka mu mambu Ivan ayi Viktoria batuba?

⁸ Befu tubaka mayangi mu kisalu kitu. Tala mambu Ivan ayi Viktoria badi bakuela ayi bansala mu kisalu ki ntuami ntuala ku Quirguistão. Bawu balengisa nzingulu’awu ayi bakivana muingi kubuela mioko mu kioso kua kiyeku, kubunda mvandi kisalu ki kutunga. Ivan wutuba: “Befu tuba kukivananga beni mu kisalu ki kutunga. Kheti tuaba banga bavonga kutsuka kilumbu, vayi tuaba monanga ndembama ayi mayangi mu kuzaba ti, tube vana mangolo mitu mu kubuela mioko bisalu bi Kintinu. Mvandi befu tubaka mayangi mawombo mu bakundi bamboti tuvanga ayi mambu mamboti befu tuntebukilanga moyo.”—Malako 10:29, 30.

9. Kheti mu mambu maphasi khomba Mirreh kamviokila, buidi ka kivaninanga mu kisalu ki kusamuna ayi ndandu mbi kambakanga?

⁹ Befu tumbakanga mayangi mu kisalu ki Yave kheti bo tumviokila mu mambu maphasi. Tala kifuani ki Mirreh, khomba mueka wunkieto wunkulutu ayi wufuilu nnuni wunkalanga ku África. Bo bamvundisa mu kisalu kiandi ki mfelimi, nandi wutona kisalu ki ntuami ntuala. Mirreh mvandi widi kimbevu kingolo ki kumbikanga to muingi kusala kilokula kimueka mu kisalu ki kusamuna nzo ka nzo. Vayi Mirreh wunnunganga kuviokisa bilokula biwombo mu kuvana kimbangi ayi nandi widi minlonguki miwombo mi Kibibila ayi batu ba kuvutukila. Bawombu mu bawu, banlongukilanga yandi mu telefoni. Mbi bivanga Mirreh kununga kukivana mu phila ayoyo? Nandi wutuba: “Ntim’ami wuba wuwala luzolo mu Yave ayi Yesu Klisto. Minu khumbu ziwombo yaba sambilanga muingi Yave katsadisa kuvanga maluti mo yilenda nunga mu kisalu kiandi.”—Matai 22:36, 37.

10. Dedi bummonisina 1 Petelo 5:10, mbi baboso bamvanganga mangolo bantambulanga kuidi Yave?

¹⁰ Yave Nzambi wutu kubikanga. Kenny, ntuami ntuala wunsadilanga ku Ilhas Maurício, wumona bivisa mu mawu. Bo katona kulonguka kiedika, nandi wubika kikola kinangama, wubotama ayi wukota mu kisalu ki kusamuna ki thangu ka thangu. Nandi wutuba, “Minu yivanga mangolo muingi kuzingila mu mambu mbikudi Yesaya katuba: ‘Minu kawu, thuma!’” (Yesa. 6:8) Kenny wukivana mu bisalu biwombo bi kutunga ayi mvandi wusadisa kusekula bilongulu bi Kibibila mu mbembu’andi kabutukila. Nandi wubue tuba: “Minu yitambula khubumunu yikhubika kuvanga biyeku bioso yitambula.” Vayi bakana ko to mawu nandi kalonguka, nandi wubue tuba, “Minu yilonguka ti yilendi nunga ko kuvanga mambu moso ayi mvandi yikuna zikhadulu zitsadisa kusadila Yave mu phila yifuana.” (Tanga 1 Petelo 5:10.) Buabu kibila mbi ngie mvaku wukhambu fiongunina mambu ma luzingu luaku ayi boti kuba kukivana muingi kubuela tambula khubumunu mu biyeku binkaka mu kisalu ki Yave?

11. Mangolo mbi zikhomba zitatu zi bakieto ku Coréia do Sul bavengi muingi kubuela kikuvana mu kisalu ki kusamuna ayi ndandu mbi badi mu kubaka? (Tala foto va thonono levista.)

¹¹ Kheti Zimbangi zi Yave beka mimvu miwombo balenda baka ndandu mu khubumunu tuntambulanga muingi kubuela kukivana mu kisalu ki kusamuna. Bo COVID-19 yitona, bakuluta ba kimvuka kimueka ku Coréia do Sul basonika: “Zikhomba ziwombo zi bakulutu  baba yindulanga ti, balendi nunga ko kubue samuna mu kibila ki buvinya buawu. Buabu bawu badi mu kusamunina mu kusadila zitelefoni. Dedi zikhomba zitatu zi bakieto beka kuvioka 80 di mimvu, balongukizi kusadila zitelefoni muingi kusamunina ayi mawu badi mu kuvanga kadika kilumbu.” (Minku. 92:14, 15) Ngie mvaku tidi kubuela kukivana mu kisalu ki kusamuna ayi kubimba ti Yave widi nkua mamboti? Tala mua mambu wulenda vanga malenda kusadisa kudukisa makani beni.

12. Mbi Yave kankanikisa kuidi baboso ba kumfiatila?

¹² Longuka kufiatila mu Yave. Nandi wunkanikisa ti wala kudukudila lusakumunu ngie kufiatila mu nandi ayi kukivana mu kisalu kiandi. (Mal. 3:10) Khomba mueka yi nkieto wunkalanga ku Colômbia bantedilanga Fabiola wumona phila Yave kadukisila lukanu alolo kuidi nandi. Bo kamana kubotama nandi waba tomba kutona kisalu ki ntuami ntuala. Vayi nnuni’andi ayi bana bandi batatu, baba fiatilanga mu zimbongo kaba tambulanga mu kisalu. Vayi mu thangu kavitila mu mimvu muingi kuvunda mu kisalu, nandi wusambila beni kuidi Yave muingi kudinda lusalusu luandi. Fabiola wuntuba: “Khumbu ziwombo bo batu bandindanga muingi kuvunda mu kisalu, vamviokanga zingonda ziwombo muingi baba vana mvutu. Vayi kuidi minu ngonda yimueka toka yivioka biza phana mvutu. Maba mambu ma kukuitukila!” Bo vavioka to zingonda wadi nandi wutona kisalu ki ntuami ntuala. Mu thangu ayiyi nandi weka 70 di mimvu ayi madukisa 20 di mimvu mu kisalu ki ntuami ntuala. Ayi manunga kusadisa nana di batu kukivana kuidi Yave ayi  kubotama. Fabiola wuntuba: “Kheti khumbu ziwombo yimmonanga nyitu kulebakana, vayi Yave wu kutsadisanga kadika kilumbu muingi yitatamana mu kiyeku kiama.”

13-14. Bifuani mbi bilenda kutusadisa kufiatila mu Yave ayi kubuela kukivana mu kisalu kiandi?

¹³ Baka ndandu mu bifuani bi batu bafiatila mu Yave. Mu Kibibila muidi bifuani biwombo bi batu bakivana muingi kusadila Yave. Vayi bawombu mu bawu, ava batambula lusakumunu lu Yave, bawu bakivana theti mu ntim’awu woso kuidi Yave. Dedi bo Abalami kabika divula dimboti baba kalanga—“kheti mu kukhambu zaba khonzo kakue zingila”—buawu Yave kansakumunina. (Ebe. 11:8) Mvandi mu matedi Yakobi, bo kanuana ayi mbasi buawu katambudila lusakumunu lunkiza. (Ngene. 32:24-30) Yindula mvandi mu dikabu di Isaeli, ava bawu bakota ku ntoto wumona, theti vaba tombulu zinganga Nzambi kukusula bitambi biawu mu muila Yolidani muingi dikabu dioso babaka bu kutabila ku khonzu yinkaka yi muila.—Yosua 3:14-16.

¹⁴ Ngie mvaku wulenda baka ndandu mu bifuani bi Zikhomba mu thangu’itu bafiatila mu Yave ayi bakivana mu kisalu kiandi. Dedi khomb’itu bantanguninanga Payton ayi nkazi’andi Diana, bankuangalalanga beni kutanganga binongu bi zikhomba zi babakala ayi zi bakieto baviokisila luzingu luawu loso mu kisalu ki Yave. Malongi amomo, madi mu kikhuku “Eles se Ofereceram.” * Payton wuntuba: “Mu thangu tuntanganga binongu abiobi, tumbanga buka ti befu tuidi mu kutala mutu wumona lueki lu bidia bimboti kadi mu kudia. Ayi kadika thangu tuntanga malongi beni, befu tunluta banga phuila muingi ‘kubimba mamboti ma Yave.’” Diawu, Payton ayi Diana babaka makani muingi kue sadila kuidi tsatu yiwombo. Ngie wumana tanga malongi amomo? Mvandi wulenda baka ndandu mu kulandakana zi video Bawu Bakivana Muingi Kuesadila Kuidi Tsatu—Austrália ayi mvandi Bawu Bakivana Muingi Kuesadila Kuidi Tsatu—Irelanda zi video aziozio zidi mu khond’itu mayo jw.org. Ziawu zilenda kusadisa kumona ziphila wulenda buedila kukivana mu kisalu ki Yave.

15. Buidi bakundi bamboti balenda kutu sadisila?

¹⁵ Sola bakundi bamboti. Befu tunzolanga beni kubimba bidia bio batu bankangalanga yitu banzolanga kudia. Bo buawu mvandi bo tumviokisa beni thangu na batu bakivananga muingi kusadila Yave, befu tuala luta tomba ziphila muingi befu mvitu kubuela kukivana mu kisalu ki Nzambi. Khomb’itu Kent ayi Veronica bamona kivisa mu mawu. Bawu batuba: “Bakundi bitu ayi basi dikanda, ba tukindisa muingi kutomba phila zimona zi kubuela kukivanina mu kisalu ki kusamuna.” Kent wubue tuba. “Mu kuba kikundi na batu bantomba kutula Kintinu ki Nzambi va theti mu luzingu luawu, befu tubuela lufiatu mu kumeka kusamunina mu ziphila zinkaka zimona.” Kent ayi Veronica badi mi ntuami ntuala mifilu ku Sérvia.

16. Dedi bummonisina kinongu Yesu kata mu Luka 12:16-21, kibila mbi tufueti bela bakubama muingi kubuela kukivana mu kisalu ki Yave?

¹⁶ Wukivana mu kibila ki Yave. Befu tuisintomba ko kutuba ti, tufueti bika luzingu luitu loso lumboti kumbusa muingi kukuangidika Yave. (Mpovi 5:19, 20) Vayi boti befu tulenda buela kukivana mu kisalu ki Nzambi vayi vadi biuma bi tutula nkaku, befu tulenda bua mu ntambu wu dibakala Yesu katubila mu kifuani kata wumanga kuba nlandikini’andi mu kibila ki busina kaba. (Tanga Luka 12:16-21.) Khomba mueka bantedilanga Christian wukalanga ku França wutuba: “Minu yabasa vanganga ko mangolo muingi kuvanga malutidi mu kisalu ki Yave ayi mvandi kuidi dikanda diama.” Nandi ayi nkazi’andi babaka makani ma kuba mintuami ntuala.  Vayi vaba tombulu theti kubika bisalu biawu baba bakilanga zimbongo ziwombo. Ayi muingi babaka bu kuzingila, bawu batona kuvanga kisalu ki kudiodisanga zinzo, ayi baba kuangalala mu luzingu lumona lukhambulu kikhafi baba nata. Bukiedika ti babaka ndandu mu mawu? Ngete kibila Christian wutuba: “Befu tunluta kuangalalanga bubu mu kisalu ki kusamuna ayi tuidi beni mayangi kumona minlonguki mi Kibibila ayi batu tumvutukilanga kukonzuka mu kiphevi ayi kulonguka mu matedi Yave.”

17. Kibila mbi tufueti mekina ziphila zimona zi kusamunina?

¹⁷ Ba wukubama muingi kutomba ziphila zimona zi kukivanina mu kisalu ki Yave. (Mava. 17:16, 17; 20:20, 21, 17; 20:20, 21) Shirley ntuami ntuala wunkalanga ku Estados Unidos, wubalula phil’andi yi kusamunina bo kimbevu ki COVID-19 kitona. Va thonono wuba divuda mu matedi kuvana kimbangi mu telefoni vayi bo baba mu sabala yi kinzenza, nkengididi wuba kubika. Tona mu thangu beni, nandi wumvananga kimbangi kadika kilumbu. Shirley wuntuba: “Va thonono yiba beni boma, vayi kuvanina kimbangi mu telefoni kunluta tuadisa ndandu kena mu thangu tuaba samunanga nzo ka nzo!”

18. Mbi bilenda kutusadisa kununga bikaku tundenanga ayi kubuela kukivana mu kisalu ki kusamuna?

¹⁸ Baka makani ayi sadila mawu. Bo tundengana bikaku, befu tunsambilanga muingi tununga kudukisa makani tube baka. (Zinga. 3:21) Sonia widi ntuami ntuala ayi wumbuelanga mioko dingumba dimueka didi mu mbembu Roménia ku Europa, wuntuba: “Minu yintianga kusonika makani mami mu nkanda ayi yintulanga mawu vama yilenda fika mamuena kadika thangu. Mvandi yidi quadro yintulanga zi nzila zinsudikisa, buidi kadika makani yinkuiza baka mankuiza sukila. Bo yintomba kubaka moso kua makani, yimfionguninanga theti quadro beni muingi kumona nzila mbi yiluti yo yifueti landakana.” Sonia wumvanganga mangolo muingi kutatamana kuba mayangi kheti mu thangu kandengana bikaku. Nandi wubue tuba: “Bikaku bioso yindengananga bilenda ba buka kibaka kinneni ki kuthula nkaku,” voti bidi mvandi buka, “kikada ki kutsadisa kununga makani yibe baka. Vayi vantombuluanga minu kutadila mambu beni mu phila yifuana.”

19. Mbi tufueti ba bakubama muingi kuvanga?

¹⁹ Yave wutu sakumunanga mu ziphila ziwombo. Befu tulenda monisa ti tumvananga luvalu phila katu sakumuninanga mu kuvanga mamoso tunnunga muingi kukembisa Yave. (Ebe. 13:15) Mawu mansundula kutomba ziphila zimona zi kukivanina mu kisalu ki kusamuna ayi kubaka lusakumunu mu kiawu. Diawu bika kadika kilumbu tutomba ziphila zimona zi kumeka ayi kumona ti Yave “widi nkua mamboti.” Befu kuvanga mawu, tuala ba buka Yesu wutuba: “Bidia biama bidi kuvanga luzolo lu mutu wuthuma ayi kumanisa kisalu kiandi.”—Yoa. 4:34.