DILONGI 36
Dikabu di Yave Dinzolanga Mambu Masonga
“Mayangi kuidi bo badi nzala ayi phuila yi mambu masonga.” —MATAI 5:6.
NKUNGA 9 Yave Nandi Ntinu’itu
MAMBU TUANLONGUKA *
1. Thotolo mbi Yozefi kaviokila ayi mbi binsadisa kukindama?
YOZEFI muana wu Yakobi wuviokila mu thotolo yiphasi. Nkazi wu mfumu’andi Potifali wuba kunkambanga kadika kilumbu “yiza wubundana yami nhitu.” Vayi Yozefi waba manganga. Bawombo bubu ba yikuvusanga, ‘mbi bisadisa Yozefi kukindama mu thotolo ayoyo?’ Potifali kasa ba ko va nzo ayi Yozefi mu kuba mvika, ḿba wuyindula ti na kumanga, nkazi wu mfumu’andi kalenda kumvangila mambu mambi. Vayi kheti bobo, nandi wumanga kuvanga mambu beni. Kibila mbi? Yozefi wutuba: “Buidi yilenda vangila diambu dimbi di phila ayoyi ayi kusumuka va meso ma Nzambi?”—Ngene. 39:7-12.
2. Buidi Yozefi kazabila ti kuvanga kitsuza diba disumu dingolo?
2 Boti nsiku wu Mose wutedi kubika vanga kitsuza wuyiza sonama to khama wadi di mimvu kuntuala, buidi Yozefi kazabila ti kuvanga kitsuza diba diambu dimbi va meso ma Nzambi? (Esodu 20:14) Yozefi mu kuzaba buboti Yave, nandi wuzaba mayindu mandi mu matedi mambu amomo ma butsuza. Dedi Yozefi wuzaba buidi Yave kakiebila mu khumbu wadi Sala, wumueka mu zikhaya ziandi bo babina kunkuika kubundana nhitu kuidi babakala bankaka. Mvandi wuyuwa buidi Yave kakiebila khayandi Lebeka nkazi wu Isaki, bo babina kunkuika kuidi dibakala dinkaka kubundana yandi nhitu. (Ngene. 2:24; 12:14-20; 20:2-7; 26:6-11) Mu kuyindula mambu amomo, Yozefi wuvisa mambu maba mamboti ayi mambi va meso ma Nzambi. Ayi mu kibila ki luzolo kaba mu Nzambi, nandi wukuna luzolo mu zithumu zisonga zi Yave ayi wuba wukubama muingi kulandakana ziawu mu luzingu luandi.
3. Mbi tuenlonguka mu dilongi adidi?
3 Tuisi ko divuda ti ngie wunzolanga mambu masonga. Vayi mu kuba batu ba masumu tufueti ba keba keba, muingi nza ayiyi yiwedi batu bakhambu zolanga mambu masonga yibika ku tuvukumuna. (Yesa. 5:20; Loma 12:2) Diawu mu dilongi adidi, tuemmona mbi binsundula busonga ayi ndandu mbi tulenda baka mu kuzola yawu. Bosi tuemmona mambu matatu tulenda vanga mankuiza tusadisa kukindisa luzolo luitu mu zithumu zisonga zi Yave.
MBI BINSUNDULA BUSONGA?
4. Buidi batu bawombo banyidudilanga mutu wusonga?
4 Batu bawombo bo bankuwanga kikuma mutu wusonga, bawu banyindulanga ti widi mutu wu lungundayi, wumfika fundisanga bankaka voti wunyidulanga ti nandi lutidi kena bankaka. Bukiedika Nzambi kazolanga ko batu badi zikhadulu aziozio. Bo Yesu kaba va ntoto, nandi kabasa kikininanga ko zimfumu zi binganga baba sikikanga zithumu ziawu veka mu mambu masonga. (Mpovi 7:16; Luka 16:15) Mutu wusonga widi mutu wumvanganga mo Yave kantuba ti madi masulama ayi wukhambu yindulanga ti nandi lutidi kena bankaka.
5. Mu Kibibila mbi kikuma busonga kinsundula? Vana kifuani.
5 Busonga yidi khadulu yimboti beni. Yawu yinsundula kuvanga mambu masulama va meso ma Yave Nzambi. Mu Kibibila kikuma ‘busonga,’ kinsundula mvandi kuzingila mu zithumu zisonga zi Yave. Dedi, Yave wutuba ti bankua lungosu bafueti sadila balança voti “bizongulu bikiedika.” (Deute. 25:15) Kikuma ki Ebeleo basekudila “balança yikiedika” mvandi balenda sekudila kiawu “balança yisonga.” Diawu nlandikini wu Klisto tidi kuba wusonga va meso ma Nzambi, kafueti tubanga kiedika bo kamvanga lungosu. Mutu wusonga wunzolanga kuvanga mambu masonga—ayi katianga ko kumona bo bamvangila mutu wunkaka mambi. Mvandi wumfionguninanga buboti makani mandi muingi kayangidika ntima wu Yave.—Kolo. 1:10.
6. Kibila mbi Yave kadidi wufuana muingi kutsikika zithumu mu matedi mamboti ayi mambi? (Yesaya 55:8, 9)
6 Kibibila kintuba ti Yave, nandi tho yi busonga. Mu kibila akiokio diawu ba kuntedila “nzo yi busonga.” (Yele. 50:7) Mu kuba Mvangi, Yave nandi to widi nsua wu kutsikika zithumu mu matedi mamboti ayi mambi. Nandi widi wuvedila ayi mayindu mandi mu matedi mamboti ayi mambi madi mavedila. Masi ko buka mayindu mitu mantuadusuanga mu zinzimbala zitu ayi mu masumu. (Zinga. 14:12; Tanga Yesaya 55:8, 9.) Vayi bo tuvangulu mu kifuani ki Nzambi, tulenda zingila mu zithumu ziandi zisonga. (Ngene. 1:27) Befu tunzolanga beni kuzingila mu zithumu ziandi. Ayi luzolo tuidi mu Tat’itu, lu tunatanga kuvanga mamoso tunnunga muingi kulandakana kifuani kiandi.—Efe. 5:1.
7. Kibila mbi tufueti landikininanga zithuadusulu zi Yave? Vana kifuani.
7 Tumbakanga ndandu mu kulandakana zithuadusulu zi Yave mu matedi mamboti ayi mambi. Kibila mbi tuntubila mawu? Dedi, yindulabu boti zidotoli ayi mimfelimi basinlandakana ko zithuadusulu bavana mu phila bafueti bukila zimbevu. Bukiedika khanu mawu mantuadisanga lufua lu batu bawombo. Vayi bo banlandakanga ziawu, buawu tulenda tubila ti ziawu zinkiebanga ayi zimvukisanga luzingu lu batu. Bobuawu mvandi zithumu zi Yave mu matedi mamboti ayi mambi zinkiebanga luzingu luitu.
8. Lusakumunu mbi basonga bala tambula?
8 Yave wunsakumunanga baboso banlandakananga zithumu ziandi zisonga. Nandi wukanikisa: “Basonga bela tambula ntoto banga kiuka, ayi bela zingila muawu mvu ka mvu.” (Minku. 37:29) Ngie wulenda yindula buidi nza yala bela kithuadi, ndembama ayi mayangi bo kadika mutu kala landakana zithumu zi Yave? Yave wuntomba ngie wubaka luzingu lu mayangi. Bukiedika, kadika mutu mu befu widi bibila muingi kuzola khadulu yi busonga! Vayi buidi tulenda kindisila luzolo tuidi mu khadulu ayoyo? Ndoko tumona mambu matatu malenda ku tusadisa.
KINDISA LUZOLO LUAKU MU ZITHUMU ZISONGA ZI YAVE
9. Mbi biala tusadisa kuzola mambu masonga?
9 Diambu 1: Zola mutu wutsikika zithumu beni. Muingi tuzola mambu masonga, tufueti buela luzolo luitu mu Mutu wutsikika zithumu mu matedi mamboti ayi mambi. Bo luzolo luitu mu Yave lumbuelama, befu tuala luta tomba kuzingila mu zithumu ziandi zisonga. Tulenda fuanikisa mawu mu mambu Adami ayi Eva bamonikina. Boti bawu baba luzolo mu Yave, khanu basa mona ko phasi kutumukina nsiku’andi.—Ngene. 3:1-6, 16-19.
10. Mbi Abalahami kavanga muingi kuzaba buboti Yave?
10 Bukiedika, befu tuisintomba ko kuvanga nzimbala Adami ayi Eva bavanga. Diawu muingi tubika bua mu nzimbala beni, tufueti tatamana kulonguka matedi Yave, kuzaba zikhadulu ziandi ayi kuvisa phil’andi yi kuyindudila. Befu kuvanga mawu, luzolo luitu mu Yave luala buelama. Dedi, tala kifuani ki Abalahami. Kheti va thonono nandi kasa visa ko buboti makani ma Yave, vayi nandi wuntumukina. Nandi wuba luzolo luwombo mu Yave, diawu kavangila mangolo muingi kunzaba buboti. Dedi, bo kazaba makani ma Yave ma kubunga divula di Sodoma ayi Ngomola, Abalahami va thonono wumona boma ti “Mfundisi wu ntoto woso”, kalenda bunga batu basonga va kimueka na bankua mambi. Mbi Abalahami kavanga? Mu kukikulula wuvana biuvu biwombo kuidi Yave muingi kanzaba buboti ayi Yave mu mvibudulu wumvana mimvutu. Kutsuka, Abalahami wuyiza visa ti Yave wumfionguninanga ntima wu kadika mutu ayi kalendi bunga ko mutu wusonga va kimueka na bankua mambi.—Ngene. 18:20-32.
11. Buidi Abalahami kamonisina luzolo ayi lufiatu kaba mu Yave?
11 Abalahami wuyangalala beni mu disolo kaba na Yave matedi divula di Sodoma ayi Ngomola. Ayi mawu mavanga luzolo ayi lukinzu luandi mu Yave luluta buelama. Bo vavioka mimvu, Yave wuthota lufiatu lu Abalahami. Buidi? Yave wundinda muingi kavonda muan’andi ayi kamvana banga nkhailu. Vayi mu kuzaba buboti Nzambi, Abalahami kasa bue vana ko Yave biuvu dedi bo kavangila mu khumbu yitheti. Nandi wuvanga mambu moso kandinda. Bukiedika, adiodio disa ba ko diambu diluelu kuidi Abalahami! Vayi mbi binsadisa? Abalahami wuyindula beni mu mambu kalonguka matedi Yave ayi wuzaba ti Nzambi kalendi vanga ko ni diambu dikhambulu disonga. Dedi butubila mvuala Polo, Abalahami wuzaba ti Yave kalenda vulubusa muan’andi Isaki. (Ebe. 11:17-19) Mvandi, Yave wukanikisa ti mu nzila Isaki muala kuizila makanda mawombo, vayi mu thangu beni Isaki kasa ba ko ni muana. Vayi mu luzolo Abalahami kaba mu Yave, nandi wufiatila ti Tat’andi kasinkuiza vanga ko mambu makhambulu masonga. Diawu kheti diba diambu diphasi kuvanga mawu, mu kiminu nandi wutumukina Yave.—Ngene. 22:1-12.
12. Buidi tulenda landikinina kifuani ki Abalahami? (Minku. 73:28)
12 Buidi tulenda landikinina kifuani ki Abalahami? Mu kutatamana kulonguka matedi Yave. Ndandu mbi tulenda baka mu mawu? Bo tunlonguka matedi Yave, tuala luta kumfikama ayi luzolo luitu mu nandi luala buelama. (Tanga Minkunga 73:28.) Mvandi kilunzi kitu kiala ba kikubama muingi kuyindula mu phila Yave kanyindudilanga. (Ebe. 5:14) Ayi tuala lenda kuvanga dioso kua diambu dimbi dilenda nhongisa ntima wu Yave ayi kuvava kikundi kitu ayi nandi. Phila mbi yinkaka tulenda monisina ti tunzolanga mambu masonga?
13. Buidi bamfuanikisila kutomba busonga? (Zingana 15:9)
13 Diambu 2: Vanga mangolo muingi wuzola mambu masonga kadika kilumbu. Boti tuntomba nhitu’itu yiba mangolo, befu tumvanganga bisavu binkindisa binama bi nhitu kadika kilumbu. Bobuawu mvandi vantombuluanga mangolo kadika kilumbu muingi kuzola mambu Yave kantuba ti madi masulama. Vayi bukiedika ti tulenda nunga? Ngete. Kibila Yave kalendi tundinda ko kuvanga mambu kazebi ti tulendi nunga ko. (Minku. 103:14) Diawu nandi katukambila ti “wunzolanga mutu wumvanganga mangolo muingi kutomba busonga.” (Tanga Zingana 15:9.) Dedi bo tumvangilanga mangolo muingi kudukisa makani tumbaka mu kisalu ki Yave, mvandi tufueti vanga mangolo muingi kutomba busonga. Ayi mu mvibudulu, Yave wala tusadisa kudukisa makani amomo.—Minku. 84:5, 7.
14. Mbi binsundula kikhutu ki kisengu ki busonga ayi nkinza mbi kidi?
14 Mu luzolo, Yave wu tutebula moyo ti zithumu ziandi zisonga zisi ko kizitu. (1 Yoa. 5:3) Vayi ka tuvanina ziawu muingi ku tukieba. Ayi tuntombanga lukiebu beni kadika kilumbu. Mawu ma tutebula moyo binuanunu bi kiphevi mvuala Polo katubila. (Efe. 6:14-18) Mu binuanunu beni kinuanunu mbi kiaba kiebanga ntima wu disodi? Kiba “kikhutu ki kisengu ki busonga,” kiawu kinsundula zithumu zisonga zi Yave. Dedi bo kikhutu beni kiaba kiebilanga ntima wu disodi, zithumu zisonga zi Yave zinkiebanga mvandi ntim’itu voti kimutu kitu ki khati. Diawu nkinza beni befu kuvuatanga binuanunu bioso kubunda mvandi kikhutu ki busonga!—Zinga. 4:23.
15. Buidi tulenda vuatila kikhutu ki busonga?
15 Buidi tulenda vuatila kikhutu ki busonga? Tulenda vangila mawu mu kubika zithumu zisonga zi Nzambi zi tutuadisa mu mambu tunsola ayi mu makani tumbaka kadika kilumbu. Dedi bo tumbaka makani matedi minkunga tunkuwa, mambu tuntala voti zibuku tuntanga, buboti beni ku yikuvusanga: ‘Buidi mambu amomo mankuiza nyikunina ntim’ami? Mawu mankuiza tsadisa kuba lunungu va meso ma Yave? Voti mawu mankuiza kuphanga kukuna zikhadulu Yave kanlendanga dedi kitsuza, buphunha, phuila yi kubaka beni biuma, ayi buimi?’ (Fili. 4:8) Bo tumbaka makani madi nguizani na luzolo lu Yave, buawu tuidi mu kubikila zithumu zisonga zi Yave zikieba ntim’itu.
Busonga buaku buala ba “banga mayo ma ḿbu”(Tala matangu 16-17)
16-17. Buidi Yesaya 48:18 yi tuvanina lufiatu ti tulenda zingila mu zithumu zisonga zi Yave?
16 Ngie wumana ba boma mu kuyindula boti wala nunga kutatamana kudiatila mu zithumu zisonga zi Yave? Boti ngete, buna yindula kifuani Yave kasadila kidi mu Yesaya 48:18. (Tanga.) Mu kifuani beni Yave wukanikisa ti ndembam’aku yala ba banga “mayo ma ḿbu.” Yindulabu ti ngie bekala mu ndeku ḿbu ayi wummona mayo ma ḿbu mankuiza mu khambu suka. Mvandi ngie zebi ti bivevi na bivevi di mimvu mima vioka ḿbu wuntatamananga kutula mayo. Bukiedika ti wunkuiza ba dibamu mu kuyindula ti ḿbu kasinkuiza bue tulanga ko mayo? Ndamba!
17 Bobuawu mvandi, busonga buaku buala ba banga mayo ma ḿbu! Buidi? Mu thangu wumbaka makani, theti buboti kuyindulanga mbi Yave kantomba ngie wuvanga ayi vanga mawu. Bosokua bubela makani maphasi wufueti baka, Tat’aku yi luzolo wala tatamana kuba va khonzo’aku muingi ku kuvana mangolo ayi lusadusu wuntomba muigi wunungu kuzingila kadika kilumbu mu zithumu ziandi zisonga.—Yesa. 40:29-31.
18. Kibila mbi tufueti bika kufundisa bankaka?
18 Diambu 3: Bika Yave kafundisa. Bo tumvanga mangolo muingi kuzingila mu zithumu zisonga zi Yave, tulendi kuyidedikisa ko na bankaka ayi kuyindula ti befu tulutidi. Kibila befu tuisi ko nsua wu kufundisa boti bankaka basimvanga ko mambu Yave kantomba. Tufueti tebukanga moyo ti Yave “nandi Mfundusi wu nza yimvimba.” (Ngene. 18:25) Ayi Yave kasa tuvana ko kiyeku akiokio ki kufundisa. Diawu Yesu katubila: “Lubika fundisa bankaka muingi babika ku lufundisa.”—Matai 7:1. *
19. Buidi Yozefi kamonisina ti wufiatila mu lufundusu lu Yave?
19 Tubue yindula mu kifuani ki Yozefi. Nandi wumanga kufundisa bankaka kheti bo bamvangila mambu mambi. Dedi zikhomba ziandi bambalukila ayi bansumbisa banga mvika. Bosi bavuna tat’awu ti Yozefi babe mvonda. Bo vavioka mimvu, Yozefi wubue dengana na zikhomba ziandi. Mu thangu beni nandi wuba mfumu yinneni ku Ngipiti. Nandi wuba luaku muingi kufundisa zikhomba ziandi ayi kuba vutudila mambi bamvangila. Ayi ḿba zikhomba ziandi bamona boma mu kuyindula ti nandi wunkuiza bavutudila mambi kheti bawu banhongina mambu bavanga. Vayi mbi Yozefi kavanga? Nandi wutuba: “Bikanu kumona boma. Minu yilendi ko kukitula va kibuangu ki Nzambi.” (Ngene. 37:18-20, 27, 28, 31-35; 50:15-21) Bukiedika, Yozefi wu kikulula ayi wubika muingi Yave kafundisa mambu beni.
20-21. Mu ziphila mbi tulenda fundisila bankaka mu phil’itu?
20 Dedi Yozefi, buboti beni kubika lufundusu mu mioko mi Yave. Dedi, busa fuana ko kufika fundisanga zikhomba mu kuyindula ti tuzebi kibila babe vangila diambu. Befu tununganga ko kutanga mintima mi batu, vayi “Yave wumfionguninanga kibila mutu kabe vangila diambu.” (Zinga. 16:2) Nandi wunzolanga batu boso, bosokua bubela tsi, mvila voti kikhulu kiandi. Ayi Yave wutukindisa muingi befu mvitu “tunzibudila mintima mitu.” (2 Koli. 6:13) Diawu buboti beni kuzolanga zikhomba zitu zioso ayi kubika kuba fundisa.
21 Mawu mansudula mvandi ti tulendi fundisa ko batu bakhambu zaba kiedika. (1 Timo. 2:3, 4) Ngie wumana fundisa muisi dikanda wukhambu sadilanga Yave mu kutuba ti: “Awowo ni kilumbu kala kikinina kiedika”? Kuyindudila mu phila ayoyo, mansundula ti befu tuidi mu kumfundisila mu phil’itu. Vayi tuzebi ti Yave khidi vana batu badi mu bibuangu bioso luaku lu kubalula mavanga mawu. (Mava. 17:30) Diawu buboti kutebuka moyo ti bo tumfundisa batu mu phil’itu, tuidi mu ku bavangila mambu makhambulu masonga.
22. Kibila mbi tufueti tatiminina kulandakana zithumu zisonga zi Yave?
22 Befu kuzola zithumu zisonga zi Yave, mawu mala tuvana mayangi, mvandi mala tusadisa kuba ntungulu wumboti kuidi bankaka. Mu kibila akiokio, bawu bala tuzola ayi bala luta zola Nzambi. Diawu tutatamananu kuba “nzala ayi phuila yi mambu masonga.” (Matai 5:6) Tuba lufiatu ti Yave wummonanga mangolo moso tumvanga ayi wunkuangalalanga mu mawu. Kheti batu bamvanga mambu makhambulu masonga badi mu kubuelama, vayi ngie kindama! Tebukanga moyo ti “Yave, wunzolanga batu basonga.”—Minku. 146:8.
NKUNGA 139 Wu Kiyindula mu Nza Yimona
^ Bubu mu nza, dimana ba diambu diphasi kumona batu bamvanga mambu masonga. Vayi kheti bobo, vadi mafunda na mafunda ma batu banlandakananga nzingulu yi busonga ayi tuisi ko divuda ti ngie widi wumueka mu bawu. Ngie wumvangilanga mawu kibila wunzolanga Yave ayi nandi wunzolanga busonga. Buidi tulenda buedila luzolo luitu mu khadulu ayoyi yimboti? Mu dilongi adidi tuemmona mbi binsundula busonga ayi ndandu mbi tulenda baka mu kuzola khadulu beni. Mvandi tuentubila mambu matatu tulenda vanga muingi kukindisa luzolo luitu mu khadulu beni.
^ Bakulutu ba kimvuka khumbu zinkaka bamfundisanga khomba bevola disumu dingolo. (1 Koli. 5:11; 6:5; Yako. 5:14, 15) Vayi kheti bobo, mu kukikulula bamvisanga ti balendi zaba ko mambu madi mu ntima wu mutu ayi bamfundisilanga va mvingi Yave. (Dedikisa na 2 Lusa 19:6.) Diawu bambelanga keba keba muingi kubaka makani mafuana, madi nguizani na kiadi ayi busonga bu Nzambi.
